೧. ಪದಸೋಧನವಾರೋ

(ಕ) ಅನುಲೋಮಂ

೧೦. (ಕ) ಚಕ್ಖು ಚಕ್ಖುಧಾತೂತಿ?

ದಿಬ್ಬಚಕ್ಖು ಪಞ್ಞಾಚಕ್ಖು ಚಕ್ಖು, ನ ಚಕ್ಖುಧಾತು. ಚಕ್ಖುಧಾತು ಚಕ್ಖು ಚೇವ ಚಕ್ಖುಧಾತು ಚ.

(ಖ) ಚಕ್ಖುಧಾತು ಚಕ್ಖೂತಿ? ಆಮನ್ತಾ.

(ಕ) ಸೋತಂ ಸೋತಧಾತೂತಿ?

ದಿಬ್ಬಸೋತಂ ತಣ್ಹಾಸೋತಂ ಸೋತಂ, ನ ಸೋತಧಾತು. ಸೋತಧಾತು ಸೋತಞ್ಚೇವ ಸೋತಧಾತು ಚ.

(ಖ) ಸೋತಧಾತು ಸೋತನ್ತಿ? ಆಮನ್ತಾ.

(ಕ) ಘಾನಂ ಘಾನಧಾತೂತಿ? ಆಮನ್ತಾ.

(ಖ) ಘಾನಧಾತು ಘಾನನ್ತಿ? ಆಮನ್ತಾ. (ಜಿವ್ಹಾಪಿ ಘಾನಧಾತುಸದಿಸಾ).

(ಕ) ಕಾಯೋ ಕಾಯಧಾತೂತಿ?

ಕಾಯಧಾತುಂ ಠಪೇತ್ವಾ ಅವಸೇಸೋ ಕಾಯೋ [ಅವಸೇಸೋ ಕಾಯೋ ಕಾಯೋ (ಸ್ಯಾ.)], ನ ಕಾಯಧಾತು. ಕಾಯಧಾತು ಕಾಯೋ ಚೇವ ಕಾಯಧಾತು ಚ.

(ಖ) ಕಾಯಧಾತು ಕಾಯೋತಿ? ಆಮನ್ತಾ.

(ಕ) ರೂಪಂ ರೂಪಧಾತೂತಿ?

ರೂಪಧಾತುಂ ಠಪೇತ್ವಾ ಅವಸೇಸಂ ರೂಪಂ, ನ ರೂಪಧಾತು. ರೂಪಧಾತು ರೂಪಞ್ಚೇವ ರೂಪಧಾತು ಚ.

(ಖ) ರೂಪಧಾತು ರೂಪನ್ತಿ? ಆಮನ್ತಾ. (ಸದ್ದೋ ಘಾನಸದಿಸೋ).

(ಕ) ಗನ್ಧೋ ಗನ್ಧಧಾತೂತಿ?

ಸೀಲಗನ್ಧೋ ಸಮಾಧಿಗನ್ಧೋ ಪಞ್ಞಾಗನ್ಧೋ ಗನ್ಧೋ, ನ ಗನ್ಧಧಾತು. ಗನ್ಧಧಾತು ಗನ್ಧೋ ಚೇವ ಗನ್ಧಧಾತು ಚ.

(ಖ) ಗನ್ಧಧಾತು ಗನ್ಧೋತಿ? ಆಮನ್ತಾ.

(ಕ) ರಸೋ ರಸಧಾತೂತಿ?

ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ ರಸೋ, ನ ರಸಧಾತು. ರಸಧಾತು ರಸೋ ಚೇವ ರಸಧಾತು ಚ.

(ಖ) ರಸಧಾತು ರಸೋತಿ? ಆಮನ್ತಾ. (ಫೋಟ್ಠಬ್ಬೋ ಘಾನಸದಿಸೋ).

(ಕ) ಚಕ್ಖುವಿಞ್ಞಾಣಂ ಚಕ್ಖುವಿಞ್ಞಾಣಧಾತೂತಿ? ಆಮನ್ತಾ.

(ಖ) ಚಕ್ಖುವಿಞ್ಞಾಣಧಾತು ಚಕ್ಖುವಿಞ್ಞಾಣನ್ತಿ? ಆಮನ್ತಾ.

ಸೋತವಿಞ್ಞಾಣಂ…ಪೇ… ಘಾನವಿಞ್ಞಾಣಂ… ಜಿವ್ಹಾವಿಞ್ಞಾಣಂ… ಕಾಯವಿಞ್ಞಾಣಂ….

(ಕ) ಮನೋ ಮನೋಧಾತೂತಿ?

ಮನೋಧಾತುಂ ಠಪೇತ್ವಾ ಅವಸೇಸೋ ಮನೋ, ನ ಮನೋಧಾತು. ಮನೋಧಾತು ಮನೋ ಚೇವ ಮನೋಧಾತು ಚ.

(ಖ) ಮನೋಧಾತು ಮನೋತಿ? ಆಮನ್ತಾ.

(ಕ) ಮನೋವಿಞ್ಞಾಣಂ ಮನೋವಿಞ್ಞಾಣಧಾತೂತಿ? ಆಮನ್ತಾ.

(ಖ) ಮನೋವಿಞ್ಞಾಣಧಾತು ಮನೋವಿಞ್ಞಾಣನ್ತಿ? ಆಮನ್ತಾ.

(ಕ) ಧಮ್ಮೋ ಧಮ್ಮಧಾತೂತಿ?

ಧಮ್ಮಧಾತುಂ ಠಪೇತ್ವಾ ಅವಸೇಸೋ ಧಮ್ಮೋ, ನ ಧಮ್ಮಧಾತು. ಧಮ್ಮಧಾತು ಧಮ್ಮೋ ಚೇವ ಧಮ್ಮಧಾತು ಚ.

(ಖ) ಧಮ್ಮಧಾತು ಧಮ್ಮೋತಿ? ಆಮನ್ತಾ.

(ಖ) ಪಚ್ಚನೀಕಂ

೧೧. (ಕ) ನ ಚಕ್ಖು ನ ಚಕ್ಖುಧಾತೂತಿ? ಆಮನ್ತಾ.

(ಖ) ನ ಚಕ್ಖುಧಾತು ನ ಚಕ್ಖೂತಿ?

ದಿಬ್ಬಚಕ್ಖು ಪಞ್ಞಾಚಕ್ಖು ನ ಚಕ್ಖುಧಾತು, ಚಕ್ಖು. ಚಕ್ಖುಞ್ಚ ಚಕ್ಖುಧಾತುಞ್ಚ ಠಪೇತ್ವಾ ಅವಸೇಸಂ ನ ಚೇವ ಚಕ್ಖು ನ ಚ ಚಕ್ಖುಧಾತು.

(ಕ) ನ ಸೋತಂ ನ ಸೋತಧಾತೂತಿ? ಆಮನ್ತಾ.

(ಖ) ನ ಸೋತಧಾತು ನ ಸೋತನ್ತಿ?

ದಿಬ್ಬಸೋತಂ ತಣ್ಹಾಸೋತಂ ನ ಸೋತಧಾತು, ಸೋತಂ. ಸೋತಞ್ಚ ಸೋತಧಾತುಞ್ಚ ಠಪೇತ್ವಾ ಅವಸೇಸಂ ನ ಚೇವ ಸೋತಂ ನ ಚ ಸೋತಧಾತು.

(ಕ) ನ ಘಾನಂ ನ ಘಾನಧಾತೂತಿ? ಆಮನ್ತಾ.

(ಖ) ನ ಘಾನಧಾತು ನ ಘಾನನ್ತಿ? ಆಮನ್ತಾ.

ನ ಜಿವ್ಹಾ… (ಸಂಖಿತ್ತಂ [ಯಂ ಸಂಖಿತ್ತಂ (ಸ್ಯಾ.)], ಉಭತೋ ಆಮನ್ತಾ).

(ಕ) ನ ಕಾಯೋ ನ ಕಾಯಧಾತೂತಿ? ಆಮನ್ತಾ.

(ಖ) ನ ಕಾಯಧಾತು ನ ಕಾಯೋತಿ?

ಕಾಯಧಾತುಂ ಠಪೇತ್ವಾ ಅವಸೇಸೋ ನ ಕಾಯಧಾತು, ಕಾಯೋ. ಕಾಯಞ್ಚ ಕಾಯಧಾತುಞ್ಚ ಠಪೇತ್ವಾ ಅವಸೇಸೋ [ಅವಸೇಸೋ ಕಾಯೋ (ಸ್ಯಾ.)] ನ ಚೇವ ಕಾಯೋ ನ ಚ ಕಾಯಧಾತು.

(ಕ) ನ ರೂಪಂ ನ ರೂಪಧಾತೂತಿ? ಆಮನ್ತಾ.

(ಖ) ನ ರೂಪಧಾತು ನ ರೂಪನ್ತಿ?

ರೂಪಧಾತುಂ ಠಪೇತ್ವಾ ಅವಸೇಸಂ ನ ರೂಪಧಾತು, ರೂಪಂ. ರೂಪಞ್ಚ ರೂಪಧಾತುಞ್ಚ ಠಪೇತ್ವಾ ಅವಸೇಸಂ ನ ಚೇವ ರೂಪಂ ನ ಚ ರೂಪಧಾತು.

ನ ಸದ್ದೋ…ಪೇ… ನ ಗನ್ಧೋ ನ ಗನ್ಧಧಾತೂತಿ? ಆಮನ್ತಾ.

ನ ಗನ್ಧಧಾತು ನ ಗನ್ಧೋತಿ?

ಸೀಲಗನ್ಧೋ ಸಮಾಧಿಗನ್ಧೋ ಪಞ್ಞಾಗನ್ಧೋ ನ ಗನ್ಧಧಾತು, ಗನ್ಧೋ. ಗನ್ಧಞ್ಚ ಗನ್ಧಧಾತುಞ್ಚ ಠಪೇತ್ವಾ ಅವಸೇಸೋ ನ ಚೇವ ಗನ್ಧೋ ನ ಚ ಗನ್ಧಧಾತು.

(ಕ) ನ ರಸೋ ನ ರಸಧಾತೂತಿ? ಆಮನ್ತಾ.

(ಖ) ನ ರಸಧಾತು ನ ರಸೋತಿ?

ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ ನ ರಸಧಾತು, ರಸೋ. ರಸಞ್ಚ ರಸಧಾತುಞ್ಚ ಠಪೇತ್ವಾ ಅವಸೇಸೋ ನ ಚೇವ ರಸೋ ನ ಚ ರಸಧಾತು.

ನ ಫೋಟ್ಠಬ್ಬೋ…ಪೇ… ನ ಚಕ್ಖುವಿಞ್ಞಾಣಂ ನ ಚಕ್ಖುವಿಞ್ಞಾಣಧಾತೂತಿ? ಆಮನ್ತಾ.

ನ ಚಕ್ಖುವಿಞ್ಞಾಣಧಾತು ನ ಚಕ್ಖುವಿಞ್ಞಾಣನ್ತಿ? ಆಮನ್ತಾ.

ನ ಸೋತವಿಞ್ಞಾಣಂ…ಪೇ… ನ ಘಾನವಿಞ್ಞಾಣಂ… ನ ಜಿವ್ಹಾವಿಞ್ಞಾಣಂ… ನ ಕಾಯವಿಞ್ಞಾಣಂ….

(ಕ) ನ ಮನೋ ನ ಮನೋಧಾತೂತಿ? ಆಮನ್ತಾ.

(ಖ) ನ ಮನೋಧಾತು ನ ಮನೋತಿ?

ಮನೋಧಾತುಂ ಠಪೇತ್ವಾ ಅವಸೇಸೋ ನ ಮನೋಧಾತು, ಮನೋ. ಮನಞ್ಚ ಮನೋಧಾತುಞ್ಚ ಠಪೇತ್ವಾ ಅವಸೇಸೋ ನ ಚೇವ ಮನೋ ನ ಚ ಮನೋಧಾತು.

(ಕ) ನ ಮನೋವಿಞ್ಞಾಣಂ ನ ಮನೋವಿಞ್ಞಾಣಧಾತೂತಿ? ಆಮನ್ತಾ.

(ಖ) ನ ಮನೋವಿಞ್ಞಾಣಧಾತು ನ ಮನೋವಿಞ್ಞಾಣನ್ತಿ? ಆಮನ್ತಾ.

(ಕ) ನ ಧಮ್ಮೋ ನ ಧಮ್ಮಧಾತೂತಿ? ಆಮನ್ತಾ.

(ಖ) ನ ಧಮ್ಮಧಾತು ನ ಧಮ್ಮೋತಿ?

ಧಮ್ಮಧಾತುಂ ಠಪೇತ್ವಾ ಅವಸೇಸೋ ನ ಧಮ್ಮಧಾತು, ಧಮ್ಮೋ. ಧಮ್ಮಞ್ಚ ಧಮ್ಮಧಾತುಞ್ಚ ಠಪೇತ್ವಾ ಅವಸೇಸೋ ನ ಚೇವ ಧಮ್ಮೋ ನ ಚ ಧಮ್ಮಧಾತು.