೩. ವಿಮುತ್ತಿಕಥಾವಣ್ಣನಾ

೩೬೩. ಇದಾನಿ ವಿಮುತ್ತಿಕಥಾ ನಾಮ ಹೋತಿ. ತತ್ಥ ಯೇಸಂ ‘‘ವೀತರಾಗಚಿತ್ತಾನಂ ವಿಮುತ್ತಿಪಯೋಜನಂ ನಾಮ ನತ್ಥಿ. ಯಥಾ ಪನ ಮಲೀನಂ ವತ್ಥಂ ಧೋವಿಯಮಾನಂ ಮಲಾ ವಿಮುಚ್ಚತಿ, ಏವಂ ಸರಾಗಂ ಚಿತ್ತಂ ರಾಗತೋ ವಿಮುಚ್ಚತೀ’’ತಿ ಲದ್ಧಿ, ಸೇಯ್ಯಥಾಪಿ ಏತರಹಿ ಅನ್ಧಕಾನಂ; ತೇ ಸನ್ಧಾಯ ಸರಾಗನ್ತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ತತೋ ರಾಗಸಹಗತನ್ತಿಆದಿನಾ ನಯೇನ ಪುಟ್ಠೋ ಮಗ್ಗಕ್ಖಣೇ ಚಿತ್ತಂ ವಿಮುಚ್ಚತಿ ನಾಮ. ತದಾ ಚ ಏವರೂಪಂ ಚಿತ್ತಂ ನತ್ಥೀತಿ ಪಟಿಕ್ಖಿಪತಿ.

ಸಫಸ್ಸನ್ತಿಆದಿನಾ ನಯೇನ ಪುಟ್ಠೋಪಿ ಯಥಾ ಫಸ್ಸೋ ಚ ಚಿತ್ತಞ್ಚ ಉಭೋ ರಾಗತೋ ವಿಮುಚ್ಚನ್ತಿ, ಏವಂ ರಾಗಸ್ಸ ವಿಮುತ್ತಿಂ ಅಪಸ್ಸಮಾನೋ ಪಟಿಕ್ಖಿಪತಿ. ಸದೋಸಾದೀಸುಪಿ ಇಮಿನಾವುಪಾಯೇನ ಅತ್ಥೋ ವೇದಿತಬ್ಬೋ.

ವಿಮುತ್ತಿಕಥಾವಣ್ಣನಾ.