೧. ವಿಭಙ್ಗವಾರೋ

ಹೇತುಪಚ್ಚಯೋ

೨೦೧. ಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ (ಪಟಿಚ್ಚವಾರಸದಿಸಂ).

ನೋಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ನೋಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ಚಿತ್ತಂ; ಪಟಿಸನ್ಧಿಕ್ಖಣೇ…ಪೇ… (ಪಟಿಚ್ಚವಾರಸದಿಸಾ). (೧)

ನೋಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಂ ಪಚ್ಚಯಾ ಸಮ್ಪಯುತ್ತಕಾ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ವತ್ಥುಂ ಪಚ್ಚಯಾ ಚಿತ್ತಸಮುಟ್ಠಾನಾ ಖನ್ಧಾ (ಪಟಿಸನ್ಧಿಕ್ಖಣೇ ದ್ವೇಪಿ ಕಾತಬ್ಬಾ). (೧)

ನೋಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಚ ನೋಚಿತ್ತಸಮುಟ್ಠಾನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ಚಿತ್ತಂ ಸಮ್ಪಯುತ್ತಕಾ ಚ ಖನ್ಧಾ; ಪಟಿಸನ್ಧಿಕ್ಖಣೇ ದ್ವೇ (ಪಟಿಚ್ಚವಾರಸದಿಸಂ). (೩)

೨೦೨. ಚಿತ್ತಸಮುಟ್ಠಾನಞ್ಚ ನೋಚಿತ್ತಸಮುಟ್ಠಾನಞ್ಚ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಸಮುಟ್ಠಾನಂ ಏಕಂ ಖನ್ಧಞ್ಚ ಚಿತ್ತಞ್ಚ ಪಚ್ಚಯಾ ದ್ವೇ ಖನ್ಧಾ, ದ್ವೇ ಖನ್ಧೇ…ಪೇ… ಚಿತ್ತಸಮುಟ್ಠಾನಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ದ್ವೇ ಖನ್ಧಾ, ದ್ವೇ ಖನ್ಧೇ…ಪೇ… (ಪಟಿಸನ್ಧಿಕ್ಖಣೇ ದ್ವೇಪಿ ಪಟಿಚ್ಚವಾರಸದಿಸಾ). (೧)

ಚಿತ್ತಸಮುಟ್ಠಾನಞ್ಚ ನೋಚಿತ್ತಸಮುಟ್ಠಾನಞ್ಚ ಧಮ್ಮಂ ಪಚ್ಚಯಾ ನೋಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಚಿತ್ತಸಮುಟ್ಠಾನೇ ಖನ್ಧೇ ಚ ವತ್ಥುಞ್ಚ ಪಚ್ಚಯಾ ಚಿತ್ತಂ (ಪಟಿಸನ್ಧಿಕ್ಖಣೇ ತೀಣಿಪಿ ಕಾತಬ್ಬಾ ಪಟಿಚ್ಚವಾರಸದಿಸಾ). (೨)

ಚಿತ್ತಸಮುಟ್ಠಾನಞ್ಚ ನೋಚಿತ್ತಸಮುಟ್ಠಾನಞ್ಚ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಚ ನೋಚಿತ್ತಸಮುಟ್ಠಾನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಚಿತ್ತಸಮುಟ್ಠಾನಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ದ್ವೇ ಖನ್ಧಾ ಚಿತ್ತಞ್ಚ, ದ್ವೇ ಖನ್ಧೇ…ಪೇ… (ಪಟಿಸನ್ಧಿಕ್ಖಣೇ ದ್ವೇಪಿ ಕಾತಬ್ಬಾ ಪಟಿಚ್ಚವಾರಸದಿಸಾ). (೩)

ಆರಮ್ಮಣಪಚ್ಚಯೋ

೨೦೩. ಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ… ತೀಣಿ (ಪಟಿಚ್ಚವಾರಸದಿಸಾ).

ನೋಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ನೋಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಂ…ಪೇ… ಕಾಯಾಯತನಂ ಪಚ್ಚಯಾ ಕಾಯವಿಞ್ಞಾಣಂ…ಪೇ… ವತ್ಥುಂ ಪಚ್ಚಯಾ ಚಿತ್ತಂ. (೧)

ನೋಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಸಹಗತಾ ಖನ್ಧಾ…ಪೇ… ಕಾಯಾಯತನಂ ಪಚ್ಚಯಾ ಕಾಯವಿಞ್ಞಾಣಸಹಗತಾ ಖನ್ಧಾ, ಚಿತ್ತಂ ಪಚ್ಚಯಾ ಸಮ್ಪಯುತ್ತಕಾ ಖನ್ಧಾ, ವತ್ಥುಂ ಪಚ್ಚಯಾ ಚಿತ್ತಸಮುಟ್ಠಾನಾ ಖನ್ಧಾ (ಪಟಿಸನ್ಧಿಕ್ಖಣೇ ದ್ವೇಪಿ). (೨)

ನೋಚಿತ್ತಸಮುಟ್ಠಾನಂ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಚ ನೋಚಿತ್ತಸಮುಟ್ಠಾನೋ ಚ ಧಮ್ಮಾ ಉಪ್ಪಜ್ಜನ್ತಿ ಆರಮ್ಮಣಪಚ್ಚಯಾ – ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಂ ಸಮ್ಪಯುತ್ತಕಾ ಚ ಖನ್ಧಾ…ಪೇ… ಕಾಯಾಯತನಂ…ಪೇ… ವತ್ಥುಂ ಪಚ್ಚಯಾ ಚಿತ್ತಂ ಸಮ್ಪಯುತ್ತಕಾ ಚ ಖನ್ಧಾ; ಪಟಿಸನ್ಧಿಕ್ಖಣೇ…ಪೇ…. (೩)

೨೦೪. ಚಿತ್ತಸಮುಟ್ಠಾನಞ್ಚ ನೋಚಿತ್ತಸಮುಟ್ಠಾನಞ್ಚ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ಚಿತ್ತಸಮುಟ್ಠಾನಂ ಏಕಂ ಖನ್ಧಞ್ಚ ಚಿತ್ತಞ್ಚ ಪಚ್ಚಯಾ ದ್ವೇ ಖನ್ಧಾ, ದ್ವೇ ಖನ್ಧೇ …ಪೇ… ಚಿತ್ತಸಮುಟ್ಠಾನಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ದ್ವೇ ಖನ್ಧಾ, ದ್ವೇ ಖನ್ಧೇ…ಪೇ… (ಪಟಿಸನ್ಧಿಕ್ಖಣೇ ದ್ವೇಪಿ ಕಾತಬ್ಬಾ). (೧)

ಚಿತ್ತಸಮುಟ್ಠಾನಞ್ಚ ನೋಚಿತ್ತಸಮುಟ್ಠಾನಞ್ಚ ಧಮ್ಮಂ ಪಚ್ಚಯಾ ನೋಚಿತ್ತಸಮುಟ್ಠಾನೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ಚಕ್ಖುವಿಞ್ಞಾಣಸಹಗತೇ ಖನ್ಧೇ ಚ ಚಕ್ಖಾಯತನಞ್ಚ ಪಚ್ಚಯಾ ಚಕ್ಖುವಿಞ್ಞಾಣಂ…ಪೇ… ಕಾಯವಿಞ್ಞಾಣಸಹಗತೇ…ಪೇ… ಚಿತ್ತಸಮುಟ್ಠಾನೇ ಖನ್ಧೇ ಚ ವತ್ಥುಞ್ಚ ಪಚ್ಚಯಾ ಚಿತ್ತಂ; ಪಟಿಸನ್ಧಿಕ್ಖಣೇ…ಪೇ…. (೨)

ಚಿತ್ತಸಮುಟ್ಠಾನಞ್ಚ ನೋಚಿತ್ತಸಮುಟ್ಠಾನಞ್ಚ ಧಮ್ಮಂ ಪಚ್ಚಯಾ ಚಿತ್ತಸಮುಟ್ಠಾನೋ ಚ ನೋಚಿತ್ತಸಮುಟ್ಠಾನೋ ಚ ಧಮ್ಮಾ ಉಪ್ಪಜ್ಜನ್ತಿ ಆರಮ್ಮಣಪಚ್ಚಯಾ – ಚಕ್ಖುವಿಞ್ಞಾಣಸಹಗತಂ ಏಕಂ ಖನ್ಧಞ್ಚ ಚಕ್ಖಾಯತನಞ್ಚ ಪಚ್ಚಯಾ ದ್ವೇ ಖನ್ಧಾ ಚಕ್ಖುವಿಞ್ಞಾಣಞ್ಚ, ದ್ವೇ ಖನ್ಧೇ…ಪೇ… ಕಾಯವಿಞ್ಞಾಣಸಹಗತಂ…ಪೇ… ಚಿತ್ತಸಮುಟ್ಠಾನಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ದ್ವೇ ಖನ್ಧಾ ಚಿತ್ತಞ್ಚ, ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. (೩) (ಸಂಖಿತ್ತಂ).