೩. ಸದ್ದೋ ವಿಪಾಕೋತಿಕಥಾವಣ್ಣನಾ

೬೩೬-೬೩೭. ಇದಾನಿ ಸದ್ದೋ ವಿಪಾಕೋತಿಕಥಾ ನಾಮ ಹೋತಿ. ತತ್ಥ ‘‘ಸೋ ತಸ್ಸ ಕಮ್ಮಸ್ಸ ಕತತ್ತಾ ಉಪಚಿತತ್ತಾ ಉಸ್ಸನ್ನತ್ತಾ ವಿಪುಲತ್ತಾ ಬ್ರಹ್ಮಸ್ಸರೋ ಹೋತೀ’’ತಿಆದೀನಿ (ದೀ. ನಿ. ೩.೨೩೬) ಅಯೋನಿಸೋ ಗಹೇತ್ವಾ ‘‘ಸದ್ದೋ ವಿಪಾಕೋ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಮಹಾಸಂಘಿಕಾನಂ; ತೇಸಂ ‘‘ಕಮ್ಮಸಮುಟ್ಠಾನಾ ಅರೂಪಧಮ್ಮಾವ ವಿಪಾಕಾತಿ ನಾಮಂ ಲಭನ್ತಿ. ರೂಪಧಮ್ಮೇಸು ಪನಾಯಂ ವೋಹಾರೋ ನತ್ಥೀ’’ತಿ ದಸ್ಸೇತುಂ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಸುಖವೇದನೀಯೋತಿಆದಿ ‘‘ವಿಪಾಕೋ ನಾಮ ಏವರೂಪೋ ಹೋತೀ’’ತಿ ದಸ್ಸನತ್ಥಂ ವುತ್ತಂ. ‘‘ಸೋ ತಸ್ಸ ಕಮ್ಮಸ್ಸಾ’’ತಿ ಸುತ್ತಂ ಲಕ್ಖಣಪಟಿಲಾಭದಸ್ಸನತ್ಥಂ ವುತ್ತಂ. ಮಹಾಪುರಿಸೋ ಹಿ ಕಮ್ಮಸ್ಸ ಕತತ್ತಾ ಸುಚಿಪರಿವಾರೋಪಿ ಹೋತಿ, ನ ಚ ಪರಿವಾರೋ ವಿಪಾಕೋ, ತಸ್ಮಾ ಅಸಾಧಕಮೇತನ್ತಿ.

ಸದ್ದೋ ವಿಪಾಕೋತಿಕಥಾವಣ್ಣನಾ.