೫. ಫಾಸುವಿಹಾರಸುತ್ತವಣ್ಣನಾ

೧೦೫. ಪಞ್ಚಮೇ ಮೇತ್ತಂ ಕಾಯಕಮ್ಮನ್ತಿ ಮೇತ್ತಚಿತ್ತೇನ ಪವತ್ತಿತಂ ಕಾಯಕಮ್ಮಂ. ಆವಿ ಚೇವ ರಹೋ ಚಾತಿ ಸಮ್ಮುಖೇ ಚೇವ ಪರಮ್ಮುಖೇ ಚ. ಇತರೇಸುಪಿ ಏಸೇವ ನಯೋ. ಯಾನಿ ತಾನಿ ಸೀಲಾನೀತಿಆದಿ ಚತುಪಾರಿಸುದ್ಧಿಸೀಲವಸೇನ ವುತ್ತಂ. ಸಮಾಧಿಸಂವತ್ತನಿಕಾನೀತಿ ಮಗ್ಗಸಮಾಧಿಫಲಸಮಾಧಿನಿಬ್ಬತ್ತಕಾನಿ. ಸೀಲಸಾಮಞ್ಞಗತೋತಿ ಸಮಾನಸೀಲತಂ ಗತೋ, ಏಕಸದಿಸಸೀಲೋ ಹುತ್ವಾತಿ ಅತ್ಥೋ. ತಕ್ಕರಸ್ಸಾತಿ ಯೋ ನಂ ಕರೋತಿ, ತಸ್ಸ. ಇತಿ ಇಮಸ್ಮಿಂ ಸುತ್ತೇ ಸೀಲಂ ಮಿಸ್ಸಕಂ ಕಥಿತಂ, ದಿಟ್ಠಿ ವಿಪಸ್ಸನಾಸಮ್ಮಾದಿಟ್ಠೀತಿ.