೩. ತತಿಯಅಧಮ್ಮಸುತ್ತವಣ್ಣನಾ

೧೧೫. ತತಿಯೇ ಉದ್ದೇಸಂ ಉದ್ದಿಸಿತ್ವಾತಿ ಮಾತಿಕಂ ನಿಕ್ಖಿಪಿತ್ವಾ. ಸತ್ಥು ಚೇವ ಸಂವಣ್ಣಿತೋತಿ ಪಞ್ಚಸು ಠಾನೇಸು ಏತದಗ್ಗೇ ಠಪೇನ್ತೇನ ಸತ್ಥಾರಾ ಸಂವಣ್ಣಿತೋ. ಸಮ್ಭಾವಿತೋತಿ ಗುಣಸಮ್ಭಾವನಾಯ ಸಮ್ಭಾವಿತೋ. ಪಹೋತೀತಿ ಸಕ್ಕೋತಿ. ಅತಿಸಿತ್ವಾತಿ ಅತಿಕ್ಕಮಿತ್ವಾ. ಜಾನಂ ಜಾನಾತೀತಿ ಜಾನಿತಬ್ಬಕಂ ಜಾನಾತಿ. ಪಸ್ಸಂ ಪಸ್ಸತೀತಿ ಪಸ್ಸಿತಬ್ಬಕಂ ಪಸ್ಸತಿ. ಚಕ್ಖುಭೂತೋತಿ ಚಕ್ಖು ವಿಯ ಭೂತೋ ಜಾತೋ ನಿಬ್ಬತ್ತೋ. ಞಾಣಭೂತೋತಿ ಞಾಣಸಭಾವೋ. ಧಮ್ಮಭೂತೋತಿ ಧಮ್ಮಸಭಾವೋ. ಬ್ರಹ್ಮಭೂತೋತಿ ಸೇಟ್ಠಸಭಾವೋ. ವತ್ತಾತಿ ವತ್ತುಂ ಸಮತ್ಥೋ. ಪವತ್ತಾತಿ ಪವತ್ತೇತುಂ ಸಮತ್ಥೋ. ಅತ್ಥಸ್ಸ ನಿನ್ನೇತಾತಿ ಅತ್ಥಂ ನೀಹರಿತ್ವಾ ದಸ್ಸೇತಾ. ಯಥಾ ನೋ ಭಗವಾತಿ ಯಥಾ ಅಮ್ಹಾಕಂ ಭಗವಾ ಬ್ಯಾಕರೇಯ್ಯ.