೫. ಪಚ್ಚುಪ್ಪನ್ನಾನಾಗತವಾರೋ

೨೫೩. (ಕ) ಯೋ ಚಕ್ಖಾಯತನಂ ಪರಿಜಾನಾತಿ ಸೋ ಸೋತಾಯತನಂ ಪರಿಜಾನಿಸ್ಸತೀತಿ? ನೋ.

(ಖ) ಯೋ ವಾ ಪನ ಸೋತಾಯತನಂ ಪರಿಜಾನಿಸ್ಸತಿ ಸೋ ಚಕ್ಖಾಯತನಂ ಪರಿಜಾನಾತೀತಿ? ನೋ.

(ಕ) ಯೋ ಚಕ್ಖಾಯತನಂ ನ ಪರಿಜಾನಾತಿ ಸೋ ಸೋತಾಯತನಂ ನ ಪರಿಜಾನಿಸ್ಸತೀತಿ?

ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇ ಚಕ್ಖಾಯತನಂ ನ ಪರಿಜಾನನ್ತಿ, ನೋ ಚ ಸೋತಾಯತನಂ ನ ಪರಿಜಾನಿಸ್ಸನ್ತಿ. ಅರಹಾ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ಚಕ್ಖಾಯತನಞ್ಚ ನ ಪರಿಜಾನನ್ತಿ ಸೋತಾಯತನಞ್ಚ ನ ಪರಿಜಾನಿಸ್ಸನ್ತಿ.

(ಖ) ಯೋ ವಾ ಪನ ಸೋತಾಯತನಂ ನ ಪರಿಜಾನಿಸ್ಸತಿ ಸೋ ಚಕ್ಖಾಯತನಂ ನ ಪರಿಜಾನಾತೀತಿ?

ಅಗ್ಗಮಗ್ಗಸಮಙ್ಗೀ ಸೋತಾಯತನಂ ನ ಪರಿಜಾನಿಸ್ಸತಿ, ನೋ ಚ ಚಕ್ಖಾಯತನಂ ನ ಪರಿಜಾನಾತಿ. ಅರಹಾ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ಸೋತಾಯತನಞ್ಚ ನ ಪರಿಜಾನಿಸ್ಸನ್ತಿ ಚಕ್ಖಾಯತನಞ್ಚ ನ ಪರಿಜಾನನ್ತಿ.