೩. ಅಸ್ಸಾಜಾನೀಯಸುತ್ತವಣ್ಣನಾ

೧೩. ತತಿಯೇ ಅಙ್ಗೇಹೀತಿ ಗುಣಙ್ಗೇಹಿ. ತಸ್ಸಂ ದಿಸಾಯಂ ಜಾತೋ ಹೋತೀತಿ ತಸ್ಸಂ ಸಿನ್ಧುನದೀತೀರದಿಸಾಯಂ ಜಾತೋ ಹೋತಿ. ಅಞ್ಞೇಪಿ ಭದ್ರಾ ಅಸ್ಸಾಜಾನೀಯಾ ತತ್ಥೇವ ಜಾಯನ್ತಿ. ಅಲ್ಲಂ ವಾ ಸುಕ್ಖಂ ವಾತಿ ಅಲ್ಲತಿಣಂ ವಾ ಸುಕ್ಖತಿಣಂ ವಾ. ನಾಞ್ಞೇ ಅಸ್ಸೇ ಉಬ್ಬೇಜೇತಾತಿ ಅಞ್ಞೇ ಅಸ್ಸೇ ನ ಉಬ್ಬೇಜೇತಿ ನ ಪಹರತಿ ನ ಡಂಸತಿ ನ ಕಲಹಂ ಕರೋತಿ. ಸಾಠೇಯ್ಯಾನೀತಿ ಸಠಭಾವೋ. ಕೂಟೇಯ್ಯಾನೀತಿ ಕೂಟಭಾವೋ. ಜಿಮ್ಹೇಯ್ಯಾನೀತಿ ಜಿಮ್ಹಭಾವೋ. ವಙ್ಕೇಯ್ಯಾನೀತಿ ವಙ್ಕಭಾವಾ. ಇಚ್ಚಸ್ಸ ಚತೂಹಿಪಿ ಪದೇಹಿ ಅಸಿಕ್ಖಿತಭಾವೋವ ಕಥಿತೋ. ವಾಹೀತಿ ವಹನಸಭಾವೋ ದಿನ್ನೋವಾದಪಟಿಕರೋ. ಯಾವ ಜೀವಿತಮರಣಪರಿಯಾದಾನಾತಿ ಯಾವ ಜೀವಿತಸ್ಸ ಮರಣೇನ ಪರಿಯೋಸಾನಾ. ಸಕ್ಕಚ್ಚಂ ಪರಿಭುಞ್ಜತೀತಿ ಅಮತಂ ವಿಯ ಪಚ್ಚವೇಕ್ಖಿತ್ವಾ ಪರಿಭುಞ್ಜತಿ. ಪುರಿಸಥಾಮೇನಾತಿಆದೀಸು ಞಾಣಥಾಮಾದಯೋ ಕಥಿತಾ. ಸಣ್ಠಾನನ್ತಿ ಓಸಕ್ಕನಂ ಪಟಿಪ್ಪಸ್ಸದ್ಧಿ.