೫. ಅಟ್ಠಮಕಕಥಾವಣ್ಣನಾ

೩೬೮. ಇದಾನಿ ಅಟ್ಠಮಕಕಥಾ ನಾಮ ಹೋತಿ. ತತ್ಥ ಯೇಸಂ ಅನುಲೋಮಗೋತ್ರಭುಮಗ್ಗಕ್ಖಣೇ ಕಿಲೇಸಾನಂ ಸಮುದಾಚಾರಾಭಾವತೋ ಅಟ್ಠಮಕಸ್ಸ ಸೋತಾಪತ್ತಿಮಗ್ಗಟ್ಠಪುಗ್ಗಲಸ್ಸ ದ್ವೇ ಪರಿಯುಟ್ಠಾನಾ ಪಹೀನಾತಿ ಲದ್ಧಿ, ಸೇಯ್ಯಥಾಪಿ ಏತರಹಿ ಅನ್ಧಕಾನಞ್ಚೇವ ಸಮ್ಮಿತಿಯಾನಞ್ಚ; ತೇಸಂ ಅಞ್ಞತರಂ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಮಗ್ಗಕ್ಖಣತೋ ಪಟ್ಠಾಯ ದಿಟ್ಠಿಯಾ ಅನುಪ್ಪತ್ತಿಂ ಸನ್ಧಾಯ ಪಟಿಞ್ಞಾ ಇತರಸ್ಸ. ತತೋ ಯಸ್ಮಾ ದಿಟ್ಠಿ ನಾಮೇಸಾ ಸೋತಾಪನ್ನಸ್ಸೇವ ಪಹೀನಾ, ನ ಮಗ್ಗಟ್ಠಸ್ಸ, ತಸ್ಮಾ ಅಟ್ಠಮಕೋ ಪುಗ್ಗಲೋ ಸೋತಾಪನ್ನೋತಿ ಅನುಯೋಗೋ ಸಕವಾದಿಸ್ಸ. ವಿಚಿಕಿಚ್ಛಾಪಞ್ಹೇಪಿ ಏಸೇವ ನಯೋ. ಅನುಸಯಪಞ್ಹೇ ಪರಿಯುಟ್ಠಾನತೋ ಅಞ್ಞೋ ಅನುಸಯೋತಿ ತೇಸಂ ಲದ್ಧಿ, ತಸ್ಮಾ ‘‘ನ ಹೇವ’’ನ್ತಿ ಪಟಿಕ್ಖಿತ್ತಂ.

ಸೀಲಬ್ಬತಪರಾಮಾಸಪಞ್ಹೇಪಿ ಸೀಲಬ್ಬತಪರಾಮಾಸಪರಿಯುಟ್ಠಾನನ್ತಿ ವೋಹಾರಂ ನ ಪಸ್ಸತಿ, ತಸ್ಮಾ ಪಟಿಕ್ಖಿಪತಿ. ಪರಿಯುಟ್ಠಾನಮೇವಸ್ಸ ಪಹೀನನ್ತಿ ಲದ್ಧಿ.

೩೬೯. ಮಗ್ಗೋ ಭಾವಿತೋತಿ ಪಞ್ಹೇ ತಸ್ಮಿಂ ಖಣೇ ಭಾವೇತಿ, ನ ಭಾವಿತೋ. ತಸ್ಮಾ ಪಟಿಕ್ಖಿಪತಿ. ಅಮಗ್ಗೇನಾತಿಆದಿಅನುಯೋಗೇ ಪಠಮಮಗ್ಗೇನೇವ ಪಹೀನಭಾವಂ ಸನ್ಧಾಯ ಪಟಿಕ್ಖಿಪತಿ. ಯದಿ ಹಿ ಅಮಗ್ಗೇನ ಪಹೀಯೇಥ, ಗೋತ್ರಭುಪುಗ್ಗಲಾದೀನಮ್ಪಿ ಪಹೀಯೇಥಾತಿ ಆಪಜ್ಜನತೋ. ಉಪ್ಪಜ್ಜಿಸ್ಸತೀತಿ ಪುಚ್ಛಾ ಪರವಾದಿಸ್ಸ, ವಿಸ್ಸಜ್ಜನಂ ಸಕವಾದಿಸ್ಸ. ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ.

ಅಟ್ಠಮಕಕಥಾವಣ್ಣನಾ.