೧. ವಿಭಙ್ಗವಾರೋ

ನಹೇತುಪಚ್ಚಯೋ

೬೪. ಚಿತ್ತಂ ಧಮ್ಮಂ ಪಚ್ಚಯಾ ನೋಚಿತ್ತೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ಚಿತ್ತಂ ಪಚ್ಚಯಾ ಸಮ್ಪಯುತ್ತಕಾ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ; ಅಹೇತುಕಪಟಿಸನ್ಧಿಕ್ಖಣೇ…ಪೇ… ವಿಚಿಕಿಚ್ಛಾಸಹಗತಂ ಉದ್ಧಚ್ಚಸಹಗತಂ ಚಿತ್ತಂ ಪಚ್ಚಯಾ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (೧)

೬೫. ನೋಚಿತ್ತಂ ಧಮ್ಮಂ ಪಚ್ಚಯಾ ನೋಚಿತ್ತೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ನೋಚಿತ್ತಂ ಏಕಂ ಖನ್ಧಂ ಪಚ್ಚಯಾ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ…ಪೇ… (ಯಾವ ಅಸಞ್ಞಸತ್ತಾ), ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಸಹಗತಾ ಖನ್ಧಾ…ಪೇ… ಕಾಯಾಯತನಂ ಪಚ್ಚಯಾ ಕಾಯವಿಞ್ಞಾಣಸಹಗತಾ ಖನ್ಧಾ, ವತ್ಥುಂ ಪಚ್ಚಯಾ ಅಹೇತುಕಾ ನೋಚಿತ್ತೇ ಖನ್ಧಾ ವಿಚಿಕಿಚ್ಛಾಸಹಗತೇ ಉದ್ಧಚ್ಚಸಹಗತೇ ಖನ್ಧೇ ಚ ವತ್ಥುಞ್ಚ ಪಚ್ಚಯಾ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (೧)

ನೋಚಿತ್ತಂ ಧಮ್ಮಂ ಪಚ್ಚಯಾ ಚಿತ್ತೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕೇ ನೋಚಿತ್ತೇ ಖನ್ಧೇ ಪಚ್ಚಯಾ ಚಿತ್ತಂ, ವತ್ಥುಂ ಪಚ್ಚಯಾ ಚಿತ್ತಂ; ಅಹೇತುಕಪಟಿಸನ್ಧಿಕ್ಖಣೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ ವತ್ಥುಂ ಪಚ್ಚಯಾ ಚಿತ್ತಂ, ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಂ…ಪೇ… ಕಾಯಾಯತನಂ ಪಚ್ಚಯಾ ಕಾಯವಿಞ್ಞಾಣಂ. (೨)

ನೋಚಿತ್ತಂ ಧಮ್ಮಂ ಪಚ್ಚಯಾ ಚಿತ್ತೋ ಚ ನೋಚಿತ್ತೋ ಚ ಧಮ್ಮಾ ಉಪ್ಪಜ್ಜನ್ತಿ ನಹೇತುಪಚ್ಚಯಾ – ಅಹೇತುಕಂ ನೋಚಿತ್ತಂ ಏಕಂ ಖನ್ಧಂ ಪಚ್ಚಯಾ ದ್ವೇ ಖನ್ಧಾ ಚಿತ್ತಞ್ಚ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ…ಪೇ… ವತ್ಥುಂ ಪಚ್ಚಯಾ ಚಿತ್ತಞ್ಚ ಸಮ್ಪಯುತ್ತಕಾ ಚ ಖನ್ಧಾ; ಅಹೇತುಕಪಟಿಸನ್ಧಿಕ್ಖಣೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ ವತ್ಥುಂ ಪಚ್ಚಯಾ ಚಿತ್ತಞ್ಚ ಸಮ್ಪಯುತ್ತಕಾ ಚ ಖನ್ಧಾ, ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಂ…ಪೇ… ಕಾಯಾಯತನಂ ಪಚ್ಚಯಾ ಕಾಯವಿಞ್ಞಾಣಂ. (೩)

ಚಿತ್ತಞ್ಚ ನೋಚಿತ್ತಞ್ಚ ಧಮ್ಮಂ ಪಚ್ಚಯಾ ನೋಚಿತ್ತೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ನೋಚಿತ್ತಂ ಏಕಂ ಖನ್ಧಞ್ಚ ಚಿತ್ತಞ್ಚ ಪಚ್ಚಯಾ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ ಚ…ಪೇ… ಚಿತ್ತಞ್ಚ ವತ್ಥುಞ್ಚ ಪಚ್ಚಯಾ ನೋಚಿತ್ತಾ ಖನ್ಧಾ; ಅಹೇತುಕಪಟಿಸನ್ಧಿಕ್ಖಣೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ ಚಿತ್ತಞ್ಚ ವತ್ಥುಞ್ಚ ಪಚ್ಚಯಾ ನೋಚಿತ್ತಾ ಖನ್ಧಾ, ಚಕ್ಖಾಯತನಞ್ಚ ಚಕ್ಖುವಿಞ್ಞಾಣಞ್ಚ ಪಚ್ಚಯಾ ಚಕ್ಖುವಿಞ್ಞಾಣಸಹಗತಾ ಖನ್ಧಾ…ಪೇ… ಕಾಯಾಯತನಂ ಚ…ಪೇ… ವಿಚಿಕಿಚ್ಛಾಸಹಗತೇ ಉದ್ಧಚ್ಚಸಹಗತೇ ಖನ್ಧೇ ಚ ಚಿತ್ತಞ್ಚ ಪಚ್ಚಯಾ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (೧) (ಸಂಖಿತ್ತಂ.)