೧. ವಿಭಙ್ಗವಾರೋ

ಹೇತುಪಚ್ಚಯೋ

೧೨೭. ಹೇತುಞ್ಚೇವ ಸಹೇತುಕಞ್ಚ ಧಮ್ಮಂ ಪಟಿಚ್ಚ ಹೇತು ಚೇವ ಸಹೇತುಕೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಲೋಭಂ ಪಟಿಚ್ಚ ಅದೋಸೋ ಅಮೋಹೋ (ಚಕ್ಕಂ). ಲೋಭಂ ಪಟಿಚ್ಚ ಮೋಹೋ (ಚಕ್ಕಂ); ಪಟಿಸನ್ಧಿಕ್ಖಣೇ ಅಲೋಭಂ ಪಟಿಚ್ಚ ಅದೋಸೋ ಅಮೋಹೋ (ಚಕ್ಕಂ). (೧)

ಹೇತುಞ್ಚೇವ ಸಹೇತುಕಞ್ಚ ಧಮ್ಮಂ ಪಟಿಚ್ಚ ಸಹೇತುಕೋ ಚೇವ ನ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಹೇತುಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ; ಪಟಿಸನ್ಧಿಕ್ಖಣೇ…ಪೇ…. (೨)

ಹೇತುಞ್ಚೇವ ಸಹೇತುಕಞ್ಚ ಧಮ್ಮಂ ಪಟಿಚ್ಚ ಹೇತು ಚೇವ ಸಹೇತುಕೋ ಚ ಸಹೇತುಕೋ ಚೇವ ನ ಚ ಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಅಲೋಭಂ ಪಟಿಚ್ಚ ಅದೋಸೋ ಅಮೋಹೋ ಸಮ್ಪಯುತ್ತಕಾ ಚ ಖನ್ಧಾ (ಚಕ್ಕಂ). ಲೋಭಂ ಪಟಿಚ್ಚ ಮೋಹೋ ಸಮ್ಪಯುತ್ತಕಾ ಚ ಖನ್ಧಾ (ಚಕ್ಕಂ); ಪಟಿಸನ್ಧಿಕ್ಖಣೇ…ಪೇ…. (೩)

೧೨೮. ಸಹೇತುಕಞ್ಚೇವ ನ ಚ ಹೇತುಂ ಧಮ್ಮಂ ಪಟಿಚ್ಚ ಸಹೇತುಕೋ ಚೇವ ನ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಹೇತುಕಞ್ಚೇವ ನ ಚ ಹೇತುಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ….(೧)

ಸಹೇತುಕಞ್ಚೇವ ನ ಚ ಹೇತುಂ ಧಮ್ಮಂ ಪಟಿಚ್ಚ ಹೇತು ಚೇವ ಸಹೇತುಕೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಹೇತುಕೇ ಚೇವ ನ ಚ ಹೇತೂ ಖನ್ಧೇ ಪಟಿಚ್ಚ ಹೇತೂ; ಪಟಿಸನ್ಧಿಕ್ಖಣೇ…ಪೇ…. (೨)

ಸಹೇತುಕಞ್ಚೇವ ನ ಚ ಹೇತುಂ ಧಮ್ಮಂ ಪಟಿಚ್ಚ ಹೇತು ಚೇವ ಸಹೇತುಕೋ ಚ ಸಹೇತುಕೋ ಚೇವ ನ ಚ ಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸಹೇತುಕಞ್ಚೇವ ನ ಚ ಹೇತುಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಹೇತು ಚ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. (೩)

೧೨೯. ಹೇತುಞ್ಚೇವ ಸಹೇತುಕಞ್ಚ ಸಹೇತುಕಞ್ಚೇವ ನ ಚ ಹೇತುಞ್ಚ ಧಮ್ಮಂ ಪಟಿಚ್ಚ ಹೇತು ಚೇವ ಸಹೇತುಕೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಲೋಭಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಅದೋಸೋ ಅಮೋಹೋ (ಚಕ್ಕಂ). ಲೋಭಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಮೋಹೋ (ಚಕ್ಕಂ); ಪಟಿಸನ್ಧಿಕ್ಖಣೇ…ಪೇ…. (೧)

ಹೇತುಞ್ಚೇವ ಸಹೇತುಕಞ್ಚ ಸಹೇತುಕಞ್ಚೇವ ನ ಚ ಹೇತುಞ್ಚ ಧಮ್ಮಂ ಪಟಿಚ್ಚ ಸಹೇತುಕೋ ಚೇವ ನ ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಹೇತುಕಞ್ಚೇವ ನ ಚ ಹೇತುಂ ಏಕಂ ಖನ್ಧಞ್ಚ ಹೇತುಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. (೨)

ಹೇತುಞ್ಚೇವ ಸಹೇತುಕಞ್ಚ ಸಹೇತುಕಞ್ಚೇವ ನ ಚ ಹೇತುಞ್ಚ ಧಮ್ಮಂ ಪಟಿಚ್ಚ ಹೇತು ಚೇವ ಸಹೇತುಕೋ ಚ ಸಹೇತುಕೋ ಚೇವ ನ ಚ ಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸಹೇತುಕಞ್ಚೇವ ನ ಚ ಹೇತುಂ ಏಕಂ ಖನ್ಧಞ್ಚ ಅಲೋಭಞ್ಚ ಪಟಿಚ್ಚ ತಯೋ ಖನ್ಧಾ ಅದೋಸೋ ಅಮೋಹೋ ಚ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. (೩)

(ಸಂಖಿತ್ತಂ. ಏವಂ ವಿತ್ಥಾರೇತಬ್ಬಂ.)