೧. ವಿಭಙ್ಗವಾರೋ

ಹೇತುಪಚ್ಚಯೋ

೧. ಹೇತುಂ ಧಮ್ಮಂ ಪಟಿಚ್ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಲೋಭಂ ಪಟಿಚ್ಚ ಅದೋಸೋ ಅಮೋಹೋ, ಅದೋಸಂ ಪಟಿಚ್ಚ ಅಲೋಭೋ ಅಮೋಹೋ, ಅಮೋಹಂ ಪಟಿಚ್ಚ ಅಲೋಭೋ ಅದೋಸೋ, ಲೋಭಂ ಪಟಿಚ್ಚ ಮೋಹೋ, ಮೋಹಂ ಪಟಿಚ್ಚ ಲೋಭೋ, ದೋಸಂ ಪಟಿಚ್ಚ ಮೋಹೋ, ಮೋಹಂ ಪಟಿಚ್ಚ ದೋಸೋ; ಪಟಿಸನ್ಧಿಕ್ಖಣೇ…ಪೇ…. (೧)

ಹೇತುಂ ಧಮ್ಮಂ ಪಟಿಚ್ಚ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಹೇತುಂ ಧಮ್ಮಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ…ಪೇ…. (೨)

ಹೇತುಂ ಧಮ್ಮಂ ಪಟಿಚ್ಚ ಹೇತು ಚ ನಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಅಲೋಭಂ ಪಟಿಚ್ಚ ಅದೋಸೋ ಅಮೋಹೋ ಸಮ್ಪಯುತ್ತಕಾ ಚ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ (ಚಕ್ಕಂ). ಲೋಭಂ ಪಟಿಚ್ಚ ಮೋಹೋ ಸಮ್ಪಯುತ್ತಕಾ ಚ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ಪಟಿಸನ್ಧಿಕ್ಖಣೇ…ಪೇ…. (೩)

೨. ನಹೇತುಂ ಧಮ್ಮಂ ಪಟಿಚ್ಚ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನಹೇತುಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ ಪಟಿಚ್ಚ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ…ಪೇ… ಖನ್ಧೇ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ಖನ್ಧಾ; ಏಕಂ ಮಹಾಭೂತಂ…ಪೇ…. (೧)

ನಹೇತುಂ ಧಮ್ಮಂ ಪಟಿಚ್ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನಹೇತೂ ಖನ್ಧೇ ಪಟಿಚ್ಚ ಹೇತೂ; ಪಟಿಸನ್ಧಿಕ್ಖಣೇ…ಪೇ… ವತ್ಥುಂ ಪಟಿಚ್ಚ ಹೇತೂ. (೨)

ನಹೇತುಂ ಧಮ್ಮಂ ಪಟಿಚ್ಚ ಹೇತು ಚ ನಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ನಹೇತುಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಹೇತು ಚ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ ಪಟಿಚ್ಚ ದ್ವೇ ಖನ್ಧಾ ಹೇತು ಚ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ…ಪೇ… ಪಟಿಸನ್ಧಿಕ್ಖಣೇ ವತ್ಥುಂ ಪಟಿಚ್ಚ ಹೇತೂ ಸಮ್ಪಯುತ್ತಕಾ ಚ ಖನ್ಧಾ. (೩)

೩. ಹೇತುಞ್ಚ ನಹೇತುಞ್ಚ ಧಮ್ಮಂ ಪಟಿಚ್ಚ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಲೋಭಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಅದೋಸೋ ಅಮೋಹೋ (ಚಕ್ಕಂ). ಲೋಭಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಮೋಹೋ, ದೋಸಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಮೋಹೋ…ಪೇ… ಪಟಿಸನ್ಧಿಕ್ಖಣೇ…ಪೇ… ಅಲೋಭಞ್ಚ ವತ್ಥುಞ್ಚ ಪಟಿಚ್ಚ ಅದೋಸೋ ಅಮೋಹೋ…ಪೇ…. (೧)

ಹೇತುಞ್ಚ ನಹೇತುಞ್ಚ ಧಮ್ಮಂ ಪಟಿಚ್ಚ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನಹೇತುಂ ಏಕಂ ಖನ್ಧಞ್ಚ ಹೇತುಞ್ಚ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ ಚ ಹೇತುಞ್ಚ ಪಟಿಚ್ಚ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ…ಪೇ… ಪಟಿಸನ್ಧಿಕ್ಖಣೇ ವತ್ಥುಞ್ಚ ಹೇತುಞ್ಚ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ. (೨)

ಹೇತುಞ್ಚ ನಹೇತುಞ್ಚ ಧಮ್ಮಂ ಪಟಿಚ್ಚ ಹೇತು ಚ ನಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ನಹೇತುಂ ಏಕಂ ಖನ್ಧಞ್ಚ ಅಲೋಭಞ್ಚ ಪಟಿಚ್ಚ ತಯೋ ಖನ್ಧಾ ಅದೋಸೋ ಅಮೋಹೋ ಚ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ ಚ ಅಲೋಭಞ್ಚ ಪಟಿಚ್ಚ ದ್ವೇ ಖನ್ಧಾ ಅದೋಸೋ ಅಮೋಹೋ ಚ ಚಿತ್ತಸಮುಟ್ಠಾನಞ್ಚ ರೂಪಂ (ಚಕ್ಕಂ). ನಹೇತುಂ ಏಕಂ ಖನ್ಧಞ್ಚ ಲೋಭಞ್ಚ ಪಟಿಚ್ಚ ತಯೋ ಖನ್ಧಾ ಮೋಹೋ ಚ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… ವತ್ಥುಞ್ಚ ಅಲೋಭಞ್ಚ ಪಟಿಚ್ಚ ಅದೋಸೋ ಅಮೋಹೋ ಸಮ್ಪಯುತ್ತಕಾ ಚ ಖನ್ಧಾ. (೩)

ಆರಮ್ಮಣಪಚ್ಚಯಾದಿ

೪. ಹೇತುಂ ಧಮ್ಮಂ ಪಟಿಚ್ಚ ಹೇತು ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ (ರೂಪಂ ಛಡ್ಡೇತ್ವಾ ಅರೂಪೇಯೇವ ನವ ಪಞ್ಹಾ)… ಅಧಿಪತಿಪಚ್ಚಯಾ (ಪಟಿಸನ್ಧಿ ನತ್ಥಿ, ಪರಿಪುಣ್ಣಂ) ಏಕಂ ಮಹಾಭೂತಂ ಪಟಿಚ್ಚ…ಪೇ… ಮಹಾಭೂತೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ ಉಪಾದಾರೂಪಂ… (ಇಮಂ ನಾನಂ) ಅನನ್ತರಪಚ್ಚಯಾ… ಸಮನನ್ತರಪಚ್ಚಯಾ… ಸಹಜಾತಪಚ್ಚಯಾ (ಸಬ್ಬೇ ಮಹಾಭೂತಾ ಯಾವ ಅಸಞ್ಞಸತ್ತಾ)… ಅಞ್ಞಮಞ್ಞಪಚ್ಚಯಾ… ನಿಸ್ಸಯಪಚ್ಚಯಾ… ಉಪನಿಸ್ಸಯಪಚ್ಚಯಾ… ಪುರೇಜಾತಪಚ್ಚಯಾ… ಆಸೇವನಪಚ್ಚಯಾ (ದ್ವೀಸುಪಿ ಪಟಿಸನ್ಧಿ ನತ್ಥಿ)… ಕಮ್ಮಪಚ್ಚಯಾ… ವಿಪಾಕಪಚ್ಚಯಾ (ಸಂಖಿತ್ತಂ)… ಅವಿಗತಪಚ್ಚಯಾ.