೧. ವಿಭಙ್ಗವಾರೋ

ಹೇತುಪಚ್ಚಯೋ

೧೦. ಆಸವಂ ಧಮ್ಮಂ ಪಚ್ಚಯಾ ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಆಸವಮೂಲಕಂ ತೀಣಿ, ಪಟಿಚ್ಚಸದಿಸಾ).

ನೋಆಸವಂ ಧಮ್ಮಂ ಪಚ್ಚಯಾ ನೋಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನೋಆಸವಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… ಖನ್ಧೇ ಪಚ್ಚಯಾ ವತ್ಥು, ವತ್ಥುಂ ಪಚ್ಚಯಾ ಖನ್ಧಾ, ಮಹಾಭೂತೇ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ ಕಟತ್ತಾರೂಪಂ ಉಪಾದಾರೂಪಂ, ವತ್ಥುಂ ಪಚ್ಚಯಾ ನೋಆಸವಾ ಖನ್ಧಾ. (೧)

ನೋಆಸವಂ ಧಮ್ಮಂ ಪಚ್ಚಯಾ ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನೋಆಸವೇ ಖನ್ಧೇ ಪಚ್ಚಯಾ ಆಸವಾ, ವತ್ಥುಂ ಪಚ್ಚಯಾ ಆಸವಾ. (೨)

ನೋಆಸವಂ ಧಮ್ಮಂ ಪಚ್ಚಯಾ ಆಸವೋ ಚ ನೋಆಸವೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ನೋಆಸವಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ ಆಸವಾ ಚ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ವತ್ಥುಂ ಪಚ್ಚಯಾ ಆಸವಾ ಸಮ್ಪಯುತ್ತಕಾ ಚ ಖನ್ಧಾ. (೩)

೧೧. ಆಸವಞ್ಚ ನೋಆಸವಞ್ಚ ಧಮ್ಮಂ ಪಚ್ಚಯಾ ಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕಾಮಾಸವಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಚ್ಚಯಾ ದಿಟ್ಠಾಸವೋ ಅವಿಜ್ಜಾಸವೋ (ಚಕ್ಕಂ). ಕಾಮಾಸವಞ್ಚ ವತ್ಥುಞ್ಚ ಪಚ್ಚಯಾ ದಿಟ್ಠಾಸವೋ ಅವಿಜ್ಜಾಸವೋ (ಚಕ್ಕಂ). (೧)

ಆಸವಞ್ಚ ನೋಆಸವಞ್ಚ ಧಮ್ಮಂ ಪಚ್ಚಯಾ ನೋಆಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನೋಆಸವಂ ಏಕಂ ಖನ್ಧಞ್ಚ ಆಸವೇ ಚ ಪಚ್ಚಯಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಆಸವಞ್ಚ ವತ್ಥುಞ್ಚ ಪಚ್ಚಯಾ ನೋಆಸವಾ ಖನ್ಧಾ. (೨)

ಆಸವಞ್ಚ ನೋಆಸವಞ್ಚ ಧಮ್ಮಂ ಪಚ್ಚಯಾ ಆಸವೋ ಚ ನೋಆಸವೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ನೋಆಸವಂ ಏಕಂ ಖನ್ಧಞ್ಚ ಕಾಮಾಸವಞ್ಚ ಪಚ್ಚಯಾ ತಯೋ ಖನ್ಧಾ ದಿಟ್ಠಾಸವೋ ಅವಿಜ್ಜಾಸವೋ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… (ಚಕ್ಕಂ). ಕಾಮಾಸವಞ್ಚ ವತ್ಥುಞ್ಚ ಪಚ್ಚಯಾ ದಿಟ್ಠಾಸವೋ ಅವಿಜ್ಜಾಸವೋ ಸಮ್ಪಯುತ್ತಕಾ ಚ ಖನ್ಧಾ (ಚಕ್ಕಂ. ಸಂಖಿತ್ತಂ). (೩)