೧೦. ವಿಞ್ಞತ್ತಿ ಸೀಲನ್ತಿಕಥಾವಣ್ಣನಾ

೬೦೧-೬೦೨. ಇದಾನಿ ವಿಞ್ಞತ್ತಿ ಸೀಲನ್ತಿಕಥಾ ನಾಮ ಹೋತಿ. ತತ್ಥ ಕಾಯವಿಞ್ಞತ್ತಿ ಕಾಯಕಮ್ಮಂ, ವಚೀವಿಞ್ಞತ್ತಿ ವಚೀಕಮ್ಮನ್ತಿ ಗಹಿತತ್ತಾ ‘‘ವಿಞ್ಞತ್ತಿ ಸೀಲ’’ನ್ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಮಹಾಸಂಘಿಕಾನಞ್ಚೇವ ಸಮ್ಮಿತಿಯಾನಞ್ಚ; ತೇ ಸನ್ಧಾಯ ವಿಞ್ಞತ್ತೀತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ಯಸ್ಮಾ ಸೀಲಂ ನಾಮ ವಿರತಿ, ನ ರೂಪಧಮ್ಮೋ, ತಸ್ಮಾ ತೇನತ್ಥೇನ ಚೋದೇತುಂ ಪಾಣಾತಿಪಾತಾ ವೇರಮಣೀತಿಆದಿಮಾಹ. ಅಭಿವಾದನಂ ಸೀಲನ್ತಿಆದಿ ಯಥಾರೂಪಂ ವಿಞ್ಞತ್ತಿಂ ಸೋ ‘‘ಸೀಲ’’ನ್ತಿ ಮಞ್ಞತಿ ತಂ ಉದ್ಧರಿತ್ವಾ ದಸ್ಸೇತುಂ ವುತ್ತಂ. ಯಸ್ಮಾ ಪನ ಸಾ ವಿರತಿ ನ ಹೋತಿ, ತಸ್ಮಾ ಪುನ ಪಾಣಾತಿಪಾತಾತಿಆದಿಮಾಹ. ಲದ್ಧಿ ಪನಸ್ಸ ಛಲೇನ ಪತಿಟ್ಠಿತತ್ತಾ ಅಪ್ಪತಿಟ್ಠಿತಾಯೇವಾತಿ.

ವಿಞ್ಞತ್ತಿ ಸೀಲನ್ತಿಕಥಾವಣ್ಣನಾ.