೯. ನನ್ದಸುತ್ತವಣ್ಣನಾ

೯. ನವಮೇ ಕುಲಪುತ್ತೋತಿ ಜಾತಿಕುಲಪುತ್ತೋ. ಬಲವಾತಿ ಥಾಮಸಮ್ಪನ್ನೋ. ಪಾಸಾದಿಕೋತಿ ರೂಪಸಮ್ಪತ್ತಿಯಾ ಪಸಾದಜನಕೋ. ತಿಬ್ಬರಾಗೋತಿ ಬಹಲರಾಗೋ. ಕಿಮಞ್ಞತ್ರಾತಿಆದೀಸು ಅಯಮತ್ಥೋ – ಕಿಂ ಅಞ್ಞೇನ ಕಾರಣೇನ ಕಥಿತೇನ, ಅಯಂ ನನ್ದೋ ಇನ್ದ್ರಿಯೇಸು ಗುತ್ತದ್ವಾರೋ ಭೋಜನೇ ಮತ್ತಞ್ಞೂ ಜಾಗರಿಯಮನುಯುತ್ತೋ ಸತಿಸಮ್ಪಜಞ್ಞೇನ ಸಮನ್ನಾಗತೋ, ಯೇಹಿ ನನ್ದೋ ಸಕ್ಕೋತಿ ಪರಿಪುಣ್ಣಂ ಪರಿಸುದ್ಧಂ ಬ್ರಹ್ಮಚರಿಯಂ ಚರಿತುಂ. ಸಚೇ ಇಮೇಹಿ ಕಾರಣೇಹಿ ಸಮನ್ನಾಗತೋ ನಾಭವಿಸ್ಸ, ನ ಸಕ್ಕುಣೇಯ್ಯಾತಿ. ಇತಿಹ ತತ್ಥಾತಿ ಏವಂ ತತ್ಥ. ಇಮಸ್ಮಿಂ ಸುತ್ತೇ ವಟ್ಟಮೇವ ಕಥಿತಂ.