೧. ವಿಭಙ್ಗವಾರೋ

ಹೇತುಪಚ್ಚಯೋ

೨೭೮. ಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಂ ಪಟಿಚ್ಚ ದ್ವೇ ಖನ್ಧಾ, ದ್ವೇ ಖನ್ಧೇ ಪಟಿಚ್ಚ ಏಕೋ ಖನ್ಧೋ; ಪಟಿಸನ್ಧಿಕ್ಖಣೇ…ಪೇ…. (೧)

ಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ನೋಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಸಂಸಟ್ಠಸಮುಟ್ಠಾನೇ ಖನ್ಧೇ ಪಟಿಚ್ಚ ಚಿತ್ತಂ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನೇ ಖನ್ಧೇ ಪಟಿಚ್ಚ ಚಿತ್ತಂ ಕಟತ್ತಾ ಚ ರೂಪಂ. (೨)

ಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ಚಿತ್ತಸಂಸಟ್ಠಸಮುಟ್ಠಾನೋ ಚ ನೋಚಿತ್ತಸಂಸಟ್ಠಸಮುಟ್ಠಾನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಂ ಪಟಿಚ್ಚ ದ್ವೇ ಖನ್ಧಾ ಚಿತ್ತಞ್ಚ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. (೩)

೨೭೯. ನೋಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ನೋಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಂ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ ಚಿತ್ತಂ ಪಟಿಚ್ಚ ಕಟತ್ತಾರೂಪಂ, ಚಿತ್ತಂ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ಚಿತ್ತಂ, ಏಕಂ ಮಹಾಭೂತಂ…ಪೇ… ಮಹಾಭೂತೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ ಕಟತ್ತಾರೂಪಂ ಉಪಾದಾರೂಪಂ. (೧)

ನೋಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ; ಪಟಿಸನ್ಧಿಕ್ಖಣೇ ಚಿತ್ತಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ, ಪಟಿಸನ್ಧಿಕ್ಖಣೇ ವತ್ಥುಂ ಪಟಿಚ್ಚ ಚಿತ್ತಸಂಸಟ್ಠಸಮುಟ್ಠಾನಾ ಖನ್ಧಾ. (೨)

ನೋಚಿತ್ತಸಂಸಟ್ಠಸಮುಟ್ಠಾನಂ ಧಮ್ಮಂ ಪಟಿಚ್ಚ ಚಿತ್ತಸಂಸಟ್ಠಸಮುಟ್ಠಾನೋ ಚ ನೋಚಿತ್ತಸಂಸಟ್ಠಸಮುಟ್ಠಾನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಚಿತ್ತಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ ಚಿತ್ತಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ ಕಟತ್ತಾ ಚ ರೂಪಂ, ಪಟಿಸನ್ಧಿಕ್ಖಣೇ ವತ್ಥುಂ ಪಟಿಚ್ಚ ಚಿತ್ತಂ ಸಮ್ಪಯುತ್ತಕಾ ಚ ಖನ್ಧಾ. (೩)

೨೮೦. ಚಿತ್ತಸಂಸಟ್ಠಸಮುಟ್ಠಾನಞ್ಚ ನೋಚಿತ್ತಸಂಸಟ್ಠಸಮುಟ್ಠಾನಞ್ಚ ಧಮ್ಮಂ ಪಟಿಚ್ಚ ಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಞ್ಚ ಚಿತ್ತಞ್ಚ ಪಟಿಚ್ಚ ದ್ವೇ ಖನ್ಧಾ, ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಞ್ಚ ಚಿತ್ತಞ್ಚ ಪಟಿಚ್ಚ ದ್ವೇ ಖನ್ಧಾ, ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಞ್ಚ ವತ್ಥುಞ್ಚ ಪಟಿಚ್ಚ ದ್ವೇ ಖನ್ಧಾ, ದ್ವೇ ಖನ್ಧೇ…ಪೇ…. (೧)

ಚಿತ್ತಸಂಸಟ್ಠಸಮುಟ್ಠಾನಞ್ಚ ನೋಚಿತ್ತಸಂಸಟ್ಠಸಮುಟ್ಠಾನಞ್ಚ ಧಮ್ಮಂ ಪಟಿಚ್ಚ ನೋಚಿತ್ತಸಂಸಟ್ಠಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಸಂಸಟ್ಠಸಮುಟ್ಠಾನೇ ಖನ್ಧೇ ಚ ಚಿತ್ತಞ್ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ, ಚಿತ್ತಸಂಸಟ್ಠಸಮುಟ್ಠಾನೇ ಖನ್ಧೇ ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನೇ ಖನ್ಧೇ ಚ ಚಿತ್ತಞ್ಚ ಪಟಿಚ್ಚ ಕಟತ್ತಾರೂಪಂ, ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನೇ ಖನ್ಧೇ ಚ ಮಹಾಭೂತೇ ಚ ಪಟಿಚ್ಚ ಕಟತ್ತಾರೂಪಂ, ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನೇ ಖನ್ಧೇ ಚ ವತ್ಥುಞ್ಚ ಪಟಿಚ್ಚ ಚಿತ್ತಂ. (೨)

ಚಿತ್ತಸಂಸಟ್ಠಸಮುಟ್ಠಾನಞ್ಚ ನೋಚಿತ್ತಸಂಸಟ್ಠಸಮುಟ್ಠಾನಞ್ಚ ಧಮ್ಮಂ ಪಟಿಚ್ಚ ಚಿತ್ತಸಂಸಟ್ಠಸಮುಟ್ಠಾನೋ ಚ ನೋಚಿತ್ತಸಂಸಟ್ಠಸಮುಟ್ಠಾನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಞ್ಚ ಚಿತ್ತಞ್ಚ ಪಟಿಚ್ಚ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಞ್ಚ ಚಿತ್ತಞ್ಚ ಪಟಿಚ್ಚ ದ್ವೇ ಖನ್ಧಾ ಕಟತ್ತಾ ಚ ರೂಪಂ, ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ ಚಿತ್ತಸಂಸಟ್ಠಸಮುಟ್ಠಾನಂ ಏಕಂ ಖನ್ಧಞ್ಚ ವತ್ಥುಞ್ಚ ಪಟಿಚ್ಚ ದ್ವೇ ಖನ್ಧಾ ಚಿತ್ತಞ್ಚ, ದ್ವೇ ಖನ್ಧೇ…ಪೇ… (ಸಂಖಿತ್ತಂ). (೩)