೧. ವಿಭಙ್ಗವಾರೋ

ಹೇತುಪಚ್ಚಯೋ

೯೮. ಉಪಾದಾನೋ ಚೇವ ಉಪಾದಾನಿಯೋ ಚ ಧಮ್ಮೋ ಉಪಾದಾನಸ್ಸ ಚೇವ ಉಪಾದಾನಿಯಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಉಪಾದಾನಾ ಚೇವ ಉಪಾದಾನಿಯಾ ಚ ಹೇತೂ ಸಮ್ಪಯುತ್ತಕಾನಂ ಉಪಾದಾನಾನಂ ಹೇತುಪಚ್ಚಯೇನ ಪಚ್ಚಯೋ. (೧)

ಉಪಾದಾನೋ ಚೇವ ಉಪಾದಾನಿಯೋ ಚ ಧಮ್ಮೋ ಉಪಾದಾನಿಯಸ್ಸ ಚೇವ ನೋ ಚ ಉಪಾದಾನಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಉಪಾದಾನಾ ಚೇವ ಉಪಾದಾನಿಯಾ ಚ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ (ಉಪಾದಾನದುಕಸದಿಸಾ ನಿನ್ನಾನಾ, ನವ ಪಞ್ಹಾ).

ಆರಮ್ಮಣಪಚ್ಚಯೋ

೯೯. ಉಪಾದಾನೋ ಚೇವ ಉಪಾದಾನಿಯೋ ಚ ಧಮ್ಮೋ ಉಪಾದಾನಸ್ಸ ಚೇವ ಉಪಾದಾನಿಯಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಉಪಾದಾನೇ ಆರಬ್ಭ ಉಪಾದಾನಾ ಉಪ್ಪಜ್ಜನ್ತಿ… ತೀಣಿ.

ಉಪಾದಾನಿಯೋ ಚೇವ ನೋ ಚ ಉಪಾದಾನೋ ಧಮ್ಮೋ ಉಪಾದಾನಿಯಸ್ಸ ಚೇವ ನೋ ಚ ಉಪಾದಾನಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಝಾನಾ ವುಟ್ಠಹಿತ್ವಾ ಝಾನಂ ಪಚ್ಚವೇಕ್ಖತಿ, ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉದ್ಧಚ್ಚಂ ದೋಮನಸ್ಸಂ ಉಪ್ಪಜ್ಜತಿ; ಅರಿಯಾ ಗೋತ್ರಭುಂ ಪಚ್ಚವೇಕ್ಖನ್ತಿ, ವೋದಾನಂ ಪಚ್ಚವೇಕ್ಖನ್ತಿ, ಪಹೀನೇ ಕಿಲೇಸೇ…ಪೇ… ವಿಕ್ಖಮ್ಭಿತೇ ಕಿಲೇಸೇ…ಪೇ… ಪುಬ್ಬೇ ಸಮುದಾಚಿಣ್ಣೇ…ಪೇ… ಚಕ್ಖುಂ…ಪೇ… ವತ್ಥುಂ…ಪೇ… (ಸಂಖಿತ್ತಂ) ಅನಾಗತಂಸಞಾಣಸ್ಸ ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಉಪಾದಾನಿಯೋ ಚೇವ ನೋ ಚ ಉಪಾದಾನೋ ಧಮ್ಮೋ ಉಪಾದಾನಸ್ಸ ಚೇವ ಉಪಾದಾನಿಯಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ (ಸಂಖಿತ್ತಂ, ಇತರೇ ದ್ವೇ ಉಪಾದಾನದುಕಸದಿಸಾ). (೩)

ಉಪಾದಾನೋ ಚೇವ ಉಪಾದಾನಿಯೋ ಚ ಉಪಾದಾನಿಯೋ ಚೇವ ನೋ ಚ ಉಪಾದಾನೋ ಚ ಧಮ್ಮಾ ಉಪಾದಾನಸ್ಸ ಚೇವ ಉಪಾದಾನಿಯಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ತೀಣಿ (ಹೇಟ್ಠಾ ಅಧಿಪತಿ ತೀಣಿ, ಉಪಾದಾನದುಕಸದಿಸಾ).

ಅಧಿಪತಿಪಚ್ಚಯೋ

೧೦೦. ಉಪಾದಾನಿಯೋ ಚೇವ ನೋ ಚ ಉಪಾದಾನೋ ಧಮ್ಮೋ ಉಪಾದಾನಿಯಸ್ಸ ಚೇವ ನೋ ಚ ಉಪಾದಾನಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ…ಪೇ… ಝಾನಾ ವುಟ್ಠಹಿತ್ವಾ ಝಾನಂ ಗರುಂ ಕತ್ವಾ ಪಚ್ಚವೇಕ್ಖತಿ, ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ; ಸೇಕ್ಖಾ ಗೋತ್ರಭುಂ ಗರುಂ ಕತ್ವಾ…ಪೇ… ವೋದಾನಂ…ಪೇ… ಚಕ್ಖುಂ…ಪೇ… ವತ್ಥುಂ ಉಪಾದಾನಿಯೇ ಚೇವ ನೋ ಚ ಉಪಾದಾನೇ ಖನ್ಧೇ ಗರುಂ ಕತ್ವಾ ಉಪಾದಾನಿಯಾ ಚೇವ ನೋ ಚ ಉಪಾದಾನಾ ಖನ್ಧಾ ಉಪ್ಪಜ್ಜನ್ತಿ. ಸಹಜಾತಾಧಿಪತಿ – ಉಪಾದಾನಿಯಾ ಚೇವ ನೋ ಚ ಉಪಾದಾನಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ (ಅವಸೇಸಾ ದ್ವೇಪಿ ಆರಮ್ಮಣಾಧಿಪತಿ ಸಹಜಾತಾಧಿಪತಿಪಿ ಉಪಾದಾನದುಕಸದಿಸಾ). (೩)

(ಘಟನಾ ಅಧಿಪತಿ ತೀಣಿ, ಉಪಾದಾನದುಕಸದಿಸಾ. ಸಬ್ಬೇ ಪಚ್ಚಯಾ ಉಪಾದಾನದುಕಸದಿಸಾ. ಉಪಾದಾನಿಯೇ ಲೋಕುತ್ತರಂ ನತ್ಥಿ, ಪಚ್ಚನೀಯಮ್ಪಿ ಇತರೇ ದ್ವೇ ಗಣನಾಪಿ ಉಪಾದಾನದುಕಸದಿಸಂ.)

ಉಪಾದಾನಉಪಾದಾನಿಯದುಕಂ ನಿಟ್ಠಿತಂ.