೧-೭. ಪಟಿಚ್ಚವಾರಾದಿ

ಪಚ್ಚಯಚತುಕ್ಕಂ

ಹೇತುಪಚ್ಚಯೋ

೪೨. ಸಞ್ಞೋಜನವಿಪ್ಪಯುತ್ತಂ ಸಞ್ಞೋಜನಿಯಂ ಕುಸಲಂ ಧಮ್ಮಂ ಪಟಿಚ್ಚ ಸಞ್ಞೋಜನವಿಪ್ಪಯುತ್ತೋ ಸಞ್ಞೋಜನಿಯೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಸಞ್ಞೋಜನವಿಪ್ಪಯುತ್ತಂ ಅಸಞ್ಞೋಜನಿಯಂ ಕುಸಲಂ ಧಮ್ಮಂ ಪಟಿಚ್ಚ ಸಞ್ಞೋಜನವಿಪ್ಪಯುತ್ತೋ ಅಸಞ್ಞೋಜನಿಯೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

೪೩. ಹೇತುಯಾ ದ್ವೇ, ಆರಮ್ಮಣೇ ದ್ವೇ…ಪೇ… ಅವಿಗತೇ ದ್ವೇ (ಸಂಖಿತ್ತಂ).

(ಯಥಾ ಚೂಳನ್ತರದುಕೇ ಲೋಕಿಯದುಕಸದಿಸಂ. ಸಹಜಾತವಾರೋಪಿ…ಪೇ… ಪಞ್ಹಾವಾರೋಪಿ ಸಬ್ಬತ್ಥ ವಿತ್ಥಾರೇತಬ್ಬಾ.)

೪೪. ಸಞ್ಞೋಜನವಿಪ್ಪಯುತ್ತೋ ಸಞ್ಞೋಜನಿಯೋ ಅಕುಸಲೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಸಞ್ಞೋಜನಿಯಸ್ಸ ಅಕುಸಲಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ (ಸಂಖಿತ್ತಂ).

೪೫. ಆರಮ್ಮಣೇ ಏಕಂ (ಸಬ್ಬತ್ಥ ಏಕಂ, ಸಂಖಿತ್ತಂ).

೪೬. ಸಞ್ಞೋಜನವಿಪ್ಪಯುತ್ತಂ ಸಞ್ಞೋಜನಿಯಂ ಅಬ್ಯಾಕತಂ ಧಮ್ಮಂ ಪಟಿಚ್ಚ ಸಞ್ಞೋಜನವಿಪ್ಪಯುತ್ತೋ ಸಞ್ಞೋಜನಿಯೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಸಞ್ಞೋಜನವಿಪ್ಪಯುತ್ತಂ ಅಸಞ್ಞೋಜನಿಯಂ ಅಬ್ಯಾಕತಂ ಧಮ್ಮಂ ಪಟಿಚ್ಚ ಸಞ್ಞೋಜನವಿಪ್ಪಯುತ್ತೋ ಅಸಞ್ಞೋಜನಿಯೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಸಞ್ಞೋಜನವಿಪ್ಪಯುತ್ತಂ ಅಸಞ್ಞೋಜನಿಯಂ ಅಬ್ಯಾಕತಂ ಧಮ್ಮಂ ಪಟಿಚ್ಚ ಸಞ್ಞೋಜನವಿಪ್ಪಯುತ್ತೋ ಸಞ್ಞೋಜನಿಯೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಸಞ್ಞೋಜನವಿಪ್ಪಯುತ್ತಂ ಅಸಞ್ಞೋಜನಿಯಂ ಅಬ್ಯಾಕತಂ ಧಮ್ಮಂ ಪಟಿಚ್ಚ ಸಞ್ಞೋಜನವಿಪ್ಪಯುತ್ತೋ ಸಞ್ಞೋಜನಿಯೋ ಅಬ್ಯಾಕತೋ ಚ ಸಞ್ಞೋಜನವಿಪ್ಪಯುತ್ತೋ ಅಸಞ್ಞೋಜನಿಯೋ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. (೩)

ಸಞ್ಞೋಜನವಿಪ್ಪಯುತ್ತಂ ಸಞ್ಞೋಜನಿಯಂ ಅಬ್ಯಾಕತಞ್ಚ ಸಞ್ಞೋಜನವಿಪ್ಪಯುತ್ತಂ ಅಸಞ್ಞೋಜನಿಯಂ ಅಬ್ಯಾಕತಞ್ಚ ಧಮ್ಮಂ ಪಟಿಚ್ಚ ಸಞ್ಞೋಜನವಿಪ್ಪಯುತ್ತೋ ಸಞ್ಞೋಜನಿಯೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧) (ಸಂಖಿತ್ತಂ.)

೪೭. ಹೇತುಯಾ ಪಞ್ಚ, ಆರಮ್ಮಣೇ ದ್ವೇ, ಅಧಿಪತಿಯಾ ಪಞ್ಚ…ಪೇ… ಆಸೇವನೇ ಏಕಂ, ಕಮ್ಮೇ ಪಞ್ಚ, ವಿಪಾಕೇ ಪಞ್ಚ…ಪೇ… ಅವಿಗತೇ ಪಞ್ಚ (ಸಂಖಿತ್ತಂ).

ನಹೇತುಯಾ ಏಕಂ, ನಆರಮ್ಮಣೇ ತೀಣಿ, ನಅಧಿಪತಿಯಾ ದ್ವೇ, ನಪುರೇಜಾತೇ ಚತ್ತಾರಿ, ನಪಚ್ಛಾಜಾತೇ ಪಞ್ಚ, ನಆಸೇವನೇ ಪಞ್ಚ, ನಕಮ್ಮೇ ಏಕಂ, ನವಿಪಾಕೇ ಏಕಂ, ನವಿಪ್ಪಯುತ್ತೇ ದ್ವೇ…ಪೇ… ನೋವಿಗತೇ ತೀಣಿ (ಸಂಖಿತ್ತಂ).

(ಸಹಜಾತವಾರೋಪಿ…ಪೇ… ಸಮ್ಪಯುತ್ತವಾರೋಪಿ ಪಟಿಚ್ಚವಾರಸದಿಸಾ.)

೪೮. ಸಞ್ಞೋಜನವಿಪ್ಪಯುತ್ತೋ ಸಞ್ಞೋಜನಿಯೋ ಅಬ್ಯಾಕತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಸಞ್ಞೋಜನಿಯಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ (ಸಂಖಿತ್ತಂ).

೪೯. ಹೇತುಯಾ ಚತ್ತಾರಿ, ಆರಮ್ಮಣೇ ತೀಣಿ, ಅಧಿಪತಿಯಾ ಚತ್ತಾರಿ, ಅನನ್ತರೇ ಚತ್ತಾರಿ…ಪೇ… ಅವಿಗತೇ ಸತ್ತ (ಸಂಖಿತ್ತಂ).

೫೦. ನಹೇತುಯಾ ಸತ್ತ, ನಆರಮ್ಮಣೇ ಸತ್ತ (ಸಂಖಿತ್ತಂ).

ಹೇತುಪಚ್ಚಯಾ ನಆರಮ್ಮಣೇ ಚತ್ತಾರಿ (ಸಂಖಿತ್ತಂ).

ನಹೇತುಪಚ್ಚಯಾ ಆರಮ್ಮಣೇ ತೀಣಿ (ಸಂಖಿತ್ತಂ).

(ಯಥಾ ಕುಸಲತ್ತಿಕೇ ಪಞ್ಹಾವಾರಸ್ಸ ಅನುಲೋಮಮ್ಪಿ ಪಚ್ಚನೀಯಮ್ಪಿ ಅನುಲೋಮಪಚ್ಚನೀಯಮ್ಪಿ ಪಚ್ಚನೀಯಾನುಲೋಮಮ್ಪಿ ಗಣಿತಂ, ಏವಂ ಗಣೇತಬ್ಬಂ.)

ಸಞ್ಞೋಜನಗೋಚ್ಛಕಕುಸಲತ್ತಿಕಂ ನಿಟ್ಠಿತಂ.