೯. ನವಕನಿದ್ದೇಸೋ

(೧) ನವ ಆಘಾತವತ್ಥೂನಿ

೯೬೦. ತತ್ಥ ಕತಮಾನಿ ನವ ಆಘಾತವತ್ಥೂನಿ? ‘‘ಅನತ್ಥಂ ಮೇ ಅಚರೀ’’ತಿ ಆಘಾತೋ ಜಾಯತಿ; ‘‘ಅನತ್ಥಂ ಮೇ ಚರತೀ’’ತಿ ಆಘಾತೋ ಜಾಯತಿ; ‘‘ಅನತ್ಥಂ ಮೇ ಚರಿಸ್ಸತೀ’’ತಿ ಆಘಾತೋ ಜಾಯತಿ; ‘‘ಪಿಯಸ್ಸ ಮೇ ಮನಾಪಸ್ಸ ಅನತ್ಥಂ ಅಚರಿ’’…ಪೇ… ಅನತ್ಥಂ ಚರತಿ…ಪೇ… ಅನತ್ಥಂ ಚರಿಸ್ಸತೀತಿ ಆಘಾತೋ ಜಾಯತಿ; ಅಪ್ಪಿಯಸ್ಸ ಮೇ ಅಮನಾಪಸ್ಸ ಅತ್ಥಂ ಅಚರಿ…ಪೇ… ಅತ್ಥಂ ಚರತಿ…ಪೇ… ಅತ್ಥಂ ಚರಿಸ್ಸತೀತಿ ಆಘಾತೋ ಜಾಯತಿ. ಇಮಾನಿ ನವ ಆಘಾತವತ್ಥೂನಿ.

(೨) ನವ ಪುರಿಸಮಲಾನಿ

೯೬೧. ತತ್ಥ ಕತಮಾನಿ ನವ ಪುರಿಸಮಲಾನಿ? ಕೋಧೋ, ಮಕ್ಖೋ, ಇಸ್ಸಾ, ಮಚ್ಛರಿಯಂ, ಮಾಯಾ, ಸಾಠೇಯ್ಯಂ, ಮುಸಾವಾದೋ, ಪಾಪಿಚ್ಛತಾ, ಮಿಚ್ಛಾದಿಟ್ಠಿ – ಇಮಾನಿ ನವ ಪುರಿಸಮಲಾನಿ.

(೩) ನವವಿಧಾ ಮಾನಾ

೯೬೨. ತತ್ಥ ಕತಮೇ ನವವಿಧಾ ಮಾನಾ? ‘‘ಸೇಯ್ಯಸ್ಸ ಸೇಯ್ಯೋಹಮಸ್ಮೀ’’ತಿ ಮಾನೋ, ‘‘ಸೇಯ್ಯಸ್ಸ ಸದಿಸೋಹಮಸ್ಮೀ’’ತಿ ಮಾನೋ, ‘‘ಸೇಯ್ಯಸ್ಸ ಹೀನೋಹಮಸ್ಮೀ’’ತಿ ಮಾನೋ, ‘‘ಸದಿಸಸ್ಸ ಸೇಯ್ಯೋಹಮಸ್ಮೀ’’ತಿ ಮಾನೋ, ‘‘ಸದಿಸಸ್ಸ ಸದಿಸೋಹಮಸ್ಮೀ’’ತಿ ಮಾನೋ, ‘‘ಸದಿಸಸ್ಸ ಹೀನೋಹಮಸ್ಮೀ’’ತಿ ಮಾನೋ, ‘‘ಹೀನಸ್ಸ ಸೇಯ್ಯೋಹಮಸ್ಮೀ’’ತಿ ಮಾನೋ, ‘‘ಹೀನಸ್ಸ ಸದಿಸೋಹಮಸ್ಮೀ’’ತಿ ಮಾನೋ, ‘‘ಹೀನಸ್ಸ ಹೀನೋಹಮಸ್ಮೀ’’ತಿ ಮಾನೋ – ಇಮೇ ನವವಿಧಾ ಮಾನಾ.

(೪) ನವ ತಣ್ಹಾಮೂಲಕಾ ಧಮ್ಮಾ

೯೬೩. ತತ್ಥ ಕತಮೇ ನವ ತಣ್ಹಾಮೂಲಕಾ ಧಮ್ಮಾ? ತಣ್ಹಂ ಪಟಿಚ್ಚ ಪರಿಯೇಸನಾ, ಪರಿಯೇಸನಂ ಪಟಿಚ್ಚ ಲಾಭೋ, ಲಾಭಂ ಪಟಿಚ್ಚ ವಿನಿಚ್ಛಯೋ, ವಿನಿಚ್ಛಯಂ ಪಟಿಚ್ಚ ಛನ್ದರಾಗೋ, ಛನ್ದರಾಗಂ ಪಟಿಚ್ಚ ಅಜ್ಝೋಸಾನಂ, ಅಜ್ಝೋಸಾನಂ ಪಟಿಚ್ಚ ಪರಿಗ್ಗಹೋ, ಪರಿಗ್ಗಹಂ ಪಟಿಚ್ಚ ಮಚ್ಛರಿಯಂ, ಮಚ್ಛರಿಯಂ ಪಟಿಚ್ಚ ಆರಕ್ಖೋ, ಆರಕ್ಖಾಧಿಕರಣಂ ದಣ್ಡಾದಾನ-ಸತ್ಥಾದಾನ-ಕಲಹ-ವಿಗ್ಗಹವಿವಾದ-ತುವಂತುವಂ-ಪೇಸುಞ್ಞ-ಮುಸಾವಾದಾ ಅನೇಕೇ ಪಾಪಕಾ ಅಕುಸಲಾ ಧಮ್ಮಾ ಸಮ್ಭವನ್ತಿ – ಇಮೇ ನವ ತಣ್ಹಾಮೂಲಕಾ ಧಮ್ಮಾ.

(೫) ನವ ಇಞ್ಜಿತಾನಿ

೯೬೪. ತತ್ಥ ಕತಮಾನಿ ನವ ಇಞ್ಜಿತಾನಿ? ‘‘ಅಸ್ಮೀ’’ತಿ ಇಞ್ಜಿತಮೇತಂ, ‘‘ಅಹಮಸ್ಮೀ’’ತಿ ಇಞ್ಜಿತಮೇತಂ, ‘‘ಅಯಮಹಮಸ್ಮೀ’’ತಿ ಇಞ್ಜಿತಮೇತಂ ‘‘ಭವಿಸ್ಸ’’ನ್ತಿ ಇಞ್ಜಿತಮೇತಂ, ‘‘ರೂಪೀ ಭವಿಸ್ಸ’’ನ್ತಿ ಇಞ್ಜಿತಮೇತಂ, ‘‘ಅರೂಪೀ ಭವಿಸ್ಸ’’ನ್ತಿ ಇಞ್ಜಿತಮೇತಂ, ‘‘ಸಞ್ಞೀ ಭವಿಸ್ಸ’’ನ್ತಿ ಇಞ್ಜಿತಮೇತಂ, ‘‘ಅಸಞ್ಞೀ ಭವಿಸ್ಸ’’ನ್ತಿ ಇಞ್ಜಿತಮೇತಂ, ‘‘ನೇವಸಞ್ಞೀನಾಸಞ್ಞೀ ಭವಿಸ್ಸ’’ನ್ತಿ ಇಞ್ಜಿತಮೇತಂ – ಇಮಾನಿ ನವ ಇಞ್ಜಿತಾನಿ.

(೬-೯) ನವ ಮಞ್ಞಿತಾದೀನಿ

೯೬೫. ತತ್ಥ ಕತಮಾನಿ ನವ ಮಞ್ಞಿತಾನಿ… ನವ ಫನ್ದಿತಾನಿ… ನವ ಪಪಞ್ಚಿತಾನಿ… ನವ ಸಙ್ಖತಾನಿ? ‘‘ಅಸ್ಮೀ’’ತಿ ಸಙ್ಖತಮೇತಂ, ‘‘ಅಹಮಸ್ಮೀ’’ತಿ ಸಙ್ಖತಮೇತಂ, ‘‘ಅಯಮಹಮಸ್ಮೀ’’ತಿ ಸಙ್ಖತಮೇತಂ, ‘‘ಭವಿಸ್ಸ’’ನ್ತಿ ಸಙ್ಖತಮೇತಂ, ‘‘ರೂಪೀ ಭವಿಸ್ಸ’’ನ್ತಿ ಸಙ್ಖತಮೇತಂ, ‘‘ಅರೂಪೀ ಭವಿಸ್ಸ’’ನ್ತಿ ಸಙ್ಖತಮೇತಂ, ‘‘ಸಞ್ಞೀ ಭವಿಸ್ಸ’’ನ್ತಿ ಸಙ್ಖತಮೇತಂ, ‘‘ಅಸಞ್ಞೀ ಭವಿಸ್ಸ’’ನ್ತಿ ಸಙ್ಖತಮೇತಂ, ‘‘ನೇವಸಞ್ಞೀನಾಸಞ್ಞೀ ಭವಿಸ್ಸ’’ನ್ತಿ ಸಙ್ಖತಮೇತಂ – ಇಮಾನಿ ನವ ಸಙ್ಖತಾನಿ.

ನವಕಂ.