೮. ವಿನಯವಗ್ಗೋ

೧. ಪಠಮವಿನಯಧರಸುತ್ತವಣ್ಣನಾ

೭೫. ಅಟ್ಠಮಸ್ಸ ಪಠಮೇ ಆಪತ್ತಿಂ ಜಾನಾತೀತಿ ಆಪತ್ತಿಂಯೇವ ಆಪತ್ತೀತಿ ಜಾನಾತಿ. ಸೇಸಪದೇಸುಪಿ ಏಸೇವ ನಯೋ.

೨. ದುತಿಯವಿನಯಧರಸುತ್ತವಣ್ಣನಾ

೭೬. ದುತಿಯೇ ಸ್ವಾಗತಾನೀತಿ ಸುಆಗತಾನಿ ಸುಪ್ಪಗುಣಾನಿ. ಸುವಿಭತ್ತಾನೀತಿ ಕೋಟ್ಠಾಸತೋ ಸುಟ್ಠು ವಿಭತ್ತಾನಿ. ಸುಪ್ಪವತ್ತೀನೀತಿ ಆವಜ್ಜಿತಾವಜ್ಜಿತಟ್ಠಾನೇ ಸುಟ್ಠು ಪವತ್ತಾನಿ ದಳ್ಹಪ್ಪಗುಣಾನಿ. ಸುವಿನಿಚ್ಛಿತಾನೀತಿ ಸುಟ್ಠು ವಿನಿಚ್ಛಿತಾನಿ. ಸುತ್ತಸೋತಿ ವಿಭಙ್ಗತೋ. ಅನುಬ್ಯಞ್ಜನಸೋತಿ ಖನ್ಧಕಪರಿವಾರತೋ.

೩. ತತಿಯವಿನಯಧರಸುತ್ತವಣ್ಣನಾ

೭೭. ತತಿಯೇ ವಿನಯೇ ಖೋ ಪನ ಠಿತೋ ಹೋತೀತಿ ವಿನಯಲಕ್ಖಣೇ ಪತಿಟ್ಠಿತೋ ಹೋತಿ. ಅಸಂಹೀರೋತಿ ನ ಸಕ್ಕಾ ಹೋತಿ ಗಹಿತಗ್ಗಹಣಂ ವಿಸ್ಸಜ್ಜಾಪೇತುಂ.

೯. ಸತ್ಥುಸಾಸನಸುತ್ತವಣ್ಣನಾ

೮೩. ನವಮೇ ಏಕೋತಿ ಅದುತಿಯೋ. ವೂಪಕಟ್ಠೋತಿ ಕಾಯೇನ ಗಣತೋ, ಚಿತ್ತೇನ ಕಿಲೇಸೇಹಿ ವೂಪಕಟ್ಠೋ ವಿವೇಕಟ್ಠೋ ದೂರೀಭೂತೋ. ಅಪ್ಪಮತ್ತೋತಿ ಸತಿಅವಿಪ್ಪವಾಸೇ ಠಿತೋ. ಪಹಿತತ್ತೋತಿ ಪೇಸಿತತ್ತೋ. ನಿಬ್ಬಿದಾಯಾತಿ ವಟ್ಟೇ ಉಕ್ಕಣ್ಠನತ್ಥಾಯ. ವಿರಾಗಾಯಾತಿ ರಾಗಾದೀನಂ ವಿರಜ್ಜನತ್ಥಾಯ. ನಿರೋಧಾಯಾತಿ ಅಪ್ಪವತ್ತಿಕರಣತ್ಥಾಯ. ವೂಪಸಮಾಯಾತಿ ಕಿಲೇಸವೂಪಸಮಾಯ ಅಪ್ಪವತ್ತಿಯಾ. ಅಭಿಞ್ಞಾಯಾತಿ ತಿಲಕ್ಖಣಂ ಆರೋಪೇತ್ವಾ ಅಭಿಜಾನನತ್ಥಾಯ. ಸಮ್ಬೋಧಾಯಾತಿ ಮಗ್ಗಸಙ್ಖಾತಸ್ಸ ಸಮ್ಬೋಧಸ್ಸ ಅತ್ಥಾಯ. ನಿಬ್ಬಾನಾಯಾತಿ ನಿಬ್ಬಾನಸ್ಸ ಸಚ್ಛಿಕರಣತ್ಥಾಯ.

೧೦. ಅಧಿಕರಣಸಮಥಸುತ್ತವಣ್ಣನಾ

೮೪. ದಸಮೇ ಅಧಿಕರಣಾನಿ ಸಮೇನ್ತಿ ವೂಪಸಮೇನ್ತೀತಿ ಅಧಿಕರಣಸಮಥಾ. ಉಪ್ಪನ್ನುಪ್ಪನ್ನಾನನ್ತಿ ಉಪ್ಪನ್ನಾನಂ ಉಪ್ಪನ್ನಾನಂ. ಅಧಿಕರಣಾನನ್ತಿ ವಿವಾದಾಧಿಕರಣಂ ಅನುವಾದಾಧಿಕರಣಂ ಆಪತ್ತಾಧಿಕರಣಂ ಕಿಚ್ಚಾಧಿಕರಣನ್ತಿ ಇಮೇಸಂ ಚತುನ್ನಂ. ಸಮಥಾಯ ವೂಪಸಮಾಯಾತಿ ಸಮಥತ್ಥಞ್ಚೇವ ವೂಪಸಮನತ್ಥಞ್ಚ. ಸಮ್ಮುಖಾವಿನಯೋ ದಾತಬ್ಬೋ…ಪೇ… ತಿಣವತ್ಥಾರಕೋತಿ ಇಮೇ ಸತ್ತ ಸಮಥಾ ದಾತಬ್ಬಾ. ತೇಸಂ ವಿನಿಚ್ಛಯೋ ವಿನಯಸಂವಣ್ಣನತೋ (ಚೂಳವ. ಅಟ್ಠ. ೧೮೬-೧೮೭ ಆದಯೋ) ಗಹೇತಬ್ಬೋ. ಅಪಿಚ ದೀಘನಿಕಾಯೇ ಸಙ್ಗೀತಿಸುತ್ತವಣ್ಣನಾಯಮ್ಪಿ (ದೀ. ನಿ. ಅಟ್ಠ. ೩.೩೩೧ ಅಧಿಕರಣಸಮಥಸತ್ತಕವಣ್ಣನಾ) ವಿತ್ಥಾರಿತೋಯೇವ, ತಥಾ ಮಜ್ಝಿಮನಿಕಾಯೇ ಸಾಮಗಾಮಸುತ್ತವಣ್ಣನಾಯಾತಿ (ಮ. ನಿ. ಅಟ್ಠ. ೩.೪೬).

ವಿನಯವಗ್ಗೋ ಅಟ್ಠಮೋ.