(೪) ಪಚ್ಚುಪ್ಪನ್ನಾತೀತವಾರೋ

(ಕ) ಅನುಲೋಮಪುಗ್ಗಲೋ

೧೨೨. (ಕ) ಯಸ್ಸ ರೂಪಕ್ಖನ್ಧೋ ನಿರುಜ್ಝತಿ ತಸ್ಸ ವೇದನಾಕ್ಖನ್ಧೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ವೇದನಾಕ್ಖನ್ಧೋ ನಿರುಜ್ಝಿತ್ಥ ತಸ್ಸ ರೂಪಕ್ಖನ್ಧೋ ನಿರುಜ್ಝತೀತಿ?

ಸಬ್ಬೇಸಂ ಉಪಪಜ್ಜನ್ತಾನಂ ಅರೂಪಾ ಚವನ್ತಾನಂ ತೇಸಂ ವೇದನಾಕ್ಖನ್ಧೋ ನಿರುಜ್ಝಿತ್ಥ, ನೋ ಚ ತೇಸಂ ರೂಪಕ್ಖನ್ಧೋ ನಿರುಜ್ಝತಿ. ಪಞ್ಚವೋಕಾರಾ ಚವನ್ತಾನಂ ಅಸಞ್ಞಸತ್ತಾ ಚವನ್ತಾನಂ ತೇಸಂ ವೇದನಾಕ್ಖನ್ಧೋ ಚ ನಿರುಜ್ಝಿತ್ಥ ರೂಪಕ್ಖನ್ಧೋ ಚ ನಿರುಜ್ಝತಿ.

೧೨೩. (ಕ) ಯಸ್ಸ ವೇದನಾಕ್ಖನ್ಧೋ ನಿರುಜ್ಝತಿ ತಸ್ಸ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥ ತಸ್ಸ ವೇದನಾಕ್ಖನ್ಧೋ ನಿರುಜ್ಝತೀತಿ?

ಸಬ್ಬೇಸಂ ಉಪಪಜ್ಜನ್ತಾನಂ ಅಸಞ್ಞಸತ್ತಾ ಚವನ್ತಾನಂ ತೇಸಂ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥ, ನೋ ಚ ತೇಸಂ ವೇದನಾಕ್ಖನ್ಧೋ ನಿರುಜ್ಝತಿ. ಚತುವೋಕಾರಾ ಪಞ್ಚವೋಕಾರಾ ಚವನ್ತಾನಂ ತೇಸಂ ಸಞ್ಞಾಕ್ಖನ್ಧೋ ಚ ನಿರುಜ್ಝಿತ್ಥ ವೇದನಾಕ್ಖನ್ಧೋ ಚ ನಿರುಜ್ಝತಿ.

(ಖ) ಅನುಲೋಮಓಕಾಸೋ

೧೨೪. (ಕ) ಯತ್ಥ ರೂಪಕ್ಖನ್ಧೋ ನಿರುಜ್ಝತಿ ತತ್ಥ ವೇದನಾಕ್ಖನ್ಧೋ ನಿರುಜ್ಝಿತ್ಥಾತಿ?

ಅಸಞ್ಞಸತ್ತೇ ತತ್ಥ ರೂಪಕ್ಖನ್ಧೋ ನಿರುಜ್ಝತಿ, ನೋ ಚ ತತ್ಥ ವೇದನಾಕ್ಖನ್ಧೋ ನಿರುಜ್ಝಿತ್ಥ. ಪಞ್ಚವೋಕಾರೇ ತತ್ಥ ರೂಪಕ್ಖನ್ಧೋ ಚ ನಿರುಜ್ಝತಿ ವೇದನಾಕ್ಖನ್ಧೋ ಚ ನಿರುಜ್ಝಿತ್ಥ.

(ಖ) ಯತ್ಥ ವಾ ಪನ ವೇದನಾಕ್ಖನ್ಧೋ ನಿರುಜ್ಝಿತ್ಥ ತತ್ಥ ರೂಪಕ್ಖನ್ಧೋ ನಿರುಜ್ಝತೀತಿ?

ಅರೂಪೇ ತತ್ಥ ವೇದನಾಕ್ಖನ್ಧೋ ನಿರುಜ್ಝಿತ್ಥ, ನೋ ಚ ತತ್ಥ ರೂಪಕ್ಖನ್ಧೋ ನಿರುಜ್ಝತಿ. ಪಞ್ಚವೋಕಾರೇ ತತ್ಥ ವೇದನಾಕ್ಖನ್ಧೋ ಚ ನಿರುಜ್ಝಿತ್ಥ ರೂಪಕ್ಖನ್ಧೋ ಚ ನಿರುಜ್ಝತಿ.

೧೨೫. (ಕ) ಯತ್ಥ ವೇದನಾಕ್ಖನ್ಧೋ ನಿರುಜ್ಝತಿ ತತ್ಥ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯತ್ಥ ವಾ ಪನ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥ ತತ್ಥ ವೇದನಾಕ್ಖನ್ಧೋ ನಿರುಜ್ಝತೀತಿ? ಆಮನ್ತಾ.

(ಗ) ಅನುಲೋಮಪುಗ್ಗಲೋಕಾಸಾ

೧೨೬. (ಕ) ಯಸ್ಸ ಯತ್ಥ ರೂಪಕ್ಖನ್ಧೋ ನಿರುಜ್ಝತಿ ತಸ್ಸ ತತ್ಥ ವೇದನಾಕ್ಖನ್ಧೋ ನಿರುಜ್ಝಿತ್ಥಾತಿ?

ಸುದ್ಧಾವಾಸೇ ಪರಿನಿಬ್ಬನ್ತಾನಂ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ರೂಪಕ್ಖನ್ಧೋ ನಿರುಜ್ಝತಿ, ನೋ ಚ ತೇಸಂ ತತ್ಥ ವೇದನಾಕ್ಖನ್ಧೋ ನಿರುಜ್ಝಿತ್ಥ. ಇತರೇಸಂ ಪಞ್ಚವೋಕಾರಾ ಚವನ್ತಾನಂ ತೇಸಂ ತತ್ಥ ರೂಪಕ್ಖನ್ಧೋ ಚ ನಿರುಜ್ಝತಿ ವೇದನಾಕ್ಖನ್ಧೋ ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ವೇದನಾಕ್ಖನ್ಧೋ ನಿರುಜ್ಝಿತ್ಥ ತಸ್ಸ ತತ್ಥ ರೂಪಕ್ಖನ್ಧೋ ನಿರುಜ್ಝತೀತಿ?

ಪಞ್ಚವೋಕಾರಂ ಉಪಪಜ್ಜನ್ತಾನಂ ಅರೂಪಾನಂ ತೇಸಂ ತತ್ಥ ವೇದನಾಕ್ಖನ್ಧೋ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ರೂಪಕ್ಖನ್ಧೋ ನಿರುಜ್ಝತಿ. ಪಞ್ಚವೋಕಾರಾ ಚವನ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ಚ ನಿರುಜ್ಝಿತ್ಥ ರೂಪಕ್ಖನ್ಧೋ ಚ ನಿರುಜ್ಝತಿ.

೧೨೭. (ಕ) ಯಸ್ಸ ಯತ್ಥ ವೇದನಾಕ್ಖನ್ಧೋ ನಿರುಜ್ಝತಿ ತಸ್ಸ ತತ್ಥ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥಾತಿ?

ಸುದ್ಧಾವಾಸೇ ಪರಿನಿಬ್ಬನ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ನಿರುಜ್ಝತಿ, ನೋ ಚ ತೇಸಂ ತತ್ಥ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥ. ಇತರೇಸಂ ಚತುವೋಕಾರಾ ಪಞ್ಚವೋಕಾರಾ ಚವನ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ಚ ನಿರುಜ್ಝತಿ ಸಞ್ಞಾಕ್ಖನ್ಧೋ ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥ ತಸ್ಸ ತತ್ಥ ವೇದನಾಕ್ಖನ್ಧೋ ನಿರುಜ್ಝತೀತಿ?

ಚತುವೋಕಾರಂ ಪಞ್ಚವೋಕಾರಂ ಉಪಪಜ್ಜನ್ತಾನಂ ತೇಸಂ ತತ್ಥ ಸಞ್ಞಾಕ್ಖನ್ಧೋ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ವೇದನಾಕ್ಖನ್ಧೋ ನಿರುಜ್ಝತಿ. ಚತುವೋಕಾರಾ ಪಞ್ಚವೋಕಾರಾ ಚವನ್ತಾನಂ ತೇಸಂ ತತ್ಥ ಸಞ್ಞಾಕ್ಖನ್ಧೋ ಚ ನಿರುಜ್ಝಿತ್ಥ ವೇದನಾಕ್ಖನ್ಧೋ ಚ ನಿರುಜ್ಝತಿ.

(ಘ) ಪಚ್ಚನೀಕಪುಗ್ಗಲೋ

೧೨೮. (ಕ) ಯಸ್ಸ ರೂಪಕ್ಖನ್ಧೋ ನ ನಿರುಜ್ಝತಿ ತಸ್ಸ ವೇದನಾಕ್ಖನ್ಧೋ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ವೇದನಾಕ್ಖನ್ಧೋ ನ ನಿರುಜ್ಝಿತ್ಥ ತಸ್ಸ ರೂಪಕ್ಖನ್ಧೋ ನ ನಿರುಜ್ಝತೀತಿ? ನತ್ಥಿ.

೧೨೯. (ಕ) ಯಸ್ಸ ವೇದನಾಕ್ಖನ್ಧೋ ನ ನಿರುಜ್ಝತಿ ತಸ್ಸ ಸಞ್ಞಾಕ್ಖನ್ಧೋ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಸಞ್ಞಾಕ್ಖನ್ಧೋ ನ ನಿರುಜ್ಝಿತ್ಥ ತಸ್ಸ ವೇದನಾಕ್ಖನ್ಧೋ ನ ನಿರುಜ್ಝತೀತಿ? ನತ್ಥಿ.

(ಙ) ಪಚ್ಚನೀಕಓಕಾಸೋ

೧೩೦. ಯತ್ಥ ರೂಪಕ್ಖನ್ಧೋ ನ ನಿರುಜ್ಝತಿ (ಯತ್ಥಕಂ ಪರಿಪುಣ್ಣಂ ಕಾತಬ್ಬಂ).

(ಚ) ಪಚ್ಚನೀಕಪುಗ್ಗಲೋಕಾಸಾ

೧೩೧. (ಕ) ಯಸ್ಸ ಯತ್ಥ ರೂಪಕ್ಖನ್ಧೋ ನ ನಿರುಜ್ಝತಿ ತಸ್ಸ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝಿತ್ಥಾತಿ?

ಪಞ್ಚವೋಕಾರಂ ಉಪಪಜ್ಜನ್ತಾನಂ ಅರೂಪಾನಂ ತೇಸಂ ತತ್ಥ ರೂಪಕ್ಖನ್ಧೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝಿತ್ಥ. ಸುದ್ಧಾವಾಸಂ ಉಪಪಜ್ಜನ್ತಾನಂ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ರೂಪಕ್ಖನ್ಧೋ ಚ ನ ನಿರುಜ್ಝತಿ ವೇದನಾಕ್ಖನ್ಧೋ ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ವೇದನಾಕ್ಖನ್ಧೋ ನ ನಿರುಜ್ಝಿತ್ಥ ತಸ್ಸ ತತ್ಥ ರೂಪಕ್ಖನ್ಧೋ ನ ನಿರುಜ್ಝತೀತಿ?

ಸುದ್ಧಾವಾಸೇ ಪರಿನಿಬ್ಬನ್ತಾನಂ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ರೂಪಕ್ಖನ್ಧೋ ನ ನಿರುಜ್ಝತಿ. ಸುದ್ಧಾವಾಸಂ ಉಪಪಜ್ಜನ್ತಾನಂ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ಚ ನ ನಿರುಜ್ಝಿತ್ಥ ರೂಪಕ್ಖನ್ಧೋ ಚ ನ ನಿರುಜ್ಝತಿ.

೧೩೨. (ಕ) ಯಸ್ಸ ಯತ್ಥ ವೇದನಾಕ್ಖನ್ಧೋ ನ ನಿರುಜ್ಝತಿ ತಸ್ಸ ತತ್ಥ ಸಞ್ಞಾಕ್ಖನ್ಧೋ ನ ನಿರುಜ್ಝಿತ್ಥಾತಿ?

ಚತುವೋಕಾರಂ ಪಞ್ಚವೋಕಾರಂ ಉಪಪಜ್ಜನ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಸಞ್ಞಾಕ್ಖನ್ಧೋ ನ ನಿರುಜ್ಝಿತ್ಥ. ಸುದ್ಧಾವಾಸಂ ಉಪಪಜ್ಜನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ವೇದನಾಕ್ಖನ್ಧೋ ಚ ನ ನಿರುಜ್ಝತಿ ಸಞ್ಞಾಕ್ಖನ್ಧೋ ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಸಞ್ಞಾಕ್ಖನ್ಧೋ ನ ನಿರುಜ್ಝಿತ್ಥ ತಸ್ಸ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝತೀತಿ?

ಸುದ್ಧಾವಾಸೇ ಪರಿನಿಬ್ಬನ್ತಾನಂ ತೇಸಂ ತತ್ಥ ಸಞ್ಞಾಕ್ಖನ್ಧೋ ನ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ವೇದನಾಕ್ಖನ್ಧೋ ನ ನಿರುಜ್ಝತಿ. ಸುದ್ಧಾವಾಸಂ ಉಪಪಜ್ಜನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಸಞ್ಞಾಕ್ಖನ್ಧೋ ಚ ನ ನಿರುಜ್ಝಿತ್ಥ ವೇದನಾಕ್ಖನ್ಧೋ ಚ ನ ನಿರುಜ್ಝತಿ.