(೩) ಅನಾಗತವಾರೋ

(ಕ) ಅನುಲೋಮಪುಗ್ಗಲೋ

೧೧೬. (ಕ) ಯಸ್ಸ ರೂಪಕ್ಖನ್ಧೋ ನಿರುಜ್ಝಿಸ್ಸತಿ ತಸ್ಸ ವೇದನಾಕ್ಖನ್ಧೋ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ ತಸ್ಸ ರೂಪಕ್ಖನ್ಧೋ ನಿರುಜ್ಝಿಸ್ಸತೀತಿ?

ಪಚ್ಛಿಮಭವಿಕಾನಂ ಅರೂಪಂ ಉಪಪಜ್ಜನ್ತಾನಂ ಯೇ ಚ ಅರೂಪಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ, ನೋ ಚ ತೇಸಂ ರೂಪಕ್ಖನ್ಧೋ ನಿರುಜ್ಝಿಸ್ಸತಿ. ಇತರೇಸಂ ತೇಸಂ ವೇದನಾಕ್ಖನ್ಧೋ ಚ ನಿರುಜ್ಝಿಸ್ಸತಿ ರೂಪಕ್ಖನ್ಧೋ ಚ ನಿರುಜ್ಝಿಸ್ಸತಿ.

(ಖ) ಅನುಲೋಮಓಕಾಸೋ

೧೧೭. (ಕ) ಯತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತಿ ತತ್ಥ ವೇದನಾಕ್ಖನ್ಧೋ ನಿರುಜ್ಝಿಸ್ಸತೀತಿ?

ಅಸಞ್ಞಸತ್ತೇ ತತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತಿ, ನೋ ಚ ತತ್ಥ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ತತ್ಥ ರೂಪಕ್ಖನ್ಧೋ ಚ ನಿರುಜ್ಝಿಸ್ಸತಿ ವೇದನಾಕ್ಖನ್ಧೋ ಚ ನಿರುಜ್ಝಿಸ್ಸತಿ.

(ಖ) ಯತ್ಥ ವಾ ಪನ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ ತತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತೀತಿ?

ಅರೂಪೇ ತತ್ಥ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ, ನೋ ಚ ತತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತಿ. ಪಞ್ಚವೋಕಾರೇ ತತ್ಥ ವೇದನಾಕ್ಖನ್ಧೋ ಚ ನಿರುಜ್ಝಿಸ್ಸತಿ ರೂಪಕ್ಖನ್ಧೋ ಚ ನಿರುಜ್ಝಿಸ್ಸತಿ.

(ಗ) ಅನುಲೋಮಪುಗ್ಗಲೋಕಾಸಾ

೧೧೮. (ಕ) ಯಸ್ಸ ಯತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತಿ ತಸ್ಸ ತತ್ಥ ವೇದನಾಕ್ಖನ್ಧೋ ನಿರುಜ್ಝಿಸ್ಸತೀತಿ?

ಅಸಞ್ಞಸತ್ತಾನಂ ತೇಸಂ ತತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ. ಪಞ್ಚವೋಕಾರಾನಂ ತೇಸಂ ತತ್ಥ ರೂಪಕ್ಖನ್ಧೋ ಚ ನಿರುಜ್ಝಿಸ್ಸತಿ ವೇದನಾಕ್ಖನ್ಧೋ ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ ತಸ್ಸ ತತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತೀತಿ?

ಅರೂಪಾನಂ ತೇಸಂ ತತ್ಥ ವೇದನಾಕ್ಖನ್ಧೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ರೂಪಕ್ಖನ್ಧೋ ನಿರುಜ್ಝಿಸ್ಸತಿ. ಪಞ್ಚವೋಕಾರಾನಂ ತೇಸಂ ತತ್ಥ ವೇದನಾಕ್ಖನ್ಧೋ ಚ ನಿರುಜ್ಝಿಸ್ಸತಿ ರೂಪಕ್ಖನ್ಧೋ ಚ ನಿರುಜ್ಝಿಸ್ಸತಿ.

(ಘ) ಪಚ್ಚನೀಕಪುಗ್ಗಲೋ

೧೧೯. (ಕ) ಯಸ್ಸ ರೂಪಕ್ಖನ್ಧೋ ನ ನಿರುಜ್ಝಿಸ್ಸತಿ ತಸ್ಸ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತೀತಿ?

ಪಚ್ಛಿಮಭವಿಕಾನಂ ಅರೂಪಂ ಉಪಪಜ್ಜನ್ತಾನಂ ಯೇ ಚ ಅರೂಪಂ ಉಪಪಜ್ಜಿತ್ವಾ ಪರಿನಿಬ್ಬಾಯಿಸ್ಸನ್ತಿ ತೇಸಂ ಚವನ್ತಾನಂ ತೇಸಂ ರೂಪಕ್ಖನ್ಧೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ರೂಪಕ್ಖನ್ಧೋ ಚ ನ ನಿರುಜ್ಝಿಸ್ಸತಿ ವೇದನಾಕ್ಖನ್ಧೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತಿ ತಸ್ಸ ರೂಪಕ್ಖನ್ಧೋ ನ ನಿರುಜ್ಝಿಸ್ಸತೀತಿ? ಆಮನ್ತಾ.

(ಙ) ಪಚ್ಚನೀಕಓಕಾಸೋ

೧೨೦. (ಕ) ಯತ್ಥ ರೂಪಕ್ಖನ್ಧೋ ನ ನಿರುಜ್ಝಿಸ್ಸತಿ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತೀತಿ? ನಿರುಜ್ಝಿಸ್ಸತಿ.

(ಖ) ಯತ್ಥ ವಾ ಪನ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತಿ ತತ್ಥ ರೂಪಕ್ಖನ್ಧೋ ನ ನಿರುಜ್ಝಿಸ್ಸತೀತಿ? ನಿರುಜ್ಝಿಸ್ಸತಿ.

(ಚ) ಪಚ್ಚನೀಕಪುಗ್ಗಲೋಕಾಸಾ

೧೨೧. (ಕ) ಯಸ್ಸ ಯತ್ಥ ರೂಪಕ್ಖನ್ಧೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತೀತಿ?

ಅರೂಪಾನಂ ತೇಸಂ ತತ್ಥ ರೂಪಕ್ಖನ್ಧೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ತತ್ಥ ರೂಪಕ್ಖನ್ಧೋ ಚ ನ ನಿರುಜ್ಝಿಸ್ಸತಿ ವೇದನಾಕ್ಖನ್ಧೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ರೂಪಕ್ಖನ್ಧೋ ನ ನಿರುಜ್ಝಿಸ್ಸತೀತಿ?

ಅಸಞ್ಞಸತ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ರೂಪಕ್ಖನ್ಧೋ ನ ನಿರುಜ್ಝಿಸ್ಸತಿ. ಪರಿನಿಬ್ಬನ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ಚ ನ ನಿರುಜ್ಝಿಸ್ಸತಿ ರೂಪಕ್ಖನ್ಧೋ ಚ ನ ನಿರುಜ್ಝಿಸ್ಸತಿ.