(೧) ಅಜ್ಝತ್ತಿಕಸ್ಸ ಉಪಾದಾಯ

೯೭೩. ತತ್ಥ ಕತಮಾನಿ ಅಟ್ಠಾರಸ ತಣ್ಹಾವಿಚರಿತಾನಿ ಅಜ್ಝತ್ತಿಕಸ್ಸ ಉಪಾದಾಯ? ಅಸ್ಮೀತಿ ಹೋತಿ, ಇತ್ಥಸ್ಮೀತಿ ಹೋತಿ, ಏವಸ್ಮೀತಿ ಹೋತಿ, ಅಞ್ಞಥಾಸ್ಮೀತಿ ಹೋತಿ, ಭವಿಸ್ಸನ್ತಿ ಹೋತಿ, ಇತ್ಥಂ ಭವಿಸ್ಸನ್ತಿ ಹೋತಿ, ಏವಂ ಭವಿಸ್ಸನ್ತಿ ಹೋತಿ, ಅಞ್ಞಥಾ ಭವಿಸ್ಸನ್ತಿ ಹೋತಿ, ಅಸಸ್ಮೀತಿ ಹೋತಿ, ಸಾತಸ್ಮೀತಿ ಹೋತಿ, ಸಿಯನ್ತಿ ಹೋತಿ, ಇತ್ಥಂ ಸಿಯನ್ತಿ ಹೋತಿ, ಏವಂ ಸಿಯನ್ತಿ ಹೋತಿ, ಅಞ್ಞಥಾ ಸಿಯನ್ತಿ ಹೋತಿ, ಅಪಾಹಂ ಸಿಯನ್ತಿ ಹೋತಿ, ಅಪಾಹಂ ಇತ್ಥಂ ಸಿಯನ್ತಿ ಹೋತಿ, ಅಪಾಹಂ ಏವಂ ಸಿಯನ್ತಿ ಹೋತಿ, ಅಪಾಹಂ ಅಞ್ಞಥಾ ಸಿಯನ್ತಿ ಹೋತಿ.

೯೭೪. ಕಥಞ್ಚ ಅಸ್ಮೀತಿ ಹೋತಿ? ಕಞ್ಚಿ ಧಮ್ಮಂ ಅನವಕಾರಿಂ [ಅನವಕಾರೀ (ಸೀ. ಕ.)] ಕರಿತ್ವಾ ರೂಪಂ…ಪೇ… ವೇದನಂ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ ಅಸ್ಮೀತಿ ಛನ್ದಂ ಪಟಿಲಭತಿ, ಅಸ್ಮೀತಿ ಮಾನಂ ಪಟಿಲಭತಿ, ಅಸ್ಮೀತಿ ದಿಟ್ಠಿಂ ಪಟಿಲಭತಿ. ತಸ್ಮಿಂ ಸತಿ ಇಮಾನಿ ಪಪಞ್ಚಿತಾನಿ ಹೋನ್ತಿ – ಇತ್ಥಸ್ಮೀತಿ ವಾ ಏವಸ್ಮೀತಿ ವಾ ಅಞ್ಞಥಾಸ್ಮೀತಿ ವಾ.

(೨) ಕಥಞ್ಚ ಇತ್ಥಸ್ಮೀತಿ ಹೋತಿ? ಖತ್ತಿಯೋಸ್ಮೀತಿ ವಾ, ಬ್ರಾಹ್ಮಣೋಸ್ಮೀತಿ ವಾ, ವೇಸ್ಸೋಸ್ಮೀತಿ ವಾ, ಸುದ್ದೋಸ್ಮೀತಿ ವಾ, ಗಹಟ್ಠೋಸ್ಮೀತಿ ವಾ, ಪಬ್ಬಜಿತೋಸ್ಮೀತಿ ವಾ, ದೇವೋಸ್ಮೀತಿ ವಾ, ಮನುಸ್ಸೋಸ್ಮೀತಿ ವಾ, ರೂಪೀಸ್ಮೀತಿ ವಾ, ಅರೂಪೀಸ್ಮೀತಿ ವಾ, ಸಞ್ಞೀಸ್ಮೀತಿ ವಾ, ಅಸಞ್ಞೀಸ್ಮೀತಿ ವಾ, ನೇವಸಞ್ಞೀನಾಸಞ್ಞೀಸ್ಮೀತಿ ವಾ – ಏವಂ ಇತ್ಥಸ್ಮೀತಿ ಹೋತಿ.

(೩) ಕಥಞ್ಚ ಏವಸ್ಮೀತಿ ಹೋತಿ? ಪರಪುಗ್ಗಲಂ [ಪರಂ ಪುಗ್ಗಲಂ (ಸ್ಯಾ.)] ಉಪನಿಧಾಯ ಯಥಾ ಸೋ ಖತ್ತಿಯೋ ತಥಾಹಂ ಖತ್ತಿಯೋಸ್ಮೀತಿ ವಾ, ಯಥಾ ಸೋ ಬ್ರಾಹ್ಮಣೋ ತಥಾಹಂ ಬ್ರಾಹ್ಮಣೋಸ್ಮೀತಿ ವಾ, ಯಥಾ ಸೋ ವೇಸ್ಸೋ ತಥಾಹಂ ವೇಸ್ಸೋಸ್ಮೀತಿ ವಾ ಯಥಾ ಸೋ ಸುದ್ದೋ ತಥಾಹಂ ಸುದ್ದೋಸ್ಮೀತಿ ವಾ, ಯಥಾ ಸೋ ಗಹಟ್ಠೋ ತಥಾಹಂ ಗಹಟ್ಠೋಸ್ಮೀತಿ ವಾ, ಯಥಾ ಸೋ ಪಬ್ಬಜಿತೋ ತಥಾಹಂ ಪಬ್ಬಜಿತೋಸ್ಮೀತಿ ವಾ, ಯಥಾ ಸೋ ದೇವೋ ತಥಾಹಂ ದೇವೋಸ್ಮೀತಿ ವಾ, ಯಥಾ ಸೋ ಮನುಸ್ಸೋ ತಥಾಹಂ ಮನುಸ್ಸೋಸ್ಮೀತಿ ವಾ, ಯಥಾ ಸೋ ರೂಪೀ ತಥಾಹಂ ರೂಪೀಸ್ಮೀತಿ ವಾ, ಯಥಾ ಸೋ ಅರೂಪೀ ತಥಾಹಂ ಅರೂಪೀಸ್ಮೀತಿ ವಾ, ಯಥಾ ಸೋ ಸಞ್ಞೀ ತಥಾಹಂ ಸಞ್ಞೀಸ್ಮೀತಿ ವಾ, ಯಥಾ ಸೋ ಅಸಞ್ಞೀ ತಥಾಹಂ ಅಸಞ್ಞೀಸ್ಮೀತಿ ವಾ, ಯಥಾ ಸೋ ನೇವಸಞ್ಞೀನಾಸಞ್ಞೀ ತಥಾಹಂ ನೇವಸಞ್ಞೀನಾಸಞ್ಞೀಸ್ಮೀತಿ ವಾ – ಏವಂ ಏವಸ್ಮೀತಿ ಹೋತಿ.

(೪) ಕಥಞ್ಚ ಅಞ್ಞಥಾಸ್ಮೀತಿ ಹೋತಿ? ಪರಪುಗ್ಗಲಂ ಉಪನಿಧಾಯ ಯಥಾ ಸೋ ಖತ್ತಿಯೋ ನಾಹಂ ತಥಾ ಖತ್ತಿಯೋಸ್ಮೀತಿ ವಾ ಯಥಾ ಸೋ ಬ್ರಾಹ್ಮಣೋ ನಾಹಂ ತಥಾ ಬ್ರಾಹ್ಮಣೋಸ್ಮೀತಿ ವಾ, ಯಥಾ ಸೋ ವೇಸ್ಸೋ ನಾಹಂ ತಥಾ ವೇಸ್ಸೋಸ್ಮೀತಿ ವಾ, ಯಥಾ ಸೋ ಸುದ್ದೋ ನಾಹಂ ತಥಾ ಸುದ್ದೋಸ್ಮೀತಿ ವಾ, ಯಥಾ ಸೋ ಗಹಟ್ಠೋ ನಾಹಂ ತಥಾ ಗಹಟ್ಠೋಸ್ಮೀತಿ ವಾ, ಯಥಾ ಸೋ ಪಬ್ಬಜಿತೋ ನಾಹಂ ತಥಾ ಪಬ್ಬಜಿತೋಸ್ಮೀತಿ ವಾ, ಯಥಾ ಸೋ ದೇವೋ ನಾಹಂ ತಥಾ ದೇವೋಸ್ಮೀತಿ ವಾ, ಯಥಾ ಸೋ ಮನುಸ್ಸೋ ನಾಹಂ ತಥಾ ಮನುಸ್ಸೋಸ್ಮೀತಿ ವಾ, ಯಥಾ ಸೋ ರೂಪೀ ನಾಹಂ ತಥಾ ರೂಪೀಸ್ಮೀತಿ ವಾ, ಯಥಾ ಸೋ ಅರೂಪೀ ನಾಹಂ ತಥಾ ಅರೂಪೀಸ್ಮೀತಿ ವಾ, ಯಥಾ ಸೋ ಸಞ್ಞೀ ನಾಹಂ ತಥಾ ಸಞ್ಞೀಸ್ಮೀತಿ ವಾ, ಯಥಾ ಸೋ ಅಸಞ್ಞೀ ನಾಹಂ ತಥಾ ಅಸಞ್ಞೀಸ್ಮೀತಿ ವಾ, ಯಥಾ ಸೋ ನೇವಸಞ್ಞೀನಾಸಞ್ಞೀ ನಾಹಂ ತಥಾ ನೇವಸಞ್ಞೀನಾಸಞ್ಞೀಸ್ಮೀತಿ ವಾ – ಏವಂ ಅಞ್ಞಥಾಸ್ಮೀತಿ ಹೋತಿ.

(೫) ಕಥಞ್ಚ ಭವಿಸ್ಸನ್ತಿ ಹೋತಿ? ಕಞ್ಚಿ ಧಮ್ಮಂ ಅನವಕಾರಿಂ ಕರಿತ್ವಾ ರೂಪಂ…ಪೇ… ವೇದನಂ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ ಭವಿಸ್ಸನ್ತಿ ಛನ್ದಂ ಪಟಿಲಭತಿ, ಭವಿಸ್ಸನ್ತಿ ಮಾನಂ ಪಟಿಲಭತಿ, ಭವಿಸ್ಸನ್ತಿ ದಿಟ್ಠಿಂ ಪಟಿಲಭತಿ. ತಸ್ಮಿಂ ಸತಿ ಇಮಾನಿ ಪಪಞ್ಚಿತಾನಿ ಹೋನ್ತಿ – ಇತ್ಥಂ ಭವಿಸ್ಸನ್ತಿ ವಾ, ಏವಂ ಭವಿಸ್ಸನ್ತಿ ವಾ, ಅಞ್ಞಥಾ ಭವಿಸ್ಸನ್ತಿ ವಾ.

(೬) ಕಥಞ್ಚ ಇತ್ಥಂ ಭವಿಸ್ಸನ್ತಿ ಹೋತಿ? ಖತ್ತಿಯೋ ಭವಿಸ್ಸನ್ತಿ ವಾ, ಬ್ರಾಹ್ಮಣೋ ಭವಿಸ್ಸನ್ತಿ ವಾ, ವೇಸ್ಸೋ ಭವಿಸ್ಸನ್ತಿ ವಾ, ಸುದ್ದೋ ಭವಿಸ್ಸನ್ತಿ ವಾ, ಗಹಟ್ಠೋ ಭವಿಸ್ಸನ್ತಿ ವಾ, ಪಬ್ಬಜಿತೋ ಭವಿಸ್ಸನ್ತಿ ವಾ, ದೇವೋ ಭವಿಸ್ಸನ್ತಿ ವಾ, ಮನುಸ್ಸೋ ಭವಿಸ್ಸನ್ತಿ ವಾ, ರೂಪೀ ಭವಿಸ್ಸನ್ತಿ ವಾ, ಅರೂಪೀ ಭವಿಸ್ಸನ್ತಿ ವಾ, ಸಞ್ಞೀ ಭವಿಸ್ಸನ್ತಿ ವಾ, ಅಸಞ್ಞೀ ಭವಿಸ್ಸನ್ತಿ ವಾ, ನೇವಸಞ್ಞೀನಾಸಞ್ಞೀ ಭವಿಸ್ಸನ್ತಿ ವಾ – ಏವಂ ಇತ್ಥಂ ಭವಿಸ್ಸನ್ತಿ ಹೋತಿ.

(೭) ಕಥಞ್ಚ ಏವಂ ಭವಿಸ್ಸನ್ತಿ ಹೋತಿ? ಪರಪುಗ್ಗಲಂ ಉಪನಿಧಾಯ ಯಥಾ ಸೋ ಖತ್ತಿಯೋ ತಥಾಹಂ ಖತ್ತಿಯೋ ಭವಿಸ್ಸನ್ತಿ ವಾ, ಯಥಾ ಸೋ ಬ್ರಾಹ್ಮಣೋ ತಥಾಹಂ ಬ್ರಾಹ್ಮಣೋ ಭವಿಸ್ಸನ್ತಿ ವಾ…ಪೇ… ಯಥಾ ಸೋ ನೇವಸಞ್ಞೀನಾಸಞ್ಞೀ ತಥಾಹಂ ನೇವಸಞ್ಞೀನಾಸಞ್ಞೀ ಭವಿಸ್ಸನ್ತಿ ವಾ – ಏವಂ ಭವಿಸ್ಸನ್ತಿ ಹೋತಿ.

(೮) ಕಥಞ್ಚ ಅಞ್ಞಥಾ ಭವಿಸ್ಸನ್ತಿ ಹೋತಿ? ಪರಪುಗ್ಗಲಂ ಉಪನಿಧಾಯ ಯಥಾ ಸೋ ಖತ್ತಿಯೋ ನಾಹಂ ತಥಾ ಖತ್ತಿಯೋ ಭವಿಸ್ಸನ್ತಿ ವಾ, ಯಥಾ ಸೋ ಬ್ರಾಹ್ಮಣೋ ನಾಹಂ ತಥಾ ಬ್ರಾಹ್ಮಣೋ ಭವಿಸ್ಸನ್ತಿ ವಾ…ಪೇ… ಯಥಾ ಸೋ ನೇವಸಞ್ಞೀನಾಸಞ್ಞೀ ನಾಹಂ ತಥಾ ನೇವಸಞ್ಞೀನಾಸಞ್ಞೀ ಭವಿಸ್ಸನ್ತಿ ವಾ – ಏವಂ ಅಞ್ಞಥಾ ಭವಿಸ್ಸನ್ತಿ ಹೋತಿ.

(೯) ಕಥಞ್ಚ ಅಸಸ್ಮೀತಿ ಹೋತಿ? ಕಞ್ಚಿ ಧಮ್ಮಂ ಅನವಕಾರಿಂ ಕರಿತ್ವಾ ರೂಪಂ…ಪೇ… ವೇದನಂ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ ನಿಚ್ಚೋಸ್ಮಿ ಧುವೋಸ್ಮಿ ಸಸ್ಸತೋಸ್ಮಿ ಅವಿಪರಿಣಾಮಧಮ್ಮೋಸ್ಮೀತಿ – ಏವಂ ಅಸಸ್ಮೀತಿ ಹೋತಿ.

(೧೦) ಕಥಞ್ಚ ಸಾತಸ್ಮೀತಿ ಹೋತಿ? ಕಞ್ಚಿ ಧಮ್ಮಂ ಅನವಕಾರಿಂ ಕರಿತ್ವಾ ರೂಪಂ…ಪೇ… ವೇದನಂ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ ಉಚ್ಛಿಜ್ಜಿಸ್ಸಾಮಿ ವಿನಸ್ಸಿಸ್ಸಾಮಿ ನ ಭವಿಸ್ಸಾಮೀತಿ – ಏವಂ ಸಾತಸ್ಮೀತಿ ಹೋತಿ.

(೧೧) ಕಥಞ್ಚ ಸಿಯನ್ತಿ ಹೋತಿ? ಕಞ್ಚಿ ಧಮ್ಮಂ ಅನವಕಾರಿಂ ಕರಿತ್ವಾ ರೂಪಂ…ಪೇ… ವೇದನಂ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ ಸಿಯನ್ತಿ ಛನ್ದಂ ಪಟಿಲಭತಿ, ಸಿಯನ್ತಿ ಮಾನಂ ಪಟಿಲಭತಿ, ಸಿಯನ್ತಿ ದಿಟ್ಠಿಂ ಪಟಿಲಭತಿ. ತಸ್ಮಿಂ ಸತಿ ಇಮಾನಿ ಪಪಞ್ಚಿತಾನಿ ಹೋನ್ತಿ – ಇತ್ಥಂ ಸಿಯನ್ತಿ ವಾ, ಏವಂ ಸಿಯನ್ತಿ ವಾ, ಅಞ್ಞಥಾ ಸಿಯನ್ತಿ ವಾ.

(೧೨) ಕಥಞ್ಚ ಇತ್ಥಂ ಸಿಯನ್ತಿ ಹೋತಿ? ಖತ್ತಿಯೋ ಸಿಯನ್ತಿ ವಾ, ಬ್ರಾಹ್ಮಣೋ ಸಿಯನ್ತಿ ವಾ, ವೇಸ್ಸೋ ಸಿಯನ್ತಿ ವಾ, ಸುದ್ದೋ ಸಿಯನ್ತಿ ವಾ, ಗಹಟ್ಠೋ ಸಿಯನ್ತಿ ವಾ, ಪಬ್ಬಜಿತೋ ಸಿಯನ್ತಿ ವಾ, ದೇವೋ ಸಿಯನ್ತಿ ವಾ, ಮನುಸ್ಸೋ ಸಿಯನ್ತಿ ವಾ, ರೂಪೀ ಸಿಯನ್ತಿ ವಾ, ಅರೂಪೀ ಸಿಯನ್ತಿ ವಾ, ಸಞ್ಞೀ ಸಿಯನ್ತಿ ವಾ, ಅಸಞ್ಞೀ ಸಿಯನ್ತಿ ವಾ, ನೇವಸಞ್ಞೀನಾಸಞ್ಞೀ ಸಿಯನ್ತಿ ವಾ – ಏವಂ ಇತ್ಥಂ ಸಿಯನ್ತಿ ಹೋತಿ.

(೧೩) ಕಥಞ್ಚ ಏವಂ ಸಿಯನ್ತಿ ಹೋತಿ? ಪರಪುಗ್ಗಲಂ ಉಪನಿಧಾಯ ಯಥಾ ಸೋ ಖತ್ತಿಯೋ ತಥಾಹಂ ಖತ್ತಿಯೋ ಸಿಯನ್ತಿ ವಾ, ಯಥಾ ಸೋ ಬ್ರಾಹ್ಮಣೋ ತಥಾಹಂ ಬ್ರಾಹ್ಮಣೋ ಸಿಯನ್ತಿ ವಾ…ಪೇ… ಯಥಾ ಸೋ ನೇವಸಞ್ಞೀನಾಸಞ್ಞೀ ತಥಾಹಂ ನೇವಸಞ್ಞೀನಾಸಞ್ಞೀ ಸಿಯನ್ತಿ ವಾ – ಏವಂ ಏವಂ ಸಿಯನ್ತಿ ಹೋತಿ.

(೧೪) ಕಥಞ್ಚ ಅಞ್ಞಥಾ ಸಿಯನ್ತಿ ಹೋತಿ? ಪರಪುಗ್ಗಲಂ ಉಪನಿಧಾಯ ಯಥಾ ಸೋ ಖತ್ತಿಯೋ ನಾಹಂ ತಥಾ ಖತ್ತಿಯೋ ಸಿಯನ್ತಿ ವಾ, ಯಥಾ ಸೋ ಬ್ರಾಹ್ಮಣೋ ನಾಹಂ ತಥಾ ಬ್ರಾಹ್ಮಣೋ ಸಿಯನ್ತಿ ವಾ…ಪೇ… ಯಥಾ ಸೋ ನೇವಸಞ್ಞೀನಾಸಞ್ಞೀ ನಾಹಂ ತಥಾ ನೇವಸಞ್ಞೀನಾಸಞ್ಞೀ ಸಿಯನ್ತಿ ವಾ – ಏವಂ ಅಞ್ಞಥಾ ಸಿಯನ್ತಿ ಹೋತಿ.

(೧೫) ಕಥಞ್ಚ ಅಪಾಹಂ ಸಿಯನ್ತಿ ಹೋತಿ? ಕಞ್ಚಿ ಧಮ್ಮಂ ಅನವಕಾರಿಂ ಕರಿತ್ವಾ ರೂಪಂ… ವೇದನಂ… ಸಞ್ಞಂ… ಸಙ್ಖಾರೇ… ವಿಞ್ಞಾಣಂ ಅಪಾಹಂ ಸಿಯನ್ತಿ ಛನ್ದಂ ಪಟಿಲಭತಿ, ಅಪಾಹಂ ಸಿಯನ್ತಿ ಮಾನಂ ಪಟಿಲಭತಿ, ಅಪಾಹಂ ಸಿಯನ್ತಿ ದಿಟ್ಠಿಂ ಪಟಿಲಭತಿ. ತಸ್ಮಿಂ ಸತಿ ಇಮಾನಿ ಪಪಞ್ಚಿತಾನಿ ಹೋನ್ತಿ – ಅಪಾಹಂ ಇತ್ಥಂ ಸಿಯನ್ತಿ ವಾ, ಅಪಾಹಂ ಏವಂ ಸಿಯನ್ತಿ ವಾ, ಅಪಾಹಂ ಅಞ್ಞಥಾ ಸಿಯನ್ತಿ ವಾ.

(೧೬) ಕಥಞ್ಚ ಅಪಾಹಂ ಇತ್ಥಂ ಸಿಯನ್ತಿ ಹೋತಿ? ಅಪಾಹಂ ಖತ್ತಿಯೋ ಸಿಯನ್ತಿ ವಾ, ಅಪಾಹಂ ಬ್ರಾಹ್ಮಣೋ ಸಿಯನ್ತಿ ವಾ, ಅಪಾಹಂ ವೇಸ್ಸೋ ಸಿಯನ್ತಿ ವಾ, ಅಪಾಹಂ ಸುದ್ದೋ ಸಿಯನ್ತಿ ವಾ, ಅಪಾಹಂ ಗಹಟ್ಠೋ ಸಿಯನ್ತಿ ವಾ, ಅಪಾಹಂ ಪಬ್ಬಜಿತೋ ಸಿಯನ್ತಿ ವಾ, ಅಪಾಹಂ ದೇವೋ ಸಿಯನ್ತಿ ವಾ, ಅಪಾಹಂ ಮನುಸ್ಸೋ ಸಿಯನ್ತಿ ವಾ, ಅಪಾಹಂ ರೂಪೀ ಸಿಯನ್ತಿ ವಾ, ಅಪಾಹಂ ಅರೂಪೀ ಸಿಯನ್ತಿ ವಾ, ಅಪಾಹಂ ಸಞ್ಞೀ ಸಿಯನ್ತಿ ವಾ, ಅಪಾಹಂ ಅಸಞ್ಞೀ ಸಿಯನ್ತಿ ವಾ, ಅಪಾಹಂ ನೇವಸಞ್ಞೀನಾಸಞ್ಞೀ ಸಿಯನ್ತಿ ವಾ – ಏವಂ ಅಪಾಹಂ ಇತ್ಥಂ ಸಿಯನ್ತಿ ಹೋತಿ. (೧೭) ಕಥಞ್ಚ ಅಪಾಹಂ ಏವಂ ಸಿಯನ್ತಿ ಹೋತಿ? ಪರಪುಗ್ಗಲಂ ಉಪನಿಧಾಯ ಯಥಾ ಸೋ ಖತ್ತಿಯೋ ಅಪಾಹಂ ತಥಾ ಖತ್ತಿಯೋ ಸಿಯನ್ತಿ ವಾ, ಯಥಾ ಸೋ ಬ್ರಾಹ್ಮಣೋ ಅಪಾಹಂ ತಥಾ ಬ್ರಾಹ್ಮಣೋ ಸಿಯನ್ತಿ ವಾ…ಪೇ… ಯಥಾ ಸೋ ನೇವಸಞ್ಞೀನಾಸಞ್ಞೀ ಅಪಾಹಂ ತಥಾ ನೇವಸಞ್ಞೀನಾಸಞ್ಞೀ ಸಿಯನ್ತಿ ವಾ – ಏವಂ ಅಪಾಹಂ ಏವಂ ಸಿಯನ್ತಿ ಹೋತಿ.

(೧೮) ಕಥಞ್ಚ ಅಪಾಹಂ ಅಞ್ಞಥಾ ಸಿಯನ್ತಿ ಹೋತಿ? ಪರಪುಗ್ಗಲಂ ಉಪನಿಧಾಯ ಯಥಾ ಸೋ ಖತ್ತಿಯೋ ಅಪಾಹಂ ನ ತಥಾ ಖತ್ತಿಯೋ ಸಿಯನ್ತಿ ವಾ, ಯಥಾ ಸೋ ಬ್ರಾಹ್ಮಣೋ ಅಪಾಹಂ ನ ತಥಾ ಬ್ರಾಹ್ಮಣೋ ಸಿಯನ್ತಿ ವಾ…ಪೇ… ಯಥಾ ಸೋ ನೇವಸಞ್ಞೀನಾಸಞ್ಞೀ ಅಪಾಹಂ ನ ತಥಾ ನೇವಸಞ್ಞೀನಾಸಞ್ಞೀ ಸಿಯನ್ತಿ ವಾ – ಏವಂ ಅಪಾಹಂ ಅಞ್ಞಥಾ ಸಿಯನ್ತಿ ಹೋತಿ.

ಇಮಾನಿ ಅಟ್ಠಾರಸ ತಣ್ಹಾವಿಚರಿತಾನಿ ಅಜ್ಝತ್ತಿಕಸ್ಸ ಉಪಾದಾಯ.