ಧಮ್ಮಪಚ್ಚನೀಯಾನುಲೋಮೇ ದುಕದುಕಪಟ್ಠಾನಂ

೧-೧. ಹೇತುದುಕ-ಸಹೇತುಕದುಕಂ

೧. ನಹೇತುಂ ನಸಹೇತುಕಂ ಧಮ್ಮಂ ಪಟಿಚ್ಚ ಹೇತು ಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಹೇತುಂ ನಸಹೇತುಕಂ ಧಮ್ಮಂ ಪಟಿಚ್ಚ ನಹೇತು ಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಹೇತುಂ ನಸಹೇತುಕಂ ಧಮ್ಮಂ ಪಟಿಚ್ಚ ಹೇತು ಸಹೇತುಕೋ ಚ ನಹೇತು ಸಹೇತುಕೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. ತೀಣಿ.

ನನಹೇತುಂ ನಸಹೇತುಕಂ ಧಮ್ಮಂ ಪಟಿಚ್ಚ ನಹೇತು ಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ಹೇತುಯಾ ಚತ್ತಾರಿ, ಆರಮ್ಮಣೇ ಚತ್ತಾರಿ…ಪೇ… ಅವಿಗತೇ ಚತ್ತಾರಿ.

೨. ನನಹೇತು ನಅಹೇತುಕೋ ಧಮ್ಮೋ ನಹೇತುಸ್ಸ ಅಹೇತುಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ.

ಹೇತುಯಾ ಏಕಂ, ಆರಮ್ಮಣೇ ಛ…ಪೇ… ಅವಿಗತೇ ಪಞ್ಚ. (ಪಞ್ಹಾವಾರಂ ವಿತ್ಥಾರೇತಬ್ಬಂ.)

೩. ನಹೇತುಂ ನಅಹೇತುಕಂ ಧಮ್ಮಂ ಪಟಿಚ್ಚ ನಹೇತು ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನನಹೇತುಂ ನಅಹೇತುಕಂ ಧಮ್ಮಂ ಪಟಿಚ್ಚ ನಹೇತು ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನಹೇತುಂ ನಅಹೇತುಕಞ್ಚ ನನಹೇತುಂ ನಅಹೇತುಕಞ್ಚ ಧಮ್ಮಂ ಪಟಿಚ್ಚ ನಹೇತು ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ತೀಣಿ.

೧-೨-೫. ಹೇತುದುಕ-ಹೇತುಸಮ್ಪಯುತ್ತಾದಿದುಕಾನಿ

೪. ನಹೇತುಂ ನಹೇತುಸಮ್ಪಯುತ್ತಂ ಧಮ್ಮಂ ಪಟಿಚ್ಚ ಹೇತು ಹೇತುಸಮ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ಚತ್ತಾರಿ.

ನಹೇತುಂ ನಹೇತುವಿಪ್ಪಯುತ್ತಂ ಧಮ್ಮಂ ಪಟಿಚ್ಚ ನಹೇತು ಹೇತುವಿಪ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೫. ನಹೇತುಂ ನಹೇತುಞ್ಚೇವ ನಅಹೇತುಕಞ್ಚ ಧಮ್ಮಂ ಪಟಿಚ್ಚ ಹೇತು ಹೇತು ಚೇವ ಸಹೇತುಕೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನನಹೇತುಂ ನಅಹೇತುಕಞ್ಚೇವ ನನಹೇತುಞ್ಚ ಧಮ್ಮಂ ಪಟಿಚ್ಚ ನಹೇತು ಸಹೇತುಕೋ ಚೇವ ನ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

೬. ನಹೇತುಂ ನಹೇತುಞ್ಚೇವ ನಹೇತುವಿಪ್ಪಯುತ್ತಞ್ಚ ಧಮ್ಮಂ ಪಟಿಚ್ಚ ಹೇತು ಹೇತು ಚೇವ ಹೇತುಸಮ್ಪಯುತ್ತೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನನಹೇತುಂ ನಹೇತುವಿಪ್ಪಯುತ್ತಞ್ಚೇವ ನನಹೇತುಞ್ಚ ಧಮ್ಮಂ ಪಟಿಚ್ಚ ನಹೇತು ಹೇತುಸಮ್ಪಯುತ್ತೋ ಚೇವ ನ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

೭. ನಹೇತುಂ ನಹೇತುಂ ನಸಹೇತುಕಂ ಧಮ್ಮಂ ಪಟಿಚ್ಚ ನಹೇತು ನಹೇತು ಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನಹೇತುಂ ನಹೇತುಂ ನಅಹೇತುಕಂ ಧಮ್ಮಂ ಪಟಿಚ್ಚ ನಹೇತು ನಹೇತು ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

೧-೬-೧೨. ಹೇತುದುಕ-ಚೂಳನ್ತರದುಕಾನಿ

೮. ನಹೇತು ನಸಪ್ಪಚ್ಚಯೋ ಧಮ್ಮೋ ಹೇತುಸ್ಸ ಸಪ್ಪಚ್ಚಯಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ಆರಮ್ಮಣೇ ತೀಣಿ. (ಸಙ್ಖತಂ ಸಪ್ಪಚ್ಚಯಸದಿಸಂ.)

೯. ನಹೇತುಂ ನಸನಿದಸ್ಸನಂ ಧಮ್ಮಂ ಪಟಿಚ್ಚ ನಹೇತು ಸನಿದಸ್ಸನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತು ನಅನಿದಸ್ಸನೋ ಧಮ್ಮೋ ಹೇತುಸ್ಸ ಅನಿದಸ್ಸನಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ಆರಮ್ಮಣೇ ತೀಣಿ.

೧೦. ನಹೇತುಂ ನಸಪ್ಪಟಿಘಂ ಧಮ್ಮಂ ಪಟಿಚ್ಚ ನಹೇತು ಸಪ್ಪಟಿಘೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಅಪ್ಪಟಿಘಂ ಧಮ್ಮಂ ಪಟಿಚ್ಚ ನಹೇತು ಅಪ್ಪಟಿಘೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

೧೧. ನಹೇತುಂ ನರೂಪಿಂ ಧಮ್ಮಂ ಪಟಿಚ್ಚ ಹೇತು ರೂಪೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಅರೂಪಿಂ ಧಮ್ಮಂ ಪಟಿಚ್ಚ ಹೇತು ಅರೂಪೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧೨. ನಹೇತುಂ ನಲೋಕಿಯಂ ಧಮ್ಮಂ ಪಟಿಚ್ಚ ನಹೇತು ಲೋಕಿಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನನಹೇತುಂ ನಲೋಕಿಯಂ ಧಮ್ಮಂ ಪಟಿಚ್ಚ ನಹೇತು ಲೋಕಿಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಗಣಿತಕೇನ ತೀಣಿ.)

ನಹೇತುಂ ನಲೋಕುತ್ತರಂ ಧಮ್ಮಂ ಪಚ್ಚಯಾ ಹೇತು ಲೋಕುತ್ತರೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧೩. ನಹೇತುಂ ನಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಹೇತು ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ನವ.

ನಹೇತುಂ ನಕೇನಚಿ ನವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಹೇತು ಕೇನಚಿ ನವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ನವ.

೧-೧೩-೧೮. ಹೇತುದುಕ-ಆಸವಗೋಚ್ಛಕಾನಿ

೧೪. ನಹೇತುಂ ನೋಆಸವಂ ಧಮ್ಮಂ ಪಟಿಚ್ಚ ಹೇತು ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಹೇತುಂ ನೋಆಸವಂ ಧಮ್ಮಂ ಪಟಿಚ್ಚ ನಹೇತು ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಹೇತುಂ ನೋಆಸವಂ ಧಮ್ಮಂ ಪಟಿಚ್ಚ ಹೇತು ಆಸವೋ ಚ ನಹೇತು ಆಸವೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. ತೀಣಿ.

ನನಹೇತುಂ ನೋಆಸವಂ ಧಮ್ಮಂ ಪಟಿಚ್ಚ ಹೇತು ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನಹೇತುಂ ನೋಆಸವಞ್ಚ ನನಹೇತುಂ ನೋಆಸವಞ್ಚ ಧಮ್ಮಂ ಪಟಿಚ್ಚ ಹೇತು ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ಪಞ್ಚ.

ನಹೇತುಂ ನನೋಆಸವಂ ಧಮ್ಮಂ ಪಟಿಚ್ಚ ನಹೇತು ನೋಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನನಹೇತುಂ ನನೋಆಸವಂ ಧಮ್ಮಂ ಪಟಿಚ್ಚ ನಹೇತು ನೋಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನನಹೇತುಂ ನನೋಆಸವಂ ಧಮ್ಮಂ ಪಟಿಚ್ಚ ಹೇತು ನೋಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನನಹೇತುಂ ನನೋಆಸವಂ ಧಮ್ಮಂ ಪಟಿಚ್ಚ ಹೇತು ನೋಆಸವೋ ಚ ನಹೇತು ನೋಆಸವೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ ತೀಣಿ.

ನಹೇತುಂ ನನೋಆಸವಞ್ಚ ನನಹೇತುಂ ನನೋಆಸವಞ್ಚ ಧಮ್ಮಂ ಪಟಿಚ್ಚ ನಹೇತು ನೋಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ಪಞ್ಚ.

೧೫. ನಹೇತುಂ ನಸಾಸವಂ ಧಮ್ಮಂ ಪಟಿಚ್ಚ ನಹೇತು ಸಾಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಅನಾಸವಂ ಧಮ್ಮಂ ಪಚ್ಚಯಾ ಹೇತು ಅನಾಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧೬. ನನಹೇತುಂ ನಆಸವಸಮ್ಪಯುತ್ತಂ ಧಮ್ಮಂ ಪಟಿಚ್ಚ ನಹೇತು ಆಸವಸಮ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಆಸವವಿಪ್ಪಯುತ್ತಂ ಧಮ್ಮಂ ಪಟಿಚ್ಚ ಹೇತು ಆಸವವಿಪ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ನವ.

೧೭. ನಹೇತುಂ ನಆಸವಞ್ಚೇವ ನಅನಾಸವಞ್ಚ ಧಮ್ಮಂ ಪಟಿಚ್ಚ ಹೇತು ಆಸವೋ ಚೇವ ಸಾಸವೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ಪಞ್ಚ.

ನಹೇತುಂ ನಅನಾಸವಞ್ಚೇವ ನನೋ ಚ ಆಸವಂ ಧಮ್ಮಂ ಪಟಿಚ್ಚ ನಹೇತು ಸಾಸವೋ ಚೇವ ನೋ ಚ ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ಪಞ್ಚ.

೧೮. ನಹೇತುಂ ನಆಸವಞ್ಚೇವ ನಆಸವವಿಪ್ಪಯುತ್ತಞ್ಚ ಧಮ್ಮಂ ಪಟಿಚ್ಚ ಹೇತು ಆಸವೋ ಚೇವ ಆಸವಸಮ್ಪಯುತ್ತೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಆಸವವಿಪ್ಪಯುತ್ತಞ್ಚೇವ ನನೋ ಚ ಆಸವಂ ಧಮ್ಮಂ ಪಟಿಚ್ಚ ನಹೇತು ಆಸವಸಮ್ಪಯುತ್ತೋ ಚೇವ ನೋ ಚ ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧೯. ನಹೇತುಂ ಆಸವವಿಪ್ಪಯುತ್ತಂ ನಸಾಸವಂ ಧಮ್ಮಂ ಪಟಿಚ್ಚ ನಹೇತು ಆಸವವಿಪ್ಪಯುತ್ತೋ ಸಾಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ಆಸವವಿಪ್ಪಯುತ್ತಂ ನಅನಾಸವಂ ಧಮ್ಮಂ ಪಚ್ಚಯಾ ಹೇತು ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧-೧೯. ಹೇತುದುಕ-ಸಞ್ಞೋಜನಾದಿಗೋಚ್ಛಕಾನಿ

೨೦. ನಹೇತುಂ ನೋಸಞ್ಞೋಜನಂ ಧಮ್ಮಂ ಪಟಿಚ್ಚ ಹೇತು ಸಞ್ಞೋಜನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೨೧. ನಹೇತುಂ ನೋಗನ್ಥಂ ಧಮ್ಮಂ ಪಟಿಚ್ಚ ಹೇತು ಗನ್ಥೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ನವ.

೨೨. ನಹೇತುಂ ನೋಓಘಂ ಧಮ್ಮಂ ಪಟಿಚ್ಚ ಹೇತು ಓಘೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ಪಞ್ಚ.

೨೩. ನಹೇತುಂ ನೋಯೋಗಂ ಧಮ್ಮಂ ಪಟಿಚ್ಚ ಹೇತು ಯೋಗೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ಪಞ್ಚ.

೨೪. ನಹೇತುಂ ನೋನೀವರಣಂ ಧಮ್ಮಂ ಪಟಿಚ್ಚ ಹೇತು ನೀವರಣೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೨೫. ನಹೇತುಂ ನೋಪರಾಮಾಸಂ ಧಮ್ಮಂ ಪಟಿಚ್ಚ ನಹೇತು ಪರಾಮಾಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧-೫೪. ಹೇತುದುಕ-ಮಹನ್ತರದುಕಂ

೨೬. ನಹೇತುಂ ನಸಾರಮ್ಮಣಂ ಧಮ್ಮಂ ಪಟಿಚ್ಚ ಹೇತು ಸಾರಮ್ಮಣೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಅನಾರಮ್ಮಣಂ ಧಮ್ಮಂ ಪಟಿಚ್ಚ ನಹೇತು ಅನಾರಮ್ಮಣೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೨೭. ನಹೇತುಂ ನೋಚಿತ್ತಂ ಧಮ್ಮಂ ಪಟಿಚ್ಚ ನಹೇತು ಚಿತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಚಿತ್ತಂ ಧಮ್ಮಂ ಪಟಿಚ್ಚ ಹೇತು ನೋಚಿತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೨೮. ನಹೇತುಂ ನಚೇತಸಿಕಂ ಧಮ್ಮಂ ಪಟಿಚ್ಚ ಹೇತು ಚೇತಸಿಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಅಚೇತಸಿಕಂ ಧಮ್ಮಂ ಪಟಿಚ್ಚ ನಹೇತು ಅಚೇತಸಿಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೨೯. ನಹೇತುಂ ನಚಿತ್ತಸಮ್ಪಯುತ್ತಂ ಧಮ್ಮಂ ಪಟಿಚ್ಚ ಹೇತು ಚಿತ್ತಸಮ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಚಿತ್ತವಿಪ್ಪಯುತ್ತಂ ಧಮ್ಮಂ ಪಟಿಚ್ಚ ನಹೇತು ಚಿತ್ತವಿಪ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೦. ನಹೇತುಂ ನಚಿತ್ತಸಂಸಟ್ಠಂ ಧಮ್ಮಂ ಪಟಿಚ್ಚ ಹೇತು ಚಿತ್ತಸಂಸಟ್ಠೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಚಿತ್ತವಿಸಂಸಟ್ಠಂ ಧಮ್ಮಂ ಪಟಿಚ್ಚ ನಹೇತು ಚಿತ್ತವಿಸಂಸಟ್ಠೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೧. ನಹೇತುಂ ನೋಚಿತ್ತಸಮುಟ್ಠಾನಂ ಧಮ್ಮಂ ಪಟಿಚ್ಚ ಹೇತು ಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಚಿತ್ತಸಮುಟ್ಠಾನಂ ಧಮ್ಮಂ ಪಟಿಚ್ಚ ಹೇತು ನೋಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೨. ನಹೇತುಂ ನೋಚಿತ್ತಸಹಭುಂ ಧಮ್ಮಂ ಪಟಿಚ್ಚ ಹೇತು ಚಿತ್ತಸಹಭೂ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಚಿತ್ತಸಹಭುಂ ಧಮ್ಮಂ ಪಟಿಚ್ಚ ನಹೇತು ನೋಚಿತ್ತಸಹಭೂ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೩. ನಹೇತುಂ ನಚಿತ್ತಾನುಪರಿವತ್ತಿಂ ಧಮ್ಮಂ ಪಟಿಚ್ಚ ಹೇತು ಚಿತ್ತಾನುಪರಿವತ್ತೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಚಿತ್ತಾನುಪರಿವತ್ತಿಂ ಧಮ್ಮಂ ಪಟಿಚ್ಚ ನಹೇತು ನೋಚಿತ್ತಾನುಪರಿವತ್ತೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೪. ನಹೇತುಂ ನಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ಹೇತು ಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ನಹೇತು ನೋಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೫. ನಹೇತುಂ ನೋಚಿತ್ತಸಂಸಟ್ಠಸಮುಟ್ಠಾನಸಹಭುಂ ಧಮ್ಮಂ ಪಟಿಚ್ಚ ಹೇತು ಚಿತ್ತಸಂಸಟ್ಠಸಮುಟ್ಠಾನಸಹಭೂ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಚಿತ್ತಸಂಸಟ್ಠಸಮುಟ್ಠಾನಸಹಭುಂ ಧಮ್ಮಂ ಪಟಿಚ್ಚ ನಹೇತು ನೋಚಿತ್ತಸಂಸಟ್ಠಸಮುಟ್ಠಾನಸಹಭೂ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೬. ನಹೇತುಂ ನೋಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿಂ ಧಮ್ಮಂ ಪಟಿಚ್ಚ ಹೇತು ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿಂ ಧಮ್ಮಂ ಪಟಿಚ್ಚ ನಹೇತು ನೋಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೭. ನಹೇತುಂ ನಅಜ್ಝತ್ತಿಕಂ ಧಮ್ಮಂ ಪಟಿಚ್ಚ ನಹೇತು ಅಜ್ಝತ್ತಿಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಬಾಹಿರಂ ಧಮ್ಮಂ ಪಟಿಚ್ಚ ಹೇತು ಬಾಹಿರೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೮. ನಹೇತುಂ ನಉಪಾದಾ ಧಮ್ಮಂ ಪಟಿಚ್ಚ ನಹೇತು ಉಪಾದಾ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನೋಉಪಾದಾ ಧಮ್ಮಂ ಪಟಿಚ್ಚ ಹೇತು ನೋಉಪಾದಾ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೩೯. ನಹೇತುಂ ನಅನುಪಾದಿನ್ನಂ ಧಮ್ಮಂ ಪಟಿಚ್ಚ ನಹೇತು ಅನುಪಾದಿನ್ನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧-೬೮. ಹೇತುದುಕ-ಉಪಾದಾನಗೋಚ್ಛಕಂ

೪೦. ನಹೇತುಂ ನಉಪಾದಾನಂ ಧಮ್ಮಂ ಪಟಿಚ್ಚ ಹೇತು ಉಪಾದಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ನವ.

೧-೭೪. ಹೇತುದುಕ-ಕಿಲೇಸಗೋಚ್ಛಕಂ

೪೧. ನಹೇತುಂ ನಕಿಲೇಸಂ ಧಮ್ಮಂ ಪಟಿಚ್ಚ ಹೇತು ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೧-೮೨. ಹೇತುದುಕ-ಪಿಟ್ಠಿದುಕಂ

೪೨. ನಹೇತುಂ ನದಸ್ಸನೇನ ಪಹಾತಬ್ಬಂ ಧಮ್ಮಂ ಪಚ್ಚಯಾ ಹೇತು ದಸ್ಸನೇನ ಪಹಾತಬ್ಬೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನದಸ್ಸನೇನ ಪಹಾತಬ್ಬಂ ಧಮ್ಮಂ ಪಟಿಚ್ಚ ನಹೇತು ನದಸ್ಸನೇನ ಪಹಾತಬ್ಬೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೪೩. ನಹೇತುಂ ನಭಾವನಾಯ ಪಹಾತಬ್ಬಂ ಧಮ್ಮಂ ಪಚ್ಚಯಾ ಹೇತು ಭಾವನಾಯ ಪಹಾತಬ್ಬೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನನಭಾವನಾಯ ಪಹಾತಬ್ಬಂ ಧಮ್ಮಂ ಪಟಿಚ್ಚ ನಹೇತು ನಭಾವನಾಯ ಪಹಾತಬ್ಬೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೪೪. ನನಹೇತುಂ ನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಟಿಚ್ಚ ನಹೇತು ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ಏಕಂ.

ನಹೇತುಂ ನನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಟಿಚ್ಚ ನಹೇತು ನದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೪೫. ನನಹೇತುಂ ನಭಾವನಾಯ ಪಹಾತಬ್ಬಹೇತುಕಂ ಧಮ್ಮಂ ಪಟಿಚ್ಚ ನಹೇತು ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ಏಕಂ.

ನಹೇತುಂ ನನಭಾವನಾಯ ಪಹಾತಬ್ಬಹೇತುಕಂ ಧಮ್ಮಂ ಪಟಿಚ್ಚ ನಹೇತು ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೪೬. ನಹೇತುಂ ನಸವಿತಕ್ಕಂ ಧಮ್ಮಂ ಪಟಿಚ್ಚ ಹೇತು ಸವಿತಕ್ಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ. (ಸಬ್ಬತ್ಥ ಸಂಖಿತ್ತಂ.)

೪೭. ನಹೇತುಂ ನಸರಣಂ ಧಮ್ಮಂ ಪಚ್ಚಯಾ ಹೇತು ಸರಣೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಹೇತುಂ ನಅರಣಂ ಧಮ್ಮಂ ಪಟಿಚ್ಚ ನಹೇತು ಅರಣೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನನಹೇತುಂ ನಅರಣಂ ಧಮ್ಮಂ ಪಟಿಚ್ಚ ನಹೇತು ಅರಣೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಹೇತುಂ ನಅರಣಞ್ಚ ನನಹೇತುಂ ನಅರಣಞ್ಚ ಧಮ್ಮಂ ಪಟಿಚ್ಚ ನಹೇತು ಅರಣೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ತೀಣಿ.

೨-೧. ಸಹೇತುಕಾದಿದುಕಾನಿ-ಹೇತುದುಕಂ

೪೮. ನಸಹೇತುಕಂ ನಹೇತುಂ ಧಮ್ಮಂ ಪಟಿಚ್ಚ ಸಹೇತುಕೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅಹೇತುಕಂ ನಹೇತುಂ ಧಮ್ಮಂ ಪಟಿಚ್ಚ ಸಹೇತುಕೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಸಹೇತುಕಂ ನಹೇತುಞ್ಚ ನಅಹೇತುಕಂ ನಹೇತುಞ್ಚ ಧಮ್ಮಂ ಪಟಿಚ್ಚ ಸಹೇತುಕೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ತೀಣಿ.

ನಸಹೇತುಕಂ ನನಹೇತುಂ ಧಮ್ಮಂ ಪಟಿಚ್ಚ ಸಹೇತುಕೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ನಅಹೇತುಕಂ ನನಹೇತುಂ ಧಮ್ಮಂ ಪಟಿಚ್ಚ ಅಹೇತುಕೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ. ಹೇತುಯಾ ಛ.

೪೯. ನಹೇತುಸಮ್ಪಯುತ್ತಂ ನಹೇತುಂ ಧಮ್ಮಂ ಪಟಿಚ್ಚ ಹೇತುಸಮ್ಪಯುತ್ತೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ. (ಸಹೇತುಕದುಕಸದಿಸಂ.)

೫೦. ನಹೇತುಞ್ಚೇವ ನಅಹೇತುಕಂ ನಹೇತುಂ ಧಮ್ಮಂ ಪಟಿಚ್ಚ ಹೇತು ಚೇವ ಸಹೇತುಕೋ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನಅಹೇತುಕಞ್ಚೇವ ನನ ಚ ಹೇತುಂ ನನಹೇತುಂ ಧಮ್ಮಂ ಪಟಿಚ್ಚ ಸಹೇತುಕೋ ಚೇವ ನ ಚ ಹೇತು ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

೫೧. ನಹೇತುಞ್ಚೇವ ನಹೇತುವಿಪ್ಪಯುತ್ತಞ್ಚ ನಹೇತುಂ ಧಮ್ಮಂ ಪಟಿಚ್ಚ ಹೇತು ಚೇವ ಹೇತುಸಮ್ಪಯುತ್ತೋ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನಹೇತುವಿಪ್ಪಯುತ್ತಞ್ಚೇವ ನನಹೇತುಞ್ಚ ನನಹೇತುಂ ಧಮ್ಮಂ ಪಟಿಚ್ಚ ಹೇತುಸಮ್ಪಯುತ್ತೋ ಚೇವ ನ ಚ ಹೇತು ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ. (ಅನ್ತಿಮದುಕಂ ನ ಲಬ್ಭತಿ.)

೭-೧೩-೧. ಚೂಳನ್ತರದುಕಾನಿ-ಹೇತುದುಕಂ

೫೨. ನಅಪ್ಪಚ್ಚಯಂ ನಹೇತುಂ ಧಮ್ಮಂ ಪಟಿಚ್ಚ ಸಪ್ಪಚ್ಚಯೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನಅಪ್ಪಚ್ಚಯಂ ನನಹೇತುಂ ಧಮ್ಮಂ ಪಟಿಚ್ಚ ಸಪ್ಪಚ್ಚಯೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ. (ಸಙ್ಖತಂ ಸಪ್ಪಚ್ಚಯಸದಿಸಂ.)

೫೩. ನಸನಿದಸ್ಸನಂ ನಹೇತುಂ ಧಮ್ಮಂ ಪಟಿಚ್ಚ ಅನಿದಸ್ಸನೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನಸನಿದಸ್ಸನಂ ನನಹೇತುಂ ಧಮ್ಮಂ ಪಟಿಚ್ಚ ಸನಿದಸ್ಸನೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ತೀಣಿ.

೫೪. ನಸಪ್ಪಟಿಘಂ ನಹೇತುಂ ಧಮ್ಮಂ ಪಟಿಚ್ಚ ಅಪ್ಪಟಿಘೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನಸಪ್ಪಟಿಘಂ ನನಹೇತುಂ ಧಮ್ಮಂ ಪಟಿಚ್ಚ ಸಪ್ಪಟಿಘೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

೫೫. ನರೂಪಿಂ ನಹೇತುಂ ಧಮ್ಮಂ ಪಟಿಚ್ಚ ಅರೂಪೀ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನರೂಪಿಂ ನನಹೇತುಂ ಧಮ್ಮಂ ಪಟಿಚ್ಚ ಅರೂಪೀ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಗಣಿತಕೇನ ತೀಣಿ.

೫೬. ನಲೋಕಿಯಂ ನಹೇತುಂ ಧಮ್ಮಂ ಪಟಿಚ್ಚ ಲೋಕುತ್ತರೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನಲೋಕುತ್ತರಂ ನಹೇತುಂ ಧಮ್ಮಂ ಪಟಿಚ್ಚ ಲೋಕಿಯೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ದ್ವೇ.

ನಲೋಕಿಯಂ ನನಹೇತುಂ ಧಮ್ಮಂ ಪಟಿಚ್ಚ ಲೋಕಿಯೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ನಲೋಕುತ್ತರಂ ನನಹೇತುಂ ಧಮ್ಮಂ ಪಟಿಚ್ಚ ಲೋಕಿಯೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ಚತ್ತಾರಿ.

೫೭. ನಕೇನಚಿ ವಿಞ್ಞೇಯ್ಯಂ ನಹೇತುಂ ಧಮ್ಮಂ ಪಟಿಚ್ಚ ಕೇನಚಿ ವಿಞ್ಞೇಯ್ಯೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ನವ.

ನಕೇನಚಿ ನವಿಞ್ಞೇಯ್ಯಂ ನನಹೇತುಂ ಧಮ್ಮಂ ಪಟಿಚ್ಚ ಕೇನಚಿ ನವಿಞ್ಞೇಯ್ಯೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ನವ.

೧೪-೧. ಆಸವಗೋಚ್ಛಕ-ಹೇತುದುಕಂ

೫೮. ನೋಆಸವಂ ನಹೇತುಂ ಧಮ್ಮಂ ಪಟಿಚ್ಚ ಆಸವೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ನನೋಆಸವಂ ನಹೇತುಂ ಧಮ್ಮಂ ಪಟಿಚ್ಚ ಆಸವೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನೋಆಸವಂ ನಹೇತುಞ್ಚ ನನೋಆಸವಂ ನಹೇತುಞ್ಚ ಧಮ್ಮಂ ಪಟಿಚ್ಚ ಆಸವೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ಪಞ್ಚ.

ನೋಆಸವಂ ನನಹೇತುಂ ಧಮ್ಮಂ ಪಟಿಚ್ಚ ನೋಆಸವೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನನೋಆಸವಂ ನನಹೇತುಂ ಧಮ್ಮಂ ಪಟಿಚ್ಚ ನೋಆಸವೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ನೋಆಸವಂ ನನಹೇತುಞ್ಚ ನನೋಆಸವಂ ನನಹೇತುಞ್ಚ ಧಮ್ಮಂ ಪಟಿಚ್ಚ ನೋಆಸವೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ಪಞ್ಚ.

೫೫-೧. ಮಹನ್ತರದುಕ-ಹೇತುದುಕಂ

೫೯. ನಸಾರಮ್ಮಣಂ ನಹೇತುಂ ಧಮ್ಮಂ ಪಟಿಚ್ಚ ಸಾರಮ್ಮಣೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ.

ನಅನಾರಮ್ಮಣಂ ನನಹೇತುಂ ಧಮ್ಮಂ ಪಟಿಚ್ಚ ಸಾರಮ್ಮಣೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಹೇತುಯಾ ತೀಣಿ. (ಸಂಖಿತ್ತಂ.)

೧೦೦-೧. ಸರಣದುಕ-ಹೇತುದುಕಂ

೬೦. ನಸರಣಂ ನಹೇತುಂ ಧಮ್ಮಂ ಪಟಿಚ್ಚ ಅರಣೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನಹೇತುಂ ಧಮ್ಮಂ ಪಟಿಚ್ಚ ಸರಣೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ದ್ವೇ.

ನಸರಣಂ ನನಹೇತುಂ ಧಮ್ಮಂ ಪಟಿಚ್ಚ ಅರಣೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ನಅರಣಂ ನನಹೇತುಂ ಧಮ್ಮಂ ಪಟಿಚ್ಚ ಅರಣೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನನಹೇತುಂ ಧಮ್ಮಂ ಪಟಿಚ್ಚ ಸರಣೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನನಹೇತುಂ ಧಮ್ಮಂ ಪಟಿಚ್ಚ ಸರಣೋ ನಹೇತು ಚ ಅರಣೋ ನಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ… ತೀಣಿ. (ಸಂಖಿತ್ತಂ.)

೧೦೦-೨. ಸರಣದುಕ-ಸಹೇತುಕದುಕಂ

೬೧. ನಸರಣಂ ನಸಹೇತುಕಂ ಧಮ್ಮಂ ಪಟಿಚ್ಚ ಅರಣೋ ಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನಸಹೇತುಕಂ ಧಮ್ಮಂ ಪಟಿಚ್ಚ ಸರಣೋ ಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ದ್ವೇ.

೬೨. ನಸರಣಂ ನಅಹೇತುಕಂ ಧಮ್ಮಂ ಪಟಿಚ್ಚ ಅರಣೋ ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನಅಹೇತುಕಂ ಧಮ್ಮಂ ಪಟಿಚ್ಚ ಅರಣೋ ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ದ್ವೇ.

೧೦೦-೩. ಸರಣದುಕ-ಹೇತುಸಮ್ಪಯುತ್ತದುಕಂ

೬೩. ನಸರಣಂ ನಹೇತುಸಮ್ಪಯುತ್ತಂ ಧಮ್ಮಂ ಪಟಿಚ್ಚ ಅರಣೋ ಹೇತುಸಮ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನಹೇತುಸಮ್ಪಯುತ್ತಂ ಧಮ್ಮಂ ಪಟಿಚ್ಚ ಸರಣೋ ಹೇತುಸಮ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ದ್ವೇ.

೬೪. ನಸರಣಂ ನಹೇತುವಿಪ್ಪಯುತ್ತಂ ಧಮ್ಮಂ ಪಟಿಚ್ಚ ಅರಣೋ ಹೇತುವಿಪ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನಹೇತುವಿಪ್ಪಯುತ್ತಂ ಧಮ್ಮಂ ಪಟಿಚ್ಚ ಅರಣೋ ಹೇತುವಿಪ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ದ್ವೇ.

೧೦೦-೪. ಸರಣದುಕ-ಹೇತುಸಹೇತುಕದುಕಾದಿ

೬೫. ನಸರಣಂ ನಹೇತುಞ್ಚೇವ ನಅಹೇತುಕಞ್ಚ ಧಮ್ಮಂ ಪಟಿಚ್ಚ ಅರಣೋ ಹೇತು ಚೇವ ಸಹೇತುಕೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನಹೇತುಞ್ಚೇವ ನಅಹೇತುಕಞ್ಚ ಧಮ್ಮಂ ಪಟಿಚ್ಚ ಸರಣೋ ಹೇತು ಚೇವ ಸಹೇತುಕೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ದ್ವೇ.

ನಸರಣಂ ನಅಹೇತುಕಞ್ಚೇವ ನನಹೇತುಞ್ಚ ಧಮ್ಮಂ ಪಟಿಚ್ಚ ಅರಣೋ ಸಹೇತುಕೋ ಚೇವ ನ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅರಣಂ ನಅಹೇತುಕಞ್ಚೇವ ನನಹೇತುಞ್ಚ ಧಮ್ಮಂ ಪಟಿಚ್ಚ ಸರಣೋ ಸಹೇತುಕೋ ಚೇವ ನ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ದ್ವೇ. (ಹೇತುಹೇತುಸಮ್ಪಯುತ್ತದುಕಂ ಸಂಖಿತ್ತಂ.)

೧೦೦-೬. ಸರಣದುಕ-ನಹೇತುಸಹೇತುಕದುಕಂ

೬೬. ನಸರಣಂ ನಹೇತುಂ ನಸಹೇತುಕಂ ಧಮ್ಮಂ ಪಟಿಚ್ಚ ಅರಣೋ ನಹೇತು ಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ಏಕಂ.

ನಸರಣಂ ನಹೇತುಂ ನಅಹೇತುಕಂ ಧಮ್ಮಂ ಪಟಿಚ್ಚ ಅರಣೋ ನಹೇತು ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ.

ನಅರಣಂ ನಹೇತುಂ ನಅಹೇತುಕಂ ಧಮ್ಮಂ ಪಟಿಚ್ಚ ಅರಣೋ ನಹೇತು ಅಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಏಕಂ. ಹೇತುಯಾ ದ್ವೇ.