೮. ಅತ್ತಕಾರೀಸುತ್ತವಣ್ಣನಾ

೩೮. ಅಟ್ಠಮೇ ಅದ್ದಸಂ ವಾ ಅಸ್ಸೋಸಿಂ ವಾತಿ ಅಕ್ಖೀನಿ ಉಮ್ಮೀಲೇತ್ವಾ ಮಾ ಅದ್ದಸಂ, ಅಸುಕಸ್ಮಿಂ ನಾಮ ಠಾನೇ ವಸತೀತಿ ಮಾ ಅಸ್ಸೋಸಿಂ, ಕಥೇನ್ತಸ್ಸ ವಾ ವಚನಂ ಮಾ ಅಸ್ಸೋಸಿಂ. ಕಥಞ್ಹಿ ನಾಮಾತಿ ಕೇನ ನಾಮ ಕಾರಣೇನ. ಆರಮ್ಭಧಾತೂತಿ ಆರಭನವಸೇನ ಪವತ್ತವೀರಿಯಂ. ನಿಕ್ಕಮಧಾತೂತಿ ಕೋಸಜ್ಜತೋ ನಿಕ್ಖಮನಸಭಾವಂ ವೀರಿಯಂ. ಪರಕ್ಕಮಧಾತೂತಿ ಪರಕ್ಕಮಸಭಾವೋ. ಥಾಮಧಾತೂತಿ ಥಾಮಸಭಾವೋ. ಠಿತಿಧಾತೂತಿ ಠಿತಿಸಭಾವೋ. ಉಪಕ್ಕಮಧಾತೂತಿ ಉಪಕ್ಕಮಸಭಾವೋ. ಸಬ್ಬಂ ಚೇತಂ ತೇನ ತೇನಾಕಾರೇನ ಪವತ್ತಸ್ಸ ವೀರಿಯಸ್ಸೇವ ನಾಮಂ.