೨. ಅನಾಗತಾದಿಏಕಚ್ಚಕಥಾ

೩೦೦. ಅನಾಗತಂ ಅತ್ಥೀತಿ? ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ. ಏಕಚ್ಚಂ ಜಾತಂ, ಏಕಚ್ಚಂ ಅಜಾತಂ; ಏಕಚ್ಚಂ ಸಞ್ಜಾತಂ, ಏಕಚ್ಚಂ ಅಸಞ್ಜಾತಂ; ಏಕಚ್ಚಂ ನಿಬ್ಬತ್ತಂ, ಏಕಚ್ಚಂ ಅನಿಬ್ಬತ್ತಂ; ಏಕಚ್ಚಂ ಪಾತುಭೂತಂ, ಏಕಚ್ಚಂ ಅಪಾತುಭೂತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ? ಆಮನ್ತಾ. ಅನಾಗತಾ ಉಪ್ಪಾದಿನೋ ಧಮ್ಮಾ ಏಕಚ್ಚೇ ಅತ್ಥಿ, ಏಕಚ್ಚೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗತಂ ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ? ಆಮನ್ತಾ. ಅನಾಗತಾ ಅನುಪ್ಪಾದಿನೋ ಧಮ್ಮಾ ಏಕಚ್ಚೇ ಅತ್ಥಿ, ಏಕಚ್ಚೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ? ಆಮನ್ತಾ. ಕಿಂ ಅತ್ಥಿ, ಕಿಂ ನತ್ಥೀತಿ? ಅನಾಗತಾ ಉಪ್ಪಾದಿನೋ ಧಮ್ಮಾ – ತೇ ಅತ್ಥಿ; ಅನಾಗತಾ ಅನುಪ್ಪಾದಿನೋ ಧಮ್ಮಾ – ತೇ ನತ್ಥೀತಿ. ಅನಾಗತಾ ಉಪ್ಪಾದಿನೋ ಧಮ್ಮಾ – ತೇ ಅತ್ಥೀತಿ? ಆಮನ್ತಾ. ಅನಾಗತಾ ಅನುಪ್ಪಾದಿನೋ ಧಮ್ಮಾ – ತೇ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗತಾ ಅನುಪ್ಪಾದಿನೋ ಧಮ್ಮಾ – ತೇ ನತ್ಥೀತಿ? ಆಮನ್ತಾ. ಅನಾಗತಾ ಉಪ್ಪಾದಿನೋ ಧಮ್ಮಾ – ತೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಾ ಉಪ್ಪಾದಿನೋ ಧಮ್ಮಾ – ತೇ ಅತ್ಥೀತಿ? ಆಮನ್ತಾ. ನನು ಅನಾಗತಾ ಉಪ್ಪಾದಿನೋ ಧಮ್ಮಾ ಅಜಾತಾತಿ? ಆಮನ್ತಾ. ಹಞ್ಚಿ ಅನಾಗತಾ ಉಪ್ಪಾದಿನೋ ಧಮ್ಮಾ ಅಜಾತಾ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಾ ಉಪ್ಪಾದಿನೋ ಧಮ್ಮಾ – ತೇ ಅತ್ಥೀ’’ತಿ.

ಅನಾಗತಾ ಉಪ್ಪಾದಿನೋ ಧಮ್ಮಾ ಅಜಾತಾ – ತೇ ಅತ್ಥೀತಿ? ಆಮನ್ತಾ. ಅನಾಗತಾ ಅನುಪ್ಪಾದಿನೋ ಧಮ್ಮಾ ಅಜಾತಾ – ತೇ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗತಾ ಅನುಪ್ಪಾದಿನೋ ಧಮ್ಮಾ ಅಜಾತಾ – ತೇ ನತ್ಥೀತಿ? ಆಮನ್ತಾ. ಅನಾಗತಾ ಉಪ್ಪಾದಿನೋ ಧಮ್ಮಾ ಅಜಾತಾ – ತೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ನ ವತ್ತಬ್ಬಂ – ‘‘ಅನಾಗತಾ ಉಪ್ಪಾದಿನೋ ಧಮ್ಮಾ – ತೇ ಅತ್ಥೀ’’ತಿ? ಆಮನ್ತಾ. ನನು ಅನಾಗತಾ ಉಪ್ಪಾದಿನೋ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ. ಹಞ್ಚಿ ಅನಾಗತಾ ಉಪ್ಪಾದಿನೋ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ತೇನ ವತ ರೇ ವತ್ತಬ್ಬೇ – ‘‘ಅನಾಗತಾ ಉಪ್ಪಾದಿನೋ ಧಮ್ಮಾ – ತೇ ಅತ್ಥೀ’’ತಿ.

ಅನಾಗತಾ ಉಪ್ಪಾದಿನೋ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ ಕತ್ವಾ ತೇ ಅತ್ಥೀತಿ? ಆಮನ್ತಾ. ಉಪ್ಪಜ್ಜಿಸ್ಸನ್ತೀತಿ ಕತ್ವಾ ಪಚ್ಚುಪ್ಪನ್ನಾತಿ? ನ ಹೇವಂ ವತ್ತಬ್ಬೇ…ಪೇ… ಉಪ್ಪಜ್ಜಿಸ್ಸನ್ತೀತಿ ಕತ್ವಾ ಪಚ್ಚುಪ್ಪನ್ನಾತಿ? ಆಮನ್ತಾ. ಪಚ್ಚುಪ್ಪನ್ನಾ ಧಮ್ಮಾ ನಿರುಜ್ಝಿಸ್ಸನ್ತೀತಿ ಕತ್ವಾ ತೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಏಕಚ್ಚಂ ಅತ್ಥೀತಿಕಥಾ ನಿಟ್ಠಿತಾ.