೬. ಸಮಾಧಿಸುತ್ತವಣ್ಣನಾ

೬. ಛಟ್ಠೇ ನೇವ ಪಥವಿಯಂ ಪಥವೀಸಞ್ಞೀ ಅಸ್ಸಾತಿ ಪಥವಿಂ ಆರಮ್ಮಣಂ ಕತ್ವಾ ಪಥವೀತಿ ಏವಂ ಉಪ್ಪನ್ನಾಯ ಸಞ್ಞಾಯ ಸಞ್ಞೀ ನ ಭವೇಯ್ಯ. ಆಪಾದೀಸುಪಿ ಏಸೇವ ನಯೋ. ನ ಇಧಲೋಕೇತಿ ಇಧಲೋಕೇ ಉಪ್ಪಜ್ಜನಕಚತುಕ್ಕಪಞ್ಚಕಜ್ಝಾನಸಞ್ಞಾಯ ನ ಸಞ್ಞೀ ಭವೇಯ್ಯ. ನ ಪರಲೋಕೇತಿ ಪರಲೋಕೇ ಉಪ್ಪಜ್ಜನಕಚತುಕ್ಕಪಞ್ಚಕಜ್ಝಾನಸಞ್ಞಾಯ ನ ಸಞ್ಞೀ ಭವೇಯ್ಯ. ಸಞ್ಞೀ ಚ ಪನ ಅಸ್ಸಾತಿ ಅಥ ಚ ಪನಸ್ಸ ಸಮಾಪತ್ತಿ ಸವಿತಕ್ಕಸಮಾಪತ್ತಿಯೇವ ಅಸ್ಸಾತಿ ವುಚ್ಚತಿ. ಏತಂ ಸನ್ತಂ ಏತಂ ಪಣೀತನ್ತಿ ಸನ್ತಂ ಸನ್ತನ್ತಿ ಅಪ್ಪೇತ್ವಾ ನಿಸಿನ್ನಸ್ಸ ದಿವಸಮ್ಪಿ ಚಿತ್ತುಪ್ಪಾದೋ ‘‘ಸನ್ತಂ ಸನ್ತ’’ನ್ತೇವ ಪವತ್ತತಿ, ಪಣೀತಂ ಪಣೀತನ್ತಿ ಅಪ್ಪೇತ್ವಾ ನಿಸಿನ್ನಸ್ಸ ದಿವಸಮ್ಪಿ ಚಿತ್ತುಪ್ಪಾದೋ ‘‘ಪಣೀತಂ ಪಣೀತ’’ನ್ತೇವ ಪವತ್ತತಿ. ಯದಿದಂ ಸಬ್ಬಸಙ್ಖಾರಸಮಥೋತಿ ನಿಬ್ಬಾನಂ ನಿಬ್ಬಾನನ್ತಿ ಅಪ್ಪೇತ್ವಾ ನಿಸಿನ್ನಸ್ಸ ದಿವಸಮ್ಪಿ ಚಿತ್ತುಪ್ಪಾದೋ ‘‘ನಿಬ್ಬಾನಂ ನಿಬ್ಬಾನ’’ನ್ತೇವ ಪವತ್ತತೀತಿ ಸಬ್ಬಮ್ಪೇತಂ ಫಲಸಮಾಪತ್ತಿಸಮಾಧಿಂ ಸನ್ಧಾಯ ವುತ್ತಂ.