೨. ರೂಪಂಮಗ್ಗೋತಿಕಥಾವಣ್ಣನಾ

೫೭೩-೫೭೫. ಇದಾನಿ ರೂಪಂ ಮಗ್ಗೋತಿಕಥಾ ನಾಮ ಹೋತಿ. ತತ್ಥ ಯೇಸಂ ‘‘ಸಮ್ಮಾವಾಚಾಕಮ್ಮನ್ತಾಜೀವಾ ರೂಪ’’ನ್ತಿ ಲದ್ಧಿ, ಸೇಯ್ಯಥಾಪಿ ಮಹಿಸಾಸಕಸಮ್ಮಿತಿಯಮಹಾಸಂಘಿಕಾನಂ; ತೇ ಸನ್ಧಾಯ ಮಗ್ಗಸಮಙ್ಗಿಸ್ಸಾತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ತೇ ಸಮ್ಮಾವಾಚಾದಯೋ ರೂಪಂ, ನ ವಿರತಿಯೋ, ಯಥಾ ಸಮ್ಮಾದಿಟ್ಠಾದಿಮಗ್ಗೋ ಸಾರಮ್ಮಣಾದಿಸಭಾವೋ, ಏವಂ ತಮ್ಪಿ ರೂಪಂ ಸಿಯಾ’’ತಿ ಚೋದೇತುಂ ಸಾರಮ್ಮಣೋತಿಆದಿಮಾಹ. ತತ್ಥ ಪಟಿಕ್ಖೇಪೋ ಚ ಪಟಿಞ್ಞಾ ಚ ಪರವಾದಿನೋ ಲದ್ಧಿಅನುರೂಪೇನ ವೇದಿತಬ್ಬಾ. ಸೇಸಮೇತ್ಥ ಉತ್ತಾನತ್ಥಮೇವಾತಿ.

ರೂಪಂ ಮಗ್ಗೋತಿಕಥಾವಣ್ಣನಾ.