೪. ಸಙ್ಖಾರಕ್ಖನ್ಧೋ

೨೦. ತತ್ಥ ಕತಮೋ ಸಙ್ಖಾರಕ್ಖನ್ಧೋ? ಯೇ ಕೇಚಿ ಸಙ್ಖಾರಾ ಅತೀತಾನಾಗತಪಚ್ಚುಪ್ಪನ್ನಾ ಅಜ್ಝತ್ತಾ ವಾ ಬಹಿದ್ಧಾ ವಾ ಓಳಾರಿಕಾ ವಾ ಸುಖುಮಾ ವಾ ಹೀನಾ ವಾ ಪಣೀತಾ ವಾ ಯೇ ದೂರೇ ಸನ್ತಿಕೇ ವಾ, ತದೇಕಜ್ಝಂ ಅಭಿಸಞ್ಞೂಹಿತ್ವಾ ಅಭಿಸಙ್ಖಿಪಿತ್ವಾ – ಅಯಂ ವುಚ್ಚತಿ ಸಙ್ಖಾರಕ್ಖನ್ಧೋ.

೨೧. ತತ್ಥ ಕತಮೇ ಸಙ್ಖಾರಾ ಅತೀತಾ? ಯೇ ಸಙ್ಖಾರಾ ಅತೀತಾ ನಿರುದ್ಧಾ ವಿಗತಾ ವಿಪರಿಣತಾ ಅತ್ಥಙ್ಗತಾ ಅಬ್ಭತ್ಥಙ್ಗತಾ ಉಪ್ಪಜ್ಜಿತ್ವಾ ವಿಗತಾ ಅತೀತಾ ಅತೀತಂಸೇನ ಸಙ್ಗಹಿತಾ, ಚಕ್ಖುಸಮ್ಫಸ್ಸಜಾ ಚೇತನಾ ಸೋತಸಮ್ಫಸ್ಸಜಾ ಚೇತನಾ ಘಾನಸಮ್ಫಸ್ಸಜಾ ಚೇತನಾ ಜಿವ್ಹಾಸಮ್ಫಸ್ಸಜಾ ಚೇತನಾ ಕಾಯಸಮ್ಫಸ್ಸಜಾ ಚೇತನಾ ಮನೋಸಮ್ಫಸ್ಸಜಾ ಚೇತನಾ – ಇಮೇ ವುಚ್ಚನ್ತಿ ಸಙ್ಖಾರಾ ಅತೀತಾ.

ತತ್ಥ ಕತಮೇ ಸಙ್ಖಾರಾ ಅನಾಗತಾ? ಯೇ ಸಙ್ಖಾರಾ ಅಜಾತಾ ಅಭೂತಾ ಅಸಞ್ಜಾತಾ ಅನಿಬ್ಬತ್ತಾ ಅನಭಿನಿಬ್ಬತ್ತಾ ಅಪಾತುಭೂತಾ ಅನುಪ್ಪನ್ನಾ ಅಸಮುಪ್ಪನ್ನಾ ಅನುಟ್ಠಿತಾ ಅಸಮುಟ್ಠಿತಾ ಅನಾಗತಾ ಅನಾಗತಂಸೇನ ಸಙ್ಗಹಿತಾ, ಚಕ್ಖುಸಮ್ಫಸ್ಸಜಾ ಚೇತನಾ ಸೋತಸಮ್ಫಸ್ಸಜಾ ಚೇತನಾ ಘಾನಸಮ್ಫಸ್ಸಜಾ ಚೇತನಾ ಜಿವ್ಹಾಸಮ್ಫಸ್ಸಜಾ ಚೇತನಾ ಕಾಯಸಮ್ಫಸ್ಸಜಾ ಚೇತನಾ ಮನೋಸಮ್ಫಸ್ಸಜಾ ಚೇತನಾ – ಇಮೇ ವುಚ್ಚನ್ತಿ ಸಙ್ಖಾರಾ ಅನಾಗತಾ.

ತತ್ಥ ಕತಮೇ ಸಙ್ಖಾರಾ ಪಚ್ಚುಪ್ಪನ್ನಾ? ಯೇ ಸಙ್ಖಾರಾ ಜಾತಾ ಭೂತಾ ಸಞ್ಜಾತಾ ನಿಬ್ಬತ್ತಾ ಅಭಿನಿಬ್ಬತ್ತಾ ಪಾತುಭೂತಾ ಉಪ್ಪನ್ನಾ ಸಮುಪ್ಪನ್ನಾ ಉಟ್ಠಿತಾ ಸಮುಟ್ಠಿತಾ ಪಚ್ಚುಪ್ಪನ್ನಾ ಪಚ್ಚುಪ್ಪನ್ನಂಸೇನ ಸಙ್ಗಹಿತಾ, ಚಕ್ಖುಸಮ್ಫಸ್ಸಜಾ ಚೇತನಾ ಸೋತಸಮ್ಫಸ್ಸಜಾ ಚೇತನಾ ಘಾನಸಮ್ಫಸ್ಸಜಾ ಚೇತನಾ ಜಿವ್ಹಾಸಮ್ಫಸ್ಸಜಾ ಚೇತನಾ ಕಾಯಸಮ್ಫಸ್ಸಜಾ ಚೇತನಾ ಮನೋಸಮ್ಫಸ್ಸಜಾ ಚೇತನಾ – ಇಮೇ ವುಚ್ಚನ್ತಿ ಸಙ್ಖಾರಾ ಪಚ್ಚುಪ್ಪನ್ನಾ.

೨೨. ತತ್ಥ ಕತಮೇ ಸಙ್ಖಾರಾ ಅಜ್ಝತ್ತಾ? ಯೇ ಸಙ್ಖಾರಾ ತೇಸಂ ತೇಸಂ ಸತ್ತಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಾ ಪಾಟಿಪುಗ್ಗಲಿಕಾ ಉಪಾದಿನ್ನಾ, ಚಕ್ಖುಸಮ್ಫಸ್ಸಜಾ ಚೇತನಾ ಸೋತಸಮ್ಫಸ್ಸಜಾ ಚೇತನಾ ಘಾನಸಮ್ಫಸ್ಸಜಾ ಚೇತನಾ ಜಿವ್ಹಾಸಮ್ಫಸ್ಸಜಾ ಚೇತನಾ ಕಾಯಸಮ್ಫಸ್ಸಜಾ ಚೇತನಾ ಮನೋಸಮ್ಫಸ್ಸಜಾ ಚೇತನಾ – ಇಮೇ ವುಚ್ಚನ್ತಿ ಸಙ್ಖಾರಾ ಅಜ್ಝತ್ತಾ.

ತತ್ಥ ಕತಮೇ ಸಙ್ಖಾರಾ ಬಹಿದ್ಧಾ? ಯೇ ಸಙ್ಖಾರಾ ತೇಸಂ ತೇಸಂ ಪರಸತ್ತಾನಂ ಪರಪುಗ್ಗಲಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಾ ಪಾಟಿಪುಗ್ಗಲಿಕಾ ಉಪಾದಿನ್ನಾ, ಚಕ್ಖುಸಮ್ಫಸ್ಸಜಾ ಚೇತನಾ ಸೋತಸಮ್ಫಸ್ಸಜಾ ಚೇತನಾ ಘಾನಸಮ್ಫಸ್ಸಜಾ ಚೇತನಾ ಜಿವ್ಹಾಸಮ್ಫಸ್ಸಜಾ ಚೇತನಾ ಕಾಯಸಮ್ಫಸ್ಸಜಾ ಚೇತನಾ ಮನೋಸಮ್ಫಸ್ಸಜಾ ಚೇತನಾ – ಇಮೇ ವುಚ್ಚನ್ತಿ ಸಙ್ಖಾರಾ ಬಹಿದ್ಧಾ.

೨೩. ತತ್ಥ ಕತಮೇ ಸಙ್ಖಾರಾ ಓಳಾರಿಕಾ ಸುಖುಮಾ? ಅಕುಸಲಾ ಸಙ್ಖಾರಾ ಓಳಾರಿಕಾ, ಕುಸಲಾಬ್ಯಾಕತಾ ಸಙ್ಖಾರಾ ಸುಖುಮಾ. ಕುಸಲಾಕುಸಲಾ ಸಙ್ಖಾರಾ ಓಳಾರಿಕಾ, ಅಬ್ಯಾಕತಾ ಸಙ್ಖಾರಾ ಸುಖುಮಾ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಓಳಾರಿಕಾ, ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಙ್ಖಾರಾ ಸುಖುಮಾ. ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತಾ ಸಙ್ಖಾರಾ ಓಳಾರಿಕಾ, ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಸುಖುಮಾ. ಅಸಮಾಪನ್ನಸ್ಸ ಸಙ್ಖಾರಾ ಓಳಾರಿಕಾ, ಸಮಾಪನ್ನಸ್ಸ ಸಙ್ಖಾರಾ ಸುಖುಮಾ. ಸಾಸವಾ ಸಙ್ಖಾರಾ ಓಳಾರಿಕಾ, ಅನಾಸವಾ ಸಙ್ಖಾರಾ ಸುಖುಮಾ. ತೇ ತೇ ವಾ ಪನ ಸಙ್ಖಾರೇ ಉಪಾದಾಯುಪಾದಾಯ ಸಙ್ಖಾರಾ ಓಳಾರಿಕಾ ಸುಖುಮಾ ದಟ್ಠಬ್ಬಾ.

೨೪. ತತ್ಥ ಕತಮೇ ಸಙ್ಖಾರಾ ಹೀನಾ ಪಣೀತಾ? ಅಕುಸಲಾ ಸಙ್ಖಾರಾ ಹೀನಾ, ಕುಸಲಾಬ್ಯಾಕತಾ ಸಙ್ಖಾರಾ ಪಣೀತಾ. ಕುಸಲಾಕುಸಲಾ ಸಙ್ಖಾರಾ ಹೀನಾ, ಅಬ್ಯಾಕತಾ ಸಙ್ಖಾರಾ ಪಣೀತಾ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಹೀನಾ, ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಙ್ಖಾರಾ ಪಣೀತಾ. ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತಾ ಸಙ್ಖಾರಾ ಹೀನಾ, ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಪಣೀತಾ. ಅಸಮಾಪನ್ನಸ್ಸ ಸಙ್ಖಾರಾ ಹೀನಾ, ಸಮಾಪನ್ನಸ್ಸ ಸಙ್ಖಾರಾ ಪಣೀತಾ. ಸಾಸವಾ ಸಙ್ಖಾರಾ ಹೀನಾ, ಅನಾಸವಾ ಸಙ್ಖಾರಾ ಪಣೀತಾ. ತೇ ತೇ ವಾ ಪನ ಸಙ್ಖಾರೇ ಉಪಾದಾಯುಪಾದಾಯ ಸಙ್ಖಾರಾ ಹೀನಾ ಪಣೀತಾ ದಟ್ಠಬ್ಬಾ.

೨೫. ತತ್ಥ ಕತಮೇ ಸಙ್ಖಾರಾ ದೂರೇ? ಅಕುಸಲಾ ಸಙ್ಖಾರಾ ಕುಸಲಾಬ್ಯಾಕತೇಹಿ ಸಙ್ಖಾರೇಹಿ ದೂರೇ; ಕುಸಲಾಬ್ಯಾಕತಾ ಸಙ್ಖಾರಾ ಅಕುಸಲೇಹಿ ಸಙ್ಖಾರೇಹಿ ದೂರೇ; ಕುಸಲಾ ಸಙ್ಖಾರಾ ಅಕುಸಲಾಬ್ಯಾಕತೇಹಿ ಸಙ್ಖಾರೇಹಿ ದೂರೇ; ಅಕುಸಲಾಬ್ಯಾಕತಾ ಸಙ್ಖಾರಾ ಕುಸಲೇಹಿ ಸಙ್ಖಾರೇಹಿ ದೂರೇ; ಅಬ್ಯಾಕತಾ ಸಙ್ಖಾರಾ ಕುಸಲಾಕುಸಲೇಹಿ ಸಙ್ಖಾರೇಹಿ ದೂರೇ; ಕುಸಲಾಕುಸಲಾ ಸಙ್ಖಾರಾ ಅಬ್ಯಾಕತೇಹಿ ಸಙ್ಖಾರೇಹಿ ದೂರೇ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತೇಹಿ ಸಙ್ಖಾರೇಹಿ ದೂರೇ; ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಙ್ಖಾರಾ ದುಕ್ಖಾಯ ವೇದನಾಯ ಸಮ್ಪಯುತ್ತೇಹಿ ಸಙ್ಖಾರೇಹಿ ದೂರೇ; ಸುಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ದುಕ್ಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತೇಹಿ ಸಙ್ಖಾರೇಹಿ ದೂರೇ; ದುಕ್ಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಙ್ಖಾರಾ ಸುಖಾಯ ವೇದನಾಯ ಸಮ್ಪಯುತ್ತೇಹಿ ಸಙ್ಖಾರೇಹಿ ದೂರೇ; ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತೇಹಿ ಸಙ್ಖಾರೇಹಿ ದೂರೇ; ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತಾ ಸಙ್ಖಾರಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೇಹಿ ಸಙ್ಖಾರೇಹಿ ದೂರೇ. ಅಸಮಾಪನ್ನಸ್ಸ ಸಙ್ಖಾರಾ ಸಮಾಪನ್ನಸ್ಸ ಸಙ್ಖಾರೇಹಿ ದೂರೇ; ಸಮಾಪನ್ನಸ್ಸ ಸಙ್ಖಾರಾ ಅಸಮಾಪನ್ನಸ್ಸ ಸಙ್ಖಾರೇಹಿ ದೂರೇ. ಸಾಸವಾ ಸಙ್ಖಾರಾ ಅನಾಸವೇಹಿ ಸಙ್ಖಾರೇಹಿ ದೂರೇ; ಅನಾಸವಾ ಸಙ್ಖಾರಾ ಸಾಸವೇಹಿ ಸಙ್ಖಾರೇಹಿ ದೂರೇ. ಇಮೇ ವುಚ್ಚನ್ತಿ ಸಙ್ಖಾರಾ ದೂರೇ.

ತತ್ಥ ಕತಮೇ ಸಙ್ಖಾರಾ ಸನ್ತಿಕೇ? ಅಕುಸಲಾ ಸಙ್ಖಾರಾ ಅಕುಸಲಾನಂ ಸಙ್ಖಾರಾನಂ ಸನ್ತಿಕೇ; ಕುಸಲಾ ಸಙ್ಖಾರಾ ಕುಸಲಾನಂ ಸಙ್ಖಾರಾನಂ ಸನ್ತಿಕೇ; ಅಬ್ಯಾಕತಾ ಸಙ್ಖಾರಾ ಅಬ್ಯಾಕತಾನಂ ಸಙ್ಖಾರಾನಂ ಸನ್ತಿಕೇ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ದುಕ್ಖಾಯ ವೇದನಾಯ ಸಮ್ಪಯುತ್ತಾನಂ ಸಙ್ಖಾರಾನಂ ಸನ್ತಿಕೇ; ಸುಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಸುಖಾಯ ವೇದನಾಯ ಸಮ್ಪಯುತ್ತಾನಂ ಸಙ್ಖಾರಾನಂ ಸನ್ತಿಕೇ; ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಙ್ಖಾರಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾನಂ ಸಙ್ಖಾರಾನಂ ಸನ್ತಿಕೇ. ಅಸಮಾಪನ್ನಸ್ಸ ಸಙ್ಖಾರಾ ಅಸಮಾಪನ್ನಸ್ಸ ಸಙ್ಖಾರಾನಂ ಸನ್ತಿಕೇ; ಸಮಾಪನ್ನಸ್ಸ ಸಙ್ಖಾರಾ ಸಮಾಪನ್ನಸ್ಸ ಸಙ್ಖಾರಾನಂ ಸನ್ತಿಕೇ. ಸಾಸವಾ ಸಙ್ಖಾರಾ ಸಾಸವಾನಂ ಸಙ್ಖಾರಾನಂ ಸನ್ತಿಕೇ; ಅನಾಸವಾ ಸಙ್ಖಾರಾ ಅನಾಸವಾನಂ ಸಙ್ಖಾರಾನಂ ಸನ್ತಿಕೇ. ಇಮೇ ವುಚ್ಚನ್ತಿ ಸಙ್ಖಾರಾ ಸನ್ತಿಕೇ. ತೇ ತೇ ವಾ ಪನ ಸಙ್ಖಾರೇ ಉಪಾದಾಯುಪಾದಾಯ ಸಙ್ಖಾರಾ ದೂರೇ ಸನ್ತಿಕೇ ದಟ್ಠಬ್ಬಾ.