(೧೩) ೩. ದಾನವಗ್ಗವಣ್ಣನಾ

೧೪೨. ತತಿಯಸ್ಸ ಪಠಮೇ ದಾನಾನೀತಿ ದಿಯ್ಯನಕವಸೇನ ದಾನಾನಿ, ದೇಯ್ಯಧಮ್ಮಸ್ಸೇತಂ ನಾಮಂ. ಸವತ್ಥುಕಾ ವಾ ಚೇತನಾ ದಾನಂ, ಸಮ್ಪತ್ತಿಪರಿಚ್ಚಾಗಸ್ಸೇತಂ ನಾಮಂ. ಆಮಿಸದಾನನ್ತಿ ಚತ್ತಾರೋ ಪಚ್ಚಯಾ ದಿಯ್ಯನಕವಸೇನ ಆಮಿಸದಾನಂ ನಾಮ. ಧಮ್ಮದಾನನ್ತಿ ಇಧೇಕಚ್ಚೋ ಅಮತಪತ್ತಿಪಟಿಪದಂ ಕಥೇತ್ವಾ ದೇತಿ, ಇದಂ ಧಮ್ಮದಾನಂ ನಾಮ.

೧೪೩. ದುತಿಯೇ ಚತ್ತಾರೋ ಪಚ್ಚಯಾ ಯಜನಕವಸೇನ ಯಾಗೋ ನಾಮ ಧಮ್ಮೋಪಿ ಯಜನಕವಸೇನ ಯಾಗೋತಿ ವೇದಿತಬ್ಬೋ.

೧೪೪. ತತಿಯೇ ಆಮಿಸಸ್ಸ ಚಜನಂ ಆಮಿಸಚಾಗೋ, ಧಮ್ಮಸ್ಸ ಚಜನಂ ಧಮ್ಮಚಾಗೋ. ಚತುತ್ಥೇ ಉಪಸಗ್ಗಮತ್ತಂ ವಿಸೇಸೋ.

೧೪೬. ಪಞ್ಚಮೇ ಚತುನ್ನಂ ಪಚ್ಚಯಾನಂ ಭುಞ್ಜನಂ ಆಮಿಸಭೋಗೋ, ಧಮ್ಮಸ್ಸ ಭುಞ್ಜನಂ ಧಮ್ಮಭೋಗೋ. ಛಟ್ಠೇ ಉಪಸಗ್ಗಮತ್ತಂ ವಿಸೇಸೋ.

೧೪೮. ಸತ್ತಮೇ ಚತುನ್ನಂ ಪಚ್ಚಯಾನಂ ಸಂವಿಭಜನಂ ಆಮಿಸಸಂವಿಭಾಗೋ, ಧಮ್ಮಸ್ಸ ಸಂವಿಭಜನಂ ಧಮ್ಮಸಂವಿಭಾಗೋ.

೧೪೯. ಅಟ್ಠಮೇ ಚತೂಹಿ ಪಚ್ಚಯೇಹಿ ಸಙ್ಗಹೋ ಆಮಿಸಸಙ್ಗಹೋ, ಧಮ್ಮೇನ ಸಙ್ಗಹೋ ಧಮ್ಮಸಙ್ಗಹೋ.

೧೫೦. ನವಮೇ ಚತೂಹಿ ಪಚ್ಚಯೇಹಿ ಅನುಗ್ಗಣ್ಹನಂ ಆಮಿಸಾನುಗ್ಗಹೋ, ಧಮ್ಮೇನ ಅನುಗ್ಗಣ್ಹನಂ ಧಮ್ಮಾನುಗ್ಗಹೋ.

೧೫೧. ದಸಮೇ ಚತೂಹಿ ಪಚ್ಚಯೇಹಿ ಅನುಕಮ್ಪನಂ ಆಮಿಸಾನುಕಮ್ಪಾ, ಧಮ್ಮೇನ ಅನುಕಮ್ಪನಂ ಧಮ್ಮಾನುಕಮ್ಪಾತಿ.

ದಾನವಗ್ಗೋ ತತಿಯೋ.