೧-೨. ಅನುಪುಬ್ಬವಿಹಾರಸುತ್ತಾದಿವಣ್ಣನಾ

೩೨-೩೩. ಚತುತ್ಥಸ್ಸ ಪಠಮೇ ಅನುಪುಬ್ಬವಿಹಾರಾತಿ ಅನುಪಟಿಪಾಟಿಯಾ ಸಮಾಪಜ್ಜಿತಬ್ಬವಿಹಾರಾ. ದುತಿಯೇ ಯತ್ಥ ಕಾಮಾ ನಿರುಜ್ಝನ್ತೀತಿ ಯಸ್ಮಿಂ ಠಾನೇ ಕಾಮಾ ವೂಪಸಮ್ಮನ್ತಿ. ನಿರೋಧೇತ್ವಾತಿ ಅಪ್ಪಟಿವತ್ತೇ ಕತ್ವಾ. ನಿಚ್ಛಾತಾತಿ ತಣ್ಹಾದಿಟ್ಠಿಚ್ಛಾತಾನಂ ಅಭಾವೇನ ನಿಚ್ಛಾತಾ. ನಿಬ್ಬುತಾತಿ ಅತ್ತಪರಿತಾಪನಕಿಲೇಸಾನಂ ಅಭಾವೇನ ನಿಬ್ಬುತಾ. ತಿಣ್ಣಾತಿ ಕಾಮತೋ ತಿಣ್ಣಾ. ಪಾರಂಗತಾತಿ ಕಾಮೇ ಪಾರಂ ಗತಾ. ತದಙ್ಗೇನಾತಿ ತೇನ ಝಾನಙ್ಗೇನ. ಏತ್ಥ ಕಾಮಾ ನಿರುಜ್ಝನ್ತೀತಿ ಏತ್ಥ ಪಠಮಜ್ಝಾನೇ ಕಾಮಾ ನಿರುಜ್ಝನ್ತಿ. ತೇ ಚಾತಿ ಯೇ ಪಠಮಜ್ಝಾನಂ ಸಮಾಪಜ್ಜನ್ತಿ, ತೇ ಕಾಮೇ ನಿರೋಧೇತ್ವಾ ನಿರೋಧೇತ್ವಾ ವಿಹರನ್ತಿ ನಾಮ. ಪಞ್ಜಲಿಕೋತಿ ಪಗ್ಗಹಿತಅಞ್ಜಲಿಕೋ ಹುತ್ವಾ. ಪಯಿರುಪಾಸೇಯ್ಯಾತಿ ಉಪಟ್ಠಾಪೇಯ್ಯ. ಇಮಿನಾ ಉಪಾಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋ.