೬. ಅತೀತಾನಾಗತವಾರೋ

೨೫೪. (ಕ) ಯೋ ಚಕ್ಖಾಯತನಂ ಪರಿಜಾನಿತ್ಥ ಸೋ ಸೋತಾಯತನಂ ಪರಿಜಾನಿಸ್ಸತೀತಿ? ನೋ.

(ಖ) ಯೋ ವಾ ಪನ ಸೋತಾಯತನಂ ಪರಿಜಾನಿಸ್ಸತಿ ಸೋ ಚಕ್ಖಾಯತನಂ ಪರಿಜಾನಿತ್ಥಾತಿ? ನೋ.

(ಕ) ಯೋ ಚಕ್ಖಾಯತನಂ ನ ಪರಿಜಾನಿತ್ಥ ಸೋ ಸೋತಾಯತನಂ ನ ಪರಿಜಾನಿಸ್ಸತೀತಿ?

ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇ ಚಕ್ಖಾಯತನಂ ನ ಪರಿಜಾನಿತ್ಥ, ನೋ ಚ ಸೋತಾಯತನಂ ನ ಪರಿಜಾನಿಸ್ಸನ್ತಿ. ಅಗ್ಗಮಗ್ಗಸಮಙ್ಗೀ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ಚಕ್ಖಾಯತನಞ್ಚ ನ ಪರಿಜಾನಿತ್ಥ ಸೋತಾಯತನಞ್ಚ ನ ಪರಿಜಾನಿಸ್ಸನ್ತಿ.

(ಖ) ಯೋ ವಾ ಪನ ಸೋತಾಯತನಂ ನ ಪರಿಜಾನಿಸ್ಸತಿ ಸೋ ಚಕ್ಖಾಯತನಂ ನ ಪರಿಜಾನಿತ್ಥಾತಿ?

ಅರಹಾ ಸೋತಾಯತನಂ ನ ಪರಿಜಾನಿಸ್ಸತಿ, ನೋ ಚ ಚಕ್ಖಾಯತನಂ ನ ಪರಿಜಾನಿತ್ಥ. ಅಗ್ಗಮಗ್ಗಸಮಙ್ಗೀ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ಸೋತಾಯತನಞ್ಚ ನ ಪರಿಜಾನಿಸ್ಸನ್ತಿ ಚಕ್ಖಾಯತನಞ್ಚ ನ ಪರಿಜಾನಿತ್ಥ.

ಪರಿಞ್ಞಾವಾರೋ.

ಆಯತನಯಮಕಂ ನಿಟ್ಠಿತಂ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ