(೪) ಪಚ್ಚುಪ್ಪನ್ನಾತೀತವಾರೋ

(ಕ) ಅನುಲೋಮಪುಗ್ಗಲೋ

೯೮. (ಕ) ಯಸ್ಸ ಕಾಯಸಙ್ಖಾರೋ ನಿರುಜ್ಝತಿ ತಸ್ಸ ವಚೀಸಙ್ಖಾರೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ವಚೀಸಙ್ಖಾರೋ ನಿರುಜ್ಝಿತ್ಥ ತಸ್ಸ ಕಾಯಸಙ್ಖಾರೋ ನಿರುಜ್ಝತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ವಚೀಸಙ್ಖಾರೋ ನಿರುಜ್ಝಿತ್ಥ, ನೋ ಚ ತೇಸಂ ಕಾಯಸಙ್ಖಾರೋ ನಿರುಜ್ಝತಿ. ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ವಚೀಸಙ್ಖಾರೋ ಚ ನಿರುಜ್ಝಿತ್ಥ ಕಾಯಸಙ್ಖಾರೋ ಚ ನಿರುಜ್ಝತಿ.

(ಕ) ಯಸ್ಸ ಕಾಯಸಙ್ಖಾರೋ ನಿರುಜ್ಝತಿ ತಸ್ಸ ಚಿತ್ತಸಙ್ಖಾರೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಸಙ್ಖಾರೋ ನಿರುಜ್ಝಿತ್ಥ ತಸ್ಸ ಕಾಯಸಙ್ಖಾರೋ ನಿರುಜ್ಝತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಸಙ್ಖಾರೋ ನಿರುಜ್ಝಿತ್ಥ, ನೋ ಚ ತೇಸಂ ಕಾಯಸಙ್ಖಾರೋ ನಿರುಜ್ಝತಿ. ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ಚಿತ್ತಸಙ್ಖಾರೋ ಚ ನಿರುಜ್ಝಿತ್ಥ ಕಾಯಸಙ್ಖಾರೋ ಚ ನಿರುಜ್ಝತಿ.

೯೯. (ಕ) ಯಸ್ಸ ವಚೀಸಙ್ಖಾರೋ ನಿರುಜ್ಝತಿ ತಸ್ಸ ಚಿತ್ತಸಙ್ಖಾರೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಸಙ್ಖಾರೋ ನಿರುಜ್ಝಿತ್ಥ ತಸ್ಸ ವಚೀಸಙ್ಖಾರೋ ನಿರುಜ್ಝತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ವಿತಕ್ಕವಿಚಾರೇಹಿ ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಸಙ್ಖಾರೋ ನಿರುಜ್ಝಿತ್ಥ, ನೋ ಚ ತೇಸಂ ವಚೀಸಙ್ಖಾರೋ ನಿರುಜ್ಝತಿ. ವಿತಕ್ಕವಿಚಾರಾನಂ ಭಙ್ಗಕ್ಖಣೇ ತೇಸಂ ಚಿತ್ತಸಙ್ಖಾರೋ ಚ ನಿರುಜ್ಝಿತ್ಥ ವಚೀಸಙ್ಖಾರೋ ಚ ನಿರುಜ್ಝತಿ.

(ಖ) ಅನುಲೋಮಓಕಾಸೋ

೧೦೦. ಯತ್ಥ ಕಾಯಸಙ್ಖಾರೋ ನಿರುಜ್ಝತಿ…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೧೦೧. (ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನಿರುಜ್ಝತಿ ತಸ್ಸ ತತ್ಥ ವಚೀಸಙ್ಖಾರೋ ನಿರುಜ್ಝಿತ್ಥಾತಿ?

ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝಿತ್ಥ. ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ಕಾಯಸಙ್ಖಾರೋ ಚ ನಿರುಜ್ಝತಿ ವಚೀಸಙ್ಖಾರೋ ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ವಚೀಸಙ್ಖಾರೋ ನಿರುಜ್ಝಿತ್ಥ ತಸ್ಸ ತತ್ಥ ಕಾಯಸಙ್ಖಾರೋ ನಿರುಜ್ಝತೀತಿ?

ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝತಿ. ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ಚ ನಿರುಜ್ಝಿತ್ಥ ಕಾಯಸಙ್ಖಾರೋ ಚ ನಿರುಜ್ಝತಿ.

(ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನಿರುಜ್ಝಿತ್ಥ ತಸ್ಸ ತತ್ಥ ಕಾಯಸಙ್ಖಾರೋ ನಿರುಜ್ಝತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝತಿ. ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ಚ ನಿರುಜ್ಝಿತ್ಥ ಕಾಯಸಙ್ಖಾರೋ ಚ ನಿರುಜ್ಝತಿ.

೧೦೨. (ಕ) ಯಸ್ಸ ಯತ್ಥ ವಚೀಸಙ್ಖಾರೋ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನಿರುಜ್ಝಿತ್ಥ ತಸ್ಸ ತತ್ಥ ವಚೀಸಙ್ಖಾರೋ ನಿರುಜ್ಝತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ವಿತಕ್ಕವಿಚಾರೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝತಿ. ವಿತಕ್ಕವಿಚಾರಾನಂ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ಚ ನಿರುಜ್ಝಿತ್ಥ ವಚೀಸಙ್ಖಾರೋ ಚ ನಿರುಜ್ಝತಿ.

(ಘ) ಪಚ್ಚನೀಕಪುಗ್ಗಲೋ

೧೦೩. (ಕ) ಯಸ್ಸ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ವಚೀಸಙ್ಖಾರೋ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ವಚೀಸಙ್ಖಾರೋ ನ ನಿರುಜ್ಝಿತ್ಥ ತಸ್ಸ ಕಾಯಸಙ್ಖಾರೋ ನ ನಿರುಜ್ಝತೀತಿ? ನತ್ಥಿ.

(ಕ) ಯಸ್ಸ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥ ತಸ್ಸ ಕಾಯಸಙ್ಖಾರೋ ನ ನಿರುಜ್ಝತೀತಿ? ನತ್ಥಿ.

೧೦೪. (ಕ) ಯಸ್ಸ ವಚೀಸಙ್ಖಾರೋ ನ ನಿರುಜ್ಝತಿ ತಸ್ಸ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥ ತಸ್ಸ ವಚೀಸಙ್ಖಾರೋ ನ ನಿರುಜ್ಝತೀತಿ? ನತ್ಥಿ.

(ಙ) ಪಚ್ಚನೀಕಓಕಾಸೋ

೧೦೫. ಯತ್ಥ ಕಾಯಸಙ್ಖಾರೋ ನ ನಿರುಜ್ಝತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೧೦೬. (ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ತತ್ಥ ವಚೀಸಙ್ಖಾರೋ ನ ನಿರುಜ್ಝಿತ್ಥಾತಿ?

ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝಿತ್ಥ. ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ಚತುತ್ಥಜ್ಝಾನಂ ಸಮಾಪನ್ನಾನಂ ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಕಾಯಸಙ್ಖಾರೋ ಚ ನ ನಿರುಜ್ಝತಿ ವಚೀಸಙ್ಖಾರೋ ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ವಚೀಸಙ್ಖಾರೋ ನ ನಿರುಜ್ಝಿತ್ಥ ತಸ್ಸ ತತ್ಥ ಕಾಯಸಙ್ಖಾರೋ ನ ನಿರುಜ್ಝತೀತಿ?

ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝತಿ. ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ಚತುತ್ಥಜ್ಝಾನಂ ಸಮಾಪನ್ನಾನಂ ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ವಚೀಸಙ್ಖಾರೋ ಚ ನ ನಿರುಜ್ಝಿತ್ಥ ಕಾಯಸಙ್ಖಾರೋ ಚ ನ ನಿರುಜ್ಝತಿ.

(ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥಾತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥ. ಸುದ್ಧಾವಾಸಂ ಉಪಪಜ್ಜನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಕಾಯಸಙ್ಖಾರೋ ಚ ನ ನಿರುಜ್ಝತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥ ತಸ್ಸ ತತ್ಥ ಕಾಯಸಙ್ಖಾರೋ ನ ನಿರುಜ್ಝತೀತಿ? ಆಮನ್ತಾ.

೧೦೭. (ಕ) ಯಸ್ಸ ಯತ್ಥ ವಚೀಸಙ್ಖಾರೋ ನ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥಾತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ವಿತಕ್ಕವಿಚಾರೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥ. ಸುದ್ಧಾವಾಸಂ ಉಪಪಜ್ಜನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ವಚೀಸಙ್ಖಾರೋ ಚ ನ ನಿರುಜ್ಝತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿತ್ಥ ತಸ್ಸ ತತ್ಥ ವಚೀಸಙ್ಖಾರೋ ನ ನಿರುಜ್ಝತೀತಿ? ಆಮನ್ತಾ.