(೩) ಅನಾಗತವಾರೋ

(ಕ) ಅನುಲೋಮಪುಗ್ಗಲೋ

೮೮. (ಕ) ಯಸ್ಸ ಕಾಯಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ವಚೀಸಙ್ಖಾರೋ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ವಚೀಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ಕಾಯಸಙ್ಖಾರೋ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ರೂಪಾವಚರೇ ಅರೂಪಾವಚರೇ ಪಚ್ಛಿಮಭವಿಕಾನಂ ಯೇ ಚ ರೂಪಾವಚರಂ ಅರೂಪಾವಚರಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ವಚೀಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ಕಾಯಸಙ್ಖಾರೋ ನಿರುಜ್ಝಿಸ್ಸತಿ. ಇತರೇಸಂ ತೇಸಂ ವಚೀಸಙ್ಖಾರೋ ಚ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನಿರುಜ್ಝಿಸ್ಸತಿ.

(ಕ) ಯಸ್ಸ ಕಾಯಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ಚಿತ್ತಸಙ್ಖಾರೋ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ಕಾಯಸಙ್ಖಾರೋ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ರೂಪಾವಚರೇ ಅರೂಪಾವಚರೇ ಪಚ್ಛಿಮಭವಿಕಾನಂ ಯೇ ಚ ರೂಪಾವಚರಂ ಅರೂಪಾವಚರಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ಕಾಯಸಙ್ಖಾರೋ ನಿರುಜ್ಝಿಸ್ಸತಿ. ಇತರೇಸಂ ತೇಸಂ ಚಿತ್ತಸಙ್ಖಾರೋ ಚ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನಿರುಜ್ಝಿಸ್ಸತಿ.

೮೯. (ಕ) ಯಸ್ಸ ವಚೀಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ಚಿತ್ತಸಙ್ಖಾರೋ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ವಚೀಸಙ್ಖಾರೋ ನಿರುಜ್ಝಿಸ್ಸತೀತಿ?

ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ತೇಸಂ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ವಚೀಸಙ್ಖಾರೋ ನಿರುಜ್ಝಿಸ್ಸತಿ. ಇತರೇಸಂ ತೇಸಂ ಚಿತ್ತಸಙ್ಖಾರೋ ಚ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನಿರುಜ್ಝಿಸ್ಸತಿ.

(ಖ) ಅನುಲೋಮಓಕಾಸೋ

೯೦. ಯತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತಿ…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೯೧. (ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತೀತಿ?

ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ. ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ತೇಸಂ ತತ್ಥ ಕಾಯಸಙ್ಖಾರೋ ಚ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತಿ. ಪಠಮಜ್ಝಾನಂ ಸಮಾಪನ್ನಾನಂ ಇತರೇಸಂ ಕಾಮಾವಚರಾನಂ ತೇಸಂ ತತ್ಥ ವಚೀಸಙ್ಖಾರೋ ಚ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನಿರುಜ್ಝಿಸ್ಸತಿ.

(ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ಚತುತ್ಥಜ್ಝಾನಂ ಸಮಾಪನ್ನಾನಂ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝಿಸ್ಸತಿ. ಪಠಮಜ್ಝಾನಂ ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಇತರೇಸಂ ಕಾಮಾವಚರಾನಂ ತೇಸಂ ತತ್ಥ ಚಿತ್ತಸಙ್ಖಾರೋ ಚ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನಿರುಜ್ಝಿಸ್ಸತಿ.

೯೨. (ಕ) ಯಸ್ಸ ಯತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತೀತಿ?

ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ದುತಿಯಜ್ಝಾನಂ ತತಿಯಜ್ಝಾನಂ ಚತುತ್ಥಜ್ಝಾನಂ ಸಮಾಪನ್ನಾನಂ ತೇಸಂ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ. ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಇತರೇಸಂ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಚಿತ್ತಸಙ್ಖಾರೋ ಚ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನಿರುಜ್ಝಿಸ್ಸತಿ.

(ಘ) ಪಚ್ಚನೀಕಪುಗ್ಗಲೋ

೯೩. (ಕ) ಯಸ್ಸ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ವಚೀಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ರೂಪಾವಚರೇ ಅರೂಪಾವಚರೇ ಪಚ್ಛಿಮಭವಿಕಾನಂ ಯೇ ಚ ರೂಪಾವಚರಂ ಅರೂಪಾವಚರಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ. ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅವಿತಕ್ಕಅವಿಚಾರಪಚ್ಛಿಮಚಿತ್ತಸಮಙ್ಗೀನಂ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ತೇಸಂ ಕಾಯಸಙ್ಖಾರೋ ಚ ನ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ…ಪೇ…? ಆಮನ್ತಾ.

(ಕ) ಯಸ್ಸ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ರೂಪಾವಚರೇ ಅರೂಪಾವಚರೇ ಪಚ್ಛಿಮಭವಿಕಾನಂ ಯೇ ಚ ರೂಪಾವಚರಂ ಅರೂಪಾವಚರಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಕಾಯಸಙ್ಖಾರೋ ಚ ನ ನಿರುಜ್ಝಿಸ್ಸತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ…ಪೇ…? ಆಮನ್ತಾ.

೯೪. (ಕ) ಯಸ್ಸ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ತೇಸಂ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ…ಪೇ…? ಆಮನ್ತಾ.

(ಙ) ಪಚ್ಚನೀಕಓಕಾಸೋ

೯೫. ಯತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೯೬. (ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ. ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅವಿತಕ್ಕಅವಿಚಾರಪಚ್ಛಿಮಚಿತ್ತಸಮಙ್ಗೀನಂ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ಚತುತ್ಥಜ್ಝಾನಂ ಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಕಾಯಸಙ್ಖಾರೋ ಚ ನ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ. ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅವಿತಕ್ಕಅವಿಚಾರಪಚ್ಛಿಮಚಿತ್ತಸಮಙ್ಗೀನಂ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ಚತುತ್ಥಜ್ಝಾನಂ ಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಕಾಮಾವಚರಾನಂ ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಕಾಮಾವಚರಾನಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ಚತುತ್ಥಜ್ಝಾನಂ ಸಮಾಪನ್ನಾನಂ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಕಾಯಸಙ್ಖಾರೋ ಚ ನ ನಿರುಜ್ಝಿಸ್ಸತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಕಾಯಸಙ್ಖಾರೋ ನ ನಿರುಜ್ಝಿಸ್ಸತೀತಿ? ಆಮನ್ತಾ.

೯೭. (ಕ) ಯಸ್ಸ ಯತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ದುತಿಯಜ್ಝಾನಂ ತತಿಯಜ್ಝಾನಂ ಚತುತ್ಥಜ್ಝಾನಂ ಸಮಾಪನ್ನಾನಂ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತೀತಿ? ಆಮನ್ತಾ.