೨೦. ಅಮತವಗ್ಗವಣ್ಣನಾ

೬೦೦-೬೧೧. ಅಮತಂ ತೇ, ಭಿಕ್ಖವೇ, ನ ಪರಿಭುಞ್ಜನ್ತೀತಿ ಮರಣವಿರಹಿತಂ ನಿಬ್ಬಾನಂ ನ ಪರಿಭುಞ್ಜನ್ತೀತಿ ಅತ್ಥೋ. ನನು ಚ ನಿಬ್ಬಾನಂ ಲೋಕುತ್ತರಂ, ಕಾಯಗತಾಸತಿ ಲೋಕಿಯಾ, ಕಥಂ ತಂ ಪರಿಭುಞ್ಜನ್ತಾ ಅಮತಂ ಪರಿಭುಞ್ಜನ್ತೀತಿ? ತಂ ಭಾವೇತ್ವಾ ಅಧಿಗನ್ತಬ್ಬತೋ. ಕಾಯಗತಞ್ಹಿ ಸತಿಂ ಭಾವೇನ್ತೋ ಅಮತಮಧಿಗಚ್ಛತಿ, ಅಭಾವೇನ್ತೋ ನಾಧಿಗಚ್ಛತಿ. ತಸ್ಮಾ ಏವಂ ವುತ್ತಂ. ಏತೇನುಪಾಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋ. ಅಪಿ ಚೇತ್ಥ ವಿರದ್ಧನ್ತಿ ವಿರಾಧಿತಂ ನಾಧಿಗತಂ. ಆರದ್ಧನ್ತಿ ಪರಿಪುಣ್ಣಂ. ಪಮಾದಿಂಸೂತಿ ಪಮಜ್ಜನ್ತಿ. ಪಮುಟ್ಠನ್ತಿ ಸಮ್ಮುಟ್ಠಂ ವಿಸ್ಸರಿತಂ ನಟ್ಠಂ ವಾ. ಆಸೇವಿತನ್ತಿ ಆದಿತೋ ಸೇವಿತಂ. ಭಾವಿತನ್ತಿ ವಡ್ಢಿತಂ. ಬಹುಲೀಕತನ್ತಿ ಪುನಪ್ಪುನಂ ಕತಂ. ಅನಭಿಞ್ಞಾತನ್ತಿ ಞಾತಅಭಿಞ್ಞಾಯ ಅಜಾನಿತಂ. ಅಪರಿಞ್ಞಾತನ್ತಿ ಞಾತಪರಿಞ್ಞಾವಸೇನೇವ ಅಪರಿಞ್ಞಾತಂ. ಅಸಚ್ಛಿಕತನ್ತಿ ಅಪಚ್ಚಕ್ಖಕತಂ. ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ.

ಅಮತವಗ್ಗವಣ್ಣನಾ.