೧. ವಿಭಙ್ಗವಾರೋ

ನಹೇತುಪಚ್ಚಯೋ

೫. ನೀವರಣಂ ಧಮ್ಮಂ ಪಟಿಚ್ಚ ನೀವರಣೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ವಿಚಿಕಿಚ್ಛಾನೀವರಣಂ ಪಟಿಚ್ಚ ಅವಿಜ್ಜಾನೀವರಣಂ, ಉದ್ಧಚ್ಚನೀವರಣಂ ಪಟಿಚ್ಚ ಅವಿಜ್ಜಾನೀವರಣಂ. (೧)

ನೋನೀವರಣಂ ಧಮ್ಮಂ ಪಟಿಚ್ಚ ನೋನೀವರಣೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ನೋನೀವರಣಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ…ಪೇ… (ಯಾವ ಅಸಞ್ಞಸತ್ತಾ). (೧)

ನೋನೀವರಣಂ ಧಮ್ಮಂ ಪಟಿಚ್ಚ ನೀವರಣೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ವಿಚಿಕಿಚ್ಛಾಸಹಗತೇ ಉದ್ಧಚ್ಚಸಹಗತೇ ಖನ್ಧೇ ಪಟಿಚ್ಚ ಅವಿಜ್ಜಾನೀವರಣಂ. (೨)

೬. ನೀವರಣಞ್ಚ ನೋನೀವರಣಞ್ಚ ಧಮ್ಮಂ ಪಟಿಚ್ಚ ನೀವರಣೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ವಿಚಿಕಿಚ್ಛಾನೀವರಣಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಅವಿಜ್ಜಾನೀವರಣಂ, ಉದ್ಧಚ್ಚನೀವರಣಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಅವಿಜ್ಜಾನೀವರಣಂ. (೧)

ನಆರಮ್ಮಣಪಚ್ಚಯಾದಿ

೭. ನೀವರಣಂ ಧಮ್ಮಂ ಪಟಿಚ್ಚ ನೋನೀವರಣೋ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ನೀವರಣೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ನೋನೀವರಣಂ ಧಮ್ಮಂ ಪಟಿಚ್ಚ ನೋನೀವರಣೋ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ನೋನೀವರಣೇ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ…ಪೇ… (ಯಾವ ಅಸಞ್ಞಸತ್ತಾ). (೧)

ನೀವರಣಞ್ಚ ನೋನೀವರಣಞ್ಚ ಧಮ್ಮಂ ಪಟಿಚ್ಚ ನೋನೀವರಣೋ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ನೀವರಣೇ ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ (ಸಂಖಿತ್ತಂ)… ನಅಧಿಪತಿಪಚ್ಚಯಾ… ನಅನನ್ತರಪಚ್ಚಯಾ… ನಸಮನನ್ತರಪಚ್ಚಯಾ… ನಅಞ್ಞಮಞ್ಞಪಚ್ಚಯಾ… ನಉಪನಿಸ್ಸಯಪಚ್ಚಯಾ.

ನಪುರೇಜಾತಪಚ್ಚಯೋ

೮. ನೀವರಣಂ ಧಮ್ಮಂ ಪಟಿಚ್ಚ ನೀವರಣೋ ಧಮ್ಮೋ ಉಪ್ಪಜ್ಜತಿ ನಪುರೇಜಾತಪಚ್ಚಯಾ – ಅರೂಪೇ ಕಾಮಚ್ಛನ್ದನೀವರಣಂ ಪಟಿಚ್ಚ ಥಿನಮಿದ್ಧನೀವರಣಂ ಉದ್ಧಚ್ಚನೀವರಣಂ ಅವಿಜ್ಜಾನೀವರಣಂ, ಅರೂಪೇ ಕಾಮಚ್ಛನ್ದನೀವರಣಂ ಪಟಿಚ್ಚ ಉದ್ಧಚ್ಚನೀವರಣಂ ಅವಿಜ್ಜಾನೀವರಣಂ, ಅರೂಪೇ ವಿಚಿಕಿಚ್ಛಾನೀವರಣಂ ಪಟಿಚ್ಚ ಉದ್ಧಚ್ಚನೀವರಣಂ ಅವಿಜ್ಜಾನೀವರಣಂ, ಅರೂಪೇ ಉದ್ಧಚ್ಚನೀವರಣಂ ಪಟಿಚ್ಚ ಅವಿಜ್ಜಾನೀವರಣಂ. (೧)

ನೀವರಣಂ ಧಮ್ಮಂ ಪಟಿಚ್ಚ ನೋನೀವರಣೋ ಧಮ್ಮೋ ಉಪ್ಪಜ್ಜತಿ ನಪುರೇಜಾತಪಚ್ಚಯಾ – ಅರೂಪೇ ನೀವರಣೇ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ, ನೀವರಣೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (ಅವಸೇಸಾ ಪಞ್ಹಾ ಸಬ್ಬೇ ವಿತ್ಥಾರೇತಬ್ಬಾ. ಅರೂಪಂ ಪಠಮಂ ಕಾತಬ್ಬಂ, ರೂಪಂ ಪಚ್ಛಾ ಯಥಾ ಲಭತಿ.)

೯. ನೀವರಣಞ್ಚ ನೋನೀವರಣಞ್ಚ ಧಮ್ಮಂ ಪಟಿಚ್ಚ ನೀವರಣೋ ಧಮ್ಮೋ ಉಪ್ಪಜ್ಜತಿ ನಪುರೇಜಾತಪಚ್ಚಯಾ – ಅರೂಪೇ ನೋನೀವರಣೇ ಖನ್ಧೇ ಚ ಕಾಮಚ್ಛನ್ದನೀವರಣಞ್ಚ ಪಟಿಚ್ಚ ಥಿನಮಿದ್ಧನೀವರಣಂ ಉದ್ಧಚ್ಚನೀವರಣಂ (ಚಕ್ಕಂ). (೧)

ನೀವರಣಞ್ಚ ನೋನೀವರಣಞ್ಚ ಧಮ್ಮಂ ಪಟಿಚ್ಚ ನೋನೀವರಣೋ ಧಮ್ಮೋ ಉಪ್ಪಜ್ಜತಿ ನಪುರೇಜಾತಪಚ್ಚಯಾ – ಅರೂಪೇ ನೋನೀವರಣಂ ಏಕಂ ಖನ್ಧಞ್ಚ ನೀವರಣೇ ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ… ನೀವರಣೇ ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ, ನೀವರಣೇ ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೨)

ನೀವರಣಞ್ಚ ನೋನೀವರಣಞ್ಚ ಧಮ್ಮಂ ಪಟಿಚ್ಚ ನೀವರಣೋ ಚ ನೋನೀವರಣೋ ಚ ಧಮ್ಮಾ ಉಪ್ಪಜ್ಜನ್ತಿ ನಪುರೇಜಾತಪಚ್ಚಯಾ – ಅರೂಪೇ ನೋನೀವರಣಂ ಏಕಂ ಖನ್ಧಞ್ಚ ಕಾಮಚ್ಛನ್ದನೀವರಣಞ್ಚ ಪಟಿಚ್ಚ ತಯೋ ಖನ್ಧಾ ಥಿನಮಿದ್ಧನೀವರಣಂ ಉದ್ಧಚ್ಚನೀವರಣಂ ಅವಿಜ್ಜಾನೀವರಣಂ (ಚಕ್ಕಂ. ಸಂಖಿತ್ತಂ). (೩)