೯. ಪಠಮಸೇಖಸುತ್ತವಣ್ಣನಾ

೮೯. ನವಮೇ ಸೇಖಸ್ಸಾತಿ ಸಿಕ್ಖಕಸ್ಸ ಸಕರಣೀಯಸ್ಸ. ಪರಿಹಾನಾಯಾತಿ ಉಪರಿಗುಣೇಹಿ ಪರಿಹಾನತ್ಥಾಯ. ಕಮ್ಮಾರಾಮತಾತಿ ನವಕಮ್ಮೇ ರಮನಕಭಾವೋ. ಭಸ್ಸಾರಾಮತಾತಿ ಆಲಾಪಸಲ್ಲಾಪೇ ರಮನಕಭಾವೋ. ನಿದ್ದಾರಾಮತಾತಿ ನಿದ್ದಾಯನೇ ರಮನಕಭಾವೋ. ಸಙ್ಗಣಿಕಾರಾಮತಾತಿ ಗಣಸಙ್ಗಣಿಕಾಯ ರಮನಕಭಾವೋ. ಯಥಾವಿಮುತ್ತಂ ಚಿತ್ತಂ ನ ಪಚ್ಚವೇಕ್ಖತೀತಿ ಯಥಾ ಯಂ ಚಿತ್ತಂ ವಿಮುತ್ತಂ, ಯೇ ಚ ದೋಸಾ ಪಹೀನಾ, ಗುಣಾ ಚ ಪಟಿಲದ್ಧಾ, ತೇ ಪಚ್ಚವೇಕ್ಖಿತ್ವಾ ಉಪರಿಗುಣಪಟಿಲಾಭಾಯ ವಾಯಾಮಂ ನ ಕರೋತೀತಿ ಅತ್ಥೋ. ಇತಿ ಇಮಸ್ಮಿಂ ಸುತ್ತೇ ಸತ್ತನ್ನಂ ಸೇಖಾನಂ ಉಪರಿಗುಣೇಹಿ ಪರಿಹಾನಿಕಾರಣಞ್ಚ ವುದ್ಧಿಕಾರಣಞ್ಚ ಕಥಿತಂ. ಯಞ್ಚ ನಾಮ ಸೇಖಸ್ಸ ಪರಿಹಾನಕಾರಣಂ, ತಂ ಪುಥುಜ್ಜನಸ್ಸ ಪಠಮಮೇವ ಹೋತೀತಿ.