೩. ಸಞ್ಞಾಕ್ಖನ್ಧೋ

೧೪. ತತ್ಥ ಕತಮೋ ಸಞ್ಞಾಕ್ಖನ್ಧೋ? ಯಾ ಕಾಚಿ ಸಞ್ಞಾ ಅತೀತಾನಾಗತಪಚ್ಚುಪ್ಪನ್ನಾ ಅಜ್ಝತ್ತಾ ವಾ ಬಹಿದ್ಧಾ ವಾ ಓಳಾರಿಕಾ ವಾ ಸುಖುಮಾ ವಾ ಹೀನಾ ವಾ ಪಣೀತಾ ವಾ ಯಾ ದೂರೇ ಸನ್ತಿಕೇ ವಾ ತದೇಕಜ್ಝಂ ಅಭಿಸಞ್ಞೂಹಿತ್ವಾ ಅಭಿಸಙ್ಖಿಪಿತ್ವಾ – ಅಯಂ ವುಚ್ಚತಿ ಸಞ್ಞಾಕ್ಖನ್ಧೋ.

೧೫. ತತ್ಥ ಕತಮಾ ಸಞ್ಞಾ ಅತೀತಾ? ಯಾ ಸಞ್ಞಾ ಅತೀತಾ ನಿರುದ್ಧಾ ವಿಗತಾ ವಿಪರಿಣತಾ ಅತ್ಥಙ್ಗತಾ ಅಬ್ಭತ್ಥಙ್ಗತಾ ಉಪ್ಪಜ್ಜಿತ್ವಾ ವಿಗತಾ ಅತೀತಾ ಅತೀತಂಸೇನ ಸಙ್ಗಹಿತಾ, ಚಕ್ಖುಸಮ್ಫಸ್ಸಜಾ ಸಞ್ಞಾ ಸೋತಸಮ್ಫಸ್ಸಜಾ ಸಞ್ಞಾ ಘಾನಸಮ್ಫಸ್ಸಜಾ ಸಞ್ಞಾ ಜಿವ್ಹಾಸಮ್ಫಸ್ಸಜಾ ಸಞ್ಞಾ ಕಾಯಸಮ್ಫಸ್ಸಜಾ ಸಞ್ಞಾ ಮನೋಸಮ್ಫಸ್ಸಜಾ ಸಞ್ಞಾ – ಅಯಂ ವುಚ್ಚತಿ ಸಞ್ಞಾ ಅತೀತಾ.

ತತ್ಥ ಕತಮಾ ಸಞ್ಞಾ ಅನಾಗತಾ? ಯಾ ಸಞ್ಞಾ ಅಜಾತಾ ಅಭೂತಾ ಅಸಞ್ಜಾತಾ ಅನಿಬ್ಬತ್ತಾ ಅನಭಿನಿಬ್ಬತ್ತಾ ಅಪಾತುಭೂತಾ ಅನುಪ್ಪನ್ನಾ ಅಸಮುಪ್ಪನ್ನಾ ಅನುಟ್ಠಿತಾ ಅಸಮುಟ್ಠಿತಾ ಅನಾಗತಾ ಅನಾಗತಂಸೇನ ಸಙ್ಗಹಿತಾ, ಚಕ್ಖುಸಮ್ಫಸ್ಸಜಾ ಸಞ್ಞಾ ಸೋತಸಮ್ಫಸ್ಸಜಾ ಸಞ್ಞಾ ಘಾನಸಮ್ಫಸ್ಸಜಾ ಸಞ್ಞಾ ಜಿವ್ಹಾಸಮ್ಫಸ್ಸಜಾ ಸಞ್ಞಾ ಕಾಯಸಮ್ಫಸ್ಸಜಾ ಸಞ್ಞಾ ಮನೋಸಮ್ಫಸ್ಸಜಾ ಸಞ್ಞಾ – ಅಯಂ ವುಚ್ಚತಿ ಸಞ್ಞಾ ಅನಾಗತಾ.

ತತ್ಥ ಕತಮಾ ಸಞ್ಞಾ ಪಚ್ಚುಪ್ಪನ್ನಾ? ಯಾ ಸಞ್ಞಾ ಜಾತಾ ಭೂತಾ ಸಞ್ಜಾತಾ ನಿಬ್ಬತ್ತಾ ಅಭಿನಿಬ್ಬತ್ತಾ ಪಾತುಭೂತಾ ಉಪ್ಪನ್ನಾ ಸಮುಪ್ಪನ್ನಾ ಉಟ್ಠಿತಾ ಸಮುಟ್ಠಿತಾ ಪಚ್ಚುಪ್ಪನ್ನಾ ಪಚ್ಚುಪ್ಪನ್ನಂಸೇನ ಸಙ್ಗಹಿತಾ, ಚಕ್ಖುಸಮ್ಫಸ್ಸಜಾ ಸಞ್ಞಾ ಸೋತಸಮ್ಫಸ್ಸಜಾ ಸಞ್ಞಾ ಘಾನಸಮ್ಫಸ್ಸಜಾ ಸಞ್ಞಾ ಜಿವ್ಹಾಸಮ್ಫಸ್ಸಜಾ ಸಞ್ಞಾ ಕಾಯಸಮ್ಫಸ್ಸಜಾ ಸಞ್ಞಾ ಮನೋಸಮ್ಫಸ್ಸಜಾ ಸಞ್ಞಾ – ಅಯಂ ವುಚ್ಚತಿ ಸಞ್ಞಾ ಪಚ್ಚುಪ್ಪನ್ನಾ.

೧೬. ತತ್ಥ ಕತಮಾ ಸಞ್ಞಾ ಅಜ್ಝತ್ತಾ? ಯಾ ಸಞ್ಞಾ ತೇಸಂ ತೇಸಂ ಸತ್ತಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಾ ಪಾಟಿಪುಗ್ಗಲಿಕಾ ಉಪಾದಿನ್ನಾ, ಚಕ್ಖುಸಮ್ಫಸ್ಸಜಾ ಸಞ್ಞಾ ಸೋತಸಮ್ಫಸ್ಸಜಾ ಸಞ್ಞಾ ಘಾನಸಮ್ಫಸ್ಸಜಾ ಸಞ್ಞಾ ಜಿವ್ಹಾಸಮ್ಫಸ್ಸಜಾ ಸಞ್ಞಾ ಕಾಯಸಮ್ಫಸ್ಸಜಾ ಸಞ್ಞಾ ಮನೋಸಮ್ಫಸ್ಸಜಾ ಸಞ್ಞಾ – ಅಯಂ ವುಚ್ಚತಿ ಸಞ್ಞಾ ಅಜ್ಝತ್ತಾ.

ತತ್ಥ ಕತಮಾ ಸಞ್ಞಾ ಬಹಿದ್ಧಾ? ಯಾ ಸಞ್ಞಾ ತೇಸಂ ತೇಸಂ ಪರಸತ್ತಾನಂ ಪರಪುಗ್ಗಲಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಾ ಪಾಟಿಪುಗ್ಗಲಿಕಾ ಉಪಾದಿನ್ನಾ, ಚಕ್ಖುಸಮ್ಫಸ್ಸಜಾ ಸಞ್ಞಾ ಸೋತಸಮ್ಫಸ್ಸಜಾ ಸಞ್ಞಾ ಘಾನಸಮ್ಫಸ್ಸಜಾ ಸಞ್ಞಾ ಜಿವ್ಹಾಸಮ್ಫಸ್ಸಜಾ ಸಞ್ಞಾ ಕಾಯಸಮ್ಫಸ್ಸಜಾ ಸಞ್ಞಾ ಮನೋಸಮ್ಫಸ್ಸಜಾ ಸಞ್ಞಾ – ಅಯಂ ವುಚ್ಚತಿ ಸಞ್ಞಾ ಬಹಿದ್ಧಾ.

೧೭. ತತ್ಥ ಕತಮಾ ಸಞ್ಞಾ ಓಳಾರಿಕಾ ಸುಖುಮಾ? ಪಟಿಘಸಮ್ಫಸ್ಸಜಾ ಸಞ್ಞಾ ಓಳಾರಿಕಾ, ಅಧಿವಚನಸಮ್ಫಸ್ಸಜಾ ಸಞ್ಞಾ ಸುಖುಮಾ. ಅಕುಸಲಾ ಸಞ್ಞಾ ಓಳಾರಿಕಾ, ಕುಸಲಾಬ್ಯಾಕತಾ ಸಞ್ಞಾ ಸುಖುಮಾ. ಕುಸಲಾಕುಸಲಾ ಸಞ್ಞಾ ಓಳಾರಿಕಾ, ಅಬ್ಯಾಕತಾ ಸಞ್ಞಾ ಸುಖುಮಾ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಓಳಾರಿಕಾ, ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಞ್ಞಾ ಸುಖುಮಾ. ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತಾ ಸಞ್ಞಾ ಓಳಾರಿಕಾ, ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಸುಖುಮಾ. ಅಸಮಾಪನ್ನಸ್ಸ ಸಞ್ಞಾ ಓಳಾರಿಕಾ, ಸಮಾಪನ್ನಸ್ಸ ಸಞ್ಞಾ ಸುಖುಮಾ. ಸಾಸವಾ ಸಞ್ಞಾ ಓಳಾರಿಕಾ, ಅನಾಸವಾ ಸಞ್ಞಾ ಸುಖುಮಾ. ತಂ ತಂ ವಾ ಪನ ಸಞ್ಞಂ ಉಪಾದಾಯುಪಾದಾಯ ಸಞ್ಞಾ ಓಳಾರಿಕಾ ಸುಖುಮಾ ದಟ್ಠಬ್ಬಾ.

೧೮. ತತ್ಥ ಕತಮಾ ಸಞ್ಞಾ ಹೀನಾ ಪಣೀತಾ? ಅಕುಸಲಾ ಸಞ್ಞಾ ಹೀನಾ, ಕುಸಲಾಬ್ಯಾಕತಾ ಸಞ್ಞಾ ಪಣೀತಾ. ಕುಸಲಾಕುಸಲಾ ಸಞ್ಞಾ ಹೀನಾ, ಅಬ್ಯಾಕತಾ ಸಞ್ಞಾ ಪಣೀತಾ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಹೀನಾ, ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಞ್ಞಾ ಪಣೀತಾ. ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತಾ ಸಞ್ಞಾ ಹೀನಾ, ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಪಣೀತಾ. ಅಸಮಾಪನ್ನಸ್ಸ ಸಞ್ಞಾ ಹೀನಾ, ಸಮಾಪನ್ನಸ್ಸ ಸಞ್ಞಾ ಪಣೀತಾ. ಸಾಸವಾ ಸಞ್ಞಾ ಹೀನಾ, ಅನಾಸವಾ ಸಞ್ಞಾ ಪಣೀತಾ. ತಂ ತಂ ವಾ ಪನ ಸಞ್ಞಂ ಉಪಾದಾಯುಪಾದಾಯ ಸಞ್ಞಾ ಹೀನಾ ಪಣೀತಾ ದಟ್ಠಬ್ಬಾ.

೧೯. ತತ್ಥ ಕತಮಾ ಸಞ್ಞಾ ದೂರೇ? ಅಕುಸಲಾ ಸಞ್ಞಾ ಕುಸಲಾಬ್ಯಾಕತಾಹಿ ಸಞ್ಞಾಹಿ ದೂರೇ; ಕುಸಲಾಬ್ಯಾಕತಾ ಸಞ್ಞಾ ಅಕುಸಲಾಯ ಸಞ್ಞಾಯ ದೂರೇ; ಕುಸಲಾ ಸಞ್ಞಾ ಅಕುಸಲಾಬ್ಯಾಕತಾಹಿ ಸಞ್ಞಾಹಿ ದೂರೇ; ಅಕುಸಲಾಬ್ಯಾಕತಾ ಸಞ್ಞಾ ಕುಸಲಾಯ ಸಞ್ಞಾಯ ದೂರೇ. ಅಬ್ಯಾಕತಾ ಸಞ್ಞಾ ಕುಸಲಾಕುಸಲಾಹಿ ಸಞ್ಞಾಹಿ ದೂರೇ; ಕುಸಲಾಕುಸಲಾ ಸಞ್ಞಾ ಅಬ್ಯಾಕತಾಯ ಸಞ್ಞಾಯ ದೂರೇ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾಹಿ ಸಞ್ಞಾಹಿ ದೂರೇ; ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಞ್ಞಾ ದುಕ್ಖಾಯ ವೇದನಾಯ ಸಮ್ಪಯುತ್ತಾಯ ಸಞ್ಞಾಯ ದೂರೇ; ಸುಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ದುಕ್ಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾಹಿ ಸಞ್ಞಾಹಿ ದೂರೇ; ದುಕ್ಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ಸಮ್ಪಯುತ್ತಾ ಸಞ್ಞಾ ಸುಖಾಯ ವೇದನಾಯ ಸಮ್ಪಯುತ್ತಾಯ ಸಞ್ಞಾಯ ದೂರೇ; ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತಾಹಿ ಸಞ್ಞಾಹಿ ದೂರೇ; ಸುಖದುಕ್ಖಾಹಿ ವೇದನಾಹಿ ಸಮ್ಪಯುತ್ತಾ ಸಞ್ಞಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾಯ ಸಞ್ಞಾಯ ದೂರೇ. ಅಸಮಾಪನ್ನಸ್ಸ ಸಞ್ಞಾ ಸಮಾಪನ್ನಸ್ಸ ಸಞ್ಞಾಯ ದೂರೇ; ಸಮಾಪನ್ನಸ್ಸ ಸಞ್ಞಾ ಅಸಮಾಪನ್ನಸ್ಸ ಸಞ್ಞಾಯ ದೂರೇ. ಸಾಸವಾ ಸಞ್ಞಾ ಅನಾಸವಾಯ ಸಞ್ಞಾಯ ದೂರೇ; ಅನಾಸವಾ ಸಞ್ಞಾ ಸಾಸವಾಯ ಸಞ್ಞಾಯ ದೂರೇ – ಅಯಂ ವುಚ್ಚತಿ ಸಞ್ಞಾ ದೂರೇ.

ತತ್ಥ ಕತಮಾ ಸಞ್ಞಾ ಸನ್ತಿಕೇ? ಅಕುಸಲಾ ಸಞ್ಞಾ ಅಕುಸಲಾಯ ಸಞ್ಞಾಯ ಸನ್ತಿಕೇ; ಕುಸಲಾ ಸಞ್ಞಾ ಕುಸಲಾಯ ಸಞ್ಞಾಯ ಸನ್ತಿಕೇ; ಅಬ್ಯಾಕತಾ ಸಞ್ಞಾ ಅಬ್ಯಾಕತಾಯ ಸಞ್ಞಾಯ ಸನ್ತಿಕೇ. ದುಕ್ಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ದುಕ್ಖಾಯ ವೇದನಾಯ ಸಮ್ಪಯುತ್ತಾಯ ಸಞ್ಞಾಯ ಸನ್ತಿಕೇ; ಸುಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಸುಖಾಯ ವೇದನಾಯ ಸಮ್ಪಯುತ್ತಾಯ ಸಞ್ಞಾಯ ಸನ್ತಿಕೇ; ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಸಞ್ಞಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾಯ ಸಞ್ಞಾಯ ಸನ್ತಿಕೇ. ಅಸಮಾಪನ್ನಸ್ಸ ಸಞ್ಞಾ ಅಸಮಾಪನ್ನಸ್ಸ ಸಞ್ಞಾಯ ಸನ್ತಿಕೇ; ಸಮಾಪನ್ನಸ್ಸ ಸಞ್ಞಾ ಸಮಾಪನ್ನಸ್ಸ ಸಞ್ಞಾಯ ಸನ್ತಿಕೇ. ಸಾಸವಾ ಸಞ್ಞಾ ಸಾಸವಾಯ ಸಞ್ಞಾಯ ಸನ್ತಿಕೇ; ಅನಾಸವಾ ಸಞ್ಞಾ ಅನಾಸವಾಯ ಸಞ್ಞಾಯ ಸನ್ತಿಕೇ. ಅಯಂ ವುಚ್ಚತಿ ಸಞ್ಞಾ ಸನ್ತಿಕೇ. ತಂ ತಂ ವಾ ಪನ ಸಞ್ಞಂ ಉಪಾದಾಯುಪಾದಾಯ ಸಞ್ಞಾ ದೂರೇ ಸನ್ತಿಕೇ ದಟ್ಠಬ್ಬಾ.