೧೧. ದಾರುಕ್ಖನ್ಧಸುತ್ತವಣ್ಣನಾ

೪೧. ಏಕಾದಸಮೇ ಚೇತೋವಸಿಪ್ಪತ್ತೋತಿ ಚಿತ್ತವಸಿಭಾವಂ ಪತ್ತೋ. ಪಥವೀತ್ವೇವ ಅಧಿಮುಚ್ಚೇಯ್ಯಾತಿ ಥದ್ಧಾಕಾರಂ ಪಥವೀಧಾತೂತಿ ಸಲ್ಲಕ್ಖೇಯ್ಯ. ಯಂ ನಿಸ್ಸಾಯಾತಿ ಯಂ ವಿಜ್ಜಮಾನಂ ಥದ್ಧಾಕಾರಂ ಪಥವೀಧಾತುಂ ನಿಸ್ಸಾಯ ಅಮುಂ ದಾರುಕ್ಖನ್ಧಂ ಪಥವೀತ್ವೇವ ಅಧಿಮುಚ್ಚೇಯ್ಯ, ಸಾ ಏತ್ಥ ಪಥವೀಧಾತು ಅತ್ಥೀತಿ. ಇಮಿನಾ ನಯೇನ ಸೇಸಪದಾನಿಪಿ ವೇದಿತಬ್ಬಾನಿ. ಯಥೇವ ಹಿ ತಸ್ಮಿಂ ಥದ್ಧಾಕಾರಾ ಪಥವೀಧಾತು ಅತ್ಥಿ, ಏವಂ ಯೂಸಾಕಾರಾ ಆಪೋಧಾತು, ಉಣ್ಹಾಕಾರಾ ತೇಜೋಧಾತು, ವಿತ್ಥಮ್ಭನಾಕಾರಾ ವಾಯೋಧಾತು, ರತ್ತವಣ್ಣಮ್ಹಿ ಸಾರೇ ಪದುಮಪುಪ್ಫವಣ್ಣಾ ಸುಭಧಾತು, ಪೂತಿಭೂತೇ ಚುಣ್ಣೇ ಚೇವ ಫೇಗ್ಗುಪಪಟಿಕಾಸು ಚ ಅಮನುಞ್ಞವಣ್ಣಾ ಅಸುಭಧಾತು, ತಂ ನಿಸ್ಸಾಯ ಅಮುಂ ದಾರುಕ್ಖನ್ಧಂ ಅಸುಭನ್ತ್ವೇವ ಅಧಿಮುಚ್ಚೇಯ್ಯ ಸಲ್ಲಕ್ಖೇಯ್ಯಾತಿ. ಇಮಸ್ಮಿಂ ಸುತ್ತೇ ಮಿಸ್ಸಕವಿಹಾರೋ ನಾಮ ಕಥಿತೋ.