೧. ರೂಪಕ್ಖನ್ಧೋ

೨. ತತ್ಥ ಕತಮೋ ರೂಪಕ್ಖನ್ಧೋ? ಯಂ ಕಿಞ್ಚಿ ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ, ತದೇಕಜ್ಝಂ ಅಭಿಸಞ್ಞೂಹಿತ್ವಾ ಅಭಿಸಙ್ಖಿಪಿತ್ವಾ – ಅಯಂ ವುಚ್ಚತಿ ರೂಪಕ್ಖನ್ಧೋ.

೩. ತತ್ಥ ಕತಮಂ ರೂಪಂ ಅತೀತಂ? ಯಂ ರೂಪಂ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತಂ ಉಪ್ಪಜ್ಜಿತ್ವಾ ವಿಗತಂ ಅತೀತಂ ಅತೀತಂಸೇನ ಸಙ್ಗಹಿತಂ, ಚತ್ತಾರೋ ಚ ಮಹಾಭೂತಾ ಚತುನ್ನಞ್ಚ ಮಹಾಭೂತಾನಂ ಉಪಾದಾಯರೂಪಂ – ಇದಂ ವುಚ್ಚತಿ ರೂಪಂ ಅತೀತಂ.

ತತ್ಥ ಕತಮಂ ರೂಪಂ ಅನಾಗತಂ? ಯಂ ರೂಪಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತಂ ಅನುಪ್ಪನ್ನಂ ಅಸಮುಪ್ಪನ್ನಂ ಅನುಟ್ಠಿತಂ ಅಸಮುಟ್ಠಿತಂ ಅನಾಗತಂ ಅನಾಗತಂಸೇನ ಸಙ್ಗಹಿತಂ, ಚತ್ತಾರೋ ಚ ಮಹಾಭೂತಾ ಚತುನ್ನಞ್ಚ ಮಹಾಭೂತಾನಂ ಉಪಾದಾಯರೂಪಂ – ಇದಂ ವುಚ್ಚತಿ ರೂಪಂ ಅನಾಗತಂ.

ತತ್ಥ ಕತಮಂ ರೂಪಂ ಪಚ್ಚುಪ್ಪನ್ನಂ? ಯಂ ರೂಪಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತಂ ಉಪ್ಪನ್ನಂ ಸಮುಪ್ಪನ್ನಂ ಉಟ್ಠಿತಂ ಸಮುಟ್ಠಿತಂ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನಂಸೇನ ಸಙ್ಗಹಿತಂ, ಚತ್ತಾರೋ ಚ ಮಹಾಭೂತಾ ಚತುನ್ನಞ್ಚ ಮಹಾಭೂತಾನಂ ಉಪಾದಾಯರೂಪಂ – ಇದಂ ವುಚ್ಚತಿ ರೂಪಂ ಪಚ್ಚುಪ್ಪನ್ನಂ.

೪. ತತ್ಥ ಕತಮಂ ರೂಪಂ ಅಜ್ಝತ್ತಂ? ಯಂ ರೂಪಂ ತೇಸಂ ತೇಸಂ ಸತ್ತಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಂ ಪಾಟಿಪುಗ್ಗಲಿಕಂ ಉಪಾದಿನ್ನಂ, ಚತ್ತಾರೋ ಚ ಮಹಾಭೂತಾ ಚತುನ್ನಞ್ಚ ಮಹಾಭೂತಾನಂ ಉಪಾದಾಯರೂಪಂ – ಇದಂ ವುಚ್ಚತಿ ರೂಪಂ ಅಜ್ಝತ್ತಂ.

ತತ್ಥ ಕತಮಂ ರೂಪಂ ಬಹಿದ್ಧಾ? ಯಂ ರೂಪಂ ತೇಸಂ ತೇಸಂ ಪರಸತ್ತಾನಂ ಪರಪುಗ್ಗಲಾನಂ ಅಜ್ಝತ್ತಂ ಪಚ್ಚತ್ತಂ ನಿಯಕಂ ಪಾಟಿಪುಗ್ಗಲಿಕಂ ಉಪಾದಿನ್ನಂ, ಚತ್ತಾರೋ ಚ ಮಹಾಭೂತಾ ಚತುನ್ನಞ್ಚ ಮಹಾಭೂತಾನಂ ಉಪಾದಾಯರೂಪಂ – ಇದಂ ವುಚ್ಚತಿ ರೂಪಂ ಬಹಿದ್ಧಾ.

೫. ತತ್ಥ ಕತಮಂ ರೂಪಂ ಓಳಾರಿಕಂ? ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನಂ – ಇದಂ ವುಚ್ಚತಿ ರೂಪಂ ಓಳಾರಿಕಂ.

ತತ್ಥ ಕತಮಂ ರೂಪಂ ಸುಖುಮಂ? ಇತ್ಥಿನ್ದ್ರಿಯಂ…ಪೇ… ಕಬಳೀಕಾರೋ [ಕಬಳಿಂಕಾರೋ (ಸೀ. ಸ್ಯಾ.)] ಆಹಾರೋ – ಇದಂ ವುಚ್ಚತಿ ರೂಪಂ ಸುಖುಮಂ.

೬. ತತ್ಥ ಕತಮಂ ರೂಪಂ ಹೀನಂ? ಯಂ ರೂಪಂ ತೇಸಂ ತೇಸಂ ಸತ್ತಾನಂ ಉಞ್ಞಾತಂ ಅವಞ್ಞಾತಂ ಹೀಳಿತಂ ಪರಿಭೂತಂ ಅಚಿತ್ತೀಕತಂ ಹೀನಂ ಹೀನಮತಂ ಹೀನಸಮ್ಮತಂ ಅನಿಟ್ಠಂ ಅಕನ್ತಂ ಅಮನಾಪಂ, ರೂಪಾ ಸದ್ದಾ ಗನ್ಧಾ ರಸಾ ಫೋಟ್ಠಬ್ಬಾ – ಇದಂ ವುಚ್ಚತಿ ರೂಪಂ ಹೀನಂ.

ತತ್ಥ ಕತಮಂ ರೂಪಂ ಪಣೀತಂ? ಯಂ ರೂಪಂ ತೇಸಂ ತೇಸಂ ಸತ್ತಾನಂ ಅನುಞ್ಞಾತಂ ಅನವಞ್ಞಾತಂ ಅಹೀಳಿತಂ ಅಪರಿಭೂತಂ ಚಿತ್ತೀಕತಂ ಪಣೀತಂ ಪಣೀತಮತಂ ಪಣೀತಸಮ್ಮತಂ ಇಟ್ಠಂ ಕನ್ತಂ ಮನಾಪಂ, ರೂಪಾ ಸದ್ದಾ ಗನ್ಧಾ ರಸಾ ಫೋಟ್ಠಬ್ಬಾ – ಇದಂ ವುಚ್ಚತಿ ರೂಪಂ ಪಣೀತಂ. ತಂ ತಂ ವಾ ಪನ ರೂಪಂ ಉಪಾದಾಯುಪಾದಾಯ ರೂಪಂ ಹೀನಂ ಪಣೀತಂ ದಟ್ಠಬ್ಬಂ.

೭. ತತ್ಥ ಕತಮಂ ರೂಪಂ ದೂರೇ? ಇತ್ಥಿನ್ದ್ರಿಯಂ…ಪೇ… ಕಬಳೀಕಾರೋ ಆಹಾರೋ, ಯಂ ವಾ ಪನಞ್ಞಮ್ಪಿ ಅತ್ಥಿ ರೂಪಂ ಅನಾಸನ್ನೇ ಅನುಪಕಟ್ಠೇ ದೂರೇ ಅಸನ್ತಿಕೇ – ಇದಂ ವುಚ್ಚತಿ ರೂಪಂ ದೂರೇ.

ತತ್ಥ ಕತಮಂ ರೂಪಂ ಸನ್ತಿಕೇ? ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನಂ, ಯಂ ವಾ ಪನಞ್ಞಮ್ಪಿ ಅತ್ಥಿ ರೂಪಂ ಆಸನ್ನೇ ಉಪಕಟ್ಠೇ ಅವಿದೂರೇ ಸನ್ತಿಕೇ – ಇದಂ ವುಚ್ಚತಿ ರೂಪಂ ಸನ್ತಿಕೇ. ತಂ ತಂ ವಾ ಪನ ರೂಪಂ ಉಪಾದಾಯುಪಾದಾಯ ರೂಪಂ ದೂರೇ ಸನ್ತಿಕೇ ದಟ್ಠಬ್ಬಂ.