೧. ಪಠಮದಾನಸುತ್ತವಣ್ಣನಾ

೩೧. ಚತುತ್ಥಸ್ಸ ಪಠಮೇ ಆಸಜ್ಜ ದಾನಂ ದೇತೀತಿ ಪತ್ವಾ ದಾನಂ ದೇತಿ. ಆಗತಂ ದಿಸ್ವಾ ತಂ ಮುಹುತ್ತಂಯೇವ ನಿಸೀದಾಪೇತ್ವಾ ಸಕ್ಕಾರಂ ಕತ್ವಾ ದಾನಂ ದೇತಿ, ದಸ್ಸಾಮೀತಿ ನ ಕಿಲಮೇತಿ. ಭಯಾತಿ ‘‘ಅಯಂ ಅದಾಯಕೋ ಅಕಾರಕೋ’’ತಿ ಗರಹಭಯಾ, ಅಪಾಯಭಯಾ ವಾ. ಅದಾಸಿ ಮೇತಿ ಮಯ್ಹಂ ಪುಬ್ಬೇ ಏಸ ಇದಂ ನಾಮ ಅದಾಸೀತಿ ದೇತಿ. ದಸ್ಸತಿ ಮೇತಿ ಅನಾಗತೇ ಇದಂ ನಾಮ ದಸ್ಸತೀತಿ ದೇತಿ. ಸಾಹು ದಾನನ್ತಿ ದಾನಂ ನಾಮ ಸಾಧು ಸುನ್ದರಂ ಬುದ್ಧಾದೀಹಿ ಪಣ್ಡಿತೇಹಿ ಪಸತ್ಥನ್ತಿ ದೇತಿ. ಚಿತ್ತಾಲಙ್ಕಾರಚಿತ್ತಪರಿಕ್ಖಾರತ್ಥಂ ದಾನಂ ದೇತೀತಿ ಸಮಥವಿಪಸ್ಸನಾಚಿತ್ತಸ್ಸ ಅಲಙ್ಕಾರತ್ಥಞ್ಚೇವ ಪರಿಕ್ಖಾರತ್ಥಞ್ಚ ದೇತಿ. ದಾನಞ್ಹಿ ಚಿತ್ತಂ ಮುದುಂ ಕರೋತಿ. ಯೇನ ಲದ್ಧೋ, ಸೋ ‘‘ಲದ್ಧಂ ಮೇ’’ತಿ ಮುದುಚಿತ್ತೋ ಹೋತಿ. ಯೇನ ದಿನ್ನಂ, ಸೋಪಿ ‘‘ದಿನ್ನಂ ಮಯಾ’’ತಿ ಮುದುಚಿತ್ತೋ ಹೋತಿ. ಇತಿ ಉಭಿನ್ನಂ ಚಿತ್ತಂ ಮುದುಂ ಕರೋತಿ. ತೇನೇವ ‘‘ಅದನ್ತದಮನ’’ನ್ತಿ ವುಚ್ಚತಿ. ಯಥಾಹ –

‘‘ಅದನ್ತದಮನಂ ದಾನಂ, ಅದಾನಂ ದನ್ತದೂಸಕಂ;

ದಾನೇನ ಪಿಯವಾಚಾಯ, ಉನ್ನಮನ್ತಿ ನಮನ್ತಿ ಚಾ’’ತಿ.

ಇಮೇಸು ಪನ ಅಟ್ಠಸು ದಾನೇಸು ಚಿತ್ತಾಲಙ್ಕಾರದಾನಮೇವ ಉತ್ತಮನ್ತಿ.