೨. ವೇದನಾಕ್ಖನ್ಧೋ

೮. ತತ್ಥ ಕತಮೋ ವೇದನಾಕ್ಖನ್ಧೋ? ಯಾ ಕಾಚಿ ವೇದನಾ ಅತೀತಾನಾಗತಪಚ್ಚುಪ್ಪನ್ನಾ ಅಜ್ಝತ್ತಾ ವಾ ಬಹಿದ್ಧಾ ವಾ ಓಳಾರಿಕಾ ವಾ ಸುಖುಮಾ ವಾ ಹೀನಾ ವಾ ಪಣೀತಾ ವಾ ಯಾ ದೂರೇ ಸನ್ತಿಕೇ ವಾ, ತದೇಕಜ್ಝಂ ಅಭಿಸಞ್ಞೂಹಿತ್ವಾ ಅಭಿಸಙ್ಖಿಪಿತ್ವಾ – ಅಯಂ ವುಚ್ಚತಿ ವೇದನಾಕ್ಖನ್ಧೋ.

೯. ತತ್ಥ ಕತಮಾ ವೇದನಾ ಅತೀತಾ? ಯಾ ವೇದನಾ ಅತೀತಾ ನಿರುದ್ಧಾ ವಿಗತಾ ವಿಪರಿಣತಾ ಅತ್ಥಙ್ಗತಾ ಅಬ್ಭತ್ಥಙ್ಗತಾ ಉಪ್ಪಜ್ಜಿತ್ವಾ ವಿಗತಾ ಅತೀತಾ ಅತೀತಂಸೇನ ಸಙ್ಗಹಿತಾ, ಸುಖಾ ವೇದನಾ ದುಕ್ಖಾ ವೇದನಾ ಅದುಕ್ಖಮಸುಖಾ ವೇದನಾ – ಅಯಂ ವುಚ್ಚತಿ ವೇದನಾ ಅತೀತಾ.

ತತ್ಥ ಕತಮಾ ವೇದನಾ ಅನಾಗತಾ? ಯಾ ವೇದನಾ ಅಜಾತಾ ಅಭೂತಾ ಅಸಞ್ಜಾತಾ ಅನಿಬ್ಬತ್ತಾ ಅನಭಿನಿಬ್ಬತ್ತಾ ಅಪಾತುಭೂತಾ ಅನುಪ್ಪನ್ನಾ ಅಸಮುಪ್ಪನ್ನಾ ಅನುಟ್ಠಿತಾ ಅಸಮುಟ್ಠಿತಾ ಅನಾಗತಾ ಅನಾಗತಂಸೇನ ಸಙ್ಗಹಿತಾ, ಸುಖಾ ವೇದನಾ ದುಕ್ಖಾ ವೇದನಾ ಅದುಕ್ಖಮಸುಖಾ ವೇದನಾ – ಅಯಂ ವುಚ್ಚತಿ ವೇದನಾ ಅನಾಗತಾ.

ತತ್ಥ ಕತಮಾ ವೇದನಾ ಪಚ್ಚುಪ್ಪನ್ನಾ? ಯಾ ವೇದನಾ ಜಾತಾ ಭೂತಾ ಸಞ್ಜಾತಾ ನಿಬ್ಬತ್ತಾ ಅಭಿನಿಬ್ಬತ್ತಾ ಪಾತುಭೂತಾ ಉಪ್ಪನ್ನಾ ಸಮುಪ್ಪನ್ನಾ ಉಟ್ಠಿತಾ ಸಮುಟ್ಠಿತಾ ಪಚ್ಚುಪ್ಪನ್ನಾ ಪಚ್ಚುಪ್ಪನ್ನಂಸೇನ ಸಙ್ಗಹಿತಾ, ಸುಖಾ ವೇದನಾ ದುಕ್ಖಾ ವೇದನಾ ಅದುಕ್ಖಮಸುಖಾ ವೇದನಾ – ಅಯಂ ವುಚ್ಚತಿ ವೇದನಾ ಪಚ್ಚುಪ್ಪನ್ನಾ.

೧೦. ತತ್ಥ ಕತಮಾ ವೇದನಾ ಅಜ್ಝತ್ತಾ? ಯಾ ವೇದನಾ ತೇಸಂ ತೇಸಂ ಸತ್ತಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಾ ಪಾಟಿಪುಗ್ಗಲಿಕಾ ಉಪಾದಿನ್ನಾ, ಸುಖಾ ವೇದನಾ ದುಕ್ಖಾ ವೇದನಾ ಅದುಕ್ಖಮಸುಖಾ ವೇದನಾ – ಅಯಂ ವುಚ್ಚತಿ ವೇದನಾ ಅಜ್ಝತ್ತಾ.

ತತ್ಥ ಕತಮಾ ವೇದನಾ ಬಹಿದ್ಧಾ? ಯಾ ವೇದನಾ ತೇಸಂ ತೇಸಂ ಪರಸತ್ತಾನಂ ಪರಪುಗ್ಗಲಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಾ ಪಾಟಿಪುಗ್ಗಲಿಕಾ ಉಪಾದಿನ್ನಾ, ಸುಖಾ ವೇದನಾ ದುಕ್ಖಾ ವೇದನಾ ಅದುಕ್ಖಮಸುಖಾ ವೇದನಾ – ಅಯಂ ವುಚ್ಚತಿ ವೇದನಾ ಬಹಿದ್ಧಾ.

೧೧. ತತ್ಥ ಕತಮಾ ವೇದನಾ ಓಳಾರಿಕಾ ಸುಖುಮಾ? ಅಕುಸಲಾ ವೇದನಾ ಓಳಾರಿಕಾ, ಕುಸಲಾಬ್ಯಾಕತಾ ವೇದನಾ ಸುಖುಮಾ. ಕುಸಲಾಕುಸಲಾ ವೇದನಾ ಓಳಾರಿಕಾ, ಅಬ್ಯಾಕತಾ ವೇದನಾ ಸುಖುಮಾ. ದುಕ್ಖಾ ವೇದನಾ ಓಳಾರಿಕಾ, ಸುಖಾ ಚ ಅದುಕ್ಖಮಸುಖಾ ಚ ವೇದನಾ ಸುಖುಮಾ. ಸುಖದುಕ್ಖಾ ವೇದನಾ ಓಳಾರಿಕಾ, ಅದುಕ್ಖಮಸುಖಾ ವೇದನಾ ಸುಖುಮಾ. ಅಸಮಾಪನ್ನಸ್ಸ ವೇದನಾ ಓಳಾರಿಕಾ, ಸಮಾಪನ್ನಸ್ಸ ವೇದನಾ ಸುಖುಮಾ. ಸಾಸವಾ ವೇದನಾ ಓಳಾರಿಕಾ, ಅನಾಸವಾ ವೇದನಾ ಸುಖುಮಾ. ತಂ ತಂ ವಾ ಪನ ವೇದನಂ ಉಪಾದಾಯುಪಾದಾಯ ವೇದನಾ ಓಳಾರಿಕಾ ಸುಖುಮಾ ದಟ್ಠಬ್ಬಾ.

೧೨. ತತ್ಥ ಕತಮಾ ವೇದನಾ ಹೀನಾ ಪಣೀತಾ? ಅಕುಸಲಾ ವೇದನಾ ಹೀನಾ, ಕುಸಲಾಬ್ಯಾಕತಾ ವೇದನಾ ಪಣೀತಾ. ಕುಸಲಾಕುಸಲಾ ವೇದನಾ ಹೀನಾ, ಅಬ್ಯಾಕತಾ ವೇದನಾ ಪಣೀತಾ. ದುಕ್ಖಾ ವೇದನಾ ಹೀನಾ, ಸುಖಾ ಚ ಅದುಕ್ಖಮಸುಖಾ ಚ ವೇದನಾ ಪಣೀತಾ. ಸುಖದುಕ್ಖಾ ವೇದನಾ ಹೀನಾ, ಅದುಕ್ಖಮಸುಖಾ ವೇದನಾ ಪಣೀತಾ. ಅಸಮಾಪನ್ನಸ್ಸ ವೇದನಾ ಹೀನಾ, ಸಮಾಪನ್ನಸ್ಸ ವೇದನಾ ಪಣೀತಾ. ಸಾಸವಾ ವೇದನಾ ಹೀನಾ, ಅನಾಸವಾ ವೇದನಾ ಪಣೀತಾ. ತಂ ತಂ ವಾ ಪನ ವೇದನಂ ಉಪಾದಾಯುಪಾದಾಯ ವೇದನಾ ಹೀನಾ ಪಣೀತಾ ದಟ್ಠಬ್ಬಾ.

೧೩. ತತ್ಥ ಕತಮಾ ವೇದನಾ ದೂರೇ? ಅಕುಸಲಾ ವೇದನಾ ಕುಸಲಾಬ್ಯಾಕತಾಹಿ ವೇದನಾಹಿ ದೂರೇ; ಕುಸಲಾಬ್ಯಾಕತಾ ವೇದನಾ ಅಕುಸಲಾಯ ವೇದನಾಯ ದೂರೇ; ಕುಸಲಾ ವೇದನಾ ಅಕುಸಲಾಬ್ಯಾಕತಾಹಿ ವೇದನಾಹಿ ದೂರೇ; ಅಕುಸಲಾಬ್ಯಾಕತಾ ವೇದನಾ ಕುಸಲಾಯ ವೇದನಾಯ ದೂರೇ; ಅಬ್ಯಾಕತಾ ವೇದನಾ ಕುಸಲಾಕುಸಲಾಹಿ ವೇದನಾಹಿ ದೂರೇ; ಕುಸಲಾಕುಸಲಾ ವೇದನಾ ಅಬ್ಯಾಕತಾಯ ವೇದನಾಯ ದೂರೇ. ದುಕ್ಖಾ ವೇದನಾ ಸುಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ದೂರೇ; ಸುಖಾ ಚ ಅದುಕ್ಖಮಸುಖಾ ಚ ವೇದನಾ ದುಕ್ಖಾಯ ವೇದನಾಯ ದೂರೇ; ಸುಖಾ ವೇದನಾ ದುಕ್ಖಾಯ ಚ ಅದುಕ್ಖಮಸುಖಾಯ ಚ ವೇದನಾಹಿ ದೂರೇ; ದುಕ್ಖಾ ಚ ಅದುಕ್ಖಮಸುಖಾ ಚ ವೇದನಾ ಸುಖಾಯ ವೇದನಾಯ ದೂರೇ; ಅದುಕ್ಖಮಸುಖಾ ವೇದನಾ ಸುಖದುಕ್ಖಾಹಿ ವೇದನಾಹಿ ದೂರೇ; ಸುಖದುಕ್ಖಾ ವೇದನಾ ಅದುಕ್ಖಮಸುಖಾಯ ವೇದನಾಯ ದೂರೇ. ಅಸಮಾಪನ್ನಸ್ಸ ವೇದನಾ ಸಮಾಪನ್ನಸ್ಸ ವೇದನಾಯ ದೂರೇ; ಸಮಾಪನ್ನಸ್ಸ ವೇದನಾ ಅಸಮಾಪನ್ನಸ್ಸ ವೇದನಾಯ ದೂರೇ. ಸಾಸವಾ ವೇದನಾ ಅನಾಸವಾಯ ವೇದನಾಯ ದೂರೇ; ಅನಾಸವಾ ವೇದನಾ ಸಾಸವಾಯ ವೇದನಾಯ ದೂರೇ – ಅಯಂ ವುಚ್ಚತಿ ವೇದನಾ ದೂರೇ.

ತತ್ಥ ಕತಮಾ ವೇದನಾ ಸನ್ತಿಕೇ? ಅಕುಸಲಾ ವೇದನಾ ಅಕುಸಲಾಯ ವೇದನಾಯ ಸನ್ತಿಕೇ; ಕುಸಲಾ ವೇದನಾ ಕುಸಲಾಯ ವೇದನಾಯ ಸನ್ತಿಕೇ; ಅಬ್ಯಾಕತಾ ವೇದನಾ ಅಬ್ಯಾಕತಾಯ ವೇದನಾಯ ಸನ್ತಿಕೇ. ದುಕ್ಖಾ ವೇದನಾ ದುಕ್ಖಾಯ ವೇದನಾಯ ಸನ್ತಿಕೇ; ಸುಖಾ ವೇದನಾ ಸುಖಾಯ ವೇದನಾಯ ಸನ್ತಿಕೇ; ಅದುಕ್ಖಮಸುಖಾ ವೇದನಾ ಅದುಕ್ಖಮಸುಖಾಯ ವೇದನಾಯ ಸನ್ತಿಕೇ. ಅಸಮಾಪನ್ನಸ್ಸ ವೇದನಾ ಅಸಮಾಪನ್ನಸ್ಸ ವೇದನಾಯ ಸನ್ತಿಕೇ; ಸಮಾಪನ್ನಸ್ಸ ವೇದನಾ ಸಮಾಪನ್ನಸ್ಸ ವೇದನಾಯ ಸನ್ತಿಕೇ. ಸಾಸವಾ ವೇದನಾ ಸಾಸವಾಯ ವೇದನಾಯ ಸನ್ತಿಕೇ; ಅನಾಸವಾ ವೇದನಾ ಅನಾಸವಾಯ ವೇದನಾಯ ಸನ್ತಿಕೇ. ಅಯಂ ವುಚ್ಚತಿ ವೇದನಾ ಸನ್ತಿಕೇ. ತಂ ತಂ ವಾ ಪನ ವೇದನಂ ಉಪಾದಾಯುಪಾದಾಯ ವೇದನಾ ದೂರೇ ಸನ್ತಿಕೇ ದಟ್ಠಬ್ಬಾ.