೧. ಅತೀತಾದಿಏಕಚ್ಚಕಥಾ

೨೯೯. ಅತೀತಂ ಅತ್ಥೀತಿ? ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ. ಏಕಚ್ಚಂ ನಿರುದ್ಧಂ, ಏಕಚ್ಚಂ ನ ನಿರುದ್ಧಂ; ಏಕಚ್ಚಂ ವಿಗತಂ, ಏಕಚ್ಚಂ ಅವಿಗತಂ; ಏಕಚ್ಚಂ ಅತ್ಥಙ್ಗತಂ, ಏಕಚ್ಚಂ ನ ಅತ್ಥಙ್ಗತಂ; ಏಕಚ್ಚಂ ಅಬ್ಭತ್ಥಙ್ಗತಂ, ಏಕಚ್ಚಂ ನ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ? ಆಮನ್ತಾ. ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ಏಕಚ್ಚೇ ಅತ್ಥಿ, ಏಕಚ್ಚೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ? ಆಮನ್ತಾ. ಅತೀತಾ ವಿಪಕ್ಕವಿಪಾಕಾ ಧಮ್ಮಾ ಏಕಚ್ಚೇ ಅತ್ಥಿ, ಏಕಚ್ಚೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ಏಕಚ್ಚಂ ಅತ್ಥಿ, ಏಕಚ್ಚಂ ನತ್ಥೀತಿ? ಆಮನ್ತಾ. ಅತೀತಾ ಅವಿಪಾಕಾ ಧಮ್ಮಾ ಏಕಚ್ಚೇ ಅತ್ಥಿ ಏಕಚ್ಚೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಏಕಚ್ಚಂ ಅತ್ಥಿ ಏಕಚ್ಚಂ ನತ್ಥೀತಿ? ಆಮನ್ತಾ. ಕಿಂ ಅತ್ಥಿ ಕಿಂ ನತ್ಥೀತಿ? ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ ಅತ್ಥಿ; ಅತೀತಾ ವಿಪಕ್ಕವಿಪಾಕಾ ಧಮ್ಮಾ – ತೇ ನತ್ಥೀತಿ. ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ ಅತ್ಥೀತಿ? ಆಮನ್ತಾ. ಅತೀತಾ ವಿಪಕ್ಕವಿಪಾಕಾ ಧಮ್ಮಾ – ತೇ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ ಅತ್ಥೀತಿ? ಆಮನ್ತಾ. ಅತೀತಾ ಅವಿಪಾಕಾ ಧಮ್ಮಾ – ತೇ ಅತ್ಥೀತಿ [ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ತೇ ನತ್ಥೀತಿ (ಕ.)]? ನ ಹೇವಂ ವತ್ತಬ್ಬೇ…ಪೇ….

ಅತೀತಾ ವಿಪಕ್ಕವಿಪಾಕಾ ಧಮ್ಮಾ – ತೇ ನತ್ಥೀತಿ? ಆಮನ್ತಾ. ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ ನತ್ಥೀತಿ? ನ ಹೇವಂ ವತ್ತಬ್ಬೇ …ಪೇ….

ಅತೀತಾ ಅವಿಪಾಕಾ [ವಿಪಕ್ಕವಿಪಾಕಾ (ಸ್ಯಾ.), ಅವಿಪಕ್ಕವಿಪಾಕಾ (ಕ.)] ಧಮ್ಮಾ – ತೇ ನತ್ಥೀತಿ? ಆಮನ್ತಾ. ಅತೀತಾ ಅವಿಪಕ್ಕವಿಪಾಕಾ [ಅವಿಪಾಕಾ (ಸ್ಯಾ.)] ಧಮ್ಮಾ – ತೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ ಅತ್ಥೀತಿ? ಆಮನ್ತಾ. ನನು ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾತಿ? ಆಮನ್ತಾ. ಹಞ್ಚಿ ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ [ಧಮ್ಮಾ ನಿರುದ್ಧಾ ತೇ (ಸ್ಯಾ. ಕ.)] ಅತ್ಥೀ’’ತಿ.

ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ಅತ್ಥೀತಿ? ಆಮನ್ತಾ. ಅತೀತಾ ವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ಅತ್ಥೀತಿ? ಆಮನ್ತಾ. ಅತೀತಾ ಅವಿಪಾಕಾ [ಅವಿಪಕ್ಕವಿಪಾಕಾ (ಸೀ. ಕ.)] ಧಮ್ಮಾ ನಿರುದ್ಧಾ – ತೇ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಾ ವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ನತ್ಥೀತಿ? ಆಮನ್ತಾ. ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಾ ಅವಿಪಾಕಾ [ವಿಪಕ್ಕವಿಪಾಕಾ (ಸ್ಯಾ.), ಅವಿಪಕ್ಕವಿಪಾಕಾ (ಕ.)] ಧಮ್ಮಾ ನಿರುದ್ಧಾ – ತೇ ನತ್ಥೀತಿ? ಆಮನ್ತಾ. ಅತೀತಾ ಅವಿಪಕ್ಕವಿಪಾಕಾ [ಅವಿಪಾಕಾ (ಸ್ಯಾ.)] ಧಮ್ಮಾ ನಿರುದ್ಧಾ – ತೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ಅತ್ಥೀತಿ? ಆಮನ್ತಾ. ಅತೀತಾ ವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ನತ್ಥೀತಿ? ಆಮನ್ತಾ. ಅತೀತಾ ಏಕದೇಸಂ ವಿಪಕ್ಕವಿಪಾಕಾ ಧಮ್ಮಾ ಏಕದೇಸಂ ಅವಿಪಕ್ಕವಿಪಾಕಾ ಧಮ್ಮಾ ನಿರುದ್ಧಾ – ತೇ ಏಕಚ್ಚೇ ಅತ್ಥಿ ಏಕಚ್ಚೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ನ ವತ್ತಬ್ಬಂ – ‘‘ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ ಅತ್ಥೀ’’ತಿ? ಆಮನ್ತಾ. ನನು ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ವಿಪಚ್ಚಿಸ್ಸನ್ತೀತಿ? ಆಮನ್ತಾ. ಹಞ್ಚಿ ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ವಿಪಚ್ಚಿಸ್ಸನ್ತಿ, ತೇನ ವತ ರೇ ವತ್ತಬ್ಬೇ – ‘‘ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ – ತೇ ಅತ್ಥೀ’’ತಿ.

ಅತೀತಾ ಅವಿಪಕ್ಕವಿಪಾಕಾ ಧಮ್ಮಾ ವಿಪಚ್ಚಿಸ್ಸನ್ತೀತಿ ಕತ್ವಾ ತೇ ಅತ್ಥೀತಿ? ಆಮನ್ತಾ. ವಿಪಚ್ಚಿಸ್ಸನ್ತೀತಿ ಕತ್ವಾ ಪಚ್ಚುಪ್ಪನ್ನಾತಿ? ನ ಹೇವಂ ವತ್ತಬ್ಬೇ…ಪೇ… ವಿಪಚ್ಚಿಸ್ಸನ್ತೀತಿ ಕತ್ವಾ ಪಚ್ಚುಪ್ಪನ್ನಾತಿ? ಆಮನ್ತಾ. ಪಚ್ಚುಪ್ಪನ್ನಾ ಧಮ್ಮಾ ನಿರುಜ್ಝಿಸ್ಸನ್ತೀತಿ ಕತ್ವಾ ತೇ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….