೬. ಛಕ್ಕನಿದ್ದೇಸವಣ್ಣನಾ

೨೦೨. ಛಕ್ಕೇ – ತತ್ರಾತಿ ತೇಸು ಛಸು ಪುಗ್ಗಲೇಸು. ಸಮ್ಮಾಸಮ್ಬುದ್ಧೋ ತೇನ ದಟ್ಠಬ್ಬೋತಿ ಸೋ ಪುಗ್ಗಲೋ ತೇನ ಅನಾಚರಿಯಕೇನ ಅತ್ತನಾ ಉಪ್ಪಾದಿತೇನ ಸಬ್ಬಞ್ಞುತಞ್ಞಾಣೇನ ಸಬ್ಬಞ್ಞುಬುದ್ಧೋ ದಟ್ಠಬ್ಬೋ.

ಪಚ್ಚೇಕಸಮ್ಬುದ್ಧೋ ತೇನಾತಿಆದೀಸುಪಿ ತೇನ ಪಚ್ಚೇಕಸಮ್ಬೋಧಿಞಾಣೇನ ಸೋ ಪುಗ್ಗಲೋ ಪಚ್ಚೇಕಸಮ್ಬುದ್ಧೋ. ತೇನ ಸಾವಕಪಾರಮೀಞಾಣೇನ ತೇ ಪುಗ್ಗಲಾ ಸಾರಿಪುತ್ತಮೋಗ್ಗಲ್ಲಾನಾ. ತೇನ ದುಕ್ಖಸ್ಸ ಅನ್ತಕರಣೇನ ತೇ ಪುಗ್ಗಲಾ ಅವಸೇಸಾ ಅರಹನ್ತೋ. ತೇನ ಇತ್ಥತ್ತಂ ಅನಾಗಮನೇನ ಸೋ ಪುಗ್ಗಲೋ ಅನಾಗಾಮೀ. ತೇನ ಇತ್ಥತ್ತಂ ಆಗಮನೇನ ತೇ ಪುಗ್ಗಲಾ ಸೋತಾಪನ್ನಸಕದಾಗಾಮಿನೋ ದಟ್ಠಬ್ಬಾತಿ.

ಛಕ್ಕನಿದ್ದೇಸವಣ್ಣನಾ.