(೫) ಪಚ್ಚುಪ್ಪನ್ನಾನಾಗತವಾರೋ

(ಕ) ಅನುಲೋಮಪುಗ್ಗಲೋ

೨೩೦. (ಕ) ಯಸ್ಸ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ಸೋತಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಸೋತಾಯತನಂ ನಿರುಜ್ಝಿಸ್ಸತಿ ತಸ್ಸ ಚಕ್ಖಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಸೋತಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ಚಕ್ಖಾಯತನಂ ಉಪ್ಪಜ್ಜತಿ. ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಸೋತಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ಘಾನಾಯತನಂ ನಿರುಜ್ಝಿಸ್ಸತೀತಿ?

ಪಚ್ಛಿಮಭವಿಕಾನಂ ರೂಪಾವಚರಂ ಉಪಪಜ್ಜನ್ತಾನಂ ತೇಸಂ ಚಕ್ಖಾಯತನಂ ಉಪ್ಪಜ್ಜತಿ, ನೋ ಚ ತೇಸಂ ಘಾನಾಯತನಂ ನಿರುಜ್ಝಿಸ್ಸತಿ. ಇತರೇಸಂ ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಚಕ್ಖಾಯತನಞ್ಚ ಉಪ್ಪಜ್ಜತಿ ಘಾನಾಯತನಞ್ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಘಾನಾಯತನಂ ನಿರುಜ್ಝಿಸ್ಸತಿ ತಸ್ಸ ಚಕ್ಖಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ಚಕ್ಖಾಯತನಂ ಉಪ್ಪಜ್ಜತಿ. ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ರೂಪಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ರೂಪಾಯತನಂ ನಿರುಜ್ಝಿಸ್ಸತಿ ತಸ್ಸ ಚಕ್ಖಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ…ಪೇ… ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ರೂಪಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ಮನಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಮನಾಯತನಂ ನಿರುಜ್ಝಿಸ್ಸತಿ ತಸ್ಸ ಚಕ್ಖಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ…ಪೇ… ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಧಮ್ಮಾಯತನಂ ನಿರುಜ್ಝಿಸ್ಸತಿ ತಸ್ಸ ಚಕ್ಖಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ…ಪೇ… ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

೨೩೧. ಯಸ್ಸ ಘಾನಾಯತನಂ ಉಪ್ಪಜ್ಜತಿ ತಸ್ಸ ರೂಪಾಯತನಂ…ಪೇ… ಮನಾಯತನಂ… ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

ಯಸ್ಸ ವಾ ಪನ ಧಮ್ಮಾಯತನಂ ನಿರುಜ್ಝಿಸ್ಸತಿ ತಸ್ಸ ಘಾನಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ಘಾನಾಯತನಂ ಉಪ್ಪಜ್ಜತಿ. ಸಘಾನಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ಘಾನಾಯತನಞ್ಚ ಉಪ್ಪಜ್ಜತಿ.

೨೩೨. ಯಸ್ಸ ರೂಪಾಯತನಂ ಉಪ್ಪಜ್ಜತಿ ತಸ್ಸ ಮನಾಯತನಂ…ಪೇ… ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

ಯಸ್ಸ ವಾ ಪನ ಧಮ್ಮಾಯತನಂ ನಿರುಜ್ಝಿಸ್ಸತಿ ತಸ್ಸ ರೂಪಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅರೂಪಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ರೂಪಾಯತನಂ ಉಪ್ಪಜ್ಜತಿ. ಸರೂಪಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ರೂಪಾಯತನಞ್ಚ ಉಪ್ಪಜ್ಜತಿ.

೨೩೩. (ಕ) ಯಸ್ಸ ಮನಾಯತನಂ ಉಪ್ಪಜ್ಜತಿ ತಸ್ಸ ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಧಮ್ಮಾಯತನಂ…ಪೇ…?

ಸಬ್ಬೇಸಂ ಚವನ್ತಾನಂ ಅಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ಮನಾಯತನಂ ಉಪ್ಪಜ್ಜತಿ. ಸಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ಮನಾಯತನಞ್ಚ ಉಪ್ಪಜ್ಜತಿ.

(ಖ) ಅನುಲೋಮಓಕಾಸೋ

೨೩೪. ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೨೩೫. (ಕ) ಯಸ್ಸ ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಸೋತಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಸೋತಾಯತನಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ಉಪ್ಪಜ್ಜತೀತಿ?

ಪಞ್ಚವೋಕಾರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಸೋತಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಕ್ಖಾಯತನಂ ಉಪ್ಪಜ್ಜತಿ. ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಸೋತಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಘಾನಾಯತನಂ ನಿರುಜ್ಝಿಸ್ಸತೀತಿ?

ರೂಪಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಚಕ್ಖಾಯತನಂ ಉಪ್ಪಜ್ಜತಿ, ನೋ ಚ ತೇಸಂ ತತ್ಥ ಘಾನಾಯತನಂ ನಿರುಜ್ಝಿಸ್ಸತಿ. ಸಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಚಕ್ಖಾಯತನಞ್ಚ ಉಪ್ಪಜ್ಜತಿ ಘಾನಾಯತನಞ್ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಘಾನಾಯತನಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ಉಪ್ಪಜ್ಜತೀತಿ?

ಕಾಮಾವಚರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಘಾನಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಕ್ಖಾಯತನಂ ಉಪ್ಪಜ್ಜತಿ. ಸಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಘಾನಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ರೂಪಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ರೂಪಾಯತನಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ಉಪ್ಪಜ್ಜತೀತಿ?

ಪಞ್ಚವೋಕಾರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ರೂಪಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಕ್ಖಾಯತನಂ ಉಪ್ಪಜ್ಜತಿ. ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ರೂಪಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಮನಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಮನಾಯತನಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ಉಪ್ಪಜ್ಜತೀತಿ?

ಪಞ್ಚವೋಕಾರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ಅರೂಪಾನಂ ತೇಸಂ ತತ್ಥ ಮನಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಕ್ಖಾಯತನಂ ಉಪ್ಪಜ್ಜತಿ. ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಮನಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಕ್ಖಾಯತನಂ ಉಪ್ಪಜ್ಜತಿ. ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ಉಪ್ಪಜ್ಜತಿ. (ಚಕ್ಖಾಯತನಮೂಲಕಂ)

೨೩೬. (ಕ) ಯಸ್ಸ ಯತ್ಥ ಘಾನಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ರೂಪಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ರೂಪಾಯತನಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಘಾನಾಯತನಂ ಉಪ್ಪಜ್ಜತೀತಿ?

ಕಾಮಾವಚರಾ ಚವನ್ತಾನಂ ಅಘಾನಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ರೂಪಾವಚರಾನಂ ತೇಸಂ ತತ್ಥ ರೂಪಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಘಾನಾಯತನಂ ಉಪ್ಪಜ್ಜತಿ. ಸಘಾನಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ರೂಪಾಯತನಞ್ಚ ನಿರುಜ್ಝಿಸ್ಸತಿ ಘಾನಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ಘಾನಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಮನಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಮನಾಯತನಂ…ಪೇ…?

ಕಾಮಾವಚರಾ ಚವನ್ತಾನಂ ಅಘಾನಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಮನಾಯತನಂ…ಪೇ… ಸಘಾನಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಮನಾಯತನಞ್ಚ ನಿರುಜ್ಝಿಸ್ಸತಿ ಘಾನಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ಘಾನಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ…ಪೇ…?

ಸಬ್ಬೇಸಂ ಚವನ್ತಾನಂ ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಂ…ಪೇ… ಸಘಾನಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ಘಾನಾಯತನಞ್ಚ ಉಪ್ಪಜ್ಜತಿ. (ಘಾನಾಯತನಮೂಲಕಂ)

೨೩೭. (ಕ) ಯಸ್ಸ ಯತ್ಥ ರೂಪಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಮನಾಯತನಂ ನಿರುಜ್ಝಿಸ್ಸತೀತಿ?

ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ರೂಪಾಯತನಂ ಉಪ್ಪಜ್ಜತಿ, ನೋ ಚ ತೇಸಂ ತತ್ಥ…ಪೇ… ಪಞ್ಚವೋಕಾರಂ ಉಪಪಜ್ಜನ್ತಾನಂ ತೇಸಂ ತತ್ಥ…ಪೇ….

(ಖ) ಯಸ್ಸ ವಾ ಪನ ಯತ್ಥ ಮನಾಯತನಂ…ಪೇ…?

ಪಞ್ಚವೋಕಾರಾ ಚವನ್ತಾನಂ ಅರೂಪಾನಂ ತೇಸಂ ತತ್ಥ…ಪೇ… ಪಞ್ಚವೋಕಾರಂ ಉಪಪಜ್ಜನ್ತಾನಂ ತೇಸಂ ತತ್ಥ ಮನಾಯತನಞ್ಚ ನಿರುಜ್ಝಿಸ್ಸತಿ ರೂಪಾಯತನಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ರೂಪಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ…ಪೇ…?

ಸಬ್ಬೇಸಂ ಚವನ್ತಾನಂ ಅರೂಪಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ರೂಪಾಯತನಂ ಉಪ್ಪಜ್ಜತಿ. ಸರೂಪಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ರೂಪಾಯತನಞ್ಚ ಉಪ್ಪಜ್ಜತಿ.

೨೩೮. (ಕ) ಯಸ್ಸ ಯತ್ಥ ಮನಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಮನಾಯತನಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಅಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಮನಾಯತನಂ ಉಪ್ಪಜ್ಜತಿ. ಸಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಧಮ್ಮಾಯತನಞ್ಚ ನಿರುಜ್ಝಿಸ್ಸತಿ ಮನಾಯತನಞ್ಚ ಉಪ್ಪಜ್ಜತಿ.

(ಘ) ಪಚ್ಚನೀಕಪುಗ್ಗಲೋ

೨೩೯. (ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ಸೋತಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಸೋತಾಯತನಂ ನ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅರೂಪೇ ಪಚ್ಛಿಮಭವಿಕಾನಂ ಯೇ ಚ ಅರೂಪಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ಸೋತಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಸೋತಾಯತನಂ ನ ನಿರುಜ್ಝಿಸ್ಸತಿ ತಸ್ಸ ಚಕ್ಖಾಯತನಂ ನುಪ್ಪಜ್ಜತೀತಿ? ಆಮನ್ತಾ.

(ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ಘಾನಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಘಾನಾಯತನಂ ನ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅರೂಪೇ ಪಚ್ಛಿಮಭವಿಕಾನಂ ಯೇ ಚ ರೂಪಾವಚರಂ ಅರೂಪಾವಚರಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ಘಾನಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಘಾನಾಯತನಂ ನ ನಿರುಜ್ಝಿಸ್ಸತಿ ತಸ್ಸ ಚಕ್ಖಾಯತನಂ ನುಪ್ಪಜ್ಜತೀತಿ?

ಪಚ್ಛಿಮಭವಿಕಾನಂ ರೂಪಾವಚರಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅರೂಪೇ ಪಚ್ಛಿಮಭವಿಕಾನಂ ಯೇ ಚ ರೂಪಾವಚರಂ ಅರೂಪಾವಚರಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಘಾನಾಯತನಞ್ಚ ನ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ರೂಪಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ರೂಪಾಯತನಂ ನ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅರೂಪೇ ಪಚ್ಛಿಮಭವಿಕಾನಂ ಯೇ ಚ ಅರೂಪಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ರೂಪಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ರೂಪಾಯತನಂ…ಪೇ…? ಆಮನ್ತಾ.

ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ಮನಾಯತನಂ…ಪೇ… ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

ಯಸ್ಸ ವಾ ಪನ ಧಮ್ಮಾಯತನಂ…ಪೇ…? ಆಮನ್ತಾ. (ಚಕ್ಖಾಯತನಮೂಲಕಂ)

೨೪೦. (ಕ) ಯಸ್ಸ ಘಾನಾಯತನಂ ನುಪ್ಪಜ್ಜತಿ ತಸ್ಸ ರೂಪಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ರೂಪಾಯತನಂ ನ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅರೂಪೇ ಪಚ್ಛಿಮಭವಿಕಾನಂ ಯೇ ಚ ಅರೂಪಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ಘಾನಾಯತನಞ್ಚ ನುಪ್ಪಜ್ಜತಿ ರೂಪಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ರೂಪಾಯತನಂ…ಪೇ…? ಆಮನ್ತಾ.

ಯಸ್ಸ ಘಾನಾಯತನಂ ನುಪ್ಪಜ್ಜತಿ ತಸ್ಸ ಮನಾಯತನಂ…ಪೇ… ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ಘಾನಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

ಯಸ್ಸ ವಾ ಪನ ಧಮ್ಮಾಯತನಂ…ಪೇ…? ಆಮನ್ತಾ. (ಘಾನಾಯತನಮೂಲಕಂ)

೨೪೧. ಯಸ್ಸ ರೂಪಾಯತನಂ ನುಪ್ಪಜ್ಜತಿ ತಸ್ಸ ಮನಾಯತನಂ…ಪೇ… ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅರೂಪಕಾನಂ ಉಪಪಜ್ಜನ್ತಾನಂ ತೇಸಂ ರೂಪಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ರೂಪಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

ಯಸ್ಸ ವಾ ಪನ ಧಮ್ಮಾಯತನಂ…ಪೇ…? ಆಮನ್ತಾ.

೨೪೨. (ಕ) ಯಸ್ಸ ಮನಾಯತನಂ ನುಪ್ಪಜ್ಜತಿ ತಸ್ಸ ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ಮನಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಧಮ್ಮಾಯತನಂ ನ ನಿರುಜ್ಝಿಸ್ಸತಿ ತಸ್ಸ ಮನಾಯತನಂ ನುಪ್ಪಜ್ಜತೀತಿ? ಆಮನ್ತಾ.

(ಙ) ಪಚ್ಚನೀಕಓಕಾಸೋ

೨೪೩. ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೨೪೪. (ಕ) ಯಸ್ಸ ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಸೋತಾಯತನಂ ನ ನಿರುಜ್ಝಿಸ್ಸತೀತಿ?

ಪಞ್ಚವೋಕಾರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಸೋತಾಯತನಂ ನ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅಸಞ್ಞಸತ್ತಾನಂ ಅರೂಪಾನಂ ತೇಸಂ ತತ್ಥ ಚಕ್ಖಾಯತನಞ್ಚ ನುಪ್ಪಜ್ಜತಿ ಸೋತಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಸೋತಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ನುಪ್ಪಜ್ಜತೀತಿ? ಆಮನ್ತಾ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಘಾನಾಯತನಂ ನ ನಿರುಜ್ಝಿಸ್ಸತೀತಿ?

ಕಾಮಾವಚರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಘಾನಾಯತನಂ ನ ನಿರುಜ್ಝಿಸ್ಸತಿ. ಕಾಮಾವಚರೇ ಪರಿನಿಬ್ಬನ್ತಾನಂ ರೂಪಾವಚರಾ ಚವನ್ತಾನಂ ಅಸಞ್ಞಸತ್ತಾನಂ ಅರೂಪಾನಂ ತೇಸಂ ತತ್ಥ ಚಕ್ಖಾಯತನಞ್ಚ ನುಪ್ಪಜ್ಜತಿ ಘಾನಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಘಾನಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ನುಪ್ಪಜ್ಜತೀತಿ?

ರೂಪಾವಚರಂ ಉಪಪಜ್ಜನ್ತಾನಂ ತೇಸಂ ತತ್ಥ ಘಾನಾಯತನಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಚಕ್ಖಾಯತನಂ ನುಪ್ಪಜ್ಜತಿ. ಕಾಮಾವಚರೇ ಪರಿನಿಬ್ಬನ್ತಾನಂ ರೂಪಾವಚರಾ ಚವನ್ತಾನಂ ಅಸಞ್ಞಸತ್ತಾನಂ ಅರೂಪಾನಂ ತೇಸಂ ತತ್ಥ ಘಾನಾಯತನಞ್ಚ ನ ನಿರುಜ್ಝಿಸ್ಸತಿ ಚಕ್ಖಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ರೂಪಾಯತನಂ ನ ನಿರುಜ್ಝಿಸ್ಸತೀತಿ?

ಪಞ್ಚವೋಕಾರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ರೂಪಾಯತನಂ ನ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅರೂಪಾನಂ ತೇಸಂ ತತ್ಥ ಚಕ್ಖಾಯತನಞ್ಚ ನುಪ್ಪಜ್ಜತಿ ರೂಪಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ರೂಪಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ನುಪ್ಪಜ್ಜತೀತಿ? ಆಮನ್ತಾ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಮನಾಯತನಂ ನ ನಿರುಜ್ಝಿಸ್ಸತೀತಿ?

ಪಞ್ಚವೋಕಾರಾ ಚವನ್ತಾನಂ ಅಚಕ್ಖುಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ಅರೂಪಾನಂ ತಸಂ ತತ್ಥ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಮನಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಚಕ್ಖಾಯತನಞ್ಚ ನುಪ್ಪಜ್ಜತಿ ಮನಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಮನಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ನುಪ್ಪಜ್ಜತೀತಿ? ಆಮನ್ತಾ.

(ಕ) ಯಸ್ಸ ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ತತ್ಥ ಚಕ್ಖಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಚಕ್ಖಾಯತನಂ ನುಪ್ಪಜ್ಜತೀತಿ? ಆಮನ್ತಾ. (ಚಕ್ಖಾಯತನಮೂಲಕಂ)

೨೪೫. (ಕ) ಯಸ್ಸ ಯತ್ಥ ಘಾನಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ರೂಪಾಯತನಂ ನ ನಿರುಜ್ಝಿಸ್ಸತೀತಿ?

ಕಾಮಾವಚರಾ ಚವನ್ತಾನಂ ಅಘಾನಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ರೂಪಾವಚರಾನಂ ತೇಸಂ ತತ್ಥ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ರೂಪಾಯತನಂ ನ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ಪರಿನಿಬ್ಬನ್ತಾನಂ ಅರೂಪಾನಂ ತೇಸಂ ತತ್ಥ ಘಾನಾಯತನಞ್ಚ ನುಪ್ಪಜ್ಜತಿ ರೂಪಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ರೂಪಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಘಾನಾಯತನಂ ನುಪ್ಪಜ್ಜತೀತಿ? ಆಮನ್ತಾ.

(ಕ) ಯಸ್ಸ ಯತ್ಥ ಘಾನಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಮನಾಯತನಂ ನ ನಿರುಜ್ಝಿಸ್ಸತೀತಿ?

ಕಾಮಾವಚರಾ ಚವನ್ತಾನಂ ಅಘಾನಕಾನಂ ಕಾಮಾವಚರಂ ಉಪಪಜ್ಜನ್ತಾನಂ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಮನಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಘಾನಾಯತನಞ್ಚ ನುಪ್ಪಜ್ಜತಿ ಮನಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಮನಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಘಾನಾಯತನಂ ನುಪ್ಪಜ್ಜತೀತಿ? ಆಮನ್ತಾ.

(ಕ) ಯಸ್ಸ ಯತ್ಥ ಘಾನಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ತತ್ಥ ಘಾನಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಘಾನಾಯತನಂ ನುಪ್ಪಜ್ಜತೀತಿ? ಆಮನ್ತಾ. (ಘಾನಾಯತನಮೂಲಕಂ)

೨೪೬. (ಕ) ಯಸ್ಸ ಯತ್ಥ ರೂಪಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಮನಾಯತನಂ ನ ನಿರುಜ್ಝಿಸ್ಸತೀತಿ?

ಪಞ್ಚವೋಕಾರಾ ಚವನ್ತಾನಂ ಅರೂಪಾನಂ ತೇಸಂ ತತ್ಥ ರೂಪಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಮನಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ರೂಪಾಯತನಞ್ಚ ನುಪ್ಪಜ್ಜತಿ ಮನಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಮನಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ರೂಪಾಯತನಂ ನುಪ್ಪಜ್ಜತೀತಿ?

ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ಮನಾಯತನಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ರೂಪಾಯತನಂ ನುಪ್ಪಜ್ಜತಿ. ಪರಿನಿಬ್ಬನ್ತಾನಂ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ಮನಾಯತನಞ್ಚ ನ ನಿರುಜ್ಝಿಸ್ಸತಿ ರೂಪಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಯತ್ಥ ರೂಪಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅರೂಪಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ರೂಪಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ತತ್ಥ ರೂಪಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ರೂಪಾಯತನಂ ನುಪ್ಪಜ್ಜತೀತಿ? ಆಮನ್ತಾ.

೨೪೭. (ಕ) ಯಸ್ಸ ಯತ್ಥ ಮನಾಯತನಂ ನುಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಅಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ತತ್ಥ ಮನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ತತ್ಥ ಮನಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಮನಾಯತನಂ ನುಪ್ಪಜ್ಜತೀತಿ? ಆಮನ್ತಾ.