೧೦. ದಸಮನಯೋ ವಿಪ್ಪಯುತ್ತೇನವಿಪ್ಪಯುತ್ತಪದವಣ್ಣನಾ

೩೫೩. ಇದಾನಿ ವಿಪ್ಪಯುತ್ತೇನವಿಪ್ಪಯುತ್ತಪದಂ ಭಾಜೇತುಂ ರೂಪಕ್ಖನ್ಧೇನಾತಿಆದಿ ಆರದ್ಧಂ. ತತ್ಥ ಯೇ ಸಮ್ಪಯೋಗವಿಪ್ಪಯೋಗಪದನಿದ್ದೇಸೇ ರೂಪಕ್ಖನ್ಧಾದಯೋ ಧಮ್ಮಾ ಉದ್ಧಟಾ, ಸಬ್ಬಪುಚ್ಛಾಸು ತೇಯೇವ ಉದ್ಧಟಾ. ಸದಿಸವಿಸ್ಸಜ್ಜನಾನಂ ಪನ ಏಕತೋ ಗಹಿತತ್ತಾ ಪದಾನಿ ಅಞ್ಞಾಯ ಪಟಿಪಾಟಿಯಾ ಆಗತಾನಿ. ತತ್ಥ ಯಂ ಪದಂ ಪುಚ್ಛಾಯ ಉದ್ಧಟಂ, ತಂ ಯೇಹಿ ಧಮ್ಮೇಹಿ ವಿಪ್ಪಯುತ್ತಂ, ತೇಸಂ ವಸೇನ ಖನ್ಧಾದಿವಿಭಾಗೋ ವೇದಿತಬ್ಬೋ. ರೂಪಕ್ಖನ್ಧೇನ ಹಿ ವೇದನಾದಯೋ ವಿಪ್ಪಯುತ್ತಾ, ತೇಹಿ ಚ ರೂಪಕ್ಖನ್ಧೋ ವಿಪ್ಪಯುತ್ತೋ. ನಿಬ್ಬಾನಂ ಪನ ಸುಖುಮರೂಪಗತಿಕಮೇವ. ಸೋ ರೂಪಕ್ಖನ್ಧೋ ಚತೂಹಿ ಖನ್ಧೇಹಿ, ಏಕೇನ ಮನಾಯತನೇನ ಸತ್ತಹಿ ವಿಞ್ಞಾಣಧಾತೂಹಿ, ಧಮ್ಮಾಯತನಧಮ್ಮಧಾತೂಸು, ಕೇಹಿಚಿ ವೇದನಾದೀಹಿ ಧಮ್ಮೇಹೇವ ವಿಪ್ಪಯುತ್ತೋ. ಏಸೇವ ನಯೋ ಸಬ್ಬತ್ಥಾತಿ.

ವಿಪ್ಪಯುತ್ತೇನವಿಪ್ಪಯುತ್ತಪದವಣ್ಣನಾ.