೨. ಪಚ್ಛಾಸಮಣಸುತ್ತವಣ್ಣನಾ

೧೧೨. ದುತಿಯೇ ಪತ್ತಪರಿಯಾಪನ್ನಂ ನ ಗಣ್ಹಾತೀತಿ ಉಪಜ್ಝಾಯೇ ನಿವತ್ತಿತ್ವಾ ಠಿತೇ ಅತ್ತನೋ ತುಚ್ಛಪತ್ತಂ ದತ್ವಾ ತಸ್ಸ ಪತ್ತಂ ನ ಗಣ್ಹಾತಿ, ತತೋ ವಾ ದೀಯಮಾನಂ ನ ಗಣ್ಹಾತಿ. ನ ನಿವಾರೇತೀತಿ ಇದಂ ವಚನಂ ಆಪತ್ತಿವೀತಿಕ್ಕಮವಚನಂ ನಾಮಾತಿ ನ ಜಾನಾತಿ. ಞತ್ವಾ ವಾಪಿ, ‘‘ಭನ್ತೇ, ಏವರೂಪಂ ನಾಮ ವತ್ತುಂ ನ ವಟ್ಟತೀ’’ತಿ ನ ನಿವಾರೇತಿ. ಕಥಂ ಓಪಾತೇತೀತಿ ತಸ್ಸ ಕಥಂ ಭಿನ್ದಿತ್ವಾ ಅತ್ತನೋ ಕಥಂ ಪವೇಸೇತಿ. ಜಳೋತಿ ಜಡೋ. ಏಳಮೂಗೋತಿ ಪಗ್ಘರಿತಖೇಳಮುಖೋ. ತತಿಯಂ ಉತ್ತಾನಮೇವ.