೧. ಪದಸೋಧನವಾರೋ

(ಕ) ಅನುಲೋಮಂ

೧೦. (ಕ) ದುಕ್ಖಂ ದುಕ್ಖಸಚ್ಚನ್ತಿ? ಆಮನ್ತಾ.

(ಖ) ದುಕ್ಖಸಚ್ಚಂ ದುಕ್ಖನ್ತಿ?

ಕಾಯಿಕಂ ದುಕ್ಖಂ ಚೇತಸಿಕಂ ದುಕ್ಖಂ ಠಪೇತ್ವಾ ಅವಸೇಸಂ ದುಕ್ಖಸಚ್ಚಂ [ಅವಸೇಸಂ ದುಕ್ಖಸಚ್ಚಂ ದುಕ್ಖಸಚ್ಚಂ (ಸ್ಯಾ.) ಏವಮುಪರಿಪಿ], ನ ದುಕ್ಖಂ. ಕಾಯಿಕಂ ದುಕ್ಖಂ ಚೇತಸಿಕಂ ದುಕ್ಖಂ ದುಕ್ಖಞ್ಚೇವ ದುಕ್ಖಸಚ್ಚಞ್ಚ.

(ಕ) ಸಮುದಯೋ ಸಮುದಯಸಚ್ಚನ್ತಿ?

ಸಮುದಯಸಚ್ಚಂ ಠಪೇತ್ವಾ ಅವಸೇಸೋ ಸಮುದಯೋ, ನ ಸಮುದಯಸಚ್ಚಂ. ಸಮುದಯಸಚ್ಚಂ ಸಮುದಯೋ ಚೇವ ಸಮುದಯಸಚ್ಚಞ್ಚ.

(ಖ) ಸಮುದಯಸಚ್ಚಂ ಸಮುದಯೋತಿ? ಆಮನ್ತಾ.

(ಕ) ನಿರೋಧೋ ನಿರೋಧಸಚ್ಚನ್ತಿ?

ನಿರೋಧಸಚ್ಚಂ ಠಪೇತ್ವಾ ಅವಸೇಸೋ ನಿರೋಧೋ, ನ ನಿರೋಧಸಚ್ಚಂ. ನಿರೋಧಸಚ್ಚಂ ನಿರೋಧೋ ಚೇವ ನಿರೋಧಸಚ್ಚಞ್ಚ.

(ಖ) ನಿರೋಧಸಚ್ಚಂ ನಿರೋಧೋತಿ? ಆಮನ್ತಾ.

(ಕ) ಮಗ್ಗೋ ಮಗ್ಗಸಚ್ಚನ್ತಿ?

ಮಗ್ಗಸಚ್ಚಂ ಠಪೇತ್ವಾ ಅವಸೇಸೋ ಮಗ್ಗೋ, ನ ಮಗ್ಗಸಚ್ಚಂ. ಮಗ್ಗಸಚ್ಚಂ ಮಗ್ಗೋ ಚೇವ ಮಗ್ಗಸಚ್ಚಞ್ಚ.

(ಖ) ಮಗ್ಗಸಚ್ಚಂ ಮಗ್ಗೋತಿ? ಆಮನ್ತಾ.

(ಖ) ಪಚ್ಚನೀಕಂ

೧೧. (ಕ) ನ ದುಕ್ಖಂ ನ ದುಕ್ಖಸಚ್ಚನ್ತಿ?

ಕಾಯಿಕಂ ದುಕ್ಖಂ ಚೇತಸಿಕಂ ದುಕ್ಖಂ ಠಪೇತ್ವಾ ಅವಸೇಸಂ ನ ದುಕ್ಖಂ [ಅವಸೇಸಂ ದುಕ್ಖಸಚ್ಚಂ ನ ದುಕ್ಖಂ (ಸೀ. ಸ್ಯಾ. ಕ.) ಏವಂ ಅವಸೇಸೇಸು ತೀಸು ಸಚ್ಚೇಸು] ದುಕ್ಖಸಚ್ಚಂ. ದುಕ್ಖಞ್ಚ ದುಕ್ಖಸಚ್ಚಞ್ಚ ಠಪೇತ್ವಾ ಅವಸೇಸಂ ನ ಚೇವ ದುಕ್ಖಂ ನ ಚ ದುಕ್ಖಸಚ್ಚಂ.

(ಖ) ನ ದುಕ್ಖಸಚ್ಚಂ ನ ದುಕ್ಖನ್ತಿ? ಆಮನ್ತಾ.

(ಕ) ನ ಸಮುದಯೋ ನ ಸಮುದಯಸಚ್ಚನ್ತಿ? ಆಮನ್ತಾ.

(ಖ) ನ ಸಮುದಯಸಚ್ಚಂ ನ ಸಮುದಯೋತಿ?

ಸಮುದಯಸಚ್ಚಂ ಠಪೇತ್ವಾ ಅವಸೇಸೋ ನ ಸಮುದಯಸಚ್ಚಂ, ಸಮುದಯೋ. ಸಮುದಯಞ್ಚ ಸಮುದಯಸಚ್ಚಞ್ಚ ಠಪೇತ್ವಾ ಅವಸೇಸೋ ನ ಚೇವ ಸಮುದಯೋ ನ ಚ ಸಮುದಯಸಚ್ಚಂ.

(ಕ) ನ ನಿರೋಧೋ ನ ನಿರೋಧಸಚ್ಚನ್ತಿ? ಆಮನ್ತಾ.

(ಖ) ನ ನಿರೋಧಸಚ್ಚಂ ನ ನಿರೋಧೋತಿ?

ನಿರೋಧಸಚ್ಚಂ ಠಪೇತ್ವಾ ಅವಸೇಸೋ ನ ನಿರೋಧಸಚ್ಚಂ, ನಿರೋಧೋ. ನಿರೋಧಞ್ಚ ನಿರೋಧಸಚ್ಚಞ್ಚ ಠಪೇತ್ವಾ ಅವಸೇಸೋ ನ ಚೇವ ನಿರೋಧೋ ನ ಚ ನಿರೋಧಸಚ್ಚಂ.

(ಕ) ನ ಮಗ್ಗೋ ನ ಮಗ್ಗಸಚ್ಚನ್ತಿ? ಆಮನ್ತಾ.

(ಖ) ನ ಮಗ್ಗಸಚ್ಚಂ ನ ಮಗ್ಗೋತಿ?

ಮಗ್ಗಸಚ್ಚಂ ಠಪೇತ್ವಾ ಅವಸೇಸೋ ನ ಮಗ್ಗಸಚ್ಚಂ, ಮಗ್ಗೋ. ಮಗ್ಗಞ್ಚ ಮಗ್ಗಸಚ್ಚಞ್ಚ ಠಪೇತ್ವಾ ಅವಸೇಸೋ ನ ಚೇವ ಮಗ್ಗೋ ನ ಚ ಮಗ್ಗಸಚ್ಚಂ.