(೯) ೪. ಧಮ್ಮವಗ್ಗವಣ್ಣನಾ

೮೮. ಚತುತ್ಥಸ್ಸ ಪಠಮೇ ಚೇತೋವಿಮುತ್ತೀತಿ ಫಲಸಮಾಧಿ. ಪಞ್ಞಾವಿಮುತ್ತೀತಿ ಫಲಪಞ್ಞಾ.

೮೯. ದುತಿಯೇ ಪಗ್ಗಾಹೋತಿ ವೀರಿಯಂ. ಅವಿಕ್ಖೇಪೋತಿ ಚಿತ್ತೇಕಗ್ಗತಾ.

೯೦. ತತಿಯೇ ನಾಮನ್ತಿ ಚತ್ತಾರೋ ಅರೂಪಕ್ಖನ್ಧಾ. ರೂಪನ್ತಿ ರೂಪಕ್ಖನ್ಧೋ. ಇತಿ ಇಮಸ್ಮಿಂ ಸುತ್ತೇ ಧಮ್ಮಕೋಟ್ಠಾಸಪರಿಚ್ಛೇದಞಾಣಂ ನಾಮ ಕಥಿತಂ.

೯೧. ಚತುತ್ಥೇ ವಿಜ್ಜಾತಿ ಫಲಞಾಣಂ. ವಿಮುತ್ತೀತಿ ತಂಸಮ್ಪಯುತ್ತಾ ಸೇಸಧಮ್ಮಾ.

೯೨. ಪಞ್ಚಮೇ ಭವದಿಟ್ಠೀತಿ ಸಸ್ಸತದಿಟ್ಠಿ. ವಿಭವದಿಟ್ಠೀತಿ ಉಚ್ಛೇದದಿಟ್ಠಿ. ಛಟ್ಠಸತ್ತಮಾನಿ ಉತ್ತಾನತ್ಥಾನೇವ.

೯೫. ಅಟ್ಠಮೇ ದೋವಚಸ್ಸತಾತಿ ದುಬ್ಬಚಭಾವೋ. ಪಾಪಮಿತ್ತತಾತಿ ಪಾಪಮಿತ್ತಸೇವನಭಾವೋ. ನವಮಂ ವುತ್ತವಿಪರಿಯಾಯೇನ ವೇದಿತಬ್ಬಂ.

೯೭. ದಸಮೇ ಧಾತುಕುಸಲತಾತಿ ಅಟ್ಠಾರಸ ಧಾತುಯೋ ಧಾತೂತಿ ಜಾನನಂ. ಮನಸಿಕಾರಕುಸಲತಾತಿ ತಾಸಂಯೇವ ಧಾತೂನಂ ಅನಿಚ್ಚಾದಿವಸೇನ ಲಕ್ಖಣತ್ತಯಂ ಆರೋಪೇತ್ವಾ ಜಾನನಂ.

೯೮. ಏಕಾದಸಮೇ ಆಪತ್ತಿಕುಸಲತಾತಿ ಪಞ್ಚನ್ನಞ್ಚ ಸತ್ತನ್ನಞ್ಚ ಆಪತ್ತಿಕ್ಖನ್ಧಾನಂ ಜಾನನಂ. ಆಪತ್ತಿವುಟ್ಠಾನಕುಸಲತಾತಿ ದೇಸನಾಯ ವಾ ಕಮ್ಮವಾಚಾಯ ವಾ ಆಪತ್ತೀಹಿ ವುಟ್ಠಾನಜಾನನನ್ತಿ.

ಧಮ್ಮವಗ್ಗೋ ಚತುತ್ಥೋ.