೨. ದುತಿಯಪಣ್ಣಾಸಕಂ

(೬) ೧. ನೀವರಣವಗ್ಗೋ

೧. ಆವರಣಸುತ್ತವಣ್ಣನಾ

೫೧. ದುತಿಯಸ್ಸ ಪಠಮೇ ಆವರಣವಸೇನ ಆವರಣಾ. ನೀವರಣವಸೇನ ನೀವರಣಾ. ಚೇತೋ ಅಜ್ಝಾರುಹನ್ತೀತಿ ಚೇತಸೋ ಅಜ್ಝಾರುಹಾ. ವಿಪಸ್ಸನಾಪಞ್ಞಞ್ಚ ಮಗ್ಗಪಞ್ಞಞ್ಚ ಉಪ್ಪತ್ತಿನಿವಾರಣಟ್ಠೇನ ದುಬ್ಬಲಂ ಕರೋನ್ತೀತಿ ಪಞ್ಞಾಯ ದುಬ್ಬಲೀಕರಣಾ. ಯಾ ವಾ ಏತೇಹಿ ಸದ್ಧಿಂ ವೋಕಿಣ್ಣಾ ಪಞ್ಞಾ ಉಪ್ಪಜ್ಜತಿ, ತಂ ದುಬ್ಬಲಂ ಕರೋನ್ತೀತಿಪಿ ಪಞ್ಞಾಯ ದುಬ್ಬಲೀಕರಣಾ. ಅಬಲಾಯಾತಿ ಪಞ್ಚನೀವರಣಪರಿಯೋನದ್ಧತ್ತಾ ಅಪಗತಬಲಾಯ. ಉತ್ತರಿ ವಾ ಮನುಸ್ಸಧಮ್ಮಾ ಅಲಮರಿಯಞಾಣದಸ್ಸನವಿಸೇಸನ್ತಿ ದಸಕುಸಲಕಮ್ಮಪಥಸಙ್ಖಾತಾ ಮನುಸ್ಸಧಮ್ಮಾ ಉತ್ತರಿ ಅರಿಯಭಾವಂ ಕಾತುಂ ಸಮತ್ಥಂ ಞಾಣದಸ್ಸನವಿಸೇಸಂ. ಹಾರಹಾರಿನೀತಿ ಹರಿತಬ್ಬಂ ಹರಿತುಂ ಸಮತ್ಥಾ. ನಙ್ಗಲಮುಖಾನೀತಿ ಮಾತಿಕಾಮುಖಾನಿ. ತಾನಿ ಹಿ ನಙ್ಗಲಸರಿಕ್ಖಕತ್ತಾ ನಙ್ಗಲೇಹಿ ಚ ಖತತ್ತಾ ನಙ್ಗಲಮುಖಾನೀತಿ ವುಚ್ಚನ್ತಿ.

ಏವಮೇವ ಖೋತಿ ಏತ್ಥ ಸೋತಂ ವಿಯ ವಿಪಸ್ಸನಾಞಾಣಂ ದಟ್ಠಬ್ಬಂ, ಉಭತೋ ನಙ್ಗಲಮುಖಾನಂ ವಿವರಣಕಾಲೋ ವಿಯ ಛಸು ದ್ವಾರೇಸು ಸಂವರಸ್ಸ ವಿಸ್ಸಟ್ಠಕಾಲೋ, ಮಜ್ಝೇನದಿಯಾ ರುಕ್ಖಪಾದೇ ಕೋಟ್ಟೇತ್ವಾ ಪಲಾಲತಿಣಮತ್ತಿಕಾಹಿ ಆವರಣೇ ಕತೇ ಉದಕಸ್ಸ ವಿಕ್ಖಿತ್ತವಿಸಟಬ್ಯಾದಿಣ್ಣಕಾಲೋ ವಿಯ ಪಞ್ಚಹಿ ನೀವರಣೇಹಿ ಪರಿಯೋನದ್ಧಕಾಲೋ, ಏವಂ ಆವರಣೇ ಕತೇ ವಿಹತವೇಗಸ್ಸ ಉದಕಸ್ಸ ತಿಣಪಲಾಲಾದೀನಿ ಪರಿಕಡ್ಢಿತ್ವಾ ಸಮುದ್ದಂ ಪಾಪುಣಿತುಂ ಅಸಮತ್ಥಕಾಲೋ ವಿಯ ವಿಪಸ್ಸನಾಞಾಣೇನ ಸಬ್ಬಾಕುಸಲೇ ವಿದ್ಧಂಸೇತ್ವಾ ನಿಬ್ಬಾನಸಾಗರಂ ಪಾಪುಣಿತುಂ ಅಸಮತ್ಥಕಾಲೋ ವೇದಿತಬ್ಬೋ. ಸುಕ್ಕಪಕ್ಖೇ ವುತ್ತವಿಪಲ್ಲಾಸೇನ ಯೋಜನಾ ಕಾತಬ್ಬಾ. ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥಿತಂ. ದುತಿಯಂ ಉತ್ತಾನತ್ಥಮೇವ.

೩. ಪಧಾನಿಯಙ್ಗಸುತ್ತವಣ್ಣನಾ

೫೩. ತತಿಯೇ ಪಧಾನಿಯಙ್ಗಾನೀತಿ ಪಧಾನಂ ವುಚ್ಚತಿ ಪದಹನಭಾವೋ, ಪಧಾನಮಸ್ಸ ಅತ್ಥೀತಿ ಪಧಾನಿಯೋ, ಪಧಾನಿಯಸ್ಸ ಭಿಕ್ಖುನೋ ಅಙ್ಗಾನೀತಿ ಪಧಾನಿಯಙ್ಗಾನಿ. ಸದ್ಧೋತಿ ಸದ್ಧಾಯ ಸಮನ್ನಾಗತೋ. ಸದ್ಧಾ ಪನೇಸಾ ಆಗಮಸದ್ಧಾ ಅಧಿಗಮಸದ್ಧಾ ಓಕಪ್ಪನಸದ್ಧಾ ಪಸಾದಸದ್ಧಾತಿ ಚತುಬ್ಬಿಧಾ. ತತ್ಥ ಸಬ್ಬಞ್ಞುಬೋಧಿಸತ್ತಾನಂ ಸದ್ಧಾ, ಅಭಿನೀಹಾರತೋ ಪಟ್ಠಾಯ ಆಗತತ್ತಾ ಆಗಮಸದ್ಧಾ ನಾಮ. ಅರಿಯಸಾವಕಾನಂ ಪಟಿವೇಧೇನ ಅಧಿಗತತ್ತಾ ಅಧಿಗಮಸದ್ಧಾ ನಾಮ. ಬುದ್ಧೋ ಧಮ್ಮೋ ಸಙ್ಘೋತಿ ವುತ್ತೇ ಅಚಲಭಾವೇನ ಓಕಪ್ಪನಂ ಓಕಪ್ಪನಸದ್ಧಾ ನಾಮ. ಪಸಾದುಪ್ಪತ್ತಿ ಪಸಾದಸದ್ಧಾ ನಾಮ. ಇಧ ಓಕಪ್ಪನಸದ್ಧಾ ಅಧಿಪ್ಪೇತಾ. ಬೋಧಿನ್ತಿ ಚತುಮಗ್ಗಞಾಣಂ. ತಂ ಸುಪ್ಪಟಿವಿದ್ಧಂ ತಥಾಗತೇನಾತಿ ಸದ್ದಹತಿ. ದೇಸನಾಸೀಸಮೇವ ಚೇತಂ, ಇಮಿನಾ ಪನ ಅಙ್ಗೇನ ತೀಸುಪಿ ರತನೇಸು ಸದ್ಧಾ ಅಧಿಪ್ಪೇತಾ. ಯಸ್ಸ ಹಿ ಬುದ್ಧಾದೀಸು ಪಸಾದೋ ಬಲವಾ, ತಸ್ಸ ಪಧಾನವೀರಿಯಂ ಇಜ್ಝತಿ.

ಅಪ್ಪಾಬಾಧೋತಿ ಅರೋಗೋ. ಅಪ್ಪಾತಙ್ಕೋತಿ ನಿದ್ದುಕ್ಖೋ. ಸಮವೇಪಾಕಿನಿಯಾತಿ ಸಮವಿಪಾಕಿನಿಯಾ. ಗಹಣಿಯಾತಿ ಕಮ್ಮಜತೇಜೋಧಾತುಯಾ. ನಾತಿಸೀತಾಯ ನಾಚ್ಚುಣ್ಹಾಯಾತಿ ಅತಿಸೀತಲಗ್ಗಹಣಿಕೋ ಹಿ ಸೀತಭೀರುಕೋ ಹೋತಿ, ಅಚ್ಚುಣ್ಹಗ್ಗಹಣಿಕೋ ಉಣ್ಹಭೀರುಕೋ, ತೇಸಂ ಪಧಾನಂ ನ ಇಜ್ಝತಿ, ಮಜ್ಝಿಮಗ್ಗಹಣಿಕಸ್ಸ ಇಜ್ಝತಿ. ತೇನಾಹ – ಮಜ್ಝಿಮಾಯ ಪಧಾನಕ್ಖಮಾಯಾತಿ. ಯಥಾಭೂತಂ ಅತ್ತಾನಂ ಆವಿಕತ್ತಾತಿ ಯಥಾಭೂತಂ ಅತ್ತನೋ ಅಗುಣಂ ಪಕಾಸೇತಾ. ಉದಯತ್ಥಗಾಮಿನಿಯಾತಿ ಉದಯಞ್ಚ ಅತ್ಥಞ್ಚ ಗನ್ತುಂ ಪರಿಚ್ಛಿನ್ದಿತುಂ ಸಮತ್ಥಾಯ. ಏತೇನ ಪಞ್ಞಾಸಲಕ್ಖಣಪರಿಗ್ಗಾಹಕಂ ಉದಯಬ್ಬಯಞಾಣಂ ವುತ್ತಂ. ಅರಿಯಾಯಾತಿ ಪರಿಸುದ್ಧಾಯ. ನಿಬ್ಬೇಧಿಕಾಯಾತಿ ಅನಿಬ್ಬಿದ್ಧಪುಬ್ಬೇ ಲೋಭಕ್ಖನ್ಧಾದಯೋ ನಿಬ್ಬಿಜ್ಝಿತುಂ ಸಮತ್ಥಾಯ. ಸಮ್ಮಾ ದುಕ್ಖಕ್ಖಯಗಾಮಿನಿಯಾತಿ ತದಙ್ಗವಸೇನ ಕಿಲೇಸಾನಂ ಪಹೀನತ್ತಾ ಯಂ ದುಕ್ಖಂ ಖೀಯತಿ, ತಸ್ಸ ದುಕ್ಖಸ್ಸ ಖಯಗಾಮಿನಿಯಾ. ಇತಿ ಸಬ್ಬೇಹಿಪಿ ಇಮೇಹಿ ಪದೇಹಿ ವಿಪಸ್ಸನಾಪಞ್ಞಾವ ಕಥಿತಾ. ದುಪ್ಪಞ್ಞಸ್ಸ ಹಿ ಪಧಾನಂ ನ ಇಜ್ಝತಿ.

೪. ಸಮಯಸುತ್ತವಣ್ಣನಾ

೫೪. ಚತುತ್ಥೇ ಪಧಾನಾಯಾತಿ ವೀರಿಯಕರಣತ್ಥಾಯ. ನ ಸುಕರಂ ಉಞ್ಛೇನ ಪಗ್ಗಹೇನ ಯಾಪೇತುನ್ತಿ ನ ಸಕ್ಕಾ ಹೋತಿ ಪತ್ತಂ ಗಹೇತ್ವಾ ಉಞ್ಛಾಚರಿಯಾಯ ಯಾಪೇತುಂ. ಇಮಸ್ಮಿಮ್ಪಿ ಸುತ್ತೇ ವಟ್ಟವಿವಟ್ಟಮೇವ ಕಥಿತಂ.

೫. ಮಾತಾಪುತ್ತಸುತ್ತವಣ್ಣನಾ

೫೫. ಪಞ್ಚಮೇ ಪರಿಯಾದಾಯ ತಿಟ್ಠತೀತಿ ಪರಿಯಾದಿಯಿತ್ವಾ ಗಹೇತ್ವಾ ಖೇಪೇತ್ವಾ ತಿಟ್ಠತಿ. ಉಗ್ಘಾತಿತಾತಿ ಉದ್ಧುಮಾತಾ.

ಅಸಿಹತ್ಥೇನಾತಿ ಸೀಸಚ್ಛೇದನತ್ಥಾಯ ಅಸಿಂ ಆದಾಯ ಆಗತೇನಾಪಿ. ಪಿಸಾಚೇನಾತಿ ಖಾದಿತುಂ ಆಗತಯಕ್ಖೇನಾಪಿ. ಆಸೀದೇತಿ ಘಟ್ಟೇಯ್ಯ. ಮಞ್ಜುನಾತಿ ಮುದುಕೇನ. ಕಾಮೋಘವುಳ್ಹಾನನ್ತಿ ಕಾಮೋಘೇನ ವುಳ್ಹಾನಂ ಕಡ್ಢಿತಾನಂ. ಕಾಲಂ ಗತಿ ಭವಾಭವನ್ತಿ ವಟ್ಟಕಾಲಂ ಗತಿಞ್ಚ ಪುನಪ್ಪುನಬ್ಭವೇ ಚ. ಪುರಕ್ಖತಾತಿ ಪುರೇಚಾರಿಕಾ ಪುರತೋ ಗತಾಯೇವ. ಯೇ ಚ ಕಾಮೇ ಪರಿಞ್ಞಾಯಾತಿ ಯೇ ಪಣ್ಡಿತಾ ದುವಿಧೇಪಿ ಕಾಮೇ ತೀಹಿ ಪರಿಞ್ಞಾಹಿ ಪರಿಜಾನಿತ್ವಾ. ಚರನ್ತಿ ಅಕುತೋಭಯಾತಿ ಖೀಣಾಸವಾನಂ ಕುತೋಚಿ ಭಯಂ ನಾಮ ನತ್ಥಿ, ತಸ್ಮಾ ತೇ ಅಕುತೋಭಯಾ ಹುತ್ವಾ ಚರನ್ತಿ. ಪಾರಙ್ಗತಾತಿ ಪಾರಂ ವುಚ್ಚತಿ ನಿಬ್ಬಾನಂ, ತಂ ಉಪಗತಾ, ಸಚ್ಛಿಕತ್ವಾ ಠಿತಾತಿ ಅತ್ಥೋ. ಆಸವಕ್ಖಯನ್ತಿ ಅರಹತ್ತಂ. ಇಮಸ್ಮಿಂ ಸುತ್ತೇ ವಟ್ಟಮೇವ ಕಥೇತ್ವಾ ಗಾಥಾಸು ವಟ್ಟವಿವಟ್ಟಂ ಕಥಿತಂ.

೬. ಉಪಜ್ಝಾಯಸುತ್ತವಣ್ಣನಾ

೫೬. ಛಟ್ಠೇ ಮಧುರಕಜಾತೋತಿ ಸಞ್ಜಾತಗರುಭಾವೋ. ದಿಸಾ ಚ ಮೇ ನ ಪಕ್ಖಾಯನ್ತೀತಿ ಚತಸ್ಸೋ ದಿಸಾ ಚ ಅನುದಿಸಾ ಚ ಮಯ್ಹಂ ನ ಉಪಟ್ಠಹನ್ತೀತಿ ವದತಿ. ಧಮ್ಮಾ ಚ ಮಂ ನಪ್ಪಟಿಭನ್ತೀತಿ ಸಮಥವಿಪಸ್ಸನಾಧಮ್ಮಾಪಿ ಮೇ ನ ಉಪಟ್ಠಹನ್ತಿ. ಅನಭಿರತೋ ಚ ಬ್ರಹ್ಮಚರಿಯಂ ಚರಾಮೀತಿ ಉಕ್ಕಣ್ಠಿತೋ ಹುತ್ವಾ ಬ್ರಹ್ಮಚರಿಯವಾಸಂ ವಸಾಮಿ. ಯೇನ ಭಗವಾ ತೇನುಪಸಙ್ಕಮೀತಿ ತಸ್ಸ ಕಥಂ ಸುತ್ವಾ ‘‘ಬುದ್ಧವೇನೇಯ್ಯಪುಗ್ಗಲೋ ಅಯ’’ನ್ತಿ ತಂ ಕಾರಣಂ ಭಗವತೋ ಆರೋಚೇತುಂ ಉಪಸಙ್ಕಮಿ. ಅವಿಪಸ್ಸಕಸ್ಸ ಕುಸಲಾನಂ ಧಮ್ಮಾನನ್ತಿ ಕುಸಲಧಮ್ಮೇ ಅವಿಪಸ್ಸನ್ತಸ್ಸ, ಅನೇಸನ್ತಸ್ಸ ಅಗವೇಸನ್ತಸ್ಸಾತಿ ಅತ್ಥೋ. ಬೋಧಿಪಕ್ಖಿಯಾನಂ ಧಮ್ಮಾನನ್ತಿ ಸತಿಪಟ್ಠಾನಾದೀನಂ ಸತ್ತತಿಂಸಧಮ್ಮಾನಂ.

೭. ಅಭಿಣ್ಹಪಚ್ಚವೇಕ್ಖಿತಬ್ಬಠಾನಸುತ್ತವಣ್ಣನಾ

೫೭. ಸತ್ತಮೇ ಜರಾಧಮ್ಮೋಮ್ಹೀತಿ ಜರಾಸಭಾವೋ ಅಮ್ಹಿ. ಜರಂ ಅನತೀತೋತಿ ಜರಂ ಅನತಿಕ್ಕನ್ತೋ, ಅನ್ತೋಜರಾಯ ಏವ ಚರಾಮಿ. ಸೇಸಪದೇಸುಪಿ ಏಸೇವ ನಯೋ. ಕಮ್ಮಸ್ಸಕೋತಿಆದೀಸು ಕಮ್ಮಂ ಮಯ್ಹಂ ಸಕಂ ಅತ್ತನೋ ಸನ್ತಕನ್ತಿ ಕಮ್ಮಸ್ಸಕೋ ಅಮ್ಹಿ. ಕಮ್ಮಸ್ಸ ದಾಯಾದೋತಿ ಕಮ್ಮದಾಯಾದೋ, ಕಮ್ಮಂ ಮಯ್ಹಂ ದಾಯಜ್ಜಂ ಸನ್ತಕನ್ತಿ ಅತ್ಥೋ. ಕಮ್ಮಂ ಮಯ್ಹಂ ಯೋನಿ ಕಾರಣನ್ತಿ ಕಮ್ಮಯೋನಿ. ಕಮ್ಮಂ ಮಯ್ಹಂ ಬನ್ಧೂತಿ ಕಮ್ಮಬನ್ಧು, ಕಮ್ಮಞಾತಕೋತಿ ಅತ್ಥೋ. ಕಮ್ಮಂ ಮಯ್ಹಂ ಪಟಿಸರಣಂ ಪತಿಟ್ಠಾತಿ ಕಮ್ಮಪಟಿಸರಣೋ. ತಸ್ಸ ದಾಯಾದೋ ಭವಿಸ್ಸಾಮೀತಿ ತಸ್ಸ ಕಮ್ಮಸ್ಸ ದಾಯಾದೋ ತೇನ ದಿನ್ನಫಲಪಟಿಗ್ಗಾಹಕೋ ಭವಿಸ್ಸಾಮೀತಿ ಅತ್ಥೋ. ಯೋಬ್ಬನಮದೋತಿ ಯೋಬ್ಬನಂ ಆರಬ್ಭ ಉಪ್ಪನ್ನಮದೋ. ಸೇಸೇಸುಪಿ ಏಸೇವ ನಯೋ. ಮಗ್ಗೋ ಸಞ್ಜಾಯತೀತಿ ಲೋಕುತ್ತರಮಗ್ಗೋ ಸಞ್ಜಾಯತಿ. ಸಂಯೋಜನಾನಿ ಸಬ್ಬಸೋ ಪಹೀಯನ್ತೀತಿ ದಸ ಸಂಯೋಜನಾನಿ ಸಬ್ಬಸೋ ಪಹೀಯನ್ತಿ. ಅನುಸಯಾ ಬ್ಯನ್ತೀಹೋನ್ತೀತಿ ಸತ್ತ ಅನುಸಯಾ ವಿಗತನ್ತಾ ಪರಿಚ್ಛಿನ್ನಾ ಪರಿವಟುಮಾ ಹೋನ್ತಿ. ಏವಮೇತ್ಥ ಹೇಟ್ಠಾ ಪಞ್ಚಸು ಠಾನೇಸು ವಿಪಸ್ಸನಾ ಕಥಿತಾ, ಇಮೇಸು ಪಞ್ಚಸು ಲೋಕುತ್ತರಮಗ್ಗೋ.

ಇದಾನಿ ಗಾಥಾಹಿ ಕೂಟಂ ಗಣ್ಹನ್ತೋ ಬ್ಯಾಧಿಧಮ್ಮಾತಿಆದಿಮಾಹ. ತತ್ಥ ಞತ್ವಾ ಧಮ್ಮಂ ನಿರೂಪಧಿನ್ತಿ ಉಪಧಿರಹಿತಂ ಅರಹತ್ತಮಗ್ಗಂ ಞತ್ವಾ. ಸಬ್ಬೇ ಮದೇ ಅಭಿಭೋಸ್ಮೀತಿ ಸಬ್ಬೇ ಇಮೇ ತಯೋಪಿ ಮದೇ ಅಧಿಭವಿಂ, ಅತಿಕ್ಕಮ್ಮ ಠಿತೋಸ್ಮೀತಿ ಅತ್ಥೋ. ನೇಕ್ಖಮ್ಮಂ ದಟ್ಠು ಖೇಮತೋತಿ ಪಬ್ಬಜ್ಜಂ ಖೇಮತೋ ದಿಸ್ವಾ. ತಸ್ಸ ಮೇ ಅಹು ಉಸ್ಸಾಹೋ, ನಿಬ್ಬಾನಂ ಅಭಿಪಸ್ಸತೋತಿ ತಸ್ಸ ಮಯ್ಹಂ ನಿಬ್ಬಾನಂ ಅಭಿಪಸ್ಸನ್ತಸ್ಸ ವಾಯಾಮೋ ಅಹೋಸಿ. ಅನಿವತ್ತಿ ಭವಿಸ್ಸಾಮೀತಿ ಪಬ್ಬಜ್ಜತೋ ಅನಿವತ್ತಿಕೋ ಭವಿಸ್ಸಾಮಿ, ಬ್ರಹ್ಮಚರಿಯವಾಸತೋ ಅನಿವತ್ತಿಕೋ, ಸಬ್ಬಞ್ಞುತಞ್ಞಾಣತೋ ಅನಿವತ್ತಿಕೋ ಭವಿಸ್ಸಾಮಿ. ಬ್ರಹ್ಮಚರಿಯಪರಾಯಣೋತಿ ಮಗ್ಗಬ್ರಹ್ಮಚರಿಯಪರಾಯಣೋ. ಇಮಿನಾ ಲೋಕುತ್ತರೋ ಅಟ್ಠಙ್ಗಿಕೋ ಮಗ್ಗೋ ಕಥಿತೋತಿ.

೮. ಲಿಚ್ಛವಿಕುಮಾರಕಸುತ್ತವಣ್ಣನಾ

೫೮. ಅಟ್ಠಮೇ ಸಜ್ಜಾನಿ ಧನೂನೀತಿ ಸಜಿಯಾನಿ ಆರೋಪಿತಧನೂನಿ. ಅದ್ದಸೂತಿ ಅದ್ದಸಂಸು. ಭವಿಸ್ಸನ್ತಿ ವಜ್ಜೀತಿ ವಡ್ಢಿಸ್ಸನ್ತಿ ವಜ್ಜಿರಾಜಾನೋ. ಅಪಾನುಭಾತಿ ಅವಡ್ಢಿನಿಸ್ಸಿತಾ ಮಾನಥದ್ಧಾ. ಪಚ್ಛಾಲಿಯಂ ಖಿಪನ್ತೀತಿ ಪಚ್ಛತೋ ಗನ್ತ್ವಾ ಪಿಟ್ಠಿಂ ಪಾದೇನ ಪಹರನ್ತಿ. ರಟ್ಠಿಕಸ್ಸಾತಿಆದೀಸು ರಟ್ಠಂ ಭುಞ್ಜತೀತಿ ರಟ್ಠಿಕೋ. ಪಿತರಾ ದತ್ತಂ ಸಾಪತೇಯ್ಯಂ ಭುಞ್ಜತೀತಿ ಪೇತ್ತನಿಕೋ. ಸೇನಾಯ ಪತಿ ಜೇಟ್ಠಕೋತಿ ಸೇನಾಪತಿಕೋ. ಗಾಮಗಾಮಣಿಕಸ್ಸಾತಿ ಗಾಮಾನಂ ಗಾಮಣಿಕಸ್ಸ, ಗಾಮಸಾಮಿಕಸ್ಸಾತಿ ಅತ್ಥೋ. ಪೂಗಗಾಮಣಿಕಸ್ಸಾತಿ ಗಣಜೇಟ್ಠಕಸ್ಸ. ಕುಲೇಸೂತಿ ತೇಸು ತೇಸು ಕುಲೇಸು. ಪಚ್ಚೇಕಾಧಿಪಚ್ಚಂ ಕಾರೇನ್ತೀತಿ ಪಚ್ಚೇಕಂ ಜೇಟ್ಠಕಟ್ಠಾನಂ ಕಾರೇನ್ತಿ. ಕಲ್ಯಾಣೇನ ಮನಸಾ ಅನುಕಮ್ಪನ್ತೀತಿ ಸುನ್ದರೇನ ಚಿತ್ತೇನ ಅನುಗ್ಗಣ್ಹನ್ತಿ. ಖೇತ್ತಕಮ್ಮನ್ತಸಾಮನ್ತಸಬ್ಯೋಹಾರೇತಿ ಯೇ ಚ ಅತ್ತನೋ ಖೇತ್ತಕಮ್ಮನ್ತಾನಂ ಸಾಮನ್ತಾ ಅನನ್ತರಕ್ಖೇತ್ತಸಾಮಿನೋ, ತೇ ಚ ರಜ್ಜುದಣ್ಡೇಹಿ ಭೂಮಿಪ್ಪಮಾಣಗ್ಗಾಹಕೇ ಸಬ್ಬೋಹಾರೇ ಚ. ಬಲಿಪಟಿಗ್ಗಾಹಿಕಾ ದೇವತಾತಿ ಕುಲಪ್ಪವೇಣಿಯಾ ಆಗತಾ ಆರಕ್ಖದೇವತಾ. ಸಕ್ಕರೋತೀತಿ ತಾ ದೇವತಾ ಅಗ್ಗಯಾಗುಭತ್ತಾದೀಹಿ ಸಕ್ಕರೋತಿ.

ಕಿಚ್ಚಕರೋತಿ ಉಪ್ಪನ್ನಾನಂ ಕಿಚ್ಚಾನಂ ಕಾರಕೋ. ಯೇ ಚಸ್ಸ ಅನುಜೀವಿನೋತಿ ಯೇ ಚ ಏತಂ ಉಪನಿಸ್ಸಾಯ ಜೀವನ್ತಿ. ಉಭಿನ್ನಞ್ಚೇವ ಅತ್ಥಾಯಾತಿ ಉಭಿನ್ನಮ್ಪಿ ಹಿತತ್ಥಾಯ ಪಟಿಪನ್ನೋ ಹೋತೀತಿ ಅತ್ಥೋ. ಪುಬ್ಬಪೇತಾನನ್ತಿ ಪರಲೋಕಗತಾನಂ. ದಿಟ್ಠೇ ಧಮ್ಮೇ ಚ ಜೀವತನ್ತಿ ಯೇ ಚ ದಿಟ್ಠೇ ಧಮ್ಮೇ ಜೀವನ್ತಿ. ಇತಿ ಪದದ್ವಯೇನಾಪಿ ಅತೀತಪಚ್ಚುಪ್ಪನ್ನೇ ಞಾತಯೋ ದಸ್ಸೇತಿ. ವಿತ್ತಿಸಞ್ಜನನೋತಿ ತುಟ್ಠಿಜನನೋ. ಘರಮಾವಸನ್ತಿ ಘರಾವಾಸಂ ವಸನ್ತೋ. ಪುಜ್ಜೋ ಹೋತಿ ಪಸಂಸಿಯೋತಿ ಪೂಜೇತಬ್ಬೋ ಚ ಪಸಂಸಿತಬ್ಬೋ ಚ ಹೋತೀತಿ.

೯-೧೦. ವುಡ್ಢಪಬ್ಬಜಿತಸುತ್ತದ್ವಯವಣ್ಣನಾ

೫೯-೬೦. ನವಮೇ ನಿಪುಣೋತಿ ಸಣ್ಹೋ ಸುಖುಮಕಾರಣಞ್ಞೂ. ಆಕಪ್ಪಸಮ್ಪನ್ನೋತಿ ಸಮಣಾಕಪ್ಪೇನ ಸಮ್ಪನ್ನೋ. ದಸಮೇ ಪದಕ್ಖಿಣಗ್ಗಾಹೀತಿ ದಿನ್ನೋವಾದಂ ಪದಕ್ಖಿಣತೋ ಗಣ್ಹನ್ತೋ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ನೀವರಣವಗ್ಗೋ ಪಠಮೋ.

(೭) ೨. ಸಞ್ಞಾವಗ್ಗೋ

೧-೨. ಸಞ್ಞಾಸುತ್ತದ್ವಯವಣ್ಣನಾ

೬೧-೬೨. ದುತಿಯಸ್ಸ ಪಠಮೇ ಮಹಪ್ಫಲಾತಿ ವಿಪಾಕಫಲೇನ ಮಹಪ್ಫಲಾ. ವಿಪಾಕಾನಿಸಂಸೇನೇವ ಮಹಾನಿಸಂಸಾ. ಅಮತೋಗಧಾತಿ ನಿಬ್ಬಾನಪತಿಟ್ಠಾ. ಸಬ್ಬಲೋಕೇ ಅನಭಿರತಿಸಞ್ಞಾತಿ ಸಬ್ಬಸ್ಮಿಂ ತೇಧಾತುಸನ್ನಿವೇಸೇ ಲೋಕೇ ಉಕ್ಕಣ್ಠಿತಸ್ಸ ಉಪ್ಪಜ್ಜನಕಸಞ್ಞಾ. ದುತಿಯಂ ಉತ್ತಾನತ್ಥಮೇವ.

೩-೪. ವಡ್ಢಸುತ್ತದ್ವಯವಣ್ಣನಾ

೬೩-೬೪. ತತಿಯೇ ವರಾದಾಯೀತಿ ಉತ್ತಮಸ್ಸ ವರಸ್ಸ ಆದಾಯಕೋ. ಸೇಸಮೇತ್ಥ ಚತುತ್ಥೇ ಚ ಉತ್ತಾನತ್ಥಮೇವಾತಿ.

೫. ಸಾಕಚ್ಛಸುತ್ತವಣ್ಣನಾ

೬೫. ಪಞ್ಚಮೇ ಅಲಂಸಾಕಚ್ಛೋತಿ ಸಾಕಚ್ಛಾಯ ಯುತ್ತೋ. ಆಗತಂ ಪಞ್ಹನ್ತಿ ಪುಚ್ಛಿತಂ ಪಞ್ಹಂ. ಬ್ಯಾಕತ್ತಾ ಹೋತೀತಿ ವಿಸ್ಸಜ್ಜಿತಾ ಹೋತಿ.

೬. ಸಾಜೀವಸುತ್ತವಣ್ಣನಾ

೬೬. ಛಟ್ಠೇ ಅಲಂಸಾಜೀವೋತಿ ಸಾಜೀವಾಯ ಯುತ್ತೋ. ಸಾಜೀವೋತಿ ಪಞ್ಹಪುಚ್ಛನಞ್ಚೇವ ಪಞ್ಹವಿಸ್ಸಜ್ಜನಞ್ಚ. ಸಬ್ಬೇಪಿ ಹಿ ಸಬ್ರಹ್ಮಚಾರಿನೋ ಪಞ್ಹಂ ಉಪಜೀವನ್ತಿ, ತೇನೇತಂ ಪಞ್ಹಪುಚ್ಛನವಿಸ್ಸಜ್ಜನಂ ಸಮಾನಾಜೀವತಾಯ ಸಾಜೀವೋತಿ ವುತ್ತಂ. ಕತಂ ಪಞ್ಹನ್ತಿ ಅಭಿಸಙ್ಖತಂ ಪಞ್ಹಂ.

೭-೧೦. ಪಠಮಇದ್ಧಿಪಾದಸುತ್ತಾದಿವಣ್ಣನಾ

೬೭-೭೦. ಸತ್ತಮೇ ಉಸ್ಸೋಳ್ಹೀತಿ ಅಧಿಮತ್ತವೀರಿಯಂ. ಅಟ್ಠಮೇ ಅತ್ತನೋ ಬೋಧಿಮಣ್ಡೇ ಪಟಿವಿದ್ಧೇ ಆಗಮನಇದ್ಧಿಪಾದೇ ಕಥೇತ್ವಾ ಉಪರಿ ಅತ್ತನೋವ ಛ ಅಭಿಞ್ಞಾ ಕಥೇಸೀತಿ. ನವಮದಸಮೇಸು ವಿಪಸ್ಸನಾ ಕಥಿತಾ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಸಞ್ಞಾವಗ್ಗೋ ದುತಿಯೋ.

(೮) ೩. ಯೋಧಾಜೀವವಗ್ಗೋ

೧. ಪಠಮಚೇತೋವಿಮುತ್ತಿಫಲಸುತ್ತವಣ್ಣನಾ

೭೧. ತತಿಯಸ್ಸ ಪಠಮೇ ಯತೋ ಖೋ, ಭಿಕ್ಖವೇತಿ ಹೇಟ್ಠಾ ವುತ್ತನಯೇನ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪತ್ತಸ್ಸ ಭಿಕ್ಖುನೋ ಇದಾನಿ ವಣ್ಣಭಣನತ್ಥಂ ಇದಂ ಆರದ್ಧಂ. ತತ್ಥ ಯತೋ ಖೋತಿ ಯದಾ ಖೋ. ಉಕ್ಖಿತ್ತಪಲಿಘೋತಿ ಅವಿಜ್ಜಾಪಲಿಘಂ ಉಕ್ಖಿಪಿತ್ವಾ ಅಪನೇತ್ವಾ ಠಿತೋ. ಸಂಕಿಣ್ಣಪರಿಖೋತಿ ಸಂಸಾರಪರಿಖಂ ಸಂಕಿರಿತ್ವಾ ವಿನಾಸೇತ್ವಾ ಠಿತೋ. ಅಬ್ಬೂಳ್ಹೇಸಿಕೋತಿ ತಣ್ಹಾಸಙ್ಖಾತಂ ಏಸಿಕಾಥಮ್ಭಂ ಅಬ್ಬುಯ್ಹ ಲುಞ್ಚಿತ್ವಾ ಠಿತೋ. ನಿರಗ್ಗಳೋತಿ ನೀವರಣಕವಾಟಂ ಉಗ್ಘಾಟೇತ್ವಾ ಠಿತೋ. ಪನ್ನದ್ಧಜೋ ಪನ್ನಭಾರೋತಿ ಮಾನದ್ಧಜಞ್ಚ ಖನ್ಧಾಭಿಸಙ್ಖಾರಕಿಲೇಸಭಾರಞ್ಚ ಪಾತೇತ್ವಾ ಓತಾರೇತ್ವಾ ಠಿತೋ. ವಿಸಂಯುತ್ತೋತಿ ವಟ್ಟೇನ ವಿಸಂಯುತ್ತೋ. ಸೇಸಂ ಪಾಳಿನಯೇನೇವ ವೇದಿತಬ್ಬಂ. ಏತ್ತಾವತಾ ಭಗವತಾ ಮಗ್ಗೇನ ಕಿಲೇಸೇ ಖೇಪೇತ್ವಾ ನಿರೋಧಸಯನವರಗತಸ್ಸ ನಿಬ್ಬಾನಾರಮ್ಮಣಂ ಫಲಸಮಾಪತ್ತಿಂ ಅಪ್ಪೇತ್ವಾ ವಿಹರತೋ ಖೀಣಾಸವಸ್ಸ ಕಾಲೋ ದಸ್ಸಿತೋ.

ಯಥಾ ಹಿ ದ್ವೇ ನಗರಾನಿ ಏಕಂ ಚೋರನಗರಂ ಏಕಂ ಖೇಮನಗರಂ. ಅಥ ಏಕಸ್ಸ ಮಹಾಯೋಧಸ್ಸ ಏವಂ ಭವೇಯ್ಯ – ‘‘ಯಾವಿಮಂ ಚೋರನಗರಂ ತಿಟ್ಠತಿ, ತಾವ ಖೇಮನಗರಂ ಭಯತೋ ನ ಮುಚ್ಚತಿ, ಚೋರನಗರಂ ಅನಗರಂ ಕರಿಸ್ಸಾಮೀ’’ತಿ ಸನ್ನಾಹಂ ಕತ್ವಾ ಖಗ್ಗಂ ಗಹೇತ್ವಾ ಚೋರನಗರಂ ಉಪಸಙ್ಕಮಿತ್ವಾ ನಗರದ್ವಾರೇ ಉಸ್ಸಾಪಿತೇ ಏಸಿಕಾಥಮ್ಭೇ ಖಗ್ಗೇನ ಛಿನ್ದಿತ್ವಾ ಸದ್ಧಿಂ ದ್ವಾರಬಾಹಾಹಿ ಕವಾಟಂ ಭಿನ್ದಿತ್ವಾ ಪಲಿಘಂ ಉಕ್ಖಿಪಿತ್ವಾ ಪಾಕಾರಂ ಭಿನ್ದಿತ್ವಾ ಪರಿಖಂ ವಿಕಿರಿತ್ವಾ ನಗರಸೋಭತ್ಥಾಯ ಉಸ್ಸಿತೇ ಧಜೇ ಪಾತೇತ್ವಾ ನಗರಂ ಅಗ್ಗಿನಾ ಝಾಪೇತ್ವಾ ಖೇಮನಗರಂ ಪವಿಸಿತ್ವಾ ಪಾಸಾದಂ ಆರುಯ್ಹ ಞಾತಿಗಣಪರಿವುತೋ ಸುರಸಭೋಜನಂ ಭುಞ್ಜೇಯ್ಯ. ಏವಂ ಚೋರನಗರಂ ವಿಯ ಸಕ್ಕಾಯೋ, ಖೇಮನಗರಂ ವಿಯ ನಿಬ್ಬಾನಂ, ಮಹಾಯೋಧೋ ವಿಯ ಯೋಗಾವಚರೋ. ತಸ್ಸೇವಂ ಹೋತಿ – ‘‘ಯಾವ ಸಕ್ಕಾಯವಟ್ಟಂ ವಟ್ಟತಿ, ತಾವ ದ್ವತ್ತಿಂಸಕಮ್ಮಕಾರಣಾಅಟ್ಠನವುತಿರೋಗಪಞ್ಚವೀಸತಿಮಹಾಭಯೇಹಿ ಪರಿಮುಚ್ಚನಂ ನತ್ಥೀ’’ತಿ. ಸೋ ಮಹಾಯೋಧೋ ಸನ್ನಾಹಂ ವಿಯ ಸೀಲಸನ್ನಾಹಂ ಕತ್ವಾ ಪಞ್ಞಾಖಗ್ಗಂ ಗಹೇತ್ವಾ ಖಗ್ಗೇನ ಏಸಿಕಾಥಮ್ಭೇ ವಿಯ ಅರಹತ್ತಮಗ್ಗೇನ ತಣ್ಹೇಸಿಕಂ ಲುಞ್ಚಿತ್ವಾ, ಸೋ ಯೋಧೋ ಸದ್ವಾರಬಾಹಕಂ ನಗರಕವಾಟಂ ವಿಯ ಪಞ್ಚೋರಮ್ಭಾಗಿಯಸಂಯೋಜನಅಗ್ಗಳಂ ಉಗ್ಘಾಟೇತ್ವಾ, ಸೋ ಯೋಧೋ ಪಲಿಘಂ ವಿಯ ಅವಿಜ್ಜಾಪಲಿಘಂ ಉಕ್ಖಿಪಿತ್ವಾ, ಸೋ ಯೋಧೋ ಪಾಕಾರಂ ಭಿನ್ದನ್ತೋ ಪರಿಖಂ ವಿಯ ಕಮ್ಮಾಭಿಸಙ್ಖಾರಂ ಭಿನ್ದನ್ತೋ ಜಾತಿಸಂಸಾರಪರಿಖಂ ವಿಕಿರಿತ್ವಾ, ಸೋ ಯೋಧೋ ನಗರಂ ಸೋಭತ್ಥಾಯ ಉಸ್ಸಾಪಿತದ್ಧಜೇ ವಿಯ ಮಾನದ್ಧಜೇ ಪಾತೇತ್ವಾ ಸಕ್ಕಾಯನಗರಂ ಝಾಪೇತ್ವಾ, ಸೋ ಯೋಧೋ ಖೇಮನಗರೇ ಉಪರಿಪಾಸಾದೇ ಸುಭೋಜನಂ ವಿಯ ಕಿಲೇಸಪರಿನಿಬ್ಬಾನನಗರಂ ಪವಿಸಿತ್ವಾ ಅಮತಂ ನಿರೋಧಾರಮ್ಮಣಂ ಫಲಸಮಾಪತ್ತಿಸುಖಂ ಅನುಭವಮಾನೋ ಕಾಲಂ ವೀತಿನಾಮೇತಿ.

೨. ದುತಿಯಚೇತೋವಿಮುತ್ತಿಫಲಸುತ್ತವಣ್ಣನಾ

೭೨. ದುತಿಯೇ ಅನಿಚ್ಚಸಞ್ಞಾತಿ ಖನ್ಧಪಞ್ಚಕಂ ಹುತ್ವಾ ಅಭಾವಾಕಾರೇನ ಅನಿಚ್ಚನ್ತಿ ಉಪ್ಪಜ್ಜನಕಸಞ್ಞಾ. ಅನಿಚ್ಚೇ ದುಕ್ಖಸಞ್ಞಾತಿ ಯದನಿಚ್ಚಂ, ತಂ ಪಟಿಪೀಳನಾಕಾರೇನ ದುಕ್ಖನ್ತಿ ಉಪ್ಪಜ್ಜನಕಸಞ್ಞಾ. ದುಕ್ಖೇ ಅನತ್ತಸಞ್ಞಾತಿ ಯಂ ದುಕ್ಖಂ, ತಂ ಅವಸವತ್ತನಾಕಾರೇನ ಅನತ್ತಾತಿ ಉಪ್ಪಜ್ಜನಕಸಞ್ಞಾ. ಸೇಸಂ ಹೇಟ್ಠಾ ವುತ್ತನಯಮೇವ. ಇಮೇಸು ಪನ ದ್ವೀಸುಪಿ ಸುತ್ತೇಸು ವಿಪಸ್ಸನಾಫಲಂ ನಾಮ ಕಥಿತನ್ತಿ.

೩. ಪಠಮಧಮ್ಮವಿಹಾರೀಸುತ್ತವಣ್ಣನಾ

೭೩. ತತಿಯೇ ದಿವಸಂ ಅತಿನಾಮೇತೀತಿ ದಿವಸಂ ಅತಿಕ್ಕಾಮೇತಿ. ರಿಞ್ಚತಿ ಪಟಿಸಲ್ಲಾನನ್ತಿ ಏಕೀಭಾವಂ ವಿಸ್ಸಜ್ಜೇತಿ. ದೇಸೇತೀತಿ ಕಥೇತಿ ಪಕಾಸೇತಿ. ಧಮ್ಮಪಞ್ಞತ್ತಿಯಾತಿ ಧಮ್ಮಸ್ಸ ಪಞ್ಞಾಪನಾಯ. ಧಮ್ಮಂ ಪರಿಯಾಪುಣಾತೀತಿ ನವಙ್ಗವಸೇನ ಚತುಸಚ್ಚಧಮ್ಮಂ ಪರಿಯಾಪುಣಾತಿ ವಳಞ್ಜೇತಿ ಕಥೇತಿ. ನ ರಿಞ್ಚತಿ ಪಟಿಸಲ್ಲಾನನ್ತಿ ಏಕೀಭಾವಂ ನ ವಿಸ್ಸಜ್ಜೇತಿ. ಅನುಯುಞ್ಜತಿ ಅಜ್ಝತ್ತಂ ಚೇತೋಸಮಥನ್ತಿ ನಿಯಕಜ್ಝತ್ತೇ ಚಿತ್ತಸಮಾಧಿಂ ಆಸೇವತಿ ಭಾವೇತಿ, ಸಮಥಕಮ್ಮಟ್ಠಾನೇ ಯುತ್ತಪ್ಪಯುತ್ತೋ ಹೋತಿ.

ಹಿತೇಸಿನಾತಿ ಹಿತಂ ಏಸನ್ತೇನ. ಅನುಕಮ್ಪಕೇನಾತಿ ಅನುಕಮ್ಪಮಾನೇನ. ಅನುಕಮ್ಪಂ ಉಪಾದಾಯಾತಿ ಅನುಕಮ್ಪಂ ಚಿತ್ತೇನ ಪರಿಗ್ಗಹೇತ್ವಾ, ಪಟಿಚ್ಚಾತಿಪಿ ವುತ್ತಂ ಹೋತಿ. ಕತಂ ವೋ ತಂ ಮಯಾತಿ ತಂ ಮಯಾ ಇಮೇ ಪಞ್ಚ ಪುಗ್ಗಲೇ ದೇಸೇನ್ತೇನ ತುಮ್ಹಾಕಂ ಕತಂ. ಏತ್ತಕಮೇವ ಹಿ ಅನುಕಮ್ಪಕಸ್ಸ ಸತ್ಥು ಕಿಚ್ಚಂ ಯದಿದಂ ಅವಿಪರೀತಧಮ್ಮದೇಸನಾ, ಇತೋ ಪರಂ ಪನ ಪಟಿಪತ್ತಿ ನಾಮ ಸಾವಕಾನಂ ಕಿಚ್ಚಂ. ತೇನಾಹ – ಏತಾನಿ ಭಿಕ್ಖು ರುಕ್ಖಮೂಲಾನಿ…ಪೇ… ಅಮ್ಹಾಕಂ ಅನುಸಾಸನೀತಿ. ತತ್ಥ ಚ ರುಕ್ಖಮೂಲಾನೀತಿ ಇಮಿನಾ ರುಕ್ಖಮೂಲಸೇನಾಸನಂ ದಸ್ಸೇತಿ. ಸುಞ್ಞಾಗಾರಾನೀತಿ ಇಮಿನಾ ಜನವಿವಿತ್ತಟ್ಠಾನಂ. ಉಭಯೇನಾಪಿ ಚ ಯೋಗಾನುರೂಪಂ ಸೇನಾಸನಮಾಚಿಕ್ಖತಿ, ದಾಯಜ್ಜಂ ನಿಯ್ಯಾತೇತಿ. ಝಾಯಥಾತಿ ಆರಮ್ಮಣೂಪನಿಜ್ಝಾನೇನ ಅಟ್ಠತಿಂಸಾರಮ್ಮಣಾನಿ, ಲಕ್ಖಣೂಪನಿಜ್ಝಾನೇನ ಚ ಅನಿಚ್ಚಾದಿತೋ ಖನ್ಧಾಯತನಾದೀನಿ ಉಪನಿಜ್ಝಾಯಥ, ಸಮಥಞ್ಚ ವಿಪಸ್ಸನಞ್ಚ ವಡ್ಢೇಥಾತಿ ವುತ್ತಂ ಹೋತಿ. ಮಾ ಪಮಾದತ್ಥಾತಿ ಮಾ ಪಮಜ್ಜಿತ್ಥ. ಮಾ ಪಚ್ಛಾ ವಿಪ್ಪಟಿಸಾರಿನೋ ಅಹುವತ್ಥಾತಿ ಯೇ ಹಿ ಪುಬ್ಬೇ ದಹರಕಾಲೇ ಆರೋಗ್ಯಕಾಲೇ ಸತ್ತಸಪ್ಪಾಯಾದಿಸಮ್ಪತ್ತಿಕಾಲೇ ಸತ್ಥು ಸಮ್ಮುಖೀಭಾವಕಾಲೇ ಚ ಯೋನಿಸೋಮನಸಿಕಾರವಿರಹಿತಾ ರತ್ತಿನ್ದಿವಂ ಮಙ್ಕುಲಭತ್ತಾ ಹುತ್ವಾ ಸೇಯ್ಯಸುಖಮಿದ್ಧಸುಖಮನುಯುತ್ತಾ ಪಮಜ್ಜನ್ತಿ, ತೇ ಪಚ್ಛಾ ಜರಾಕಾಲೇ ರೋಗಕಾಲೇ ಮರಣಕಾಲೇ ವಿಪತ್ತಿಕಾಲೇ ಸತ್ಥು ಪರಿನಿಬ್ಬಾನಕಾಲೇ ಚ ತಂ ಪುಬ್ಬೇ ಪಮಾದವಿಹಾರಂ ಅನುಸ್ಸರನ್ತಾ ಸಪ್ಪಟಿಸನ್ಧಿಕಾಲಕಿರಿಯಞ್ಚ ಭಾರಿಯಂ ಸಮ್ಪಸ್ಸಮಾನಾ ವಿಪ್ಪಟಿಸಾರಿನೋ ಹೋನ್ತಿ. ತುಮ್ಹೇ ಪನ ತಾದಿಸಾ ಮಾ ಅಹುವತ್ಥಾತಿ ಏತಮತ್ಥಂ ದಸ್ಸೇನ್ತೋ ಆಹ – ‘‘ಮಾ ಪಚ್ಛಾ ವಿಪ್ಪಟಿಸಾರಿನೋ ಅಹುವತ್ಥಾ’’ತಿ. ಅಯಂ ವೋ ಅಮ್ಹಾಕಂ ಅನುಸಾಸನೀತಿ ಅಯಂ ಅಮ್ಹಾಕಂ ಸನ್ತಿಕಾ ‘‘ಝಾಯಥ ಮಾ ಪಮಾದತ್ಥಾ’’ತಿ ತುಮ್ಹಾಕಂ ಅನುಸಾಸನೀ, ಓವಾದೋತಿ ವುತ್ತಂ ಹೋತಿ.

೪. ದುತಿಯಧಮ್ಮವಿಹಾರೀಸುತ್ತವಣ್ಣನಾ

೭೪. ಚತುತ್ಥೇ ಉತ್ತರಿ ಚಸ್ಸ ಪಞ್ಞಾಯ ಅತ್ಥಂ ನಪ್ಪಜಾನಾತೀತಿ ತತೋ ಪರಿಯತ್ತಿತೋ ಉತ್ತರಿ ತಸ್ಸ ಧಮ್ಮಸ್ಸ ಸಹವಿಪಸ್ಸನಾಯ ಮಗ್ಗಪಞ್ಞಾಯ ಅತ್ಥಂ ನಪ್ಪಜಾನಾತಿ, ಚತ್ತಾರಿ ಸಚ್ಚಾನಿ ನ ಪಸ್ಸತಿ ನಪ್ಪಟಿವಿಜ್ಝತೀತಿ ಅತ್ಥೋ. ಸೇಸವಾರೇಸುಪಿ ಏಸೇವ ನಯೋ. ಏವಮೇತೇಸು ದ್ವೀಸುಪಿ ಸುತ್ತೇಸು ಬಹುಸ್ಸುತಭಿಕ್ಖು ವಿಪಸ್ಸನಾಕಮ್ಮಿಕೋ ಸೋತಾಪನ್ನೋ ಸಕದಾಗಾಮೀ ಅನಾಗಾಮೀ ಖೀಣಾಸವೋತಿ ಛ ಜನಾ ಧಮ್ಮವಿಹಾರಿನೋ ನಾಮಾತಿ ವೇದಿತಬ್ಬಾ.

೫. ಪಠಮಯೋಧಾಜೀವಸುತ್ತವಣ್ಣನಾ

೭೫. ಪಞ್ಚಮೇ ಯೋಧಾಜೀವಾತಿ ಯುದ್ಧೂಪಜೀವಿನೋ. ರಜಗ್ಗನ್ತಿ ಹತ್ಥಿಅಸ್ಸಾದೀನಂ ಪಾದಪ್ಪಹಾರಭಿನ್ನಾಯ ಭೂಮಿಯಾ ಉಗ್ಗತಂ ರಜಕ್ಖನ್ಧಂ. ನ ಸನ್ಥಮ್ಭತೀತಿ ಸನ್ಥಮ್ಭಿತ್ವಾ ಠಾತುಂ ನ ಸಕ್ಕೋತಿ. ಸಹತಿ ರಜಗ್ಗನ್ತಿ ರಜಕ್ಖನ್ಧಂ ದಿಸ್ವಾಪಿ ಅಧಿವಾಸೇತಿ. ಧಜಗ್ಗನ್ತಿ ಹತ್ಥಿಅಸ್ಸದೀನಂ ಪಿಟ್ಠೇಸು ವಾ ರಥೇಸು ವಾ ಉಸ್ಸಾಪಿತಾನಂ ಧಜಾನಂ ಅಗ್ಗಂ. ಉಸ್ಸಾರಣನ್ತಿ ಹತ್ಥಿಅಸ್ಸರಥಾನಞ್ಚೇವ ಬಲಕಾಯಸ್ಸ ಚ ಉಚ್ಚಾಸದ್ದಮಹಾಸದ್ದಂ. ಸಮ್ಪಹಾರೇತಿ ಸಮಾಗತೇ ಅಪ್ಪಮತ್ತಕೇಪಿ ಪಹಾರೇ. ಹಞ್ಞತೀತಿ ವಿಹಞ್ಞತಿ ವಿಘಾತಂ ಆಪಜ್ಜತಿ. ಬ್ಯಾಪಜ್ಜತೀತಿ ವಿಪತ್ತಿಂ ಆಪಜ್ಜತಿ, ಪಕತಿಭಾವಂ ಜಹತಿ. ಸಹತಿ ಸಮ್ಪಹಾರನ್ತಿ ದ್ವೇ ತಯೋ ಪಹಾರೇ ಪತ್ವಾಪಿ ಸಹತಿ ಅಧಿವಾಸೇತಿ. ತಮೇವ ಸಙ್ಗಾಮಸೀಸನ್ತಿ ತಂಯೇವ ಜಯಕ್ಖನ್ಧಾವಾರಟ್ಠಾನಂ. ಅಜ್ಝಾವಸತೀತಿ ಸತ್ತಾಹಮತ್ತಂ ಅಭಿಭವಿತ್ವಾ ಆವಸತಿ. ಕಿಂ ಕಾರಣಾ? ಲದ್ಧಪಹಾರಾನಂ ಪಹಾರಜಗ್ಗನತ್ಥಞ್ಚೇವ ಕತಕಮ್ಮಾನಂ ವಿಸೇಸಂ ಞತ್ವಾ ಠಾನನ್ತರದಾನತ್ಥಞ್ಚ ಇಸ್ಸರಿಯಸುಖಾನುಭವನತ್ಥಞ್ಚ.

ಇದಾನಿ ಯಸ್ಮಾ ಸತ್ಥು ಯೋಧಾಜೀವೇಹಿ ಕಿಚ್ಚಂ ನತ್ಥಿ, ಇಮಸ್ಮಿಂ ಪನ ಸಾಸನೇ ತಥಾರೂಪೇ ಪಞ್ಚ ಪುಗ್ಗಲೇ ದಸ್ಸೇತುಂ ಇದಂ ಓಪಮ್ಮಂ ಆಭತಂ. ತಸ್ಮಾ ತೇ ಪುಗ್ಗಲೇ ದಸ್ಸೇನ್ತೋ ಏವಮೇವ ಖೋತಿಆದಿಮಾಹ. ತತ್ಥ ಸಂಸೀದತೀತಿ ಮಿಚ್ಛಾವಿತಕ್ಕಸ್ಮಿಂ ಸಂಸೀದತಿ ಅನುಪ್ಪವಿಸತಿ. ನ ಸಕ್ಕೋತಿ ಬ್ರಹ್ಮಚರಿಯಂ ಸನ್ಧಾರೇತುನ್ತಿ ಬ್ರಹ್ಮಚರಿಯವಾಸಂ ಅನುಪಚ್ಛಿಜ್ಜಮಾನಂ ಗೋಪೇತುಂ ನ ಸಕ್ಕೋತಿ. ಸಿಕ್ಖಾದುಬ್ಬಲ್ಯಂ ಆವಿಕತ್ವಾತಿ ಸಿಕ್ಖಾಯ ದುಬ್ಬಲಭಾವಂ ಪಕಾಸೇತ್ವಾ. ಕಿಮಸ್ಸ ರಜಗ್ಗಸ್ಮಿನ್ತಿ ಕಿಂ ತಸ್ಸ ಪುಗ್ಗಲಸ್ಸ ರಜಗ್ಗಂ ನಾಮಾತಿ ವದತಿ. ಅಭಿರೂಪಾತಿ ಅಭಿರೂಪವತೀ. ದಸ್ಸನೀಯಾತಿ ದಸ್ಸನಯೋಗ್ಗಾ. ಪಾಸಾದಿಕಾತಿ ದಸ್ಸನೇನೇವ ಚಿತ್ತಪ್ಪಸಾದಾವಹಾ. ಪರಮಾಯಾತಿ ಉತ್ತಮಾಯ. ವಣ್ಣಪೋಕ್ಖರತಾಯಾತಿ ಸರೀರವಣ್ಣೇನ ಚೇವ ಅಙ್ಗಸಣ್ಠಾನೇನ ಚ. ಊಹಸತೀತಿ ಅವಹಸತಿ. ಉಲ್ಲಪತೀತಿ ಕಥೇತಿ. ಉಜ್ಝಗ್ಘತೀತಿ ಪಾಣಿಂ ಪಹರಿತ್ವಾ ಮಹಾಹಸಿತಂ ಹಸತಿ. ಉಪ್ಪಣ್ಡೇತೀತಿ ಉಪ್ಪಣ್ಡನಕಥಂ ಕಥೇತಿ. ಅಭಿನಿಸೀದತೀತಿ ಅಭಿಭವಿತ್ವಾ ಸನ್ತಿಕೇ ವಾ ಏಕಾಸನೇ ವಾ ನಿಸೀದತಿ. ದುತಿಯಪದೇಪಿ ಏಸೇವ ನಯೋ. ಅಜ್ಝೋತ್ಥರತೀತಿ ಅವತ್ಥರತಿ. ವಿನಿವೇಠೇತ್ವಾ ವಿನಿಮೋಚೇತ್ವಾತಿ ಗಹಿತಟ್ಠಾನತೋ ತಸ್ಸಾ ಹತ್ಥಂ ವಿನಿಬ್ಬೇಠೇತ್ವಾ ಚೇವ ಮೋಚೇತ್ವಾ ಚ. ಸೇಸಮೇತ್ಥ ಉತ್ತಾನತ್ಥಮೇವಾತಿ. ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥಿತಂ.

೬. ದುತಿಯಯೋಧಾಜೀವಸುತ್ತವಣ್ಣನಾ

೭೬. ಛಟ್ಠೇ ಅಸಿಚಮ್ಮಂ ಗಹೇತ್ವಾತಿ ಅಸಿಞ್ಚ ಚಮ್ಮಞ್ಚ ಗಹೇತ್ವಾ. ಧನುಕಲಾಪಂ ಸನ್ನಯ್ಹಿತ್ವಾತಿ ಧನುಞ್ಚ ಸರಕಲಾಪಞ್ಚ ಸನ್ನಯ್ಹಿತ್ವಾ. ವಿಯೂಳ್ಹನ್ತಿ ಯುದ್ಧಸನ್ನಿವೇಸವೇಸೇನ ಠಿತಂ. ಸಙ್ಗಾಮಂ ಓತರತೀತಿ ಮಹಾಯುದ್ಧಂ ಓತರತಿ. ಉಸ್ಸಹತಿ ವಾಯಮತೀತಿ ಉಸ್ಸಾಹಞ್ಚ ವಾಯಾಮಞ್ಚ ಕರೋತಿ. ಹನನ್ತೀತಿ ಘಾತೇನ್ತಿ. ಪರಿಯಾಪಾದೇನ್ತೀತಿ ಪರಿಯಾಪಾದಯನ್ತಿ. ಉಪಲಿಕ್ಖನ್ತೀತಿ ವಿಜ್ಝನ್ತಿ. ಅಪನೇನ್ತೀತಿ ಸಕಸೇನಂ ಗಹೇತ್ವಾ ಗಚ್ಛನ್ತಿ. ಅಪನೇತ್ವಾ ಞಾತಕಾನಂ ನೇನ್ತೀತಿ ಸಕಸೇನಂ ನೇತ್ವಾ ತತೋ ಞಾತಕಾನಂ ಸನ್ತಿಕಂ ನೇನ್ತಿ. ನೀಯಮಾನೋತಿ ಅತ್ತನೋ ಗೇಹಂ ವಾ ಸೇಸಞಾತಿಸನ್ತಿಕಂ ವಾ ನಿಯ್ಯಮಾನೋ. ಉಪಟ್ಠಹನ್ತಿ ಪರಿಚರನ್ತೀತಿ ಪಹಾರಸೋಧನವಣಕಪ್ಪನಾದೀನಿ ಕರೋನ್ತಾ ಜಗ್ಗನ್ತಿ ಗೋಪಯನ್ತಿ.

ಅರಕ್ಖಿತೇನೇವ ಕಾಯೇನಾತಿ ಅರಕ್ಖಿತೇನ ಕಾಯದ್ವಾರೇನ. ಅರಕ್ಖಿತಾಯ ವಾಚಾಯಾತಿ ಅರಕ್ಖಿತೇನ ವಚೀದ್ವಾರೇನ. ಅರಕ್ಖಿತೇನ ಚಿತ್ತೇನಾತಿ ಅರಕ್ಖಿತೇನ ಮನೋದ್ವಾರೇನ. ಅನುಪಟ್ಠಿತಾಯ ಸತಿಯಾತಿ ಸತಿಂ ಸುಪಟ್ಠಿತಂ ಅಕತ್ವಾ. ಅಸಂವುತೇಹಿ ಇನ್ದ್ರಿಯೇಹೀತಿ ಮನಚ್ಛಟ್ಠೇಹಿ ಇನ್ದ್ರಿಯೇಹಿ ಅಪಿಹಿತೇಹಿ ಅಗೋಪಿತೇಹಿ. ರಾಗೋ ಚಿತ್ತಂ ಅನುದ್ಧಂಸೇತೀತಿ ರಾಗೋ ಉಪ್ಪಜ್ಜಮಾನೋವ ಸಮಥವಿಪಸ್ಸನಾಚಿತ್ತಂ ಧಂಸೇತಿ, ದೂರೇ ಖಿಪತಿ. ರಾಗಪರಿಯುಟ್ಠಿತೋಮ್ಹಿ, ಆವುಸೋ, ರಾಗಪರೇತೋತಿ ಅಹಂ, ಆವುಸೋ, ರಾಗೇನ ರತ್ತೋ, ರಾಗೇನ ಅನುಗತೋ.

ಅಟ್ಠಿಕಙ್ಕಲೂಪಮಾತಿಆದೀಸು ಅಟ್ಠಿಕಙ್ಕಲೂಪಮಾ ಅಪ್ಪಸ್ಸಾದಟ್ಠೇನ. ಮಂಸಪೇಸೂಪಮಾ ಬಹುಸಾಧಾರಣಟ್ಠೇನ. ತಿಣುಕ್ಕೂಪಮಾ ಅನುದಹನಟ್ಠೇನ. ಅಙ್ಗಾರಕಾಸೂಪಮಾ ಮಹಾಭಿತಾಪಟ್ಠೇನ. ಸುಪಿನಕೂಪಮಾ ಇತ್ತರಪಚ್ಚುಪಟ್ಠಾನಟ್ಠೇನ. ಯಾಚಿತಕೂಪಮಾ ತಾವಕಾಲಿಕಟ್ಠೇನ. ರುಕ್ಖಫಲೂಪಮಾ ಸಬ್ಬಙ್ಗಪಚ್ಚಙ್ಗಪಲಿಭಞ್ಜನಟ್ಠೇನ. ಅಸಿಸೂನೂಪಮಾ ಅಧಿಕುಟ್ಟನಟ್ಠೇನ. ಸತ್ತಿಸೂಲೂಪಮಾ ವಿನಿವಿಜ್ಝನಟ್ಠೇನ. ಸಪ್ಪಸಿರೂಪಮಾ ಸಾಸಙ್ಕಸಪ್ಪಟಿಭಯಟ್ಠೇನ. ಉಸ್ಸಹಿಸ್ಸಾಮೀತಿ ಉಸ್ಸಾಹಂ ಕರಿಸ್ಸಾಮಿ. ಧಾರಯಿಸ್ಸಾಮೀತಿ ಸಮಣಭಾವಂ ಧಾರಯಿಸ್ಸಾಮಿ. ಅಭಿರಮಿಸ್ಸಾಮೀತಿ ಅಭಿರತಿಂ ಉಪ್ಪಾದೇಸ್ಸಾಮಿ ನ ಉಕ್ಕಣ್ಠಿಸ್ಸಾಮಿ. ಸೇಸಮೇತ್ಥ ಉತ್ತಾನತ್ಥಮೇವ. ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥಿತನ್ತಿ.

೭. ಪಠಮಅನಾಗತಭಯಸುತ್ತವಣ್ಣನಾ

೭೭. ಸತ್ತಮೇ ಆರಞ್ಞಕೇನಾತಿ ಅರಞ್ಞವಾಸಿನಾ. ಅಪ್ಪತ್ತಸ್ಸಾತಿ ಅಸಮ್ಪತ್ತಸ್ಸ ಝಾನವಿಪಸ್ಸನಾಮಗ್ಗಫಲಪ್ಪಭೇದಸ್ಸ ವಿಸೇಸಸ್ಸ ಪತ್ತಿಯಾ. ಸೇಸಪದೇಸುಪಿ ಏಸೇವ ನಯೋ. ಸೋ ಮಮಸ್ಸ ಅನ್ತರಾಯೋತಿ ಸೋ ಮಮ ಜೀವಿತನ್ತರಾಯೋ ಚ ಬ್ರಹ್ಮಚರಿಯನ್ತರಾಯೋ ಚ, ಪುಥುಜ್ಜನಕಾಲಕಿರಿಯಂ ಕರೋನ್ತಸ್ಸ ಸಗ್ಗನ್ತರಾಯೋ ಚ ಮಗ್ಗನ್ತರಾಯೋ ಚ ಭವೇಯ್ಯ. ಹನ್ದಾತಿ ವವಸ್ಸಗ್ಗತ್ಥೇ ನಿಪಾತೋ. ವೀರಿಯಂ ಆರಭಾಮೀತಿ ದುವಿಧಮ್ಪಿ ವೀರಿಯಂ ಕರೋಮಿ. ಸತ್ಥಕಾತಿ ಸತ್ಥಂ ವಿಯ ಸನ್ಧಿಬನ್ಧನಚ್ಛೇದಕವಾತಾ. ವಾಳೇಹೀತಿ ಕಕ್ಖಳೇಹಿ. ಮಾಣವೇಹೀತಿ ಚೋರೇಹಿ. ಕತಕಮ್ಮೇಹಿ ವಾ ಅಕತಕಮ್ಮೇಹಿ ವಾತಿ ಏತ್ಥ ಚೋರಿಕಂ ಕತ್ವಾ ನಿಕ್ಖನ್ತಾ ಕತಕಮ್ಮಾ ನಾಮ, ಚೋರಿಕಂ ಕಾತುಂ ಗಚ್ಛನ್ತಾ ಅಕತಕಮ್ಮಾ ನಾಮ. ತತ್ಥ ಕತಕಮ್ಮಾ ಕಮ್ಮಸ್ಸ ನಿಪ್ಫನ್ನತ್ತಾ ಸತ್ತಾನಂ ಗಲಲೋಹಿತಂ ಗಹೇತ್ವಾ ದೇವತಾನಂ ಬಲಿಂ ಕರೋನ್ತಿ, ಅಕತಕಮ್ಮಾ ‘‘ಏವಂ ನೋ ಕಮ್ಮಂ ನಿಪ್ಫಜ್ಜಿಸ್ಸತೀ’’ತಿ ಪಠಮತರಂ ಕರೋನ್ತಿ. ಇದಂ ಸನ್ಧಾಯ ತೇ ಮಂ ಜೀವಿತಾ ವೋರೋಪೇಯ್ಯುನ್ತಿ ವುತ್ತಂ. ವಾಳಾ ಅಮನುಸ್ಸಾತಿ ಕಕ್ಖಳಾ ದುಟ್ಠಾ ಯಕ್ಖಾದಯೋ ಅಮನುಸ್ಸಾ.

೮. ದುತಿಯಅನಾಗತಭಯಸುತ್ತವಣ್ಣನಾ

೭೮. ಅಟ್ಠಮೇ ಪುರಾ ಮಂ ಸೋ ಧಮ್ಮೋ ಆಗಚ್ಛತೀತಿ ಯಾವ ಸೋ ಧಮ್ಮೋ ಮಂ ನ ಉಪಗಚ್ಛತಿ, ತಾವ ಅಹಂ ಪುರೇತರಮೇವ ವೀರಿಯಂ ಆರಭಾಮೀತಿ ಅತ್ಥೋ. ಖೀರೋದಕೀಭೂತಾತಿ ಖೀರೋದಕಂ ವಿಯ ಭೂತಾ ಏಕೀಭಾವಂ ಉಪಗತಾ. ಪಿಯಚಕ್ಖೂಹೀತಿ ಮೇತ್ತಚಕ್ಖೂಹಿ.

೯. ತತಿಯಅನಾಗತಭಯಸುತ್ತವಣ್ಣನಾ

೭೯. ನವಮೇ ಧಮ್ಮಸನ್ದೋಸಾ ವಿನಯಸನ್ದೋಸೋತಿ ಧಮ್ಮಸನ್ದೋಸೇನ ವಿನಯಸನ್ದೋಸೋ ಹೋತಿ. ಕಥಂ ಪನ ಧಮ್ಮಸ್ಮಿಂ ದುಸ್ಸನ್ತೇ ವಿನಯೋ ದುಸ್ಸತಿ ನಾಮ? ಸಮಥವಿಪಸ್ಸನಾಧಮ್ಮೇಸು ಗಬ್ಭಂ ಅಗ್ಗಣ್ಹನ್ತೇಸು ಪಞ್ಚವಿಧೋ ವಿನಯೋ ನ ಹೋತಿ, ಏವಂ ಧಮ್ಮೇ ದುಸ್ಸನ್ತೇ ವಿನಯೋ ದುಸ್ಸತಿ. ದುಸ್ಸೀಲಸ್ಸ ಪನ ಸಂವರವಿನಯೋ ನಾಮ ನ ಹೋತಿ, ತಸ್ಮಿಂ ಅಸತಿ ಸಮಥವಿಪಸ್ಸನಾ ಗಬ್ಭಂ ನ ಗಣ್ಹಾತಿ. ಏವಂ ವಿನಯಸನ್ದೋಸೇನಪಿ ಧಮ್ಮಸನ್ದೋಸೋ ವೇದಿತಬ್ಬೋ. ಅಭಿಧಮ್ಮಕಥನ್ತಿ ಸೀಲಾದಿಉತ್ತಮಧಮ್ಮಕಥಂ. ವೇದಲ್ಲಕಥನ್ತಿ ವೇದಪಟಿಸಂಯುತ್ತಂ ಞಾಣಮಿಸ್ಸಕಕಥಂ. ಕಣ್ಹಧಮ್ಮಂ ಓಕ್ಕಮಮಾನಾತಿ ರನ್ಧಗವೇಸಿತಾಯ ಉಪಾರಮ್ಭಪರಿಯೇಸನವಸೇನ ಕಾಳಕಧಮ್ಮಂ ಓಕ್ಕಮಮಾನಾ. ಅಪಿಚ ದುಟ್ಠಚಿತ್ತೇನ ಪುಗ್ಗಲಂ ಘಟ್ಟೇನ್ತಾಪಿ ತಂ ಕಣ್ಹಧಮ್ಮಂ ಅತ್ತನೋ ದಹನ್ತಾಪಿ ಲಾಭಸಕ್ಕಾರತ್ಥಂ ಕಥೇನ್ತಾಪಿ ಕಣ್ಹಧಮ್ಮಂ ಓಕ್ಕಮನ್ತಿಯೇವ.

ಗಮ್ಭೀರಾತಿ ಪಾಳಿಗಮ್ಭೀರಾ. ಗಮ್ಭೀರತ್ಥಾತಿ ಅತ್ಥಗಮ್ಭೀರಾ. ಲೋಕುತ್ತರಾತಿ ಲೋಕುತ್ತರಧಮ್ಮದೀಪಕಾ. ಸುಞ್ಞತಾಪಟಿಸಂಯುತ್ತಾತಿ ಖನ್ಧಧಾತುಆಯತನಪಚ್ಚಯಾಕಾರಪಟಿಸಂಯುತ್ತಾ. ನ ಅಞ್ಞಾ ಚಿತ್ತಂ ಉಪಟ್ಠಪೇಸ್ಸನ್ತೀತಿ ಜಾನನತ್ಥಾಯ ಚಿತ್ತಂ ನ ಠಪೇಸ್ಸನ್ತಿ. ಉಗ್ಗಹೇತಬ್ಬಂ ಪರಿಯಾಪುಣಿತಬ್ಬನ್ತಿ ಉಗ್ಗಹೇತಬ್ಬೇ ಚ ವಳಞ್ಜೇತಬ್ಬೇ ಚ. ಕವಿತಾತಿ ಸಿಲೋಕಾದಿಬನ್ಧನವಸೇನ ಕವೀಹಿ ಕತಾ. ಕಾವೇಯ್ಯಾತಿ ತಸ್ಸೇವ ವೇವಚನಂ. ಬಾಹಿರಕಾತಿ ಸಾಸನತೋ ಬಹಿದ್ಧಾ ಠಿತಾ. ಸಾವಕಭಾಸಿತಾತಿ ಬಾಹಿರಸಾವಕೇಹಿ ಭಾಸಿತಾ. ಸೇಸಮೇತ್ಥ ಹೇಟ್ಠಾ ವುತ್ತನಯತ್ತಾ ಸುವಿಞ್ಞೇಯ್ಯತ್ತಾ ಚ ಉತ್ತಾನತ್ಥಮೇವ.

೧೦. ಚತುತ್ಥಅನಾಗತಭಯಸುತ್ತವಣ್ಣನಾ

೮೦. ದಸಮೇ ಕಲ್ಯಾಣಕಾಮಾತಿ ಸುನ್ದರಕಾಮಾ. ರಸಗ್ಗಾನೀತಿ ಉತ್ತಮರಸಾನಿ. ಸಂಸಟ್ಠಾ ವಿಹರಿಸ್ಸನ್ತೀತಿ ಪಞ್ಚವಿಧೇನ ಸಂಸಗ್ಗೇನ ಸಂಸಟ್ಠಾ ವಿಹರಿಸ್ಸನ್ತಿ. ಸನ್ನಿಧಿಕಾರಪರಿಭೋಗನ್ತಿ ಸನ್ನಿಧಿಕತಸ್ಸ ಪರಿಭೋಗಂ. ಓಳಾರಿಕಮ್ಪಿ ನಿಮಿತ್ತನ್ತಿ ಏತ್ಥ ಪಥವಿಂ ಖಣನ್ತೋಪಿ ಖಣಾಹೀತಿ ಆಣಾಪೇನ್ತೋಪಿ ಪಥವಿಯಂ ಓಳಾರಿಕಂ ನಿಮಿತ್ತಂ ಕರೋತಿ ನಾಮ. ತಿಣಕಟ್ಠಸಾಖಾಪಲಾಸಂ ಛಿನ್ದನ್ತೋಪಿ ಛಿನ್ದಾತಿ ಆಣಾಪೇನ್ತೋಪಿ ಹರಿತಗ್ಗೇ ಓಳಾರಿಕಂ ನಿಮಿತ್ತಂ ಕರೋತಿ ನಾಮ. ಆಜೀವತ್ಥಾಯ ಪಣ್ಣನಿವಾಪಆದೀನಿ ಗಾಹಾಪೇನ್ತೋ ಫಲಾನಿ ಓಚಿನನ್ತೇ ವಾ ಓಚಿನಾಪೇನ್ತೇನ ವತ್ತಬ್ಬಮೇವ ನತ್ಥಿ. ಇಮೇಸು ಚತೂಸು ಸುತ್ತೇಸು ಸತ್ಥಾರಾ ಸಾಸನೇ ವುದ್ಧಿಪರಿಹಾನಿ ಕಥಿತಾತಿ.

ಯೋಧಾಜೀವವಗ್ಗೋ ತತಿಯೋ.

(೯) ೪. ಥೇರವಗ್ಗೋ

೧. ರಜನೀಯಸುತ್ತವಣ್ಣನಾ

೮೧. ಚತುತ್ಥಸ್ಸ ಪಠಮೇ ರಜನೀಯೇಸೂತಿ ರಾಗಸ್ಸ ಪಚ್ಚಯೇಸು ಆರಮ್ಮಣೇಸು. ಸೇಸೇಸುಪಿ ಏಸೇವ ನಯೋ.

೨. ವೀತರಾಗಸುತ್ತವಣ್ಣನಾ

೮೨. ದುತಿಯೇ ಮಕ್ಖೀತಿ ಗುಣಮಕ್ಖಕೋ. ಪಳಾಸೀತಿ ಯುಗಗ್ಗಾಹಲಕ್ಖಣೇನ ಪಳಾಸೇನ ಸಮನ್ನಾಗತೋ.

೩. ಕುಹಕಸುತ್ತವಣ್ಣನಾ

೮೩. ತತಿಯೇ ಕುಹಕೋತಿ ತೀಹಿ ಕುಹನವತ್ಥೂಹಿ ಸಮನ್ನಾಗತೋ. ಲಪಕೋತಿ ಲಾಭಸನ್ನಿಸ್ಸಿತಾಯ ಲಪನಾಯ ಸಮನ್ನಾಗತೋ. ನೇಮಿತ್ತಿಕೋತಿ ನಿಮಿತ್ತಕಿರಿಯಕಾರಕೋ. ನಿಪ್ಪೇಸಿಕೋತಿ ನಿಪ್ಪೇಸನಕತಾಯ ಸಮನ್ನಾಗತೋ. ಲಾಭೇನ ಚ ಲಾಭಂ ನಿಜಿಗೀಸಿತಾತಿ ಲಾಭೇನ ಲಾಭಗವೇಸಕೋ. ಸುಕ್ಕಪಕ್ಖೋ ವುತ್ತವಿಪಲ್ಲಾಸವಸೇನ ವೇದಿತಬ್ಬೋ. ಚತುತ್ಥಂ ಉತ್ತಾನಮೇವ.

೫. ಅಕ್ಖಮಸುತ್ತವಣ್ಣನಾ

೮೫. ಪಞ್ಚಮೇ ಅಕ್ಖಮೋ ಹೋತಿ ರೂಪಾನನ್ತಿ ರೂಪಾರಮ್ಮಣಾನಂ ಅನಧಿವಾಸಕೋ ಹೋತಿ, ತದಾರಮ್ಮಣೇಹಿ ರಾಗಾದೀಹಿ ಅಭಿಭುಯ್ಯತಿ. ಏಸೇವ ನಯೋ ಸಬ್ಬತ್ಥ.

೬. ಪಟಿಸಮ್ಭಿದಾಪ್ಪತ್ತಸುತ್ತವಣ್ಣನಾ

೮೬. ಛಟ್ಠೇ ಅತ್ಥಪಟಿಸಮ್ಭಿದಾಪ್ಪತ್ತೋತಿ ಪಞ್ಚಸು ಅತ್ಥೇಸು ಪಭೇದಗತಂ ಞಾಣಂ ಪತ್ತೋ. ಧಮ್ಮಪಟಿಸಮ್ಭಿದಾಪ್ಪತ್ತೋತಿ ಚತುಬ್ಬಿಧೇ ಧಮ್ಮೇ ಪಭೇದಗತಂ ಞಾಣಂ ಪತ್ತೋ. ನಿರುತ್ತಿಪಟಿಸಮ್ಭಿದಾಪ್ಪತ್ತೋತಿ ಧಮ್ಮನಿರುತ್ತೀಸು ಪಭೇದಗತಂ ಞಾಣಂ ಪತ್ತೋ. ಪಟಿಭಾನಪಟಿಸಮ್ಭಿದಾಪ್ಪತ್ತೋತಿ ತೇಸು ತೀಸು ಞಾಣೇಸು ಪಭೇದಗತಂ ಞಾಣಂ ಪತ್ತೋ. ಸೋ ಪನ ತಾನಿ ತೀಣಿ ಞಾಣಾನೇವ ಜಾನಾತಿ, ನ ತೇಸಂ ಕಿಚ್ಚಂ ಕರೋತಿ. ಉಚ್ಚಾವಚಾನೀತಿ ಮಹನ್ತಖುದ್ದಕಾನಿ. ಕಿಂಕರಣೀಯಾನೀತಿ ಇತಿ ಕತ್ತಬ್ಬಾನಿ.

೭. ಸೀಲವನ್ತಸುತ್ತವಣ್ಣನಾ

೮೭. ಸತ್ತಮಂ ಉತ್ತಾನತ್ಥಮೇವ. ಸೀಲಂ ಪನೇತ್ಥ ಖೀಣಾಸವಸೀಲಮೇವ, ಬಾಹುಸಚ್ಚಮ್ಪಿ ಖೀಣಾಸವಬಾಹುಸಚ್ಚಮೇವ, ವಾಚಾಪಿ ಖೀಣಾಸವಸ್ಸ ಕಲ್ಯಾಣವಾಚಾವ, ಝಾನಾನಿಪಿ ಕಿರಿಯಜ್ಝಾನಾನೇವ ಕಥಿತಾನೀತಿ ವೇದಿತಬ್ಬಾನಿ.

೮. ಥೇರಸುತ್ತವಣ್ಣನಾ

೮೮. ಅಟ್ಠಮೇ ಥೇರೋತಿ ಥಿರಭಾವಪ್ಪತ್ತೋ. ರತ್ತಞ್ಞೂತಿ ಪಬ್ಬಜಿತದಿವಸತೋ ಪಟ್ಠಾಯ ಅತಿಕ್ಕನ್ತಾನಂ ಬಹೂನಂ ರತ್ತೀನಂ ಞಾತಾ. ಞಾತೋತಿ ಪಞ್ಞಾತೋ ಪಾಕಟೋ. ಯಸಸ್ಸೀತಿ ಯಸನಿಸ್ಸಿತೋ. ಮಿಚ್ಛಾದಿಟ್ಠಿಕೋತಿ ಅಯಾಥಾವದಿಟ್ಠಿಕೋ. ಸದ್ಧಮ್ಮಾ ವುಟ್ಠಾಪೇತ್ವಾತಿ ದಸಕುಸಲಕಮ್ಮಪಥಧಮ್ಮತೋ ವುಟ್ಠಾಪೇತ್ವಾ. ಅಸದ್ಧಮ್ಮೇ ಪತಿಟ್ಠಾಪೇತೀತಿ ಅಕುಸಲಕಮ್ಮಪಥೇಸು ಪತಿಟ್ಠಾಪೇತಿ.

೯. ಪಠಮಸೇಖಸುತ್ತವಣ್ಣನಾ

೮೯. ನವಮೇ ಸೇಖಸ್ಸಾತಿ ಸಿಕ್ಖಕಸ್ಸ ಸಕರಣೀಯಸ್ಸ. ಪರಿಹಾನಾಯಾತಿ ಉಪರಿಗುಣೇಹಿ ಪರಿಹಾನತ್ಥಾಯ. ಕಮ್ಮಾರಾಮತಾತಿ ನವಕಮ್ಮೇ ರಮನಕಭಾವೋ. ಭಸ್ಸಾರಾಮತಾತಿ ಆಲಾಪಸಲ್ಲಾಪೇ ರಮನಕಭಾವೋ. ನಿದ್ದಾರಾಮತಾತಿ ನಿದ್ದಾಯನೇ ರಮನಕಭಾವೋ. ಸಙ್ಗಣಿಕಾರಾಮತಾತಿ ಗಣಸಙ್ಗಣಿಕಾಯ ರಮನಕಭಾವೋ. ಯಥಾವಿಮುತ್ತಂ ಚಿತ್ತಂ ನ ಪಚ್ಚವೇಕ್ಖತೀತಿ ಯಥಾ ಯಂ ಚಿತ್ತಂ ವಿಮುತ್ತಂ, ಯೇ ಚ ದೋಸಾ ಪಹೀನಾ, ಗುಣಾ ಚ ಪಟಿಲದ್ಧಾ, ತೇ ಪಚ್ಚವೇಕ್ಖಿತ್ವಾ ಉಪರಿಗುಣಪಟಿಲಾಭಾಯ ವಾಯಾಮಂ ನ ಕರೋತೀತಿ ಅತ್ಥೋ. ಇತಿ ಇಮಸ್ಮಿಂ ಸುತ್ತೇ ಸತ್ತನ್ನಂ ಸೇಖಾನಂ ಉಪರಿಗುಣೇಹಿ ಪರಿಹಾನಿಕಾರಣಞ್ಚ ವುದ್ಧಿಕಾರಣಞ್ಚ ಕಥಿತಂ. ಯಞ್ಚ ನಾಮ ಸೇಖಸ್ಸ ಪರಿಹಾನಕಾರಣಂ, ತಂ ಪುಥುಜ್ಜನಸ್ಸ ಪಠಮಮೇವ ಹೋತೀತಿ.

೧೦. ದುತಿಯಸೇಖಸುತ್ತವಣ್ಣನಾ

೯೦. ದಸಮೇ ವಿಯತ್ತೋತಿ ಬ್ಯತ್ತೋ ಛೇಕೋ. ಕಿಂಕರಣೀಯೇಸೂತಿ ಇತಿ ಕತ್ತಬ್ಬೇಸು. ಚೇತೋಸಮಥನ್ತಿ ಸಮಾಧಿಕಮ್ಮಟ್ಠಾನಂ. ಅನನುಲೋಮಿಕೇನಾತಿ ಸಾಸನಸ್ಸ ಅನನುಚ್ಛವಿಕೇನ. ಅತಿಕಾಲೇನಾತಿ ಅತಿಪಾತೋವ. ಅತಿದಿವಾತಿ ದಿವಾ ವುಚ್ಚತಿ ಮಜ್ಝನ್ಹಿಕೋ, ತಂ ಅತಿಕ್ಕಮಿತ್ವಾ. ಆಭಿಸಲ್ಲೇಖಿಕಾತಿ ಅತಿವಿಯ ಕಿಲೇಸಸಲ್ಲೇಖಿಕಾ. ಚೇತೋವಿವರಣಸಪ್ಪಾಯಾತಿ ಚಿತ್ತವಿವರಣಸಙ್ಖಾತಾನಂ ಸಮಥವಿಪಸ್ಸನಾನಂ ಸಪ್ಪಾಯಾ. ಅಪ್ಪಿಚ್ಛಕಥಾತಿ ಅಪ್ಪಿಚ್ಛಾ ಹೋಥಾತಿ ಕಥನಕಥಾ. ಸನ್ತುಟ್ಠಿಕಥಾತಿ ಚತೂಹಿ ಪಚ್ಚಯೇಹಿ ಸನ್ತುಟ್ಠಾ ಹೋಥಾತಿ ಕಥನಕಥಾ. ಪವಿವೇಕಕಥಾತಿ ತೀಹಿ ವಿವೇಕೇಹಿ ವಿವಿತ್ತಾ ಹೋಥಾತಿ ಕಥನಕಥಾ. ಅಸಂಸಗ್ಗಕಥಾತಿ ಪಞ್ಚವಿಧೇನ ಸಂಸಗ್ಗೇನ ಅಸಂಸಟ್ಠಾ ಹೋಥಾತಿ ಕಥನಕಥಾ. ವೀರಿಯಾರಮ್ಭಕಥಾತಿ ದುವಿಧಂ ವೀರಿಯಂ ಆರಭಥಾತಿ ಕಥನಕಥಾ. ಸೀಲಕಥಾದೀಸು ಸೀಲಂ ಆರಬ್ಭ ಕಥಾ ಸೀಲಕಥಾ. ಸಮಾಧಿಂ ಆರಬ್ಭ, ಪಞ್ಞಂ ಆರಬ್ಭ, ಪಞ್ಚವಿಧಂ ವಿಮುತ್ತಿಂ ಆರಬ್ಭ, ಏಕೂನವೀಸತಿಪಚ್ಚವೇಕ್ಖಣಸಙ್ಖಾತಂ ವಿಮುತ್ತಿಞಾಣದಸ್ಸನಂ ಆರಬ್ಭ ಕಥಾ ವಿಮುತ್ತಿಞಾಣದಸ್ಸನಕಥಾ. ನ ನಿಕಾಮಲಾಭೀತಿಆದೀಸು ನ ಇಚ್ಛಿತಿಚ್ಛಿತಲಾಭೀ, ದುಕ್ಖಲಾಭೀ ನ ವಿಪುಲಲಾಭೀತಿ ಅತ್ಥೋ. ಸೇಸಂ ಉತ್ತಾನತ್ಥಮೇವಾತಿ.

ಥೇರವಗ್ಗೋ ಚತುತ್ಥೋ.

(೧೦) ೫. ಕಕುಧವಗ್ಗೋ

೧-೨. ಸಮ್ಪದಾಸುತ್ತದ್ವಯವಣ್ಣನಾ

೯೧-೯೨. ಪಞ್ಚಮಸ್ಸ ಪಠಮೇ ಪಞ್ಚ ಸಮ್ಪದಾ ಮಿಸ್ಸಿಕಾ ಕಥಿತಾ. ದುತಿಯೇ ಪುರಿಮಾ ಚತಸ್ಸೋ ಮಿಸ್ಸಿಕಾ, ಪಞ್ಚಮೀ ಲೋಕಿಕಾವ.

೩. ಬ್ಯಾಕರಣಸುತ್ತವಣ್ಣನಾ

೯೩. ತತಿಯೇ ಅಞ್ಞಾಬ್ಯಾಕರಣಾನೀತಿ ಅರಹತ್ತಬ್ಯಾಕರಣಾನಿ. ಮನ್ದತ್ತಾತಿ ಮನ್ದಭಾವೇನ ಅಞ್ಞಾಣೇನ. ಮೋಮೂಹತ್ತಾತಿ ಅತಿಮೂಳ್ಹಭಾವೇನ. ಅಞ್ಞಂ ಬ್ಯಾಕರೋತೀತಿ ಅರಹತ್ತಂ ಪತ್ತೋಸ್ಮೀತಿ ಕಥೇತಿ. ಇಚ್ಛಾಪಕತೋತಿ ಇಚ್ಛಾಯ ಅಭಿಭೂತೋ. ಅಧಿಮಾನೇನಾತಿ ಅಧಿಗತಮಾನೇನ. ಸಮ್ಮದೇವಾತಿ ಹೇತುನಾ ನಯೇನ ಕಾರಣೇನೇವ.

೪-೫. ಫಾಸುವಿಹಾರಸುತ್ತಾದಿವಣ್ಣನಾ

೯೪-೯೫. ಚತುತ್ಥೇ ಫಾಸುವಿಹಾರಾತಿ ಸುಖವಿಹಾರಾ. ಪಞ್ಚಮೇ ಅಕುಪ್ಪನ್ತಿ ಅರಹತ್ತಂ.

೬. ಸುತಧರಸುತ್ತವಣ್ಣನಾ

೯೬. ಛಟ್ಠೇ ಅಪ್ಪಟ್ಠೋತಿ ಅಪ್ಪಸಮಾರಮ್ಭೋ. ಅಪ್ಪಕಿಚ್ಚೋತಿ ಅಪ್ಪಕರಣೀಯೋ. ಸುಭರೋತಿ ಸುಖೇನ ಭರಿತಬ್ಬೋ ಸುಪೋಸೋ. ಸುಸನ್ತೋಸೋತಿ ತೀಹಿ ಸನ್ತೋಸೇಹಿ ಸುಟ್ಠು ಸನ್ತೋಸೋ. ಜೀವಿತಪರಿಕ್ಖಾರೇಸೂತಿ ಜೀವಿತಸಮ್ಭಾರೇಸು. ಅಪ್ಪಾಹಾರೋತಿ ಮನ್ದಾಹಾರೋ. ಅನೋದರಿಕತ್ತನ್ತಿ ನ ಓದರಿಕಭಾವಂ ಅಮಹಗ್ಘಸಭಾವಂ ಅನುಯುತ್ತೋ. ಅಪ್ಪಮಿದ್ಧೋತಿ ನ ಬಹುನಿದ್ದೋ. ಸತ್ತಮಟ್ಠಮಾನಿ ಉತ್ತಾನತ್ಥಾನಿ.

೯. ಸೀಹಸುತ್ತವಣ್ಣನಾ

೯೯. ನವಮೇ ಸಕ್ಕಚ್ಚಞ್ಞೇವ ದೇತಿ ನೋ ಅಸಕ್ಕಚ್ಚನ್ತಿ ಅನವಞ್ಞಾಯ ಅವಿರಜ್ಝಿತ್ವಾವ ದೇತಿ, ನೋ ಅವಞ್ಞಾಯ ವಿರಜ್ಝಿತ್ವಾ. ಮಾ ಮೇ ಯೋಗ್ಗಪಥೋ ನಸ್ಸಾತಿ ಮಯಾ ಕತಯೋಗ್ಗಪಥೋ ಮಯ್ಹಂ ಮಾ ನಸ್ಸತು, ‘‘ಏಕೋ ಸೀಹೋ ಉಟ್ಠಾಯ ಬಿಳಾರಂ ಪಹರನ್ತೋ ವಿರಜ್ಝಿತ್ವಾ ಪಹರೀ’’ತಿ ಏವಂ ವತ್ತಾರೋ ಮಾ ಹೋನ್ತೂತಿ ಅತ್ಥೋ. ಅನ್ನಭಾರನೇಸಾದಾನನ್ತಿ ಏತ್ಥ ಅನ್ನಂ ವುಚ್ಚತಿ ಯವಭತ್ತಂ, ತಂ ಭಾರೋ ಏತೇಸನ್ತಿ ಅನ್ನಭಾರಾ. ಯಾಚಕಾನಂ ಏತಂ ನಾಮಂ. ನೇಸಾದಾ ವುಚ್ಚನ್ತಿ ಸಾಕುಣಿಕಾ. ಇತಿ ಸಬ್ಬಪಚ್ಛಿಮಾಯ ಕೋಟಿಯಾ ಏತೇಸಂ ಯಾಚಕನೇಸಾದಾನಮ್ಪಿ ಸಕ್ಕಚ್ಚಮೇವ ದೇಸೇತಿ.

೧೦. ಕಕುಧಥೇರಸುತ್ತವಣ್ಣನಾ

೧೦೦. ದಸಮೇ ಅತ್ತಭಾವಪಟಿಲಾಭೋತಿ ಸರೀರಪಟಿಲಾಭೋ. ದ್ವೇ ವಾ ತೀಣಿ ವಾ ಮಾಗಧಕಾನಿ ಗಾಮಕ್ಖೇತ್ತಾನೀತಿ ಏತ್ಥ ಮಾಗಧಿಕಂ ಗಾಮಕ್ಖೇತ್ತಂ ಅತ್ಥಿ ಖುದ್ದಕಂ, ಅತ್ಥಿ ಮಜ್ಝಿಮಂ, ಅತ್ಥಿ ಮಹನ್ತಂ. ಖುದ್ದಕಂ ಗಾಮಕ್ಖೇತ್ತಂ ಇತೋ ಚತ್ತಾಲೀಸಂ ಉಸಭಾನಿ, ಇತೋ ಚತ್ತಾಲೀಸನ್ತಿ ಗಾವುತಂ ಹೋತಿ, ಮಜ್ಝಿಮಂ ಇತೋ ಗಾವುತಂ, ಇತೋ ಗಾವುತನ್ತಿ ಅಡ್ಢಯೋಜನಂ ಹೋತಿ, ಮಹನ್ತಂ ಇತೋ ದಿಯಡ್ಢಗಾವುತಂ, ಇತೋ ದಿಯಡ್ಢಗಾವುತನ್ತಿ ತಿಗಾವುತಂ ಹೋತಿ. ತೇಸು ಖುದ್ದಕೇನ ಗಾಮಕ್ಖೇತ್ತೇನ ತೀಣಿ, ಖುದ್ದಕೇನ ಚ ಮಜ್ಝಿಮೇನ ಚ ದ್ವೇ ಗಾಮಕ್ಖೇತ್ತಾನಿ ತಸ್ಸ ಅತ್ತಭಾವೋ. ತಿಗಾವುತಞ್ಹಿಸ್ಸ ಸರೀರಂ. ಪರಿಹರಿಸ್ಸಾಮೀತಿ ಪಟಿಜಗ್ಗಿಸ್ಸಾಮಿ ಗೋಪಯಿಸ್ಸಾಮಿ. ರಕ್ಖಸ್ಸೇತನ್ತಿ ರಕ್ಖಸ್ಸು ಏತಂ. ಮೋಘಪುರಿಸೋತಿ ತುಚ್ಛಪುರಿಸೋ. ನಾಸ್ಸಸ್ಸಾತಿ ನ ಏತಸ್ಸ ಭವೇಯ್ಯ. ಸಮುದಾಚರೇಯ್ಯಾಮಾತಿ ಕಥೇಯ್ಯಾಮ. ಸಮ್ಮನ್ನತೀತಿ ಸಮ್ಮಾನಂ ಕರೋತಿ. ಯಂ ತುಮೋ ಕರಿಸ್ಸತಿ ತುಮೋವ ತೇನ ಪಞ್ಞಾಯಿಸ್ಸತೀತಿ ಯಂ ಏಸ ಕರಿಸ್ಸತಿ, ಏಸೋವ ತೇನ ಕಮ್ಮೇನ ಪಾಕಟೋ ಭವಿಸ್ಸತಿ. ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ.

ಕಕುಧವಗ್ಗೋ ಪಞ್ಚಮೋ.

ದುತಿಯಪಣ್ಣಾಸಕಂ ನಿಟ್ಠಿತಂ.